Zozue 8

Baa le Ai nɛ wal bulo

1Wankpoo tɔa ha Zozue: «Mɛ de ke na nɛ ka sila mɛ ha ki me na. Ku hio zugili bulo pɛ mɛ fɛt nɛ mɛ nɛ̂ de mɔ ngaya ha Ai. Zɔk, mi kuo ha mɛ kongapora mɔ Ai hinɛ hio wi mɔ lea, ngbale hinɛ nua. 2Mɛ bede nɛ lea tuka ɛngɛ ka mɛ bade nɛ Zeriko nɛ kongapora pɛa. Tangere, mɛ nɛ hio zugili bulo pɛ mɛ, ɛnɛ lɛma kuo hio toe nɛ hio dede mɔ nɛ hio nam dalɛ ka ɛnɛ bekpa. Bhɔngiri ma dea mɔ nɛ ngaya nɛ mɔ yaksi mbwa ha wal gdong ngbale.»

3Zozue nɛ hio zugili bulo pɛa gutɛ mɔ dang sungiri nɛ Ai. Zozue weka hio nga wan bitumbɔ saki bhukɔa tar nɛ a tomsa mbwa nɛ zɛ. 4Wɛnɛ haa nu ha mbwa mɛgi: «Ɛnɛ nɛ usi ha wal pata ngbalea. Ɛnɛ dung nɛ nɛ̂a gdang na nɛ ngbalea, nɛ ɛnɛ dung sanga mɔ ha kɔ. 5Mɔ wal pɔm, mi betikisi nɛ wal Ai hinɛ hio wi pɔm. Ka hio wi mɔ lea ngoy mɔ gbo mɔ tɛa dea mɔ ngaya ha tɛ ɔ tuka mɔ bosia, ɔ beyu mɔ ha Sɔngsi mbwa. 6Mbwa be gutɛ mɔ nak gdong ɔ nɛ ɔ bedak mbwa nɛ nɛ̂ nɛ nɛ̂a mɔ ngbalea. Mbwa betɔ nde, ɔ yuomɔ ha li mbwa tuka mɔ bosia. 7Mɛgi, ɛnɛ begbo ha bhandi uso pɛ ɛnɛ mɔ baa gbalea, Wankpoo Sɔ pɛ ɛnɛ behaa yo ha ɛnɛ. 8Ka ɛnɛ baa lea, ɛnɛ pi we hang lɛm nɛ haa nu pɛ Wankpoo. Ɛnɛ mbari ngbɛrɛrɛ osa mɔ pɔm.» 9Zozue tomsa hio wan bibulo ha bhandi kaa sala mɔ tɔnde mbwa a nɛ de mɔ ngaya sɛm hang. Mbwa nɛ̂a nɛ dung ha ɔnu swe mɔ Ai, ha soko Betel nɛ Ai, tangere Zozue nɛ hio olo wan zugili bulo ɔa pɛ mbwa nu nɛ zɛa.

10Nɛ sutele sut, Zozue mbara hio wan zugili hapata, hinɛ hio kotowi mɔ Israel, a kuo mbwa nɛnɛ a bio bulo ha Ai. 11Hio wan bibulo tiko nɛ hinɛ wɛnɛ gboa Sɔngsi ngbalea. Mbwa pɛa gɛngtɛng ha kɔl wal kala; ma bikonu gɔna soko mbwa nɛ ngbalea. 12Zozue weka hio wei mana saki mɔrkɔ nɛ a gdea mbwa nɛ baka ha ɔnu swe mɔ ngbalea, ha soko Betel nɛ Ai. 13Zugili bulo bhɔngara guru pɛ mbwa ha wal kala mɔ ngbalea tangere ma bhalkɔa nɛ wal ɔnu swe. Zozue ɔa pɛa hazang bikɔnu. 14Nɛ sutele, ka kongapora mɔ Ai a zɔka, a kuo hio zugili bulo pɛa fɛt hazang ngbalea mɔ nɛ̂a bio bulo ha ndangi bhandi ka mbwa baa bitumbɔ se ayo, ha bikɔnu mɔ Zurdain. Ma a tɛ hing na nde ɛ bhɔngara ma baka ha wal gdong wa. 15Zozue nɛ hio wi mɔ Israel fɛt dea mbɔlɛ nde hio wia ha pen zu mbwa nɛ ngaya nɛ mbwa kɔa mɔ yumɔ nɛ ha wal kpɛnu. 16Hio wei fɛt mɔ Ai kpaa haa nu mɔ nak hio wi mɔ Israel, mbwa naka mbwa nɛnɛ nɛ̂ nyɛa nɛ ngbalea. 17Ma wei ndang tɛ bhɔn ha Ai na, mbwa naka hio wi mɔ Israel nɛ mbwa gdea lea bhɔna nɛ gelea. 18Mɛgi Wankpoo tɔa ha Zozue: «Gu sɛ pɛ mɛ mɛ usi ha wal Ai, hazu mi beku ngbalea haa mɛ.» Zozue yɛ fafa sɛ ka dung ha kɔwa ha wal Ai. 19Hio wi Israel kaba usi tɛ mbwa gboa nɛ hasa ha bhandi ka mbwa dungɔ ha yo: mbwa Sɔa wi gbo hazang ngbalea, mbwa lea, mbwa baa lea sising-sising mbwa pio we ha yo.

20Hio wi mɔ Ai zɔk ka nɛ zewe ka gu tɛ ha wal gdong mbwa hazang le pɛ mbwa. Mbwa ing bhandi ka mbwa beyu mɔ nɛ̂ ang na, ha wen zu hio wi mɔ Israel ka bayu mɔ pen ha wal kpɛnu ha pea fin nɛ pata mɔ bitumbɔ nɛ hio wi ndɔng ka bayin mbwa. 21Yo mɛgi, ka Zozue hinɛ hio wi pɛa zɔka nde baka ka mbwa gdea ha gdong ngbale baa lea kari nɛ zɛwe ha tuloa, mbwa nduko nɛ pata mɔ bibulo nɛ hio wi mɔ Ai. 22Hio ma wi mɔ Israel gutɛ hazang lea mɔ nɛa bio tumbo nɛ mbwa fin, mɛgi hio wi mɔ Israel gdɔka liwal bhalkɔ nɛ bhalkɔ kɛlkiti mbwa nɛ angara gbɛa mbwa. Wi ndang kpa liwal mɔ yu mɔ na, nɛ ma wi ndang bhɔn na. 23Pɛ Kongapora mɔ Ai, mbwa baa wɛnɛ nɛ tunɔ tɛnɛ ha Sɔngsi Zozue. 24Hio wi mɔ Israel gbɔndasa hio kɔmbɛ pɛ mbwa fɛt hazang bɛlɛ hazang hio guru, gboa tɛ hio ɔ ndong ka mbwa naka gdong mbwa, mbwa gbɛa mbwa fɛt. Mbwa nduko hazang ngbalea, ha ki mbwa gbɔndasa hio olo wi mɔ kandɔa fɛt. 25Hio wi mɔ le Ai, hio wi saki bhukɔ gbala bwa wei hinɛ hio bhoko, ɛ gbɛa mbwa fɛt ha yala ɛngi. 26Zozue bhɔna ka nɛ guo gbapa pɛa ha wal Ai gboa ngimɔ ka mbwa gbɔndasa hio wi mɔ lea fɛt. 27Tuka ka Wankpoo haa nɛ nu ha Zozue, hio wi mɔ Israel kuo hio wi mɔ ka mbwa baa ha ngimɔ bulo nɛ hio sari ka mbwa kpaa hazang lea. 28Zozue besasa Ai, a dea lea tɛa dɔka ta, bhandia tɛa kpɛ nu gbo sising. 29Ɛ sanga gɛl kongapora mɔ Ai nɛ pɛl, wɔl tɛ wa dungɔ gboa mbolo. Ha mboloa, Zozue haa nu mɔ zilsi wɔla. Ɛ pio yo sanga ha nu lea nɛ ɛ ndɛma dɔka ta ha zua, yo bhɔna gbo mɛsɛ.

Tɔla mbonga hazu ngari mɔ Ebal

30Zozue bhɔngara ma go ha Wankpoo, Sɔ Israel hazu ngari mɔ Ebal. 31Wɛnɛ yolsa go ɛngi lɛm nɛ haanu ka Moize, wantom pɛ Wankpoo, bahaa ha hio wi mɔ Israel. Haanu ɛngi ɛ baa ngɛrki hazang takarata mɔ mbonga pɛ Moize: «Go mɔ ta ka ɛ sɛk tɛa nɛ bolo na.» Hapata, hazu go ɛngi hio wi mɔ Israel ahaa sadaka ka ɛ dɔdɔ ha we fɛt nɛ hio sadaka mɔ gaamɔ. 32Ha kɛ, ha li hio wi fɛt mɔ Israel, Zozue ngɛraka mbonga ka Moize bangɛriki Sɔngsi. 33Hio wi mɔ Israel fɛt hinɛ hio kotowi pɛ mbwa, hio wan pɛ mbwa, hio wan gɔn kita, nɛ hio gɛnɛ ka dung ha soko mbwa, yola bhalkɔ nɛ bhalkɔ ha pɛtɛ kubha, ha Sɔngsi hio wan-hasadaka mɔ kandɔ pɛ Levi ka toya kubha mɔ mbon pɛ Wankpoo, Titia ha soko mbwa dungɔ ha wal kuso ngari mɔ Garizim, nɛ ma bhalkɔ titia ha wal kuso ngari mɔ Ebal. Moize bahaa nu swe ki mɔ gde kɔ ha zu hio bele mɔ Israel. 34Hapata, Zozue ha ngimɔ ɛngɛ tɔla hio wen fɛt ka ɛ ngɛraka hazang mbonga, hio dede wen nɛ hio wen mɔ fomi. 35Zozue tɔla mbonga pɛ Moize, a bisi ma ndang na, ha li kandɔ Israel fɛt mɔsoykisi, hio bhoko, hio bhobem hinɛ hio gɛnɛ fɛt ka ɔa ha soko hio wi mɔ Israel.