Angaramɔ 3

Sɔ Wankpoo yinɔ Adam hinɛ Ɛvɛ yu nɛ̂ ha zang fɔ mɔ Ɛden

1Gɔk dungɔ nɛ zɔma pen hio olo sari fɛt ha kumbɔ ka Sɔ Wankpoo dea. A tɔa ha bhoko: «Sɔ tɔa kpasawen nde: Ɛnɛ lɛm yɔng hio wayate fɛt mɔ fɔ na?» 2Bhokoa tɔa ha gɔk nde: «Ɔ lɛma yɔng hio wayate mɔ fɔ. 3Maa, pɛ wayate ka dung ha binsila fɔ, Sɔ tɔa: Ɛnɛ yɔng yo na, nɛ ɛnɛ aba tɛa na, hazu ɛnɛ befe.» 4Mɛgi, gɔk tɔa ha bhoko: «Ɛnɛ lɛm fe ndang na!» 5Maa, Sɔ ingɔ nde swe ka ɛnɛ beyɔng yo, lî ɛnɛ bebhaa, nɛ ɛnɛ bedung tuka Sɔ ka ing soko dedemɔ hinɛ gdangamɔ.

6Bhokoa zɔka nde hio wayatea nɛ dedea mɔ yɔng, yo dungɔ nɛ lɔka ha lî, nɛ hɛla dea wi mɔ yɔng yo hazu mbari nɛ mɔ. A kuo wayatea, nɛ a yɔnga yo; wɛnɛ kuo yo fin haa wei pɛa ka dungɔ ha pɛtɛ wa, nɛ wei pɛa yɔnga. 7Hio gbalî mbwa bwa fɛt bhaa; nɛ mbwa ingɔ nde mbwa nɛ Sɔngɛrɛ. Mbwa kuo hio wa mɔ fige ful ha may tuka kandɔ mɔ yol.

8Mɛgi, mbwa zea gɛl Sɔ Wankpoo ha yala ha zang fɔ nɛ mbolo ha ngimɔ ka bok ha yua. 9Sɔ Wankpoo sa wei, nɛ a tɔa ha wɛnɛ: «Mɛ ha ndo?» 10A kɔa sala nde: «Mi zea gɛl mɛ ha zang fɔ, nɛ ke dea mi, hazu mi nɛ Sɔngɛrɛ. Mɛgi, mi wusotɛ mi.» 11Sɔ Wankpoo tɔa: «O ha osi ha mɛ nde, mɛ nɛ Sɔngɛrɛ o nde? Mɛ yɔnga wayate ka mi haa nû ha mɛ nde mɛ yɔng na kɛ nde?» 12Weia kiforo wen: «Yo nɛ̂ bhoko ka mɛ gdea wɛnɛ ha pɛtɛ mi ha haa mi wayate, nɛ mi yɔnga yo.»

13Mɛgi, Sɔ Wankpoo tɔa ha bhoko nde: «Mɛ de mɔ mɛgi ha wen zu ge?» Bhoko kiforo wen nde: «Gɔk ɔsara mi, nɛ mi yɔnga yo.»

14Sɔ Wankpoo tɔa ha gɔk:

«Hazu mɛ dea mɛgi,

mɛ bekpa fomi ha soko hio sari le hinɛ hio sari kumbɔ fɛt,

mɛ benɛ nɔ nɛ zang,

nɛ mɛ beyɔng gbutunu,

ha hio yala tunɔ pɛ mɛ fɛt.

15Mi begde sɛni ha soko

mɛ hinɛ bhoko,

ha soko hio bezang mɛ hinɛ pɛa:

mbwa begba zu mɛ nɛ dalɛ,

nɛ mɛ begde dalɛ ha tindi mbwa.»

16Hapata, Sɔ tɔa ha bhoko nde:

«Mi bede nde, mɛ akpaa yengasamɔ pentɛ

ha ngimɔ hio zang ka mɛ bebaa,

nɛ bhɛa bem pɛ mɛ,

bedung nɛ ngaya ha tɛ mɛ.

Hio hɛltɛ mɛ bedung nɛ mɔ pen zu wei mɛ,

maa, a bepen zu mɛ.»

17Sɔ tɔa ha wei: «Hazu mɛ zea wen pɛ ko mɛ, nɛ mɛ yɔnga wayate ka mi haa nû ha mɛ nde mɛ ayɔng na.

Mi befom nu ha wen zu mɛ.

Kpaa yɔngamɔ pɛ mɛ nɛ wal nu,

Yo bedung nɛ ngaya ha tɛ mɛ nɛ kpaa

yɔngamɔ pɛ mɛ nɛ wal nu ha hio yala tunɔ pɛ mɛ fɛt.

18Hio tɛn, nɛ hio te ka dung nɛ tɛn

begbo ha nu ha wen zu mɛ

nɛ mɛ beyɔng hio yɔng mɔ fɔ mana mɔ kumbɔ.

19Mɛ bekpa yɔng pɛ mɛ nɛ wal gbɛngamɔ zanglî mɛ,

gbo ha kiforo pɛ mɛ ha nu,

ka ɛ kuo mɛ ang tɛ̂ nɛ̂;

hazu mɛ nɛ̂ gbutunu,

nɛ besi ha gbutunu.

20Wei haa ling ko pɛa nde Ɛvɛ: Hazu a dungɔ nɛ̂ nana mɛ hio wi fɛt ka dung nɛ tunɔ. 21Sɔ Wankpoo dea hio la mɔ kutu sari aa ha tɛ Adam hinɛ ko pɛa Ɛvɛ. 22Sɔ Wankpoo tɔa: «Hazu sising, wi tɛ bo tuka ɔ mɔ ing dedemɔ nɛ gdangamɔ, ɔ de nde wɛnɛ ayɛfifi kɔ̂ mɔ ku nɛ wayate mɔ tunɔ yɔng kade wɛnɛ adung nɛ tunɔ kpoo nɛ kpoo na. 23Sɔ Wankpoo yinɔ wɛnɛ ha zang fɔ mɔ Ɛden yu nɛ̂, kade wɛnɛ agɔm nu ka ɛ dea wɛnɛ nɛ yo. 24Hapata, ka Sɔ Wankpoo kuto wei ha fɔ mɔ Ɛden, a gdea hio telenge Serubin tuka sanzere ha wal gutɛ-swe mɔ fɔ Ɛden, nɛ mbwa baa hio gbapa ka zifi lî nɛ lembewe ha yo, mɔ pam nɛ lîwal ka nɛ̂ ha wayate ka haa tunɔ.