Angaramɔ 29

Zakob kpaa may hinɛ Rasɛl, bebhoko pɛ Laban

1Zakob baa fin wal mɔ nɛ ha wal guotɛ-swe. 2Ma swe a kpaa ma ndongli ha zang bɛlɛ, wɛnɛ zɔka fin hio ma zugili sami tar banɛ hio mbori fin ka ɔm tɛ sanga nɛ zundong ki. Hazu yo nɛ̂ li zang ndong ɛngɛ ka hio zugili sari ndɔng dung mɔ nɔ. Ɛ gdɔka nu zundong ɛngɛ nɛ ma gasa ta. 3Ka ɛ wesara hio sari ndɔng ha bhandi ndang, ɛ ilo ta gok zu li ɛngɛ yu nɛ̂, mbwa kuo lia ha yo ha mbwa. Ka mbwa nɔa fɛt kari, ɛ gdɔka nu lia fin nɛ ta ɛngi. 4Zakob ana hio zaoro-sami ndɔng nde: «Hio ya mi, ɛnɛ gu tɛ nɛ wal ndo?» Mbwa kiforo wen ha wɛnɛ: «Ɔ gu tɛ ha Haran.» 5A ana mbwa fin nde: «Ɛnɛ ingɔ Laban, bewei pɛ Nahor nde?» Mbwa tɔa: «Ɛy, ɔ ingɔ wɛnɛ.» 6Zakob ana mbwa nde: «Wɛnɛ gele nde?» Nɛ hio zaoro-sami ndɔng kiforo wen fin nde: «Ɛy, wɛnɛ gele. Zɔk bem pɛa mɔ bhoko Rasɛl ha tɛ nɛ hio sami pɛ bafa wa kɔ.» 7Zakob tɔa fin : «Ɔ bhɔna ha bango we-swe, ngimɔ wesiri hio zugili sari bo ka na. Ɛnɛ ha li ha mbwa, nɛ ngbɔsi mbwa nɛ̂ nɛ̂ ha bhandi yɔngamɔ pɛ mbwa.» 8Hio zaoro-sami ndɔng tɔa: «Ɔ lɛm de yo mɛgi sising na. Hazu, lɛma nde ɔ awesiri hio zugili namdalɛa fɛt. Hapata, ɔ be il ta gok zu li ɛngɛ yu nɛ̂. Mɛgi ɔ lɛma ha li ha mbwa mɔ nɔ.

9Zakob bhɔna tɔa wen hinɛ hio zaoro-sami ndɔng ha ngimɔ ka Rasɛl hɔa nɛ zugili hio sami pɛ bafa wa. Rasɛl fin nɛ̂ zaoro-sami. 10Ka Zakob zɔka Rasɛl, bem pɛ yang wa, hinɛ zugili hio sari pɛ yang wa Laban, nɛ hasa, a tiko tɛ̂ ha pɛtɛ ndɔng-li ki, nɛ il ta gok nu lia yu nɛ̂. Nɛ a gduo lia ha yo ha hio sami pɛ Laban. 11Zakob fuko Rasɛl he nɛ kwa. 12A tɔa ha Rasɛl nde: «Mi nɛ̂ nam pɛ bafa mɛ, bewei pɛ Rebeka.» Mɛgi Rasɛl Sɔa wi si ha le mɔ tɔ pata wen ɛngɛ ha bafa wa. 13Ka Laban zea nde Zakob, bem pɛ ya wa mɔ bhoko hɔa, a Sɔa wi tɛ̂ ha Sɔngsi Zakob. A fuko wɛnɛ hali sila wa, nɛ zɔbhi nû Zakob, hapata Laban kuo Zakob si nɛ̂ ha twa pɛa. Haki Zakob gbasa hio wi mɔ fɛt ka kpaa may hinɛ wɛnɛ. 14Laban tɔa ha Zakob nde: «Mi ingɔ nde mɛ nɛ̂ nam pɔm, mi nɛ mɛ, tɔktɛ ɔ nɛ̂ ndang.»

Zakob dea fioze ndang fɛt hinɛ Laban.

Sio may pɛ Zakob hinɛ hio bebhoko pɛ Laban

15Ma swe, Laban tɔa ha Zakob nde: «Yo bo nɛ̂ hawen ɛngɛ ka mɛ nɛ nam pɔm, ka mɛ bede tom ha si mi nɛ̂ tɛ̂ gelea na. Mɛ ngoya nde mi afuti mɛ nɛ ge tuka kɛamɔ pɛ mɛ nde?»

16Laban dungɔ nɛ hio bem pɛa mɔ bhoko bwa. Ling kay bebhokoa nɛ̂ Lea, nɛ pɔlɔmbɔa nɛ̂ Rasɛl. 17Lea zɔk mɔ nɛ dedea na, tangere Rasɛl nɛ tɛ̂ lɔka ha li hio wi. 18Zakob ngoya Rasɛl. A tɔa ha Laban nde: «Mi bede tom ha si mɛ kanɛ̂ bɛlɛ mɔrkɔ zanga bwa kade mi asi Rasɛl pɔlɔmbɔ bebhoko pɛ mɛ nɛ bhoko.» 19Laban kiforo wen nde: «Yo nɛ dedea mɔ ha wɛnɛ ha mɛ pen mɔ ha wɛnɛ ha ma mbing wei nɛtɛ. Mɛ bhɔn hinɛ mi.»

20Zakob dea tom ha si Laban kanɛ bɛlɛ mɔrkɔ zanga bwa mɔ si Rasɛl. Maa hio bɛlɛ ndɔng fɛt dung ha lî Zakob tuka bebe yala Sɔna hazu a ngoya Rasɛl. 21Hapata, Zakob tɔa ha Laban: «Ngimɔ tom pɔm kara. Ha mi ko pɔm, mi ngoya si may hinɛ wɛnɛ.»

22Laban saa mɔ ha hio wi mɔ lea fɛt, nɛ bhɔngiri ma gasa yɔngamɔ. 23Nɛ mboloze, Laban ngbosa kay bebhoko pɛa, Lea nɛ̂ nɛ̂ ha pɛ Zakob kade mbwa a ɔ mɔsoykisi nɛ may ha zang zɛ ɛngi. 24Laban kuo fin ma bebhoko bala pɛa ka ling wa nɛ̂ Zilpa, mɔ de tom ha bem pɛa Lea. 25Ka yo hɔa ha sutole, Zakob zɔka nde yo dungɔ nɛ̂ Lea ka bafa kuo tɛ̂ nɛ̂ ha wɛnɛ. A tɔa ha Laban nde: «Ɛngɛ nɛ ngetɛmɔ ka mɛ dea? Mi tɛ̂ de tom lɛm ha li mɛ mɔ si nɛ Rasɛl na nde? Mɛ ɔsiri mi ha wen ge nde?» 26Laban kiforo wen ha Zakob: «Ha pɛɔ, ɛ lɛm si ma bebhoko Sɔngsi nɛ gasa ya na. Deamɔ mɛgi bo nɛ̂ ndɔki deamɔ pɛ ɔ na. 27Mɛ karsi yenga siomay ɛngɛ hinɛ kay bebhoko ɛngɛ Sɔngsi hing, hapata ɔ beha pɔlɔmbɔ bebhokoa ha mɛ. Maa lɛma nde mɛ ade tom ha mi kanɛ bɛlɛ mɔrkɔ zanga bwa fin gding.» 28Zakob mɛkara nɛ wen pɛ Laban. A karsa yenga sio bhoko hinɛ Lea. Hapata, Laban haa Rasɛl ha wɛnɛ tuka ko. 29Laban kuo Bila mɔ dung wantom pɛ bem pɛa Rasɛl. 30Zakob dungɔ hinɛ Rasɛl, nɛ a ngoya wɛnɛ pen Lea. Mɛgi a dea tom ha Laban mɔ hɔ bɛlɛ mɔrkɔ zanga bwa fin.

Hio bem pɛ Zakob

31Ka Wankpoo zɔka nde ɛ ngoy Lea pentɛ na, a haa ha wɛnɛ bhɛ. Nɛ Lea bhɛa hio bem. Maa pɛ Rasɛl, Sɔ tɛ̂ ha bhɛ wɛnɛ na. 32Lea baa zang. A bhɛa bewei ndang. A gbala wɛnɛ nɛ ling Ruben1. Hazu a tɔa nde: «Wankpoo zɔka foy pɔm. Sising wei mi bengoy mi.»

33Lea baa fin ma zang, nɛ a bhɛa nɛ bewei. A tɔa : «Ɛy Wankpoo ingɔ nde ɛ ngoy mi na. Yo nɛ̂ ɛngi ka wɛnɛ haa nɛ ma mbing bewei ha mi.» A gdea ling wa Simeon2.

34Lea baa fin zang nɛ bhɛ nɛ zetar bewei mɛgi a tɔa: «Mi bhɛa hio bewei tar ha wei mi. Mɔ sising a beha tɛ wa ha mi. Yo nɛ̂ ɛngi ka Zakob gdea ling Levi3 hazu bem ɛngɛ.

35Lea baa ma zang nɛ wɛnɛ bhɛa ma bewei fin. A tɔa: «Mɔ sising mi be be gima lukisi nɛ Wankpoo.» Yo nɛ̂ ɛngi ka wɛnɛ haa nɛ ling Zuda4 ha bem ɛngi.

Hapata Lea bhɛ fin na.