Angaramɔ 41

Hio liSɔ pɛ kongapora Faraon

1Hapata gdong bɛlɛ bwa, kongapora Faraon zɔka liSɔ. A yola hanu kolo nanali ka ɛ saa nde Nil. 2Haki, a zɔka hio dede ngba nana nday mɔrkɔ zanga bwa ka gbo hazang li, nɛ mbwa angara yɔnga hio bɛlɛ ka dung ha nukolo ki. 3Hapata, hio ma gdanga ɔkatɛ nday mɔrkɔ zanga bwa fin gboa, nɛ mbwa naka pata hio bosia ha nu kolo. 4Hio gdanga ɔkatɛ hio nday ndɔng yɔnga hio dedetɛ hio nday ndɔng fɛt yunɛ. Nɛ ka kongapora zɔka mɛgi, a tunɔ ha la.

5Wɛnɛ ɔala fin, nɛ zɔk ma mbing liSɔ: A zɔka hio dede lɔka waya ble mɔrkɔzanga bwa hatɛ tea ndang. 6A zɔka fin hio ɔka waya ble ka kota gboa, nɛ we bok kpɛnu besasa yo. Mbwa fɛt kpɔatɛ hapɛtɛ hio dede ble ndɔng. 7Hio kota waya ble gulo hio dede bholo bholo waya ble ndɔng. Ka wɛnɛ zɔka mɛgi, kongapora yaksa tun ha la. Nɛ tazu wa hapata gba nde ɛ zɔka nɛ liSɔ.

8Nɛ sutele, sila kongapora ha kio wɛnɛ. Mɛgi a tomsa mɔ saa hio wan nganga mɔ Ezipte fɛt tɛnɛ, nɛ hio wan mbarimɔ fɛt. Wɛnɛ tɔa pata hio liSɔ ka wɛnɛ zɔka ha mbwa, maa ma wi ndang mɔ gbasi gotoa ha wɛnɛ nɛ dedea bona. 9Mɛgi, ngbawi pɛ hio wan haa dɔkɔ pɛ Faraon tɔa ha wɛnɛ nde: «Kongapora, mɛsɛ tazu mi gba ha gdangamɔ ka mi dea. 10Mɔ swe ki, kongapora dea ngambi sungiri ɔ, nɛ a baa ɔ hio ngbawi bwa: mi nɛ ngbawi pɛ hio wa dɔ mampa, pi ɔ zɔbhɔ ka wan pɛ hio nasara ka pam kongapora dungo hazua. 11Hazang zɛ ndang, ɔ bwa fɛt zɔka liSɔ. Nɛ goto hio liSɔa ndang ndang ang nɛtɛ nɛtɛ. 12Ma bewei mɔ kandɔ Hebro ka detom hasi wan ki badungse hapɛtɛ ɔ. Nɛ ɔ tɔa ha wɛnɛ hio liSɔ pɛ ɔ ndang ndang fɛt, nɛ wɛnɛ osa goto hio liSɔ pɛ ɔ ha ɔ ndang ndang. 13Mɛgi hio wi mɔa hɔa lɛmnɛ tuka wɛnɛ osa ha ɔ. Mɔ pɔm ɛ kuo mi penɛ ha tom pɔm, nɛ pɛ dan mi ɛ sanga gɛl wa hatɛ te ha ngɔn.»

Zozɛf osa goto hio liSɔ pɛ kongapora Faraon

14Kongapora Faraon tomsa wi mɔ saa Zozɛf. Nɛ hasa, ɛ kuo wɛnɛ hazang twa zɔbhɔ gbonɛ. Ɛ kpea zɛlɛ hinɛ bumɔzu wa yunɛ, ɛ sanza hio latɛ wa Sɔngsi nde wɛnɛ atɛ ha hali kongapora. 15Kongapora tɔa ha Zozɛf: «Mi zɔka liSɔ, nɛ ma wi ndang ka lɛma gbasi goto liSɔ ɛngɛ ha mi boang na. Maa mi zea nde mɛ ingo gbasa goto liSɔ ka hio wi zɔk ha mbwa.» 16Zozɛf kiforowen ha kongapora: «Yo bonɛ mi na, yo nɛ Sɔ ka lɛma gbasi tɔ goto liSɔ ha mɛ nɛ dedea.» 17Kongapora gdeatɛ a tɔ pata liSɔ pɛa ha Zozɛf: «Ze liSɔ ka mi zɔka, mi ha nukolo Nil. 18Mi zɔka hio dede ngba nana nday mɔrkɔzanga bwa ka gbo hazang nana li. Mbwa angara yɔnga hio bhɔa bɛlɛ ka dung ha nukolo ɛngi. 19Hapata, hio ma nana nday mɔrkɔzanga bwa gboa hazang nana lia fin hapata hio bosia ndɔng. Hio nday ɛngi dung nɛ ɔka, mana nɛ hio kputu hatɛ mbwa, nɛ tɛ mbwa hasi na. Hazang le Ezipte fɛt mi tɛ zɔk kuli hio gdanga hio nday ɛngi ma swe ndang na. 20Mɛgi hio gdanga ɔka nana nday ndɔng tɛka hatɛ hio dede lɔka nana nday mɔ Sɔngsi yɔng mbwa fɛt yunɛ. 21Hapata ka hio ɔka nday ndɔng gulo hio dede ngbanga nana nday ɛngi kari, ma wi mɔ ing nde mbwa yɔnga hio dede nday ndɔng yunɛ bona. Mbwa bhɔna kanɛ ɔka tuka mɔ Sɔngsi. Suu, mi tunɔ ha la. 22Mi zɔka ma liSɔ fin. Mi zɔka hio zu ble mɔrkɔzanga bwa ka waya ngaya nɛ dedea. Yo bhɔya hatɛ ndanga tea. 23Hapata, mi zɔka hio zu ble ka hio waya ngay ngay kɔkSɔrɔ, yo nɛ ɔka, nɛ bhɔya. Hio bok kota kpɛnu gbɛ yo fɛt nɛ gbɛngamɔ, nɛ yo kota. 24Hio kota ɔk kɔkSɔrɔ waya ble ndɔng yɔnga hio dede ngaya waya ble ndɔng fin yunɛ. Mi osa pata hio liSɔ ndɔng ha hio wan nganga, maa ma wi ndang hasoko mbwa ka lɛma gbasi goto hio liSɔ ndɔng ha mi bona.»

25Zozɛf tɔa ha Faraon: «Hio liSɔ pɛ mɛ bwa fɛt tɔ nɛ wen ndang, kongapora pɔm. Sɔ ha tɔa ha mɛ hio wi mɔ ka wɛnɛ bede. 26Hio dede nana nday hinɛ hio zu ble mɔrkɔzanga bwa ndɔng osi nɛ hio bɛlɛ mɔrkɔzanga bwa. Yo Sɔna nɛ liSɔ ndang. 27Hio ɔka gdanga nana nday mɔrkɔzanga bwa hinɛ kota beawe ble ndɔng, osi nɛ bɛlɛ mɔrkɔzanga bwa, maa yo nɛ hio bɛlɛ foto. 28Kongapora pɔm, mi tɔa ha mɛ, Sɔ osa ha mɛ hio wi mɔ ka wɛnɛ bede. 29Hio bɛlɛ mɔrkɔzanga bwa ka betɛ, bedung nɛ hio dede bɛlɛ hawenzu gbɛa hio kpalmɔ hazang le Ezipte fɛt. 30Hapata bedung nɛ hio bɛlɛ mɔrkɔzanga bwa mɔ gasa foto, nɛ ɛ lɛm gbatazu nɛ hio dede bɛlɛ gbɛ hio kpalmɔ ka pena ha le Ezipte na. Gasa foto ɛngɛ bepi le Ezipte hanu hazang ngɔtɛ. 31Foto ɛngi bengay pentɛ, nɛ yo bede nde wi ing fin hio dede bɛlɛ ka mbwa gbɛa nɛ hio kpalmɔ mɔ Sɔngsi na. 32LiSɔ pɛ mɛ tɛa zebwa nɛtɛ nɛtɛ nɛ wal hio wi mɔ baamay. Yo ngoy mɔ tɔ nde wen ka Sɔ tɔa a be de yo, nɛ pataa lɛm mɔ nyen nde Sɔ ade hio wi mɔ ndɔng na. 33Mɔ sising, kongapora pɔm, mɛ ki ma wi ka dung nɛ dede hingɔ nɛ mbaramɔ, nɛ mɛ yolsi wɛnɛ hazu kandɔ Ezipte. 34Mɛ saa fin hio ma wei ka mɛ begde mbwa hazang hio le ndang ndang mɔ kay hio kpalmɔ ka mbwa bebaa ndang hasoko kapana kpalmɔ mɔrkɔ hakɔ wi ndang ndang. Hio wei ndɔng be wesiri hio wi mɔ fɛt ka mbwa be kay hazang bɛlɛ mɔrkɔzanga bwa mɔ dede gbɛa kpalmɔ ha bhandi ndang. 35Mbwa bewesiri hio yɔng fɛt mɔ hio bɛlɛ mɔrkɔzanga bwa ka betɛ. Hazang le ndang ndang, mbwa bewesiri kpal ble hazang hio gasa gulo gde nɛtɛ nɛ ling mɛ. Ɛ bekunzi yo tuka yɔng. 36Mɛgi, le Ezipte fɛt bekpa yɔng hawenzu hio bɛlɛ mɔrkɔzanga bwa mɔ gasa wɔ. Nɛ foto ki lɛm gbɛ wi na.

Zozɛf tɛbo nɛ gɔfɔrɔma mɔ Ezipte

37Kongapora hinɛ hio ngbawi gɔfɔrɔma pɛa dungo nɛ totɛ ha bhandi tom ɛngɛ ka ɛ gdea Zozɛf ang. 38Kongapora tɔa ha mbwa nde: «Wi ɛngɛ, Sɔ donsa wɛnɛ nɛ Sɔtɛ pɛa. Anamɔ pɔm nde, ɔ lɛma kpa ma wi tuka wɛnɛ nde?» 39Hapata, kongapora tɔa ha Zozɛf: «Yo nɛ Sɔ ha osi hio wi mɔ ndɔng fɛt ha mɛ. Ma wi ndang ka lɛma dungɔ nɛ mbaramɔ hinɛ mbaramɔ tuka mɛ bona. 40Mɛ bedung nɛ gɔfɔrɔma mɔ kandɔ pɔm. Hio wi mɔ le pɔm fɛt bezewen nu mɛ. Mi bedung pɔm Sɔna hazu mɛ hazu mi nɛ kongapora. 41Sising, mi be haa mɛ ngaya mɔ dung hazu kandɔ Ezipte fɛt.» 42Kongapora kpɔsa nɛtɛwa mɔ ndɔngkɔ kongapora pɛa, nɛ yoli yo ha ndɔngkɔ Zozɛf. A haa Zozɛf hio la ka ɛ dea nɛ lin nɛ wɛnɛ yola mɔ gɛl ka ɛ dea nɛ lɔr ha gɛl Zozɛf. 43Hapata, a gdea wɛnɛ hazu bwa yanga ndamba pɛa ka ɛ saa nde Sar , nɛ hio wi gdɔra ha li wa: «Ɛnɛ gde wal!» Ɛnɛ zɔk wal ɛngɛ osi nde Faraon yolsa Zozɛf mɔ dung gɔfɔrɔma hazu kandɔ Ezipte fɛt.

44Faraon tɔa ha Zozɛf: «Yo nɛ mi Faraon, kongapora mɔ Ezipte! Ka mɛ tɛ haa nu mɔ de mamɔ na, ma wi lɛm de mamɔ hazang le Ezipte na.» 45Kongapora Faraon haa ma ling hio wi Ezipte ha Zozɛf, Safnath-Penea. Wɛnɛ haa Asnat, bebhoko pɛ wantom pɛ Sɔ Potifera wi mɔ le On, nɛ bhoko ha Zozɛf. Hapata, Zozɛf laka kongapora Faraon gde nɛ pen mɔ zɔk hio le Ezipte ndang ndang. 46Zozɛf badungse nɛ bɛlɛ bhukɔatar ha ngimɔ ka ɛ baa nɛ wɛnɛ tɛnɛ ha Faraon, kongapora mɔ Ezipte, nɛ a pena mɔ zɔk zang le Ezipte fɛt.

47Hazang hio bɛlɛ mɔrkɔzanga bwa mɔ gbɛa kpalmɔ, hio kpalmɔ kpɔatɛ pentɛ ha nu Ezipte. 48Hazang hio bɛlɛ mɔrkɔzanga bwa ndɔng, Zozɛf kunzo hio yɔng ha Ezipte. A wesara yɔng ndɔng, nɛ pam yo ha hio le ka ɛ gɔm fɔa ang. Hio yɔng mɔ hio bebe le mɔ pɛtɛ hio ngbale, ɛ ndɛma yo fɛt nɛ pam hazang hio ngbalea. 49Zozɛf wesara dɔka ble. Ka mɛ zɔka yo, yo dung tuka hio gbala lembe mɔ gasa nanali tɔng. Ɛ gdea tɔla yo, hazu ɛ lɛm tɔl fin na, yo dɔkaa pentɛ.

50Sɔngsi nde ngimɔ foto ki ahɔ, Asnat, ko pɛ Zozɛf, bebhoko pɛ Potifara, wantom pɛ Sɔ, bhɛa hio bewei bwa. 51Zozɛf haa ling hatɛ kaya bema, nɛ wɛnɛ tɔa: «Sɔ dea nde tazu mi abisi1 nɛ hio bɔnɛ banɛ kɛtana soko hinɛ hio nam pɔm.» 52A saa ling bebea nde Efraim nɛ wɛnɛ tɔa: « Sɔ haa mi hio bem2 hazang le ka mi badung ang tuka wan-ngɔtɛ.»

53Hio bɛlɛ mɔrkɔzanga bwa mɔ gbɛa kpalmɔ kara. 54Mɛgi hio bɛlɛ mɔrkɔzanga bwa mɔ foto angara mɔsoykisi tuka ka Zozɛf batɔ. Foto tɛka hazang hio le fɛt, maa ha Ezipte, hio yɔng ang.

55Ka wɔ angara dea hio wi mɔ Ezipte, mbwa ana yɔng hakɔ kongapora mɔ Ezipte. Kongapora kiforowen ha mbwa: «Ɛnɛ nɛ ha pɛ Zozɛf, nɛ ɛnɛ de mɔ ka wɛnɛ be tɔ ha ɛnɛ.» 56Foto baa zang le Ezipte fɛt. Zozɛf haanu nde ɛ gbosiri nu hio gulo ka hio yɔng ang hazang hio ngba le ndang ndang kade ɛ gdongi hio ble ha hio wi mɔ Ezipte. Hapata, fotoa tɛbo nɛ ngaya hazang lea. 57Hio wi gutɛ ha zang hio le fɛt tɛka ha hɛa ble hakɔ Zozɛf ha Ezipte hazu a bhandi fɛt fotoa lɛm na, yo tɛbo nɛ ngaya.