Zozue 17

1Ɛ ha fin nu ha hio wi mɔ kandɔ pɛ Manase, bosi bem pɛ Zozɛf. Ɛ bahaa nu ha hio bezang Makir, ngaya wan bibulo, bosi bem pɛ Manase bafa mɛ Galaad. Mbwa bakpa kandɔnu mɔ Galaad nɛ mɔ Basan, ha wal gutɛ swe mɔ Zurdain. 2Ɛ haa fin nu ha hio olo pɛl nam pɛ Manase. Hio pɛl nam pɛ mbwa dungɔ nɛ ɛ ndɔng: pɛ Abiezer pɛ Helek pɛ Asriel pɛ Sekem pɛ Hefer nɛ pɛ Semida. Mbwa fɛt nɛ kandɔ pɛ Manase bem pɛ Zozɛf.

3Selofad nɛ bem pɛ Hefer bem pɛ Galaad, Galaad nɛ bem pɛ Makir, bem pɛ Manase. Selofad tɛ bhɛ be wei na, ma abhɛa nɛ hio be bhoko. Ling mbwa nɛ: Mala, Noa, Hogla, Milka nɛ Tirsa. 4Hio be bhoko ndɔng nɛa nɛ zɔk Wan hasadaka Elazar nɛ Zozue, bem pɛ Nun nɛ hio gasa wi mɔ le nɛ mbwa tɔa ha mbwa: «Wankpoo ha nu ha Moize mɔ ku nu ha ɔ tuka ɛngɛ wɛnɛ haa nɛ ha nɛ nu ha hio wei mɔ zang kandɔ pɔ.» Mɛgi ɛ haa hio nu ha mbwa tuka ɛngɛ ɛ haa nɛ hio nu ha hio wei mɔ zang kandɔ pɛ mbwa, lɛm nɛ ha nu ka Wankpoo baa haa. 5Ɛ haa, fin nu bhukɔ ha hio wi mɔ kandɔ pɛ Manase, hazua fin ɛ tɔla nu pɛ Galaad hinɛ Basan ka dung ha gutɛ swe mɔ ku li Zurdain. 6Ɛ tɛ ha hio nu ha hio wei mɔ kandɔ pɛ Manase sɔnana, maa ɛ ha haa hio bhoko mɔ ndang tɛ kandɔa fin. Kandɔnu pɛ Galaad tɛa pɛ hio olo bezang pɛ Manase.

7Nu pɛ Manase gutɛ a Azer nɛ̂a, gbo ha Mikmetat ha gutɛ swe mɔ Sisem. Ha Mikmetat lingia zilo ha wal gdɔk gboa pɛ hio wi mɔ le mɔ En-Tapua. 8Kandɔnua nɛ pɛ Manase. Maa le mɔ Tapua nɛ tɛwa ka dung ha lingia ɛ ha yo ha hio pɛ Efraim. 9Hapata, lingia zilo ha wal gdɔk mɔ ngbang nɛ kolo mɔ Kanaan. Mɛgi, hio le ka dung ha wal gdɔk mɔ ngbang nɛ kolo tɛa pɛ hio wi pɛ Efraim, ngase hio nua dung hazang nu pɛ Manase. Lingia nua pena ha wal kala mɔ ngbang nɛ kolo sɔngsi nde yo agɔsi ha nana li tɔng mɔ Mediterane. 10Mɛgi, nu pɛ hio wi mɔ kandɔ pɛ Efraim baa wal gdɔk, nu pɛ hio wi mɔ kandɔ pɛ Manase dung ha wal kala. Nɛ wal ɔnu swe, lingia nɛ nana li tɔng mɔ Mediterane. Nu pɛ hio wi mɔ kandɔ pɛ Azer yo nɛ̂a ha wal kala ɔnu swe mɔ nu pɛ Manase, pɛ Isakar dung ha wal kala gutɛ swe. 11Hazang hio nu pɛ Isakar nɛ pɛ Azer, ɛ kuo Bet-Sean nɛ Ibleam hinɛ hio bebe le fɛt ha pɛtɛa haa hio wi mɔ kandɔ pɛ Manase. Ɛ kuo fin Dor, En-Dor, Taanak, Megido hinɛ hio wi mɔ lea nɛ hio bebe le fɛt ha pɛtɛa, ɛngi osi nde hio le ka zikoro Dor. 12Maa hio wi pɛ Manase tɛ kpa wal mɔ yin hio wi mɔ lea na. Nɛ hio wi mɔ Kanaan bhɔna ɔanu hazang hio lea. 13Ngase hio wi mɔ Israel tɛbo nɛ ngaya pentɛ, maa mbwa tɛ kpa wal mɔ yin hio wi mɔ Kanaan na, nɛ mbwa dea mbwa nɛ bala.

14Hio bezang pɛ Zozɛf tɛa tɛ tɔ ha Zozue: «Mɛ ha nɛ bhal nu ndang ha ɔ ha wen zu ge? Tangere Wankpoo baa wol dede wen hazu ɔ nde ɔ yɛbhi.» 15Zozue tɔa ha mbwa: «Ka ɛnɛ yɛbha pentɛ nɛ ka kandɔnu zu ngari pɛ Efraim lɛm ɛnɛ na, ɛnɛ nɛ nɛ̂ nɛ poe hio nu hazang hio kumbɔ pɛ hio wi mɔ Perizi nɛ pɛ hio wi mɔ Refa.» 16Hio bezang pɛ Zozɛf tɔa ha wɛnɛ: «Kpasawen kandɔnu zu gari ɛngɛ lɛm ɔ na. Maa hio wi mɔ Kanaan ka ɔnu ha tɛlɛfɛn nu mbwa nɛ pus bolo pɛ yanga, fin nɛ hio wi mɔ Bet-Sean nɛ hio bebe le fɛt ha pɛtɛa nɛ hio ɛ ndɔng mɔ bikonu mɔ Yizreel.» 17Mɛgi Zozue tɔa ha hio bezang pɛ Zozɛf, osi nde hio wi mɔ kandɔ pɛ Efraim nɛ titi kandɔ pɛ Manase nɛ wal ɔnu swe: ‹‹Ɛy, ɛnɛ yɛbha nɛ ɛnɛ nɛ ngaya pentɛ. Mɛgi ɛnɛ lɛm mɔ kpa nɛ bhal nu sɔna ha zang lea na. 18Mɛgi kandɔnu kumbɔ zu ngari fɛt bedung pɛ ɛnɛ, ɛnɛ be poe yo nɛ ɛnɛ be baa yo fɛt. Ɛnɛ be yin hio wi mɔ Kanaan ngase mbwa nɛ pus mɔ bolo yanga nɛ mbwa nɛ ngaya pentɛ.»