Angaramɔ 43

Zakob mɛkara nde bewei pɛa apen hinɛ hio ya wa

1Gasa wɔ ɛngɛ bhɔna ka nɛ ngaya hazang le Kanaan. 2Hio nam pɛ Zakob karsa yɔnga hio ble ka hio bem kuo penɛ ha wal Ezipte. Mɛgi Zakob tɔa ha hio bewei pɛa nde: «Ɛnɛ nɛ fin ha Ezipte kade ɛnɛ hɛa be yɔngamɔ penɛ ha ɔ.» 3Zuda kiforowen ha wɛnɛ: «Gofɔrɔma mɔ Ezipte gbasa ha ɔ long nde: “Mi lɛm baa fin ɛnɛ nɛ dede kɔ na, ka ɛnɛ tɛku bebe ya ɛnɛ tɛnɛ hinɛ ɛnɛ na.” 4Ka mɛ mɛkara mɔ tomsi Benzamin hinɛ ɔ, mɛgi ɔ benɛ hɛ hio yɔng penɛ ha mɛ. 5Maa ka mɛ kafa, ɔ lɛm nɛ pɛ ɔ na. Hazu gɔfɔrɔma mɔ lea tɔa ha ɔ nde: “Mi lɛm baa fin ɛnɛ nɛ dede kɔ na, ka ɛnɛ tɛku bebe ya ɛnɛ tɛnɛ hinɛ ɛnɛ na.”» 6Zakob tɔa ha mbwa: «Hawen ge ka ɛnɛ gbasa ha wei ɛngi nde ɛnɛ nɛ ma bebe ya ɛnɛ nde? Ɛnɛ dea gdanga nɛ mi.» 7Mbwa kiforowen nde: «Gɔfɔrɔma ki ana ɔ nɛ hio dɔka wen hazu ɔ banɛ hio nam pɛ ɔ. Wɛnɛ ana ɔ nde: “Bafa ɛnɛ bhɔna nɛ zutunɔ nde? Ɛnɛ nɛ ma gdiya nde?” Nɛ ɔ kiforowen Sɔna ha hio anamɔ ɛngɛ. Ɔ tɛ ing nde a betɔ ha ɔ nde: “Ɛnɛ ku ya ɛnɛ tɛnɛ.”»

8Zuda tɔa ha bafa: «Bafa mi, mɛ gde Benzamin anɛ hinɛ mi. Lɛma nde ɔ pen ka ɔ ngoymɔ bhɔn nɛ tunɔ, mɛ, hinɛ ɔ banɛ hio nam pɛ ɔ. Hazu ɔ bonɛ wɔ Fea na. 9Benzamin bedung hakɔ mi. Nɛ ka mamɔ kpamay hinɛ wɛnɛ, lɛma nde mɛ aani nɛ mi Sɔna nɛ wen. Ka mi tɛku wɛnɛ tɛgde hazang kɔ mɛ na, lɛma nde wen gdangamɔ ka mi dea nɛ mɛ abhɔn hazu mi kpo nɛ kpo. 10Abose nde ɔ agde ngimɔ pɛ ɔ apen nɛ gelea pentɛ na, mana ɔ nɛa nɛ pe zebwa ha Ezipte kari.» 11Zakob tɔa ha mbwa: «Mɛgi, ɔ bo fin nɛ mamɔ mɔ de nɛtɛ na. Ɛnɛ zɔk mɔ ka ɛnɛ bede ka: Ɛnɛ gde hazang hio toy pɛ ɛnɛ hio dede kpalmɔ mɔ le pɛ ɔ kade ɛnɛ haa yo ha wi mɔ Ezipte ɛngi. Ɛnɛ gde hazang kɔ ɛnɛ hio ma kulyama nɛ hio yina, nɔ gɔlɔ tikiring, hio ma waya pistas banɛ amande1. 12Ɛnɛ ku hio mbɔli ka ɛnɛ kpa hazang hio toy pɛ ɛnɛ nɛnɛ, mana yo badung nɛ tazu mbwa abisi. Ɛnɛ ku ma mbing mbɔli fin gde hapɛtɛ ɛngi. 13Ɛnɛ nduki fin sising hapɛ wei ɛngi hinɛ ya ɛnɛ Benzamin. 14Gde Sɔ wan-ngaya atɔwen ha sila wa kade wɛnɛ ade kobbhetɛ ɛnɛ nɛ wɛnɛ agde Simeon hinɛ Benzamin ape hinɛ ɛnɛ! Mɔ pɔm, mi bedung gbatɛ tuka mi tɛdung nɛ ma bem Sɔngsi na.

Zozɛf haa yɔngmɔ ha hio ya wa

15Hio ya mɛ Zozɛf nduko fin ha Ezipte hinɛ hio lafu mbɔli ndɔng bwa fɛt, hio kpalmɔ le pɛ mbwa ka mbwa bhɔngara mɔ ha a gɔfɔrɔka mɔ Ezipte, banɛ Benzamin. Mbwa hɔa ha pɛ Zozɛf. 16Ka Zozɛf zɔka Benzamin hinɛ mbwa, a haanu ha wan pam mɔ pɛa nde: «Mɛ ku hio wi ndɔng nɛnɛ ha twa pɔm, nɛ mɛ gbɛ ma namdalɛ pɔm, gi yo. Ɔ beyɔngmɔ hinɛ mbwa mɛsɛ.» 17Wan-pam mɔ pɛ Zozɛf deamɔ mɔsoykisi tuka ɛ tɔa ha wɛnɛ. Nɛ a kuo hio wi ndɔng sinɛ ha pɛ wan pɛa. 18Ka ɛ ana mbwa mɔ le hazang twa pɛ Zozɛf, ke dea mbwa. Nɛ mbwa takaramɔ nde: «Mana yo nɛ hawenzu mbɔli ka ɛ gdea hazng hio toy ble ha bosi tɛa nde? Mɛgi mbwa betek hazu ɔ nɛ mɔ de gdangamɔ nɛ ɔ. Mbwa bekay hio toyfok pɛ ɔ nɛ mɔ baa ɔ tuka hio bala pɛ mbwa. 19Ka mbwa ha lea twa, mbwa tiko tɛ sanga nɛ wan-pam mɔ pɛ Zozɛf nɛ mbwa tɔa ha wɛnɛ nde: 20«Ɔ baa nanga mɛ Gasa-wi. Ɔ batɛ mɔ bosia mɔ hɛ hio yɔngamɔ. 21Ka ɔ ha sioa, ha gbala, ka yola mɔ ɔmtɛ ɔ nɛ zɛ, ɔ gbosara hio nu toy pɛ ɔ. Nɛ wi ndang ndang hasoko ɔ kpa mbɔli pɛa hazu toy pɛa. Yo nɛtɛ mbɔli ka ɔ hɛa nɛ mɔ. Maa ɔ kaya yo tɛnɛ fin mɛsɛ. 22Ɔ tɛa nɛ ma mbing mbɔli fin mɔ hɛ nɛ hio yɔngamɔ. Ɔ tɛ ing wi ka bagde hio mbɔli ndɔng hazang hio toy pɛ ɔ na.» 23Wan-pam mɔ ki kiforowen nde: «Ɛnɛ kari sɛm, ke ade ɛnɛ na. Yo nɛ Sɔ pɛ ɛnɛ, Sɔ pɛ hio bafa ɛnɛ, agde mbɔli ndang hazang hio toy pɛ ɛnɛ. Mbɔli mɔ pɛ ɛnɛ, mi bakpase yo.» Hapata, a gbosara Simeon. 24Wɛnɛ kuo hio gdiya ndɔng nɛnɛ ha pɛ Zozɛf. A kuo liwal nanga tɛnɛ ha mbwa nɛ a haa bɛlɛ ha hio toyfok pɛ mbwa. 25Hio gdiya ndɔng bhɔngara hio dede kpalmɔ ka mbwa kuo tɛnɛ gde Sɔngsi nde Zozɛf ahɔ ha bangowe swe. Hazu tazu mbwa gba nde mbwa beyɔngmɔ haki hinɛ Zozɛf. 26Ka Zozɛf hɔa, mbwa haa hio wi mɔ ndɔng ka mbwa kaya tɛnɛ ha wɛnɛ. Nɛ mbwa fɛt gɔmazu mbwa hasi wa. 27Zozɛf ana mbwa nɛ wen tɛ mbwa, nɛ wɛnɛ anamɔ fin nde: «Ɛnɛ batɔ ha mi wen pɛ gbɛla bafa ɛnɛ. Kpasi pɛa mɛng nde? A bhɔna nɛ zutunɔ nde?» 28Mbwa kiforowen ha wɛnɛ nde: «Ɛy, wantom pɛ mɛ, bafa ɔ nɛ dedetɛ, a bhɔna nɛ zutunɔ.» Mbwa gɔmazu mbwa fin nɛ mbinga hasi wa. 29Hapata, Zozɛf zɔka Benzamin, beya wa, bewei pɛ nana wa. A anamɔ nde: «Ɛnɛ batɔwen bebe ya ɛnɛ ha mi. Yo nɛ wɛnɛ ka nde?» Nɛ a tɔa ha Benzamin nde: «Sɔ awol dede wen hazu mɛ, bem pɔm!»

30Ka Zozɛf zɔka Benzamin tɛwa doya nɛ totɛ awen zu wɔ tɛ yawa pena tɛwa, nɛ hio zangli wa dona nɛ milkua. Mɛgi a gboa nɛwi, wɛnɛ lea zang pimbi pɛa mɔ hekua. 31Hapata, wɛnɛ tayali wa nɛ peya hapɛtɛ hio ya wa. A dea mbɔlɛ wusi nɛ totɛ pɛa nɛ hio ya wa. Wɛnɛ tɔa: «Ku yɔngamɔa tɛnɛ!» 32Ɛ haa yɔngamɔ pɛ Zozɛf nɛtɛ hali tabolo nɛ pɛ hio ya wa nɛtɛ ha bhandi ndang. Hio wi mɔ Ezipte ka ɛ saa mbwa, dung pɛ mbwa nɛtɛ fin. Mbwa lɛm yɔngmɔ hinɛ hio hebro ha bhandi ndang na, hazu ndɔki gɔaSɔ pɛ mbwa gdɔka wal ha deamɔ mɛgi. 33Hio ya mɛ Zozɛf dungɔ zɔkmay hinɛ wɛnɛ. Ɛ gdea mbwa hapatamay nɛ wal bɛlɛ bhɛ pɛ wi ndang ndang, angiri nɛ kayawi hɔnɛ ha kpogio wi, sila mbwa kio mbwa ha mɔ ɛngi pentɛ. 34Zozɛf haanu mɔ haa ma yɔngamɔ ka dung hazu tabolo pɛa ka wɛnɛ yɔng ha mbwa. Ɛ donsa zang tasi yɔngmɔ pɛ Benzamin mɔ lɛm nɛ pɛ hio ya wa zemɔrkɔ fɛt. Nɛ mbwa nɔa gbɛli dɔkɔ pentɛ hinɛ Zozɛf tɛ mbwa fɛt nɛ totɛ.