Skip to content
BibleKenya

Projet de traduction en Gbaya-Bianda

Angaramɔ 45

Zozɛf gbasatɛ wa ha hio ya wa

Zozɛf lɛm wusi fin hio wi mɔ ka dung ha sila wa hali hio wi wi kadetom hasi wa na. A ana hio wantom pɛa mɔ gbo ha dɛl.

Ka Zozɛf tɛbo gbatɛ hinɛ hio ya wa, wɛnɛ gbasa tɛ wa ha mbwa. Maa wɛnɛ hea kua nɛ ngaya, nɛ dea nde hio wi mɔ Ezipte ka dung ha dɛl aze yo. Ne wen kua pɛ Zozɛf pena hɔ hapɛ kongapora mɔ Ezipte.

Zozɛf tɔa ha hio ya wa nde: «Yo nɛ mi Zozɛf! Bafa mi bhɔna nɛ zutunɔ nde?» Maa, gasa ke baa hio ya wa. Nɛ mbwa bo fin nɛ ma ngaya mɔ kifiriwen ha wɛnɛ na. Zozɛf tɔa ha mbwa nde: «Ɛnɛ tiki tɛ sanga nɛ mi.» Mbwa tɛa sanga nɛ wɛnɛ. Zozɛf tɔa fin: «Yo nɛ mi Zozɛf, ya ɛnɛ. Yo badung nɛ mi ka ɛnɛ bagdongi. Ɛ kuo mi pen nɛ ha Ezipte. Sising, ɛnɛ de ke na. Ɛnɛ ki sila ɛnɛ na hawen mi ka ɛnɛ gdonga ha hio wi mɔ le ɛngɛ na. Hazu yo badung nɛ mɔ ka Sɔ ngoya mɔ tomsi nɛ mi hakɛ Sɔngsi nɛ ɛnɛ kade mi akpasisi zutunɔ pɛ ɛnɛ.»

Zozɛf tɔa fin ha hio ya wa nde: «Hakɛ ha Ezipte, hazang bɛlɛ bwa fɛt kanɛ gasa foto lɛm na. Nɛ yo bedung mɛgi hazang bɛlɛ mɔrkɔ fin nɛ ɔ lɛm gɔmfɔ nɛ bhi kpalmɔ na. Sɔ batomsi mi hakɛ Sɔngsi nɛ ɛnɛ. A bangoy nde ɛnɛ abhɛ hio bem ha zang le ɛngɛ, nɛ dɛ le hakɛ Mɛgi wɛnɛ gdea ɛnɛ sɛɛ ha zang gaamɔ. Yo tɛbonɛ ɛnɛ ha batomsi mi hakɛ na maa yo nɛ Sɔ ha gde mi tuka wan ha mbɔla pɛ kongapora mɔ Ezipte, fin wan kin pɛ kongapora nɛ gɔfɔrɔma mɔ le Ezipte fɛt. Sising, ɛnɛ ngaytɛ ɛnɛ nɛ hasa mɔ tɔ ha bafa mi nde: “Ze tomi pɛ bewei pɛ mɛ Zozɛf: Sɔ gdea mi tuka gɔfɔrɔma hazu le mɔ Ezipte fɛt. Mɛ tɛ ha pɔm nɛ hasa. Mɛ bede le ha Gosen hinɛ hio bem pɛ mɛ, hio bewazang mɛ, hio sami pɛ mɛ, hio mbori pɛ mɛ, hio nday pɛ mɛ banɛ hio wi mɔ pɛmɛ fɛt. Mi beha mɔ fɛt ka lɛma haakɔ ha mɛ hinɛ hio nam pɛ mɛ banɛ hio zugili namdalɛ pɛ mɛ. Hazu gasa foto ɛngɛ bede bɛlɛ mɔrkɔ fin.”»

Zozɛf tɔa fin nde: «Ɛnɛ zɔka mi nɛ dedea, nɛ Benzamin fin zɔka mɛgi nde yo nɛ mi Zozɛf ha tɔwen ɛngɛ ha ɛnɛ. Ɛngɛ nɛ ngete kpamɔ ka mi hazanga ha Ezipte e nde. Ɛnɛ nduki nɛ tɔ ha wɛnɛ hio wi mɔ fɛt ka ɛnɛ zɔka. Hapata, ɛnɛ ku wɛnɛ tɛnɛ ha mi.»

Zozɛf teka ha gɛl Benzamin, nɛ mbwa bwa fɛt fokamay nɛ kua. Zozɛf fokamay hinɛ hio olo ya wa nɛ a hea kua pentɛ. Hapata hio ya wa angara tɔawen ha wɛnɛ.

Faraon saa Zakob tɛnɛ ha Ezipte.

Hazang kin pɛ kongapora, ɛ zea nde hio ya mɛ Zozɛf hɔa ha Ezipte. Sila kongapora hio ngbawi gɔfɔrɔma pɛa dona nɛ totɛ ka mbwa zea wen ɛngɛ. Faraon tɔa ha Zozɛf: «Mɛ tɔ ha hio ya mɛ mɔ bhɔngiri toy pɛ mbwa hazu hio toyfok pɛ mbwa nɛ mɔ nduki nɛ hasa ha Kanaan. Mbwa benɛ ku bafa mbwa hinɛ hio nam pɛ mbwa fɛt penɛ ha mi hakɛ. Mi begde mbwa adele ha bhandi ka hio dedemɔ ang pentɛ kade mbwa ayɔng. Pɛ mɛ, mɛ betɔ ha hio ya mɛ mɔ baa hio puspus pɛ hio yanga kade mbwa kaya nɛ hio ko pɛ mbwa, hio bem banɛ bafa mbwa penɛ hakɛ. Mbwa lɛm takiri hio wi mɔ ka mbwa begde hapata mbwa haki na. Hazu mbwa betɛ dele ha bhandi ka hio dedemɔ ang pentɛ hakɛ ha le mɔ Ezipte.»

Hio bewei pɛ Zakob deamɔ mɔsoykisi tuka ɛ tɔa ha mbwa. Zozɛf haa mbwa hio puspus pɛ hio yanga mɔsoykisi tuka kongapora tɔa ha wɛnɛ mɔ de, banɛ hio wi mɔ yɔng ha wal. Zozɛf haa hio la de yenga ha mbwa ndang ndang. Maa pɛ Benzamin, wɛnɛ nɛ hio la mɔrkɔ hinɛ mbɔli ka lɛma faranga gɔmay tar mɔ mbɔli bolo. A tomsa mɔ pɛ bafa wa hio dedemɔ Ezipte hazu hio bafa toyfok bhukɔ banɛ hio zɔnga toyfok bhuka ka toya pɛ mbwa kpal ble, mampa banɛ hio tili hio yɔng nɛtɛ nɛtɛ. Zozɛf ana ha hio ya wa nde mbwa mɔy hasoko may ha wal na. Hapata a gdea wal ha mbwa mɔ pen. Mbwa gdea Ezipte pen, nɛ mbwa hɔa ha Kanaan hapɛ bafa mbwa Zakob. Mbwa tɔa ha wɛnɛ nde: «Zozɛf bhɔna nɛ zutunɔ. Wɛnɛ tɛbo nɛ wan hazu le mɔ Ezipte fɛt. Maa tɛ Zakob gaa nɛ kui ngangmɔ hazu wɛnɛ mɛkiri ha wen pɛ mbwa na. Mɛgi mbwa tɔa ha wɛnɛ hio wen fɛt ka Zozɛf tɔa ha mbwa. Nɛ Zakob zɔka hio puspus pɛ hio yanga ka bewei pɛa tomsa mɔ kay nɛ mbwa. Mɛgi wɛnɛ pea hazang tɛ wa. Zakob tɔa: «Yo nɛ dedea. Bewei pɔm bhɔna nɛ zutunɔ, mi benɛ zɔk wɛnɛ Sɔngsi gding nde mi afe.»

Projet de traduction en Gbaya-Bianda. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.