Angaramɔ 40

1Hapata hio wi mɔ ndɔng, hio ma ngbawi deamɔ yimsila kongapora Ezipte, yo nɛ ngbawi ka dung hazu hio wi ka haa dɔkɔ ha kongapora, banɛ ngbawi ka dung hazu hio wan dɔ mampa pɛ kongapora. 2Faraon, kongapora mɔ Ezipte dea ngambi hatɛ hio wi ndɔng bwa fɛt ngbawi pɛ hio wi haa dɔkɔ pɛ kongapora hinɛ ngbawi pɛ hio wi dɔ mampa pɛ kongapora. 3A gdɔka mbwa hazang twa zɔbhɔ pɛ ngbawi pɛ hio nasara ka pam kongapora, ha bhandi ɛngɛ ka Zozɛf nɛ wan-zɔbhɔ ang. 4Ngbawi pɛ hio nasara ka pam kongapora gdea hio wi ndɔng hakɔ Zozɛf tuka nde wɛnɛ azɔk mbwa. Nɛ bhɔna ha zang twa zɔbhɔ ɛngi mɔ hɔ ha ma yala.

Zozɛf gbasa goto zɔka liSɔ pɛ hio ma ngbawi bwa pɛ kongapora.

5Ka yo hɔa ha ma zɛ, hazang twa zɔbhɔ pɛ mbwa, hio ngbawi pɛ hio wi haa dɔkɔ pɛ kongapora hinɛ ngbawi pɛ hio ɛ ndɔng ka dɔ pɛ mbwa nɛ mampa pɛ kongapora bwa fɛt zɔka liSɔ. Hio liSɔa ndang ndang dung nɛ gotoa nɛtɛ nɛtɛ. 6Nɛ sutele ka Zozɛf tɛa mɔ zɔk mbwa, wi ndang ndang dung nɛ dedea na. 7Zozɛf ana mbwa nde: «Mɛsɛ ɛnɛ dung nɛ gɔtɛ hawen ge nde?» 8Mbwa kiforowen nde: «Ɔ bwa fɛt zɔka liSɔ, maa wi mɔ gbasi gotoa ha ɔ bona.» Zozɛf tɔa ha mbwa nde: «Sɔ lɛma gbasa gotoa ha ɛnɛ. Ɛnɛ tɔ ha mi hio liSɔ ka ɛnɛ zɔka.»

9Ngbawi pɛ hio wan haa dɔkɔ tɔa: «Hazang liSɔ pɔm, ma te viny yola ha li mi. 10Tea dungo nɛ hio gbakɔa tar hatɛa. Te vinye ɛngɛ dungo nɛ hio nzori wa hatɛa. Hio doa gboa nɛ hio dɔka Fea waya. 11Mi baa bila pɛ kongapora mɔ Ezipte hazang kɔ mi. Mi baa hio Fea waya vinye, mi ha bhalaa yo nde lia asɛ hazang bila ɛngɛ nɛ mi haa yo ha kongapora. 12Zozɛf tɔa ha wɛnɛ nde: «Ze goto liSɔ pɛ mɛ: Hio gbakɔ te tar osi nɛ yala tar. 13Hazang yala tar kongapora begu mɛ gdea ha ma gasa bhandi. Wɛnɛ behaa tom pɛ mɛ ha mɛ. Mɛgi mɛ lɛma haa fin bila dɔkɔ pɛa ha wɛnɛ tuka mɔ Sɔngsi. 14Ka mɔ fɛt lɛmsaratɛ ha mɛ, mi baa nanga mɛ mɔ gbatazu mɛ nɛ mi. De kɔbhɛ tɛ mi nɛ mɛ tɔ wen ha kongapora. De nde ɛ gbosisi mi yunɛ hazang twa zɔbhɔ ɛngɛ. 15Ɛy, ɛ ku mi ku ha le pɛ hio Hebro nɛ ngaya tɛnɛ. Nɛ hakɛ, mi tɛde mamɔ kade mbwa agdɔki mi na.»

16Ka ngbawi dɔ mampa pɛ kongapora zɔka nde Zozɛf ha gbasa nɛ dedea goto hio liSɔ, a tɔa ha Zozɛf liSɔ mɔ pɛa: «Mi fin, mi zɔka liSɔ. Mi toya hio dede mampa hazang hio begɛsɛ tar hazu mi. 17Gɛsɛ ɛngɛ ka dung hazu hio oloa, hio tili hio mampa tnɛtɛ nɛtɛ ang, hio ɛ ndɔng ka kongapora mɔ Ezipte yɔng. Nɛ hio nɔy ha tɛa yɔngamɔ hazang hio gɛsɛ ndɔng ka mi toy hazu mi.» 18Zozɛf tɔa: «Ze goto liSɔ pɛ mɛ: Hio gɛsɛ tar ndɔng nɛ yala tar. 19Hapata yala tar, kongapora begde mɛ ha ma kuso bhandi ka mɛ tɛngoy dungo ang na. Ɛ besang gɛl mɛ hatɛ ma te ha gɔn, nɛ hio nɔy betɛ gɔm multɛ mɛ.»

20Hapata yala tar, kongapora dea yenga bhɛ pɛa. Wɛnɛ bhɔngara ma gasa yɔngamɔ ha hio ngbawi fɛt ka de tom hasi wa. Wɛnɛ gbosara hio ngbawi pɛ hio wan haa dɔkɔ hinɛ ngbawi pɛ hio wan dɔ mampa yunɛ hazang twa zɔbhɔ hali hio wi fɛt. 21Kongapora haa tom pɛ wan haa dɔkɔ ha wɛnɛ, mɛgi ngbawi ɛngɛ tɛ sising nɛ bila mɔ gbɛli dɔkɔ ha kongapora. 22Maa wɛnɛ sanga gɛl ngbawi dɔ mampa hatɛ te ha ngɔn tuka Zozɛf batɔse. 23Tangere, tazu ngbawi pɛ hio wan haa dɔkɔ biso nɛ Zozɛf.