Angaramɔ 37

Zozɛf

37–50

Hio liSɔ pɛ Zozɛf

1Zakob dea le ha Kanaan ha le ka bafa wa ba ɔ ang. 2Ɛngɛ nɛ kasiwen hazu hio bewei pɛ Zakob. Zozɛf badungse nɛ ma bewei mɔ bɛlɛ bhukɔ zanga mɔrkɔ zanga bwa. A pam nɛ hio namdalɛ pɛ bafa wa ha zangmɔ hinɛ hio ya wa banɛ hio bewei pɛ Bila hinɛ hio bem pɛ Zilpa, hio ko pɛ bafawa. Swe fɛt Zozɛf ha tɔa pata hio gdanga wen fɛt ka mbwa ha tɔa nɛ ling wa ha bafa. 3Zakob ngoya Zozɛf pen olo hio bem pɛa. A bhɛa Zozɛf ha ngimɔ ka wɛnɛ gbɛla kari. Zakob fulo ha wɛnɛ ma la mbɔli ka hio dɔka dafu hatɛa. 4Hio ya mɛ Zozɛf zɔka nde bafa mbwa ngoya wɛnɛ pen olo mbwa fɛt. Mɛgi mbwa angara ha sungoro wɛnɛ ha sila mbwa. Mbwa tɔ fin wen ha wɛnɛ nɛ dede nu na.

5Ma swe, Zozɛf zɔka liSɔ. Nɛ a tɔa pata ha hio ya wa, nɛ hio ya wa ndɔng singo wɛnɛ nɛ ngaya fin ha sila mbwa fɛt. 6Zozɛf tɔa mbwa: «Ɛnɛ ze pata liSɔ ka mi zɔka. 7Ɔ hinɛ ɛnɛ dungo ha zang fɔ, nɛ ɔ ha bhio kpal ble. Ka ɔ zɔk, hio hɛla ble pɔm guotɛ, yola ha ngɔn, nɛ hio dɔka hɛla ble pɛ ɛnɛ zikoro pɛtɛ mɔ pɔm nɛ angiri gɔmazu hasi mɔ pɔm ki.» 8Hio ya wa ndɔng ana wɛnɛ nde: «Mɛ ngoya dung kongapora pɛ ɔ, nɛ mɔ dung hazu ɔ nde?» Mɛgi, mbwa kafa wɛnɛ fin pen mɔ bosia ha wen liso ka wɛnɛ zɔka, nɛ hio wen ka wɛnɛ tɔa ha mbwa.

9Zozɛf zɔka fin ma mbing liSɔ nɛ a tɔa pata ha hio ya wa: «Mi zɔka ma mbing liSɔ fin. Swe, ze hinɛ hio Sɔla bhukɔ gbala ndang gɔmazu hasi mi.» 10Zozɛf tɔa pata liSɔ ɛngɛ ha bafa fin. Nɛ bafa, Zakob sɛnawen ha wɛnɛ nde: «Ɛngɛ nɛ ngete zɔka liSɔe? Yo ngoy mɔ tɔ nde mi, nana mɛ hinɛ hio ya mɛ be hilsitɛ hasi mɛ?» 11Hio ya mɔ Zozɛf dea gasa sila sungiri nɛ wɛnɛ na, maa swe fɛt, bafa ha takaramɔ hazu hio liSɔ ndɔng.

Hio ya mɛ Zozɛf gdonga wɛnɛ, nɛ ɛ kuo wɛnɛ pen nɛ ha Ezipte

12Hio ya mɛ Zozɛf pena ha Sisem mɔ pam hio sami hinɛ hio mbori pɛ bafa mbwa Zakob. 13Ma swe, Zakob tɔa ha Zozɛf: «Hio ya mɛ ha pama hio namdalɛ ha Sisem. Mɛ nɛ zɔk mbwa ha mi.» Zozɛf kiforo wen ha bafa: «Ɛy, mi benɛ gele.» 14Zakob tɔa fin ha wɛnɛ: «Mɛ nɛ zɔk ya mɛ, mana mbwa dung gele hinɛ hio zugili namdalɛa nde? Ku wen tɛ mbwa pey nɛ ha mi.»

Zakob hinɛ Zozɛf dung ha ngbongo Hebron, ka wɛnɛ tomsi nɛ Zozɛf. Ka Zozɛf hɔa sanga nɛ Sisem. 15Ma wei kpamay hinɛ wɛnɛ ha ngimɔ ka Zozɛf yɔawal hazangmɔ. Nɛ wei ɛngɛ ana wɛnɛ nde: «Mɛ ki nɛ ge nde?» 16A kiforowen ha wei ɛngɛ nde: «Mi ha kio pata hio ya mi. Mi baa nanga mɛ fɛt osi ha mi bhandi ka mbwa kaya hio namdalɛ pen nɛ ang.» 17Wei ɛngɛ kiforowen ha Zozɛf nde: «Mbwa pena hakɛ kari, maa mi zea mbwa ha tɔa nde “Ɔ pen ha Dotan.”» Zozɛf naka pata hio ya wa nɛ kpa mbwa ha Dotan.

18Hio ya mɔ Zozɛf zɔka wɛnɛ nɛ nyan, nɛ mbwa angara bhɔngara wen gbɛa Zozɛf nɛ wuso. 19Mbwa ha tɔa hasoko may: «Maa, nazɔk liSɔ ha tɛ kɔ! 20Maa yala lɛma kari! Ɔ nɛ gbɛ wɛnɛ pi hazang ma kɔ ndong. Hapata ɔ betɔ nde ma gdanga sari yɔnga wɛnɛ yunɛ. Mɛgi ɔ bezɔk wal ka hio liSɔ pɛa betɛ kpasa wen.» 21Ruben ha zea mbwa nɛ a ngoy mɔ kpasisi tunɔ pɛ Zozɛf, nɛ a tɔa: «Ɔ gbɛ wɛnɛ na!» 22A tɔa fin: «Ka ɛnɛ agbɛ wɛnɛ na! Ɛnɛ pi wɛnɛ Sɔna hazang ma kɔ zu dong ka dung hazang kpɛnu, ɔ gbɛ wɛnɛ na!» Nɛ dea mɛgi, Ruben ngoy mɔ kpasisi ya wa Zozɛf hazang kɔ mbwa nɛ mɔ ku wɛnɛ penɛ ha bafa.

23Ka Zozɛf hɔa sanga nɛ hio ya wa, mbwa zino dede la dufu pɛa yunɛ hatɛ wa. 24Mbwa kuo Zozɛf nɛ pi wɛnɛ ha zang ma kɔ mɔ zu dong. Ma li bo ha zang zundong ɛngi na. 25Hapata, mbwa dungo hanu mɔ yɔngmɔ. Mbwa zɔka ma zugili hio wi mɔ le Ismael ka gutɛ ha Galaad mɔ nɛ ha Ezipte. Hio zambala pɛ mbwa guo hio dɔka toy: Yo tuka hio kul liyama ka ɛ saa nde gome, rezine banɛ ladanum1 26Zuda tɔa ha hio ya wa nde: « Ɔ bekpa nɛ ge ha gbɛa ya ɔ nɛ mɔ wusi wɛnɛ nde? 27Yo nɛ dedea nde ɔ gdongi wɛnɛ ha hio wi mɔ Isamael. Yo nɛ dedea nde ɔ gbɛ wɛnɛ na! Yo nɛ ya ɔ. Tɔktɛ ɔ nɛ ndang hinɛ wɛnɛ.» Mɛgi hio ya mɔ Zuda mɛkara nɛ wen ɛngi. 28Hio wan gdongimɔ mɔ le Madian pena nɛ liwal ɛngi. Mbwa daka Zozɛf yunɛ ha zang kɔ zundong ɛngi nɛ gdongi wɛnɛ ha hio wi mɔ Isamael mɔ lɛm faranga bhuzebwa mɔ mboli. Hio Ismael wi mɔ kuo wɛnɛ pen nɛ ha Ezipte. 29Ka Ruben tɛa hapɛtɛ kɔ zundong ɛngi, a kpa Zozɛf bo fin ang na. Mɛgi a gbaa latɛ wa yunɛ. 30Ruben nduko hapata hio ya wa nɛ tɔ ha mbwa nde: « Bema bo fin ang na. Nɛ mi bedung mɛng sising nde?»

31Hio ya mɔ Zozɛf gbɛa ma bafa sami, mbwa kuo hio la pɛ Zozɛf nɛ yuli ha zang tɔk sami ɛngi. 32Mbwa tomsa dede la pɛ Zozɛf ki ha bafa mbwa nɛ wen ɛngɛ: «Ɔ kpa mɔ ɛngɛ. Zɔk yo nɛ dedea mana yo nɛ la pɛ bewei pɛ mɛ na nde, ɛy mana way.» 33Zakob ingo laa, nɛ a tɔa: «Yo nɛ la pɛ bewei pɔm! Ma gdanga sari bɛlɛ baa Zozɛf nɛ yɔng wɛnɛ gbɛ yunɛ!» 34Zakob gba latɛ wa yunɛ, nɛ wɛnɛ yola ma la ngɔtɛ. Wɛnɛ hea bem pɛa ha zang dɔka yala. 35Hio bewei hinɛ hio bebhoko pɛa fɛt tɛa ha mboa wɛnɛ. Maa, a kafa hio mbɔla pɛ mbwa fɛt. A tɔa: «Mi be dung kanɛ ngɔtɛ teee gbo a yala ka mi be fe nak nɛ pata bem pɔm hazang kɔ fio.»

36Hio wi mɔ Madian gdonga Zozɛf ha Ezipte ha Potifar. Wei ɛngi nɛ ma kagama bulo pɛ kongapora, wɛnɛ dungɔ hazu hio nasara ka pam kongapora.