Skip to content
BibleKenya

Projet de traduction en Gbaya-Bianda

Angaramɔ 39

Zozɛf ha pɛ Potifar ha Ezipte

Hio wi mɔ le Ismael ka kuo Zozɛf nɛnɛ ha Ezipte, mbwa gdonga wɛnɛ ha ma wei mɔ Ezipte ka ling wa nɛ Potifar. Wɛnɛ nɛ ma gasa kagama bulo pɛ kongapora, yo nɛ wɛnɛ adung hazu hio nasara pamtɛ kongapora. Wankpoo dungo hinɛ Zozɛf, nɛ hio wi mɔ fɛt ha lɛmsaratɛ ha Zozɛf. Wɛnɛ ɔ ha pɛ wan pɛa wi mɔ Ezipte ɛngɛ. Potifar zɔka hatɛ wa nde: Wankpoo hinɛ Zozɛf nɛ yo nɛ ɛngi ka hio nanga hio wi mɔ pɛa akpɔatɛ. Mɛgi Potifar tɛbo ha dea dedemɔ nɛ Zozɛf. A gdea Zozɛf hazu hio wi mɔ zang twa nɛ hio olo mɔ pɛa fɛt nde wɛnɛ azɔkmɔ hazua. Ka Potifar deamɔ mɛgi, Wankpoo wola dedewen fin hazu hio wi mɔ pɛa hawenzu Zozɛf. Dedewen pɛ Wankpoo dungo hazu hio wi mɔ pɛa mɔ zang twa gbo ha mɔ hio fɔ pɛa fɛt. Potifar gdea hio wi mɔ ka wɛnɛ nɛ yo fɛt ha kɔ Zozɛf. Wɛnɛ bha fin pata mamɔ pɛa na, kanɛ mɔ ka wɛnɛ yɔng.

Ko pɛ Potifar gɔna dalo nɛ ling Zozɛf

Zozɛf nɛ lɔka bewei, nɛ zangli wa nɛ dedea ha li hio wi. Hapata ma ngimɔ tikiring, ko pɛ wan pɛ Zozɛf mbara wɛnɛ, nɛ a tɔa ha Zozɛf: «Ɔnu hinɛ mi!» Zozɛf kafa pɛa nɛ wɛnɛ tɔa ha ko pɛ wan pɛa nde: «Ka mi hɔa nɛ hakɛ, wan pɔm de fin mamɔ hazang twa na. Wɛnɛ gdea hio wi mɔ pɛa fɛt ha kɔ mi. Hazang twa ɛngɛ, a bo fin nɛ ma ngaya na, kanɛ mi. Wɛnɛ tɛ dol mi nɛ mamɔ na, kanɛ mɔ hɔ hapɛtɛ mɛ hazu mɛ nɛ ko pɛa. Mi bede mɛng mɔ denɛ tili gdangamɔ ɛngi, nɛ mɔ de gdangamɔ sungiri nɛ Sɔ nde?» Swe fɛt ko pɛ Potifar ha ana Zozɛf mɔ tɛ hazaang pimbi pɛa nɛ mɔ ɔnu hinɛ wɛnɛ. Maa Zozɛf ze pɛa wɛnɛ na.

Ma swe ndang, Zozɛf lea twa mɔ de ma tom pɛa. Hio wantom bo ha ngimɔ ɛngi na. Ko pɛ Potifar baa Zozɛf ha latɛ wa, nɛ tɔ ha wɛnɛ nde: «Ɔnu hinɛ mi!» Zozɛf dakatɛ wa hazang la pɛa gde hazang ko bhokoa nɛ yumɔ pen ha kɔ bhoko ki. Bhokoa zɔka nde Zozɛf gdea la pɛa hazang kɔ wa nɛ yumɔ hakɔ wa nɛ gbo ha dɛl. Mɛgi, a saa hio wantom pɛa nɛ tɔ ha mbwa nde: «Ɛnɛ zɔk! Wei pɔm baa ma Hebro tɛnɛ mɔ tɔ nde wɛnɛ a tɛ mam ɔ.Wɛnɛ tiko tɛ hapɛtɛ mi mɔ ɔnu hinɛ mi. Maa mi gdɔra nɛ ngaya. Ka wɛnɛ zea mi ha gdɔra nɛ saa nɛ sala, a Sɔnɛwi pen, gde nɛ la pɛa Sɔna hapɛtɛ mi ka.»

Bhokoa pama latɛ pɛ Zozɛf hapɛtɛ wa kanɛ pea pɛ wei. A tɔa ndangtɛ wen ha wei pɛa: «Wan bala hebro ka mɛ baa wɛnɛ tɛnɛ ha pɛɔ, tɛa sanga nɛ mi mɔ fingsi mi. Ka mi gdɔra, nɛ saa hio wi, a gdea latɛ wa hapɛtɛ mi yumɔ pen. Zɔk mɔ ka bala pɛ mɛ dea nɛ mi.» Ka wan pɛ Zozɛf zea wen ka ko pɛa tɔa ha wɛnɛ, sila wa doya nɛ gasa ngambi. Wɛnɛ haanu ɛ baa Zozɛf nɛ gde wɛnɛ hazang zɔbhɔ, ha bhandi ka ɛ agdɔka hio wan-zɔbho pɛ kongapora.

Zozɛf hinɛ ma buwi tom bwa pɛ kongapora Ezipte hazang twa zɔbhɔ

Ha ngimɔ ka Zozɛf dungo hazang twa zɔbhɔ, Wankpoo dungo hinɛ wɛnɛ, nɛ a osa ngoy pɛa ha wɛnɛ. A dea nde wan pam hio wan-zɔbhɔa angiri ngoya Zozɛf. A gdea olo hio wan-zɔbhɔa hakɔ wa. Yo tɛbo nɛ Zozɛf ka osi hio tom mɔ de ha hio wan-zɔbhɔa. Wan pam hio wan-zɔbhɔa pengi fin nɛ hio wi mɔ ka wɛnɛ gdea hakɔ Zozɛf na. Hazu Wankpoo hinɛ Zozɛf. Hio mɔ fɛt ka Zozɛf de Wankpoo ,bhɔngara mɔ tɔ nde yo ha tɛ nɛ dedea.

Projet de traduction en Gbaya-Bianda. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.