Zozue 20

Hio le ka wi yumɔ usitɛ ang

1Wankpoo tɔa ha Zozue: 2‹‹Nɛ tɔ ha hio wi mɔ Israel, hio wen nu mi ka mi tɔa ha mɛ tuka ɛngɛ: ɛnɛ sal hio le ka ɛnɛ lɛma yuomɔ nɛ̂ ang, tuka mi batɔ nɛ ha Moize nde wɛnɛ atɔ ha ɛnɛ. 3Ka ma wi ndang ha soko ɛnɛ gbɛa ma wi nɛ wɛnɛ gbɛ wia nɛ nyalɔ na, mana wɛnɛ tɛ takiri ha sila wa mɔ gbɛ wi ɛngi na, wɛnɛ lɛma yumɔ nɛ ha ma lea ndang nɛ ositɛ. Mɛgi, wɛnɛ beyumɔ nɛ̂ ha bhandi ɛngi, yunɛ ke ma wi betɛ kifiri nɛ gdangamɔ ɛngi fin ha tɛwa. 4Wi ɛngi ka tɛ mɛkiri gbɛa wi ha sila wa nɛ nyalɔ na, ka wɛnɛ hɔa ha ma lea ndang, wɛnɛ beyol ha nudɛl le ɛngi ha bhandi ka ɛ kpa hio wan gɔn kita hazu hio zugili nɛ wɛnɛ be bulsi longo wen mɔ mɔ ka hɔa ha wɛnɛ ha hio kotowi mɔ lea. Mɛgi hio kotowi ndɔng beba wɛnɛ nɛnɛ hazang lea nɛ mbwa be osi bhandi ka wɛnɛ be ɔnu ang. 5Wi ka benak pata wan kpɔ ngɛnɛ gboa hazang le ɛngi mɔ de gdangamɔ nɛ wɛnɛ, hio kotowi mɔ zang lea lɛm mɛkiri mɔ gde wɛnɛ ha kɔ̂ wa na. Hazu, wɛnɛ tɛ mɛkiri ha sila mɔ gbɛa wia na, wɛnɛ tɛ pam wen ha sila wa sungiri nɛ wia na. 6Wɛnɛ bebhɔn hazang lea gboa ngimɔ ka zugili begɔn kita hazu wa, nɛ gboa ngimɔ fio pɛ gasa wan hasadaka ka de tom ha ngimɔ ɛngi. Hapata, wɛnɛ benduki ha pɛa, hazang le, ha bhandi ka wɛnɛ yuomɔ ang tɛnɛ.››

7Le ka hio wi mɔ Israel gdea nɛ tɛ nɛ ɛ gdɔng: Kedes ha Galile, hazang kandɔnu mɔ zungari pɛ Neftali, ha Sisem hazang kandɔnu zungari pɛ Efraim nɛ ha Kiriat-Arba ka ɛ saa fin nde Hebron, hazang kandɔnu zungari pɛ Zuda. 8Nɛ wal kuli Zurdain, ha wal gutɛ swe mɔ Zeriko, mbwa sala le mɔ Beser, hazu tɛlɛfɛn kpɛnu zu ngari ka dung nɛ pɛ kandɔ pɛ Ruben, Ramot, ha Galaad, ka dung nɛ pɛ kandɔ pɛ Gad, nɛ Golan, hazang Basan ka dung nɛ kandɔ pɛ Manase. 9Ɛ ndɔng nɛ hio le mɔ usitɛ ka hio wi mɔ Israel sala gde nɛtɛ, hawenzu mbwa nɛ hio gɛnɛ ka ɔ hasoko mbwa. Mɛgi ka ma wi gbɛa wi nɛ wɛnɛ tɛ mɛkiri gbɛa wi ɛngi nɛ sila wa na, wɛnɛ beyu wi ka ngoy mɔ de gdangamɔ ha tɛwa mɔ tɔnde ɛ gbɛ wɛnɛ sɔngsi na. Lɛma nde zugiri ha gɔn kita ha zua ing.