Zozue 22

Hio kandɔ mɔ wal gutɛ swe mɔ Zurdain

1Mɛgi, Zozue saa hio wi mɔ kandɔ pɛ Ruben, pɛ Gad nɛ titi kandɔ pɛ Manase ka ɔnu ha wal gutɛ swe mɔ Zurdain. 2Wɛnɛ tɔa ha mbwa: ‹‹Ɛnɛ ba pam hio haanu fɛt ka Moize wantom pɛ Wankpoo haa ha ɛnɛ nɛ ɛnɛ deamɔ lɛm nɛ haanu ɛngi tuka ka mi bahaa nɛ nu ha ɛnɛ. 3Angiri ha ngimɔ ɛngi tee gbo mɛsɛ, ɛnɛ tɛ mul hio ya ɛnɛ mɔ Israel pi na nɛ ɛnɛ zea hio haanu pɛ Wankpoo Sɔ pɛ ɛnɛ. 4Sising, Wankpoo Sɔ pɛ ɛnɛ haa ɔmatɛ ha hio wi mɔ Israel, tuka ɛngɛ ka wɛnɛ bahaa nɛ nu ha ɛnɛ, ɛnɛ nduki ha pɛ ɛnɛ. Ɛnɛ benɛ̂ nɛ ɔa hazang kandɔnu ka Moize, wantom pɛ Wankpoo baa kapini ha ɛnɛ ha wal gutɛ swe mɔ Zurdain. 5Mɛgi, ɛnɛ pam nɛ dedea hio osamɔ fɛt ka Moize, wantom pɛ Wankpoo baa osi ha ɛnɛ: ɛnɛ ngoy Wankpoo Sɔ pɛ ɛnɛ, ɛnɛ demɔ ka sila wa ngoya, ɛnɛ de hio mɔ lɛm nɛ mbonga pɛa, ɛnɛ hɛl tɛ ɛnɛ nɛ wɛnɛ nɛ ɛnɛ detom pɛa nɛ sila ɛnɛ fɛt nɛ hio ngaya pɛ ɛnɛ fɛt.››

6Hapata, Zozue wola dedewen hazu mbwa nɛ wɛnɛ tɔa nde mbwa nduki ha pɛ mbwa. 7Moize bahaa nu mɔ Basan ha wal gutɛ swe mɔ Zurdain ha titi kandɔ pɛ Manase. Ha wal ma titi kandɔ ɛngi, Zozue bahaa nu ha mbwa ka dung tuka pɛ hio olo kandɔ ndɔng ha wal ɔnu swe mɔ Zurdain. Zozue ana ha bosi titi kandɔ pɛ Manase mɔ nduki ha pɛ mbwa ha wal gutɛ swe mɔ Zurdain. Wɛnɛ wola dedewen hazu mbwa 8nɛ wɛnɛ tɔa : «Ɛnɛ nduki ha pɛ ɛnɛ nɛ hio dɔka kpaamɔ nɛ hio dɔka sari hinɛ mbɔli nɛ ɔr, gbɛ bolo nɛ bolo nɛ dɔka hio la. Ɛnɛ kapini hio toy bulo pɛ hio ngana pɛ ɛnɛ ndɔng ha soka hio ya ɛnɛ mɔ Israel.››

Go ka ɛ yolsa sanga nɛ Zurdain

9Hio bezang pɛ Ruben, pɛ Gad nɛ titi kandɔ pɛ Manase nduko ha pɛ mbwa. Mbwa guotɛ ha Silo ha soko hio olo wi mɔ Israel hazang le mɔ Kanaan, mbwa nɛ̂a hazang le mɔ Galaad, kandɔnu ka mbwa kpaa nɛ wal kapanamɔ, lɛm nɛ hio haanu ka Wankpoo bahaa nɛ wal pɛ Moize. 10Ka mbwa hɔa ha nu Zurdain, ha le mɔ Kanaan, mbwa bɛa ma gasa go sanga nɛ lia. 11Ɛ tɛa tɛ tɔ wena ha hio olo wi mɔ Israel: ‹‹ Ɛnɛ zɔk hio kandɔ pɛ Ruben, pɛ Gad nɛ titi kandɔ pɛ Manase bɛa go ha nu Zurdain ha le mɔ Kanaan nɛ wal pɛ ɔ.››

12Ka hio olo wi mɔ Israel zea wen ɛngi, mbwa wesamay nɛ hasa ha Silo mɔ nɛ̂a biobulo sungiri nɛ hio kandɔ mɔ wal gutɛ swe mɔ Zurdain. 13Mbwa tomsa Pinas, bem pɛ wan hasadaka Elazar, hazang le mɔ Galaad, nde wɛnɛ atɔ wen ha hio kandɔ pɛ Ruben nɛ pɛ Gad nɛ titi kandɔ pɛ Manase. 14Hio gasa wi mɔ zu kandɔ bhukɔ nɛ̂a hinɛ wɛnɛ, hazu kandɔ ndang ndang fɛt, mbwa fɛt nɛ hio wan mɔ nam hazang hio pɛl nam mɔ Israel. 15Mbwa nɛ̂a hazang le mɔ Galaad hapɛtɛ hio kandɔ mɔ wal gutɛ swe nɛ mbwa tɔa: 16‹‹Nɛ ling zugili pɛ Wankpoo: Hawenzu ge ɛnɛ dea gdangamɔ ɛngɛ pentɛ sungiri nɛ Sɔ mɔ Israel nde ? Hawenzu ge ɛnɛ kafa zea mbɔla pɛ Wankpoo nde ? Hawenzu ge ɛnɛ bɛa go pɛ ɛnɛ mɔ guzu nɛ wɛnɛ nde? 17Ha Peor, ɔ bade ma gdangamɔ, mɛgi ma gasa ngɔtɛ teka hazu kandɔ fɛt nɛ zugili pɛ Wankpoo. Nɛ mɛsɛ fin, ɔ bhɔna ka baa sila ha hio pata mɔ ngɔtɛ ka hɔa, yo tɛ lɛm ɔ na nde? 18Zɔk sising ɛnɛ kafa zea mbɔla pɛ Wankpoo! Ka ɛnɛ dea ngazu sungiri wɛnɛ mɛsɛ, maa bhisiri wɛnɛ bede ngambi sungiri nɛ zugili mɔ Israel fɛt ! 19Ka ɛnɛ ingɔ nde nu pɛ ɛnɛ nɛ nganga, mɛgi ɛnɛ nduki ha le pɛ Wankpoo, ha bhandi Twa la kpamay hinɛ Sɔ, nɛ ɛnɛ lɛma mɔ baanu ha soko hio nu pɛ ɔ. Maa, ɛnɛ guzu sungiri nɛ Wankpoo nɛ ɔ na nɛ mɔ bhɔngiri ma go nɛtɛ nɛ pɛ Wankpoo Sɔ pɛ ɔ na. 20Ha ngimɔ ka Akan, bezang Zera dea ma gdangamɔ hawenzu hio mɔ ka Wankpoo kafa nde hio wi abaa na, ɛnɛ ingɔ nɛ dedea. Yo nɛ ɛngi ngambi pɛ Wankpoo zilo hazu zugili mɔ Israel fɛt. Bonɛ Akan ndang sɔna ka fea hawenzu hio gdangamɔ pɛa na.

21Hio wi mɔ nam pɛ Ruben, pɛ Gad nɛ titi kandɔ pɛ Manase, kiforowen ha hio wan mɔ pɛl nam pɛ hio olo kandɔ mɔ Israel, mbwa tɔa: 22«Wankpoo nɛ̂ Sɔ pɛ hio sɔ, ɛy, wɛnɛ nɛ̂ Sɔ pɛ hio sɔ, nɛ wɛnɛ ingɔ hawenzu ge ɔ dea mɔ tuka ɛngi. Hio wi mɔ Israel fɛt be ing fin. Ka yo nɛ weatɛ, bedung nɛ gdangamɔ pentɛ ka ɔ dea sungiri nɛ Wankpoo, nɛ wɛnɛ lɛm mɔ pam ɔ nɛ zutunɔ na! 23Ka ɔ bɛa go pɛ ɔ hawenzu haa sadaka ka ɛ dɔdɔ ha we fɛt mana sadaka mɔ hio yɔng mana sadaka mɔ gaamɔ, ka ɔ dea yo mɔ guzu ɔ nɛ Wankpoo, mɛgi, wɛnɛ nɛ tɛwa be ndulsi ɔ. 24Maa yo bo mɛgi na, hazu ɔ nɛ ke nde bin gan hio bezang ɛnɛ be ani hio bezang ɔ: ‘‘Mɔ ka gbama soko ɛnɛ ha may nɛ Wankpoo, Sɔ mɔ Israel nɛ ge nde? 25Wankpoo gdea Zurdain tuka lingia ha soko ɔ nɛ ɛnɛ hio wi mɔ Ruben nɛ hio wi mɔ Gad. Way, ɛ tɛ haa wal ha ɛnɛ nde ɛnɛ de tom pɛ Wankpoo na!’’ Mɛgi hio bem pɛ ɛnɛ bepusi hio bem pɛ ɔ nde mbwa gɔ Wankpoo na. 26Hawenzu ɛngi, ɔ banɛ nɛ zu mɔ yolsi go ɛngi, maa ɔ tɛ yolsi yo hawenzu haa sadaka ka ɛ dɔdɔ ha we fɛt mana olo hio sadaka na. 27Ɔ ngoya pɛ ɔ sɔna nde pɛ ɔ nɛ pɛ ɛnɛ fin hasoko hio bezang ɔ nɛ hio bezang ɛnɛ tuka mɔ kɛmɔ nzeng nde ɔ lɛma mɔ nɛ̂a gɔa Wankpoo, nɛ wal hio sadaka pɛ ɔ ka ɛ dɔdɔ ha we fɛt mana sadaka mɔ gaamɔ nɛ hio olo sadaka pɛ ɔ fɛt. Mɛgi, hio bezang ɛnɛ lɛm mɔ tɔ ha hio bezang ɔ: ‘‘Ɛ tɛ haa wal ha ɛnɛ mɔ de tom pɛ Wankpoo na.’’ 28Zɔk mɔ ka ɔ takara nɛ ɛngɛ: bin gan hio wi betɔ ha ɔ nɛ hio bezang ɔ wen ɛngɛ, ɔ be kifiri ha mbwa: ‘‘Zɔk hio ngbabafa ɔ yolsa go ɛngɛ lɛma may nɛ go pɛ Wankpoo. Mbwa yolsi yo hawenzu sadaka mɔ dɔa we fɛt na mana hio olo sadaka na. Maa go ɛngi dung mɔ kɛmɔ ha soko ɔ nɛ ɛnɛ.’’ 29Way! ɔ lɛm guzu sungiri nɛ Wankpoo mana kafi wɛnɛ na. Ɔ yolsi go ɛngɛ hawenzu haa sadaka ka dɔdɔ ha we fɛt mana sadaka mɔ hio yɔng mana olo hio sadaka na. Ɔ tɛ ngoy mɔ haa sadaka ɛngi ha ma mbing bhandi nɛtɛ na. Maa ɔ ngoy mɔ haa sadaka ɛngi hazu go pɛ Wankpoo Sɔ pɛ ɔ, ka dung ha sɔngsi Twa la kpamay hinɛ Sɔ.››

30Ha ngimɔ ka wan hasadaka Pinas, hio gasa wi mɔ zugili nɛ hio wan hazu hio pɛl nam mɔ Israel zea wen nu hio wi pɛ Ruben, pɛ Gad nɛ pɛ Manase, wena hefa ha sila mbwa. 31Pinas, bem pɛ wan hasadaka Elazar tɔa ha mbwa: ‹‹ Ɔ ingɔ sising nde Wankpoo ha soko ɔ, hawenzu ɛnɛ tɛ de ma gdangamɔ sungiri nɛ wɛnɛ pentɛ na. Ɛnɛ guo hio wi mɔ Israel hasi kita pɛ Wankpoo kari.››

32Hapata Pinas, bem pɛ wan hasadaka Elazar, nɛ hio gasa wi mɔ zu kɔndɔ guotɛ ha pɛ hio wi pɛ Ruben, nɛ pɛ Gad. Mbwa guotɛ ha Galaad mɔ kifiri ha Kanaan nɛ mɔ kifiri pata hio wen mɔ ka hɔa ha hio olo wi mɔ Israel. 33Wena hefa ha sila hio wi mɔ Israel nɛ mbwa tɔa oeba ha Sɔ. Mbwa kafa nɛ̂a bio bulo sungiri nɛ hio kandɔ pɛ Ruben nɛ pɛ Gad nɛ mɔ gdangsi hio nu pɛ mbwa. 34Hio wi pɛ Ruben nɛ pɛ Gad tɔa: ‹‹ Go ɛngi dung mɔ kɛmɔ ha soko ɔ fɛt nde Wankpoo nɛ Sɔ.›› Nɛ mbwa haa ling go ɛngi nde: ‹‹ Kɛamɔ.››