Zozue 21

Hio le pɛ hio wi mɔ kandɔ pɛ Levi

1Hio wan mɔ zu hio nam hazang kandɔ pɛ Levi tɛa tɛ kpa wan hasadaka Elazar, nɛ Zozue, bem pɛ Nun, nɛ hio wan hazu hio olo kandɔ mɔ Israel, 2ha Silo, ha nu mɔ Kanaan, mbwa tɔa: «Wankpoo haa nu nɛ wal pɛ Moize nde ɛnɛ haa ɔ hio le sanga ka ɔ lɛma ɔanu ang, ɛnɛ behaa ɔ fin hio bhandi ka hio sari pɛ ɔ lɛma yɔnga bɛlɛ ang sanga nɛ ɔ.›› 3Mɛgi, hio wi mɔ Israel sala ha soko nu pɛ mbwa hio ma le nɛ hio bhandi yɔng mɔ pɛ hio sari pɛ mbwa beyɔng bɛlɛ ang, mbwa haa ha hio wi mɔ Levi, lɛm nɛ haanu pɛ Wankpoo.

4Hio pɛl nam pɛ Kehat nɛ bezang kandɔ pɛ Levi nɛ hio bosi wi ka kpa le nɛ wal dea mbala. Ha soko mbwa hio bezang wan hasadaka Aaron kpa pɛ mbwa hio le bhukɔ gbala tar nɛ wal dea mbala, ha soko hio nu mɔ Zuda, Simeon nɛ Benzamin. 5Hio olo bezang pɛ Kehat kpa pɛ mbwa hio le bhukɔ hazang hio nu pɛ Efraim, pɛ Dan, nɛ titi kandɔ pɛ Manase, ka dung ha wal ɔnu swe mɔ Zurdain. 6Hio pɛl nam mɔ bezang pɛ Gerson kpa pɛ mbwa hio le bhukɔ gbala tar, nɛ wal dea mbala ka dung hazang hio nu pɛ Isakar, pɛ Azer, pɛ Neftali nɛ titi kandɔ pɛ Manase ka dung ha Basan. 7Hio pɛl nam mɔ bezang Merari kpa pɛ mbwa hio le bhukɔ gbala bwa hazang hio nu pɛ Ruben, pɛ Gad nɛ pɛ Zabulon. 8Hio wi mɔ Israel haa ha hio bezang pɛ Levi nɛ wal dea mbala, hio le pɛ mbwa fɛt nɛ hio bhandi yɔng bɛlɛ pɛ hio sari pɛ mbwa, lɛm nɛ haanu ka Wankpoo bahaa nɛ wal pɛ Moize.

9Zɔk hio ling le mɔ Zuda nɛ pɛ Simeon ka ɛ haa ha 10hio bezang Aaron, mɔ pɛl nam pɛ Kehat, bem pɛ Levi. Yo nɛ mbwa ka ɛ sala sɔngsi nɛ wal dea mbala. 11Ɛ haa ha mbwa Kiriat-Arba, le ka linga nɛ pɛ ngbabafa mɛ hio wi mɔ Anak. Le ɛngi, ka ɛ saa sising nde Hebron, ka dung ha kandɔnu mɔ zungari mɔ Zuda. Ɛ haa ha mbwa hinɛ bhandi yɔng bɛlɛ pɛ hio sari pɛ mbwa sanga. 12Hio fɔ nɛ hio bebe le ka dung hapɛtɛ lea, ɛ baaha yo ha Kaleb, bem pɛ Yefune. 13Hio wi mɔ nam pɛ wan hasadaka Aaron kpa pɛ mbwa le mɔ Hebron ka dung nɛ ma lea ndang mɔ usitɛ. Mbwa kpaa fin Libna, 14Yatir, Estemoa, 15Holon, Debir, 16Asan, Yuta nɛ Bet-Semes, lea dea fɛt mɔrkɔ zang nar nɛ hio bhandi yɔng bɛlɛ pɛ hio sari pɛ mbwa, fɛt dung hazang nu mɔ Zuda nɛ pɛ Simeon. 17Hazang nu pɛ Bezamin, mbwa kpaa le mɔ Gabaon, Geba, 18Anatot nɛ Alemet, lea fɛt dea nar nɛ hio bhandi yɔng bɛlɛ pɛ hio sari pɛ mbwa. 19Hio le ka hio wan hasadaka nam pɛ Aaron kpaa fɛt nɛ bhukɔ gbala tar nɛ hio bhandi yɔng bɛlɛ pɛ hio sari pɛ mbwa.

20Hio olo pɛl nam pɛ hio bezang Kehat kpaa pɛ mbwa hio le hazang nu pɛ kandɔ pɛ Efraim nɛ wal dea mbala. 21Sisem, ma lea ndang ha soko hio le mɔ usitɛ hazang kandɔnu zungari pɛ Efraim, Gezer, 22Kibsaim nɛ Bet-Horon, fɛt dea le nar nɛ hio bhandi yɔng bɛlɛ pɛ hio sari pɛ mbwa sanga. 23Hazang nu pɛ Dan, mbwa kpaa fin le nar nɛ hio bhandi yɔng bɛlɛ pɛ hio sari pɛ mbwa: Elteke, Gibeton, 24Ayalon nɛ Gat-Rimon. 25Hazang nu pɛ titi kandɔ pɛ Manase mɔ wal ɔnu swe kpaa pɛ mbwa le bwa: Taanak nɛ Ibleam, nɛ hio bhandi sanga mɔ yɔng bɛlɛ pɛ hio sari pɛ mbwa. 26Mbwa kpa fɛt le bhukɔ nɛ hio bhandi sanga mɔ yɔng bɛlɛ pɛ hio sari pɛ mbwa. 27Hio pɛl nam mɔ zang kandɔ pɛ Levi, bezang Gerson kpaa pɛ mbwa le bwa nɛ hio bhandi yɔng bɛlɛ pɛ hio sari pɛ mbwa hazang nu mɔ titi kandɔ pɛ Manase nɛ wal gutɛ swe: Golan hazang Basan, ma lea ndang ha soko hio le usitɛ, nɛ Besetera. 28Hazang nu pɛ Isakar, mbwa kpaa le nar nɛ hio bhandi yɔng bɛlɛ pɛ hio sari pɛ mbwa: Kision, Dabrat, 29Yarmut nɛ En-Ganim. 30Hazang nu pɛ Aser, mbwa kpaa fin le nar nɛ hio bhandi yɔng bɛlɛ pɛ hio sari pɛ mbwa sanga: Misal, Abdon, 31Helkat nɛ Rehob. 32Hazang nu pɛ Neftali, mbwa kpaa le tar nɛ hio bhandi sanga mɔ yɔng bɛlɛ pɛ hio sari pɛ mbwa: Kedes, hazang Galile, ma lea ndang ha soko hio le usitɛ: Hamot-Dor nɛ Kartan. 33Hio pɛl nam pɛ Gerson, kpaa le fɛt bhukɔ gbala tar nɛ hio bhandi yɔng bɛlɛ pɛ hio sari pɛ mbwa.

34Hio olo pɛl nam pɛ Levi, ɛndɔng hazang bezang Merari, kpaa le nar nɛ hio bhandi yɔng bɛlɛ pɛ hio sari pɛ mbwa, hazang nu pɛ Zabulon: Yokneam, Karta, 35Dimna nɛ Nahalal. 36Hazang nu pɛ Ruben, ka dung ha gutɛ swe mɔ Zurdain tan may nɛ Zeriko, mbwa kpaa fin le nar nɛ hio bhandi yɔng bɛlɛ pɛ hio sari pɛ mbwa: Beser ha kandɔnu mɔ kpɛnu, ma lea ndang ha soko hio le usitɛ, Yahas, 37Kedemot nɛ Mefaat. 38Hazang nu pɛ Gad, mbwa kpa pɛ mbwa fin le nar nɛ hio bhandi yɔng bɛlɛ pɛ hio sari pɛ mbwa: Ramot, ka dung ha Galaad, ma le ndang mɔ usitɛ, Mahanaim, 39Hesebon nɛ Yazer. 40Hio pɛl nam mɔ kandɔ pɛ Levi bezang Merari, kpa pɛ mbwa hio le bhukɔ gbala bwa nɛ wal dea mbala.

41Hio le ka ɛ haa ha hio bezang pɛ Levi ha hio nu pɛ hio olo wi mɔ Israel fɛt nɛ bhukɔ nar zanga mɔrkɔ gbala tar. 42Ɛ haa mbwa hio lea fɛt nɛ hio bhandi yɔng bɛlɛ pɛ hio sari pɛ mbwa.

43Wankpoo haa ha hio wi mɔ Israel nu fɛt ka wɛnɛ bahaanu mɔ haa hio ngbabafa mbwa. Mbwa baa nua nɛ mbwa dea le ang. 44Wankpoo gdea gaamɔ ha hio lingia pɛ mbwa fɛt, tuka ɛngɛ ka wɛnɛ baa haa nɛ nu ha hio ngbabafa mbwa. Wɛnɛ haa mbwa wal ganzu hio ngana pɛ mbwa, ngana pɛ mbwa lɛm mɔ simbi ha sɔngsi mbwa na. 45Mɛgi, hio haanu ndɔng fɛt ka Wankpoo tɔa hazu hio wi mɔ Israel bazɔk dɛl, ma ndang tɛ bhɔn nɛ gelea na.