Angaramɔ 48

Zakob wola dedewen hazu hio bewei pɛ Zozɛf

1Hapata hio wi mɔ ndɔng, Zozɛf zea nde tɛ bafa wa ha yimoa. A kuo hio bewei pɛa bwa, Manasse hinɛ Efraim. 2Ɛ tɔa ha Zakob nde: «Zɔk, bewei pɛ mɛ Zozɛf tɛa mɔ zɔk mɛ.» Zakob yɔnga yini wa nɛ gutɛ dung ha ngɔn hazu yala pɛa. 3A tɔa ha Zozɛf: «Sɔ, Wan-ngaya gbasatɛ wa ha mi ha Luz, ha Kanaan. Wɛnɛ wola dedewen hazu mi 4nɛ wɛnɛ tɔa ha mi: “Mi behaa mɛ dɔka bem, nɛ mi bede nde mɛ adung ngbabafa mɛ hio wi mɔ dɔka kandɔ. Mi behaa le ɛngɛ ha hio bem pɛ mɛ, ha hio bezang hio bem pɛ mbwa. Yo bedung nɛ pɛ mbwa kpo nɛ kpo.”» 5Zakob tɔa fin nde: «Sɔngsi nde mi atɛ ha Ezipte, mɛ bhɛa hio bewei bwa Manasse hinɛ Efraim. Mbwa ndɔng bwa nɛ hio bewei pɔm mɔsoykisi tuka Ruben hinɛ Simeon ka dung nɛ hio bewei pɔm. 6Maa hio ɛ ndɔng ka mɛ be bhɛ hapata Manasse hinɛ Efraim, mbwa bekpa pɛ mbwa mɔ pata fio ha le pɛ hio gasa ya mbwa. 7Ka mi guonɛtɛ ha Mezopotami, Sɔngsi nde mi ahɔ ha Efrata ha Kanaan, nana mɛ Rasɛl Fea hakɔ mi ha wal. Mi gunɔ wɛnɛ haki hapɛtɛ wal Efrata ka ɛ saa nde Bɛtl ɛɛm1. 8Zakob zɔka hio bewei pɛ Zozɛf. Wɛnɛ anamɔ nde: «Ɛngɛ nɛ o?» 9Zozɛf kiforowen nde: «Yo nɛ hio bem ka Sɔ haa mi ha Ezipte kɔ.» Nɛ Zakob tɔa ha Zozɛf nde: «Ku mbwa tɛnɛ ha mi kade mi awol dedewen hazu mbwa.»

10Zakob gbɛla pentɛ nɛ a zɔkmɔ fin nɛ dedea na. Zozɛf kuo hio bewei pɛa tɛnɛ hapɛtɛ Zakob. Mɛgi Zakob foka hali sila wa. 11Hapata, a tɔa ha Zozɛf: «Mi batakiri nde mi lɛm fin mɔ zɔk li mɛ na. Tangere, Sɔ dea nde mi azɔk fin hio bem zang mɛ!» 12Zozɛf guo hio bewei pɛa ka dung hazu nanga bafa2 wa yunɛ. Nɛ a gɔmazu wa gbo ha nu hasi bafa wa. 13Hapata, Zozɛf baa kɔ hio bewei pɛa. Efraim dungɔ nɛ wal we kɔ banɛ Manasse nɛ wa gare, mbwa dung nɛ wal we kɔ Zakob. Zozɛf tikoso mbwa tɛ sanga nɛ Zakob. 14Maa Zakob kpalsa hio kɔ wa hamay. A gdea weikɔ wa hazu Efraim ka dung nɛ pɔlɔmbɔ wi. A gdea kɔ wa mɔ gare hazu Manasse ka dung nɛ gasawi nɛ Efraim3. 15A wola dedewen hazu Zozɛf fin nɛ a tɔa:

«Ngbabafa mi Abraham hinɛ bafa mi Izaak

badung hasi ngatɛ pɛ Sɔ.

Lɛma nde Sɔ, zaoro-sami pɔm angiri ha ngimɔ

pɔlɔmbɔ pɔm gbo swe mɛsɛ.

16Lɛma nde telenge ka guo mi

yunɛ hazang hio gdangamɔ

a wol dedewen hazu hio bem ndɔng.

Lɛma nde ling hio bafa mi

Abraham hinɛ Izaak a yɛbhi hawenzu mbwa.

Lɛma nde mbwa abhɛ hio bem nɛ dɔka

kade mbwa yɛbhi don zu nu fɛt.»

17Zozɛf zɔka wei kɔ bafa ka wɛnɛ gdea hazu Efraim, yo nɛ dung nɛ dedea ha sila wa na. Wɛnɛ guo kɔ bafa wa ka dung hazu Efraim, nɛ a ngoy mɔ gde yo hazu Manasse. 18Zozɛf tɔa ha Zakob nde: «Bafa mi, mɛ kɔpa deamɔa. Wi ka dung nɛ kaya wi nɛ Manasse. Mɛ gde wei kɔ mɛ hazu wa.» 19Maa bafa wa kafa, nɛ a tɔa: «Bem pɔm, mi ingɔ yo. Hio bemzang hio bem pɛ Manasse fin bedung ma gasa kandɔ. Maa bebe ya bedung nɛ gasa pen wɛnɛ. Hio bezang hio bem pɛa be dung hio dɔka kandɔ nɛ mbwa be tɛ dɔka kandɔ pentɛ.»

20Ha swe ɛngi, Zakob wola dedewen hazu hio be wei pɛ Zozɛf, a tɔa: «Hio wi mɔ Israel beku ling ɛnɛ mɔ wol nɛ dedewen. Mbwa betɔ: “Sɔ a holi dedewen ɛnɛ mɔsoykisi tuka a bade hinɛ Efraim banɛ Manasse!» Yo mɛgi ka Sɔ yolsa Efraim Sɔngsi nɛ ya wa Manasse.” »

21Hapata, a tɔa ha Zozɛf nde: «Mi befe, maa Sɔ bedung hinɛ ɛnɛ ka nɛ wɛnɛ a be kuo ɛnɛ ndukinɛ hale pɛ hio ngbabafa ɛnɛ. 22Mɔ pɔm, mi haa mɛ gasa nu pen pɛ hio ya mɛ fɛt. Mi haa mɛ nu Sisem. Mi baku yo ha kɔ hio wi mɔ Amorit nɛ ngaya nɛ gbapa hinɛ ndoro pɔm.»