Angaramɔ 42

Zakob tomsa hio bewei pɛa ha Ezipte.

1Ka Zakob zea nde ɛ ha gdonga ble ha Ezipte, wɛnɛ tɔa ha hio bewei pɛa: «Ɛnɛ dung ka hakɛ ha gɛra limay Sɔna hawen ge?» 2Mi zea nde ble ha Ezipte. Mɛgi ɛnɛ nɛ haki kade ɛnɛ hɛa ma tɛnɛ. Mɛgi ɔ lɛma bhɔn nɛ zutunɔ. Ɔ ngoy Fea na. 3Hio ya mɛ Zozɛf bhukɔ pena ha Ezipte mɔ hɛ ble. 4Zakob tɛgde nde Benzamin, ya mɛ Zozɛf, apen hinɛ mbwa na. Wɛnɛ takaramɔ nde: «A lɛma kpaa ma gdangamɔ.» 5Hio bewei pɛ Zakob hɔa ha Ezipte mɔsoykisi nɛ hio ma wi mɔ ble. Foto baa le Kanaan fɛt.

Zozɛf baa hio ya wa nɛ gdanga kɔ.

6Zozɛf nɛ gɔfɔrɔma mɔ Ezipte, yo nɛ wɛnɛ ha zɔkmɔ hazu wal gdonga blea ha hio wi fɛt. Ka hio ya wa hɔa, mbwa gɔmazu hanu hasi Zozɛf.

7Ka Zozɛf zɔka hio ya wa, a ingo mbwa. Maa a tɛtɔ ha mbwa nde ɛ nɛ ya mbwa na. Wɛnɛ ana mbwa nɛ gɛl ngaya nde: «Ɛnɛ gutɛ ha ndo?» Mbwa kiforowen nde: «Ɔ gutɛ ha Kanaan. Ɔtɛ hakɛ mɔ hɛa hio yɔngamɔ.»

8Zozɛf ingo hio ya wa, maa mbwa ing wɛnɛ na. 9Tazu Zozɛf gba hatɛ hio liSɔ ka wɛnɛ bazɔk hatɛ hio ya wa nɛ wɛnɛ tɔa ha mbwa: «Ɛnɛ nɛ hio wan mbarimɔ, ɛnɛ tɛ hakɛ mɔ ki nɛ mɔ ing bhandi ka hio wan-bibulo pɛ ɔ bo ang na hazang lea.» 10Mbwa kiforowen ha wɛnɛ: «Way, gasa wi, ɔ nɛ hio wi mɔ si mɛ, ɔ tɛ ka mɔ hɛ mɔ Sɔna. 11Ɔ fɛt nɛ hio bem mɔ gdibafa ndang. Ɔ bonɛ hio wi ka de mɔ nɛ tum na. Ɔ bonɛ hio wan mbarimɔ na. 12Zozɛf tɔa ha mbwa: «Yɛlɛ, ɛnɛ tɛ mɔ ki nɛ mɔ ing bhandi ka hio wan-bibulo bo ang na hazang lea.» 13Mbwa kiforowen ha Zozɛf nde: «Way, ɔ nɛ hio gdiya bhukɔ gbala bwa, mɔ gdibafa ndang, wi mɔ Kanaan. Kpogio ya ɔ bhɔna hinɛ bafa ɔ, nɛ ma ya ɔ ndang yɔamɔ bhee.» 14Zozɛf tɔa ha mbwa: «Mi batɔ ha ɛnɛ nde ɛnɛ nɛ hio wan-dambari. 15Mi bezɔk mana ɛnɛ betɔ kpasawen. Mi kanatɛm fɛt nɛ ling kongapora mɔ Ezipte, ɛnɛ lɛm pen hazang le ɛngɛ na ka bebe ya ɛnɛ ki tɛ hɔ hakɛ na. 16Ɛnɛ tomsi ma wi ndang hasoko ɛnɛ mɔ nɛ saa wɛnɛ tɛnɛ. Hio oloa be dung hazang twa zɔbhɔ zengi nɛ mbwa. Mɛgi mi being tɛwen pɛ ɛnɛ. Ka ɛnɛ tɔa yɛlɛ, kpasawen, nɛ ling kongapora mɔ Ezipte, ɛnɛ nɛtɛ hio wan-mbarimɔ.»

17Zozɛf gdea hio ya wa ha zɔbhɔ lɛm nɛ yala tar. 18Ha yala tar, Zozɛf tɔa ha mbwa: «Ka ɛnɛ ngoya bhɔna nɛ zutunɔ, ɛnɛ de hio wi mɔ ka mi betɔ ha ɛnɛ. Hazu mi ha deamɔ lɛm nɛ mɔ ka Sɔ osi. 19Ka ɛnɛ nɛ hio dede wi, ɛnɛ mɛkiri nde ma wi ndang hasoko ɛnɛ abhɔn hazang twa zɔbhɔ. Ɛnɛ hio oloa, ɛnɛ be ku hio yɔng ndɔng sinɛ ha hio nam pɛ ɛnɛ ka wɔa a gbɛa mbwa. 20Hapata, ɛnɛ baa bebe ya ɛnɛ peynɛ ha mi. Mɛgi mi being nde ɛnɛ ha tɔa kpasawen, nɛ ɛnɛ lɛm fe na.» Hio gdiya ndɔng mɛkara nɛ wen pɛ Zozɛf. 21Sising mbwa nɛtɔa hasoko may: «Ɛy, ɔ kpa wen mɔ ka ɔ dea hatɛ ya ɔ Zozɛf. Mɔ swe ki, Zozɛf badung nɛ gasa ke hinɛ ngɔtɛ, a ana ɔ mɔ de kobhɛtɛ wa, maa ɔ tɛze wɛnɛ na. Yo nɛ ɛngi ka ɔ ha kpamay nɛ hio ngayamɔ mɛsɛ. 22Ruben tɔa fin nde: «Mi batɔ ha ɛnɛ nde: “Ɛnɛ de gdangamɔ nɛ bem1 ɛngi na!” Maa ɛnɛ tɛze mi na. Sising, ɔ tɛbo hasi kita hazu ɔ gbɛa wɛnɛ.» 23Hio ya mɛ Zozɛf tɛ ing nde wɛnɛ ha zea nule ka mbwa ha tɔa na, hazu a kunɛ ma wi mɔ tɔpata hio wen pɛ mbwa ha wɛnɛ. 24Mɛgi Zozɛf gdea mbwa pen, nɛ angiri hea kua.

Hio ya mɔ Zozɛf nduko ha Kanaan

Hapata, Zozɛf pea hapɛtɛ hio ya wa nɛ tɔ ha mbwa mɔ gde Simeon. Mɛgi ɛ hɛla Simeon ha li mbwa. 25Zozɛf haa nu ha hio wantom pɛa: «Ɛnɛ donsi hio toy pɛ hio wi ndɔng. Ɛnɛ ndukisi mboli pɛ mbwa ha mbwa hazang hio toy pɛ mbwa ndang ndang. Ɛnɛ haa fin ha mbwa hio wi mɔ ka mbwa lɛma kpa yɔnga ha wal.» Hio wantoma deamɔ mɔsoykisi mɛgi. 26Hio ya mɔ Zozɛf kaya hio toy ble pɛ mbwa gde hazu hio toyfok pɛ mbwa. Nɛ mbwa pena.

27Ka mbwa yola nɛ zɛ mɔ ɔmtɛ mbwa, maa hasoko mbwa kpɔsa zang toy pɛa mɔ haa bɛlɛ ha toyfok pɛa. Wɛnɛ kpa mboli hɛmɔ pɛa ka ɛ hɛla gde hazu toy pɛa ka ɛ hɛla. 28A tɔa ha hio ya wa nde: «Ɛ ndukoso mboli pɔm, yo hazang toy pɔm!» Mɔ ɛngi pena baazu mbwa, nɛ mbwa tɛbo ha dea ke. Mbwa anamay ndang ndang: «Ɛngɛ nɛ ngetemɔ ka Sɔ de nɛ ɔe nde?»

29Ka mbwa hɔa ha Kanaan, ha pɛ bafa mbwa Zakob, mbwa tɔa pata hio wi mɔ fɛt ka hɔa. 30Mbwa tɔa: «Wei ka dung wan hazu lea, tɔawen haɔ nɛ nga gɛl ha ɔ. A baa ɔ tuka hio gdanga wi2. 31Ɔ fɛt nɛ hio bem mɔ gdibafa ndang. Ɔ bonɛ hio wi ka de mɔ nɛ tum na. Ɔ bonɛ hio wan mbarimɔ na. 32Ɔ badung hio bewei bhukɔ zanga bwa ka gdibafa ndang ha bhɛ ɔ. Maa ma ya ɔ bewei ndang hasoko ɔ yɔamɔ, nɛ kpogio ɔ bhɔna hapɛtɛ bafa ɔ ha Kanaan.” 33Wei ɛngi kiforowen ha ɔ nde: “Mi ngoya ing ka ɛnɛ nɛ hio mboazu wi kpasawen. Ɛnɛ gde ma wi ndang hasoko ɛnɛ hakɛ, nɛ hio oloa anduki nɛ hio ble ha hio nam pɛ ɛnɛ ka fe wɔ. 34Hapata, ɛnɛ pe nɛ kpogio ɛnɛ mɔ wei ha mi. Mɛgi mi be ing nde ɛnɛ bonɛ hio gdanga wi na. Mɛgi mi be ing nde ɛnɛ bonɛ hio wan mbarimɔ na maa ɛnɛ nɛ hio nzeg wi na. Mɛgi mi be ha ya ɛnɛ a ɛnɛ, nɛ mi be gde ɛnɛ sɛm mɔ gdongi nɛ hɛa hio wi mɔ pɛnɛ hazang lea.»

35Hapata, mbwa gɔsa hio wi mɔ ka dung hazang hio toy pɛ mbwa ha nu nɛ wi ndang ndang kpa ma bebe lafu mboli hazang toy pɛa. Ka mbwa fɛt zɔka mboli ɛngi, mbwa fɛt dea ke, ngase bafa mbwa Zakob fɛt dea ke. 36Zakob tɔa ha mbwa: «Ɛnɛ yɔsasa hio bewei pɔm bwa kari: mi zɔk fin li Zozɛf na, nɛ mi zɔk fin li Simeon na. Nɛ ɛnɛ ngoy mɔ ku fin Benzamin hakɔ mi yunɛ! Ngɔtɛ ndɔng fɛt tek ka hazu mi.» 37Ruben tɔa ha wɛnɛ nde: «Ka mi ku Benzamin peynɛ ha mɛ na, lɛma nde mɛ agbɛ hio bewei pɔm bwa fɛt yunɛ. Mɛ gde wɛnɛ hakɔm, mi beku wɛnɛ penɛ ha mɛ.» 38Zakob kiforowen nde: «Way, bewei pɔm lɛm pen hinɛ ɛnɛ na. Ya wa mɔ bewei Fea, bhɔna nɛ wɛnɛ Sɔna hakɔm. Mi gbɛla kari. Ka ma gdangmɔ kpamay hinɛ wɛnɛ hazang nɔ pɛ ɛnɛ, mi befe nɛtɛ ngɔtɛ ha sila mi hawenzu gdanga deamɔ pɛ ɛnɛ.