Angaramɔ 38

Wen pɛ Tamar hinɛ Zuda

1Ha ngimɔ ɛngi, Zuda gdea hio ya wa nɛ pen ha pɛ ma wei ha le Adulam ka ling wa nɛ Hira. 2Haki, Zuda zɔka ma bebhoko pɛ Sua, ma wi mɔ le Kanaan. A sio wɛnɛ tuka ko. Mbwa dungo hinɛ may 3nɛ bebhoko ki baa zang. A bhɛa nɛ bewei, nɛ Zuda gdea ling wa nde Er. 4A baa fin ma zang, nɛ wɛnɛ bhɛa ma bewei fin. Bhokoa gdea ling bema nde Oan. 5Hapata, wɛnɛ bhɛa zetar bewei. A gdea ling Sela hazu wa. Ha ngimɔ bhɛ pɛ bem ɛngi, Zuda dungopɛa ha Kezib.

6Zuda sio ma bhoko ka ling wa nɛ Tamar ha kaya bewei pɛa 7Maa deamɔtɛ Er, kaya bewei pɛ Zuda bo nɛdedea hali Wankpoo na, ɛ Wankpoo dea nde Er afe. 8Mɛgi, Zuda tɔa ha Onan: «Mɛ nɛ ɔanu hinɛ ko1 pɛ ya mɛ. Bhɛ bem hinɛ wɛnɛ kade mɛ gbala ling wa.» 9Maa Onan ingo nde bem ka bebhɛ bhoko ɛngɛ lɛm dung nɛ pɛa na. Yo nɛ ɛngi ka wɛnɛ ɔanu hinɛ ko pɛ ya wa ɛngi, ɛnɛ gɔsa litɛ wa hanu tuka wɛnɛ abhɛ bem gde nɛ ling ya wa na. 10Deamɔ mɛgi haa yimsila ha Wankpoo, nɛ a dea fin nde Onan afe. 11Mɛgi, Zuda tɔa ha bekoko wa nde: « Hazu mɛ tɛbo nɛ nagula, lɛma nde mɛ asi ha pɛ bafa2 mɛ. Mɛ zingi bewei pɔm Sela akpɔtɛ gding.» Tamar nduko ha pɛ bafa wa.

12Yala nɛ dɔka hapata, bebhoko pɛ Sua, ko pɛ Zuda Fea. Ka ngimɔ zimɔ mɔa kara, Zuda pena ha Timna hinɛ dan wa Hira mɔ le Adulam. A nɛ haki mɔ zɔk hio wi ka gɔn bumɔtɛ hio sami pɛa. 13Ma wi tɔa ha Tamar nde: «Folo mɛ nɛa ha Timna mɔ gɔn bumɔtɛ hio sami pɛa.» 14Tamar kposa la gula pɛa yunɛ, a gdoka li wa nɛ ma yelele la yunde ɛ ing wɛnɛ na. Wɛnɛ pena nɛ dung hanu le Enaim hapɛtɛ liwal ka nɛ ha Timna. A demɔ mɛgi hazu, a zɔka nde Sela tɛbo nɛ wei kari maa ɛ ngoy haa wɛnɛ ha Sela nɛ bhoko na.

15Zuda zɔka Tamar, nɛ a zɔk pɛa nde yo nɛ ma bhoko de wanza hazu a goka li wa. 16A tɛ ing nde yo nɛ bekoko wa na. Mɛgi, wɛnɛ tiko tɛ hapɛtɛ wa hanu mbango nɛ tɔ ha wɛnɛ nde: «Ɛy mi ngoy mɔ dung hinɛ nɛ mɛ nɛ bhoko!» Tamar ana wɛnɛ: «Mɛ be haa nɛ ge hami halia nde?» 17Zuda kiforowen nde: «Mi be tomsi ha mɛ ma mbori pɔm ndang.» Tamar tɔa nde: «Ɛy, maa mɛ haa ma mɔ Sɔngsi mi pam gding.» 18Zuda anamɔ: «Mɛ ngoy nɛ ge?» Tamar kiforowen: ‹‹Mɛ haa mi mɔ de nɛ dafu pɛ mɛ, pɛl sang nɛ la, hinɛ tongolo pɛ mɛ.» Zuda haa ha wɛnɛ hio wi mɔ tar ndɔng nɛ wɛnɛ ɔanu hinɛ bhokoa gde nɛ zang hatɛ wa. 19Tamar nduko ha twa pɛa wantɛ, a kpɔsa la ka wɛnɛ goka nɛ zu wa yunɛ nɛ wɛnɛ baa la nagula pɛa yol.

20Zuda tomsa dan-wa Adulam nɛ mbori ka wɛnɛ gɔnanua nɛnɛ ha bhoko ɛngi nɛ mɔ kay hio wi mɔ pɛa tar ka Zuda gdea ha kɔ Tamar pen nɛ. Maa dan wa mɔ Adulam tɛ kpa pɛa bhokoa na. 21Dan wa mɔ Adulam ana hio wi mɔ le Enaim: «Bhoko wanza ka dungo hapɛtɛ mbango hanu le Enaim hakɛ ha ndo nde?» Mbwa kiforowen ha wɛnɛ nde: «Ma bhoko wanza bo pɛa ha le pɛ ɔ na!» 22Dan mɛ Zuda pea nɛ tɔ ha wɛnɛ nde: «Mi tɛ kpa bhokoa na. Nɛ hio wi mɔ lea tɔa ha mi nde: “Ma bhoko de wanza bo pɛa haki na.”» 23Zuda kiforowen ha Hira nde: «Maa ka wɛnɛ pama hio wi mɔ pɔm! Yo bonɛ mɔ foy hatɛ ɔ na! Mi tomsa mboria, nɛ mɛ tɛkpa wɛnɛ na!»

24Ze tar hapataa, ɛ tɛa tɔ ha Zuda nde: «Tamar, bekoko mɛ dea wanza, sising a tɛbo nɛ zang.» Zuda tɔa: «Ɛnɛ ku wɛnɛ gbonɛ, ɛnɛ dɔ wɛnɛ dɔ nɛ we nɛ tunɔ!»

25Ha ngimɔ ka ɛ ha gbosara Tamar ha dɛl, a tomsa ma wi ha pɛ folo wa nde ɛ tɔ ha wɛnɛ: «Zɔk mɔ de dafu ɛngɛ, pɛl sanga la banɛ tongolo ɛngɛ. Mi ha zenga bem nɛ wal pɛ hio wan mɔ ndɔng. Mɔ ndɔng nɛ pɛ o nde?» 26Zuda ingo hio wi mɔ ndɔng nɛ wɛnɛ tɔa: «A pama mbonga nɛ dedea pen mi. Yo badung nɛ mi a haa bewei pɔm Sela ha wɛnɛ mɔ si wɛnɛ nɛ bhoko, maa mi tɛde yo na.» Hapata hio wi mɔ ndɔng, Zuda ɔanu fin hinɛ wɛnɛ na bhɔn.

27Ha ngimɔ bhɛ pɛ Tamar, a bhɛa bedan. 28Ha ngimɔ bhɛa, bema ndang gbosara kɔ wa ha dɛl, nɛ bhoko baa bem baa yo. Wɛnɛ hɛla ma gbɛ pɛl ha gɛlkɔ bema mɔ osi nde: «Bem ɛngɛ gboa Sɔngsi.»

29Maa bem ɛngi daka kɔ wa fin hazanga, nɛ ya wa gboa Sɔngsi nɛ wɛnɛ. Bhoko baa bem hatɛ bhoko ɛngɛ nɛ a tɔa: «Ɛngɛ nɛ ngete gbosara wal tɛ ka mɛ dea nde!»

Mɛgi Zuda saa ling bem ɛngi nde Perez. Ling ɛngɛ ngoy mɔtɔ nde: «Gbosara wal». 30Hapata ma bema gboa nɛ gbɛ pɛl ha gɛlkɔ, nɛ Zuda gdea ling wa nde Zera.