Angaramɔ 46

Zakob nɛa ha Ezipte hinɛ hio nam pɛa.

1Zakob baa wal hinɛ hio wi mɔ fɛt ka wɛnɛ nɛ yo. A hɔa ha Berseba. Haki wɛnɛ haa hio sadaka ha Sɔ pɛ bafa wa Izaak. 2Hazang zɛ ɛngi, Sɔ tɔa wen ha wɛnɛ ha ngimɔ ka wɛnɛ ha ɔala. A saa wɛnɛ: «Zakob! Zakob!» Zakob kiforowen: «Ɛy, mi ha zea mɛ.» 3Sɔ tɔa ha wɛnɛ nde: «Mi nɛ Sɔ, Sɔ pɛ bafa mɛ. Mɛ de ke mɔ nɛ ha Ezipte na. Hazu haki, hio bem zang hio bem pɛ mɛ behɛbhi nɛ mbwa betɛ ma kandɔ ndang. 4Mi ha nɛa hinɛ mɛ ha Ezipte, yo nɛ mi ha be ku mɛ nduki nɛ. Ka mɛ befe, yo nɛ Zozɛf a be gdɔki li mɛ.»

5Mɛgi, Zakob gdea Berseba nɛ pen. Hio bewei pɛ toya wɛnɛ hinɛ hio bem pɛ mbwa fɛ, banɛ hio ko pɛ mbwa ha zang hio puspus1 ndɔng ka kongapora mɔ Ezipte batomsi hazu kunɛ mbwa. 6Mbwa tɛa hinɛ hio zugili namdalɛ pɛ mbwa, banɛ hio kpamɔ pɛ mbwa ka mbwa dungo nɛ yo ha Kanaan. Mɛgi Zakob hɔa ha Ezipte hinɛ bem zang wa fɛt. 7Hio bem zang wa mɔ bewei hinɛ mɔ bebhoko, bewazang wa mɔ bewei banɛ mɔ bebhoko. Hio nam pɛa fɛt hɔa hinɛ wɛnɛ ha Ezipte.

Nam pɛ Zakob

8Ɛngɛ nɛ ling hio wi mɔ Israel ka tɛa ha Ezipte, nɛ ka dungo nɛ Zakob, hio bem pɛa banɛ hio bezang hio bem pɛa: Ruben, kaya bewei pɛ Zakob, 9hinɛ hio bewei pɛa Hanok, Palu, Hesron banɛ Karmi.

10– Simeon hinɛ hio bewei pɛa Yemuel, Yamin, Ohad, Yakin, Sohar banɛ Saul, ka badung nɛ bewei pɛ ma bhoko mɔ Kanaan.

11– Levi hinɛ hio bewei pɛa Gerson, Kehat hinɛ Marari.

12– Zuda hinɛ hio bewei pɛa Sela, Peres hinɛ Zera. Hio olo bewei pɛ Zuda, Er hinɛ Onan Fea pɛ mbwa bhɔn ha Kanaan. Peres bhɛa hio bewei bwa: Hesron hinɛ Hamul.

13– Isakar hinɛ hio bewei pɛa Tola, Puva, Yazub hinɛ Simron.

14– Zabulon hinɛ hio bewei pɛa Sered, Elon hinɛ Yaleel.

15Ɛ ndɔng fɛt nɛ hio bewei ka Lea bhɛa hinɛ Zakob ha Mezopotami. Banɛ bebhoko pɛ mbwa ndang ka ling wa nɛ Dina. Ka ɛ gdea hio bezang mbwa ang, mbwa fɛt hɔa fɛt bhukɔa tar gbala tar.

16– Gad hinɛ hio bewei pɛa Sifion, Hagi, Suni, Esbon, Eri, Arodi hinɛ Areli.

17– Asser hinɛ hio bewei pɛa Imna, Iseva, Isevi hinɛ Beria hinɛ ya mbwa bebhoko Sera. Beria dungo nɛ hio bewei bwa: Heber hinɛ Malkiel.

18Ɛngɛ nɛ hio bem zang Zilpa hinɛ Zakob banɛ hio bewazang mbwa ka. Mbwa fɛt lɛma wi bhukɔ zanga mɔrkɔ gbala ndang. Laban bahaa Zilpa ha bebhoko pɛa Lea tuka wantom hasi wa.

19Rasɛl, ko pɛ Zakob bhɛa ha Zakob hio bewei bwa: Zozɛf hinɛ Benzamin.

20Ha Ezipte Zozɛf bhɛa hio bewei bwa hinɛ kɔ pɛa Asnat, bebhoko pɛ Potifera, wan ha sadaka ha zang le mɔ On. Hio ling bewei pɛ Zozɛf ndɔng nɛ Manasse hinɛ Efraim.

21– Benzamin bhɛa pɛa hio bewei bhukɔ: Bela, Beker, Asebel, Gera, Naaman, Ehi, Ros, Huppim, Muppim banɛ Arde.

22Ɛngi nɛ hio bem pɛ Zakob ka wɛnɛ bhɛa hinɛ ko pɛa Rasɛl banɛ hio bezang mbwa. Mbwa fɛt hɔa wi bhukɔ zanga nar.

23– Dan hinɛ bewei pɛa Husim.

24– Neftali hinɛ hio bewei pɛa Yassiel, Guni, Yesser banɛ Sillem.

25Ɛngi nɛ hio bem ka Bela bhɛa hinɛ Zakob. Mbwa banɛ hio bem zang hio bem pɛ mbwa fɛt hɔa wi mɔrkɔ zanga bwa. Laban bahaa Bila ha bebhoko pɛa Rasɛl tuka wantom pɛa.

26Hio nam pɛ Zakob, hio bem pɛa banɛ hio bezang mbwa fɛt ka tɛa ha Ezipte nɛ hio wi bhukɔa mɔrkɔ zu bhukɔ zanga mɔrkɔ gbala ndang. Hio ko pɛ hio bewei pɛa fɛt ang fin. 27Ka ɛ kuo hio bewei pɛ Zozɛf bwa ka wɛnɛ bhɛa ha Ezipte gde hazu hio nam pɛ Zakob ka tɛa ha Ezipte, mbwa fɛt lɛma wi bhukɔ mɔrkɔ zu bhuze bwa2.

Zakob hinɛ hio nam pɛa dea le ha Ezipte

28Zakob tomsa Zuda Sɔngsi ha Zozɛf kade mbwa bhɔngiri bhandi pɛa ha Gosen. Ka Zakob hinɛ hio nam pɛa hɔa ha Gosen, 29Zozɛf bhɔngara puspus pɛa, nɛ wɛnɛ nɛa ha Sɔngsi bafa wa. Ka wɛnɛ zɔka bafa wa, wɛnɛ teka hazu gɛl wa nɛ angara hea kua nɛ dɔka, mbwa fokamay ha zang kɔ may. 30Mɛgi Zakob tɔa ha Zozɛf: «Mɛ ha bhɔn nɛ zutunɔ ka, tɛ mɛ mia zɔka zangli mɛ ka! Sising mi lɛma feya gele!» 31Zozɛf tɔa ha hio ya wa banɛ hio olo nam pɛ bafa wa nde: «Mi ha pena mɔ gbatazu kongapora nde: “Hio ya mi banɛ hio nam pɛ bafa ka badung ha Kanaan hɔa kari.” 32Mi betɔ ha wɛnɛ nde: “Yo nɛ̂ hio na-pam sami hinɛ mbori. Mbwa ha pama hio zugili hio sari nɛ mbwa tɛa nɛ hio sami, hio mbori, hio nday banɛ hio wi mɔ fɛt ka mbwa dung nɛ yo.” 33Ka kongapora saa ɛnɛ, nɛ ka wɛnɛ ana ɛnɛ nde: “Tom pɛ ɛnɛ nɛ ge?” 34Ɛnɛ betɔ ha wɛnɛ nde: “Ɔ nɛ hio na-pam hio namdalɛ angiri ha ngimɔ pɔlɔmbɔ pɛ ɔ mɔsoykisi tuka hio ngbabafa ɔ.” Mɛgi, ɛnɛ lɛma dungɔ ha nu Gosen. Hazu hio wi mɔ Ezipte ngoy hio na-pam sami hinɛ mbori na.»