Zozue 14

Kapana nu mɔ Kanaan

1Zɔk hio nu ndɔng ka ɛ kapana nɛ hio wi mɔ Israel hazang le mɔ Kanaan. Wan hasadaka Elazar nɛ Zozue bem pɛ Nun nɛ hio wan pɛ hio nam hazang kandɔ mɔ Israel, ha kapini hio nu ndɔng ha mbwa. 2Tuka ɛngɛ Wankpoo haa nɛ nu ha Moize, nde wɛnɛ a de mbala mɔ kapini nu ha hio kandɔ mɔrkɔ zanga nar nɛ olo titi kandɔ ndɔng ka tɛ kpaa na. Nua ka tɛ kpanu na. 3Moize baa kapini nu ndɔng fɛt ha wal gutɛ swe mɔ li Zurdain ha hio kandɔ bwa nɛ titi-kandɔ ndɔng, ma wɛnɛ tɛ kapini nu ndɔng ha hio kandɔ pɛ Levi na, 4osa nde mbwa lɛm mɔ kpaa nu ndɔng na. Hazu hio bezang pɛ Zozɛf fɛt dea kandɔ bwa: kandɔ pɛ Manase nɛ pɛ Efraim. Pɛ hio wi pɛ Levi, mbwa kpaa ka nɛ hio le mɔ ɔnu sɔna, nɛ bhandi ka hio sari pɛ mbwa beyɔng mɔ sona nɛ bhandi gde hio toy pɛ mbwa. 5Mɛgi hio wi mɔ Israel kapana le ndɔng tuka ɛngɛ Wankpoo baa haa nɛ nu ha Moize.

6Ma swe, hio wi mɔ kandɔ mɔ Zuda tɛa tɛ kpaa Zozue ha guru ha Gilgal. Kaleb, bem pɛ Yefune, pɛl nam pɛ Kenaz tɔa ha wɛnɛ: ‹‹Mɛ gbatazu mɛ ha Kades-Barnea nɛ wen ka Wankpoo baa tɔ ha Moize, wan tom pɛ Sɔ awen zu mi hinɛ nɛ mɛ. 7Ha ngimɔ ka mi dungɔ ha Kades-Barnea mi nɛ bɛlɛ bhukɔa nar ka Moize, wantom pɛ Wankpoo, baa tomsi mi nde mi nɛ̂ nɛ mbarimɔ hazang le mɔ Kanaan nɛ dedea. Ha nduko pɔm, mi bhasara pata hio mɔ fɛt ka mi zɔka ha ki ha wɛnɛ nɛ wala nzeng. 8Hio ya mi ka ɔ hinɛ mbwa baa nɛ̂, gbesa hɛl mɔ ha sila kandɔ pɛɔ. Ma pɔm, mi naka pata Wankpoo, Sɔ pɔm nɛ sila mi fɛt. 9Ha yala ɛngi, Moize kana nu ha wɛnɛ atɔa: ‘‘Nu ndɔng fɛt ka nanga mɛ umɔ hazua betɛ pɛmɛ nɛ hio bezang pɛmɛ kpo nɛ kpo, hazu mɛ naka pata Wankpoo, Sɔ pɔm nɛ sila mɛ fɛt.’’ 10Dea mɛsɛ, bɛlɛ bhukɔa nar zanga mɔrkɔ ka Wankpoo baa haanu soeki ha Moize, ha ngimɔ ɛngɛ ka hio wi mɔ Israel bhɔna nɛa nanganɔ hazang kpɛnu. Angiri ha ngimɔ ɛngi, tee gboa mɛsɛ, Wankpoo bhɔna ka pama tunɔ pɔm lɛm nɛ gɔnanu ka wɛnɛ baa tɔ, ma mɛsɛ mi tɛ bo nɛ bɛlɛ bhukɔa mɔrkɔ zu bhukɔa tar zang mɔrkɔ. 11Ngaya ka mi dungɔ nɛ yo sɔngsi bhɔna gbo mɛsɛ, tuka ɛngɛ ka Moize baa tomsi mi soeki ha mbaramɔ. Nɛ ɛngi, mi bhɔna fin nɛ ngaya mɔ bio bulo nɛ mɔ guzu ha tɛ gele tom. 12Tuka ɛngɛ sising, mɛ haa mi kandɔnu mɔ zungari fɛt ka Wankpoo baa haanu ha mi ha ngimɔ ɛngɛ. Mɛ zea ha ngimɔ ɛngi nde hio wi mɔ Anak baa ɔnu soeki hazang hio le nɛ dede sɛnga le nɛ ngeng le. Kpasa wen, ka Wankpoo bhɔna hinɛ mi, mɛgi mi beyin mbwa tuka ɛngɛ wɛnɛ baa tɔ nɛ tɛwa.››

13Zozue wola dedewen hazu Kaleb, bem pɛ Yefune nɛ wɛnɛ haa le mɔ Hebron ha Kaleb. 14Le ɛngi tɛa pɛ hio bezang pɛ Kaleb, bem pɛ Yefune, pɛl nam pɛ Kenaz gbo mɛsɛ, ha wenzu ɛngɛ Kaleb naka nɛ wala zeng lɛm nɛ sila Wankpoo Sɔ mɔ Israel. 15Ling Hebron dungɔ sɔngsi nɛ Kiriat-Arba, le mɔ Arba gutɛ nɛ ling ma gasa wi ka ling wa ɔma pentɛ ha soko hio wi mɔ Anak.

Hapata, hio kandɔa kpaa gamɔ bulo bo fin na.