Angaramɔ 47

1Mɛgi, Zozɛf pena mɔ gbatazu kongapora mɔ Ezipte. A tɔa ha wɛnɛ nde: «Bafa mi hinɛ hio ya mi guotɛ ha Kanaan, nɛ mbwa hɔa kari. Mbwa tɛa hinɛ hio sami, mbori, hio nday pɛ mbwa banɛ hio wi mɔ pɛ mbwa fɛt. Sising mbwa ha Gosen.» 2Hapata, Zozɛf kuo hio ma ya wa mɔrkɔ, nɛ osi mbwa ha kongapora mɔ Ezipte. 3Kongapora Faraon ana mbwa nde: «Tom pɛ ɛnɛ ka ɛnɛ de nɛ ge?» Mbwa kiforowen ha wɛnɛ nde: «Kongapora pɛ ɔ, ɔ pam nɛ hio sami banɛ hio mbori mɔsoykisi tuka hio ngbabafa ɔ badung ha dea Sɔngsi.» 4Foto ɛngɛ lɛm na ha Kanaan nɛ hio zugili namdalɛ pɛ ɔ kpa bɛlɛ mɔ yɔng na. Nɛ ɔ tɛ mɔ dele hakɛ. Gde ɔ a dele ha Gosen.»

5Kongapora mɔ Ezipte tɔa ha Zozɛf nde: «Bafa mɛ hinɛ hio ya mɛ tɛa sanga nɛ mɛ. 6Le pɔm fɛt dung hakɔ mɛ. Gde mbwa ha ma dede nu mɔ le pɛ ɔ. Mɛ gde mbwa ha Gosen. Ka mɛ zɔka hasoko mbwa hio ma wi ka lɛma, mɛ gde mbwa hazu hio zugili namdalɛ pɔm.»

7Zozɛf kuo bafa wa tɛnɛ nɛ osi wɛnɛ ha Faraon kongapora mɔ Ezipte. Zakob fana kongapora nɛ zio wɛnɛ. 8Faraon ana wɛnɛ nde: «Mɛ nɛ bɛlɛ ge?» 9Zakob kiforowen ha Faraon nde: «Yo tɛbo bɛlɛ gɔmamay ndang gbala tar 130 ka mi ha gbinɔ le nɛ le tuka tombɔ nɛnɛ. Zunu pɔm nɛ dɔa, nɛ mi kpamay hinɛ hio ngaymɔ pentɛ. Mi tɛ de hazu nu bɛlɛ nɛ dɔka tuka pɛ hio ngbabafa mi ka badung hio na-pam namdalɛ tuka mi na.» 10Zakob fana fin kongapora mɔ zebwa nɛ a gboa ha zang kin pɛ kongapora.

11Zozɛf gdea bafa wa hinɛ hio ya wa ha ma dede nu mɔ le Ezipte, ha kandɔnu pɛ Ramses tuka Faraon batɔ ha wɛnɛ.nɛ Zozɛf haa ha mbwa hio nu mɔ demɔ sila mbwa ang. 12Zozɛf daya bafa wa, hio ya wa banɛ dɔka gili hio bem pɛ mbwa fɛt.

Mɔ ka Zozɛf dea ha ngimɔ foto.

13Ɛ lɛm kpa fin hio yɔngamɔ ha zang hio le na hawen gasa foto ka baa bhandi fɛt. Hio wi mɔ Ezipte hinɛ hio wi mɔ kanaan fɛt mɔka nɛ wɔ. 14Zozɛf wesara hio mbɔli fɛt ka hio wi mɔ Ezipte banɛ mɔ Kanaan bahɛ nɛ hio ble ha kɔ, nɛ ku nɛnɛ ha zang kin pɛ Faraon. 15Ka mbɔli pɛ hio wi mɔ Ezipte kara ha kɔ mbwa fɛt yunɛ, mbwa tɛa hapɛ Zozɛf, nɛ mbwa tɔa ha wɛnɛ: «Haa ɔ mɔ yɔng! Mɛ ngoya zɔka fio pɛ ɔ hawenzu mbɔli ka kara ha kɔ ɔ nde?» 16Zozɛf tɔa ha mbwa: «Ka ɛnɛ bo fin nɛ mbɔli na, ɛnɛ ku hio namdalɛ pɛ ɛnɛ mɔ sanzi nɛ yɔngamɔ.»

17Mbwa kaya hio zugili namdalɛ pɛ mbwa tɛnɛ ha Zozɛf. Mɛ a haa mbwa hio yɔng hali hio yanga, hio sami, hio mbori, hio nday banɛ hio toyfok pɛ mbwa. Hazang bɛlɛ ɛngi, Zozɛf haa hio yɔng ha hio wi mɔ Ezipte hali hio sari pɛ mbwa fɛt. 18Ha bɛlɛ mɔ pata, mbwa tɛa fin hapɛ Zozɛf nɛ tɔ ha wɛnɛ: «Gɔfɔrɔma, ɔ lɛm wusi tɛwen nɛ mɛ na. Ɔ bo fin nɛ mbɔli banɛ hio zugili namdalɛ na. Yo nɛ mɛ ha dung nɛ mbwa sising. Mɔ ka bhɔna hakɔ ɔ mɔ sising nɛ tɛ ɔ banɛ hio nu pɛ ɔ. 19Ka ɔ Fea lakgde hio nu pɛ ɔ yo bede nɛ ge hali mɛ nde? Way, ɔ ngɔya nde mɛ hɛ ɔ hinɛ hio nu pɛ ɔ fɛt. Mɛ haa ɔ yɔng. Mɛgi hio nu pɛ ɔ hinɛ ɔ wantɛ bedung mɔtom pɛ Faraon. Mɛ ha ɔ hio kpalmɔ mɔ tɔ nde ɔ bhɔn nɛ zutunɔ ɔ ngoy Fea na kade hio nu pɛ ɔ akifiri kpɛnu nɛ gelea na.»

20Zozɛf hɛa hio nu mɔ Ezipte fɛt ha Faraon hazu foto baa hio wi mɔ lea fɛt nɛ mbwa gdonga hio fɔ pɛ mbwa fɛt yunɛ. Lea fɛt tɛ bonɛ pɛ Faraon. 21A baa hio wi mɔ lea fɛt angiri ha zua gbo ha gdɔk lea tuka bala. 22Hio nu ka Zozɛf tɛ hɛ na nɛ pɛ hio wan haasadaka hazu Faraon yolsa ma mbonga hawenzu mbwa. Yo nɛ Faraon ha dung mɔ haa yɔngamɔ ha mbwa, yo nɛ ɛngi ka mbwa tɛ gdongi hio fɔ pɛ mbwa na kɔ.

23Zozɛf tɔawen ha hio wi mɔ Ezipte nde: «Sising mi hɛa ɛnɛ hinɛ hio fɔ pɛ ɛnɛ ha Faraon kari. Ɛnɛ bekpa hio kpal ble mɔ gun hazang hio fɔ pɛ ɛnɛ ndɔng. 24Ha ngimɔ bhio kpalmɔa, ɛnɛ behaa pɛ Faraon mɔ ndang hasoko kapana kpal ble ka ɛnɛ be bhi mɔrkɔ. Nɛ oloa bedung nɛ pɛ ɛnɛ wantɛ. Ɛnɛ bekay yo gun kade ɛnɛ daya nɛ tɛ ɛnɛ, hio bem pɛ ɛnɛ banɛ hio wi ka ɔ hinɛ ɛnɛ.» 25Hio wi mɔ Ezipte kiforowen nde: «Gɔfɔrɔma, mɛ kpasasa ɔ. Mɛ de kɔbhɛtɛ ɔ, nɛ mɛ gde ɔ tuka bala pɛ Faraon.» 26Mɛgi Zozɛf yolsa ma mbonga ka bhɔna nɛ ngaya gbo swe mɛsɛ ha Ezipte. Yo nɛ hasoko hio kpalmɔ ka ɛ kapana sokoa mɔrkɔ, ndang nɛ pɛ kongapora. Sɔna hio nu pɛ hio wan haasadaka lɛm dung nu pɛ kongapora na.

Kpogio mɔ ka Zakob ana

27Hio wi mɔ Israel dea le ha Ezipte, ha nu Gosen. Haki, mbwa kpa hio dɔka mɔ, mbwa bhɛa nɛ dɔka, nɛ mbwa yɛbha. 28Zakob dea bɛlɛ bhukɔ zanga mɔrkɔ gbala bwa ha Ezipte. Mɛgi wɛnɛ ɔa hazu nu bɛlɛ gɔmmay ndang nɛ bhukɔa nar zanga mɔrkɔ gbala bwa (147).

29Ha ngimɔ ka Zakob ngoy mɔ fe, a saa bewei pɛa Zozɛf nɛ tɔ ha wɛnɛ nde: «Ka mɛ nɛ ngoy pɔm, mɛ de mamɔ ka lɛma osi ngoy pɛ mɛ hatɛm: ka mɛ gun mi ha Ezipte na. Mɛ osi ngoy ki ha mi nɛ wal gdea kɔ mɛ hasi nganza1 mi. 30Ka mi Fea, mɛ ku wɔl mi gbonɛ yunɛ ha Ezipte nɛ mɛ begde yo hazang kɔfio pɛ hio kotowi mi.» Zozɛf kiforowen nde: «Mi bede mɔ ka mɛ ana ha mi.» 31Zakob tɔa ha wɛnɛ: «Kan tɛ mɛ.» Zozɛf kana tɛ wa. Mɛgi Zakob ngbio zugolo wa hapɛtɛ zuyala pɛa.