Angaramɔ 30

1Ka Rasɛl zɔka nde ɛ nɛ̂ nakomba, a angara dea gula hatɛ gasa ya wa. Mɛgi a tɔa ha Zakob: «De nde mi abhɛ kina mi befe!» 2Ngambi dea Zakob sungiri nɛ Rasɛl, nɛ a tɔa: «Mi nɛ̂ Sɔ nde? Yo nɛ̂ wɛnɛ adolsi mɛ nɛ hio bem!» 3Rasɛl kiforowen nde: ‹‹Mɛ ku wantom pɔm Bila. Ɔnu hinɛ wɛnɛ1 mɔ tɔ nde wɛnɛ abhɛ. Mi be pam bema nɛ pɔm. Mɛgi nɛ wal wa, mi fin, mi lɛma kpa hio bem.» 4Rasɛl kuo wantom pɛa haa Zakob. Nɛ Zakob dungo hinɛ wɛnɛ.

5Bila baa zang, nɛ a bhɛa nɛ bewei ha Zakob. 6Rasɛl tɔa: « Sɔ gɔna kita pɔm kari, a zea gɔamɔ pɔm. Nɛ ha mi fin, bewei ndang. Yo nɛ̂ ɛngi ka wɛnɛ gdea ling Dan2 hazu bem ki.

7Bila, wantom pɛ Rasɛl baa fin zang. A bhɛa zebwa bewei ha Zakob. 8Rasɛl tɔa: «Mi bio ya mi nɛ ngaya tetete, nɛ mi kpaa mɔa kari.» Mɛgi a haa ling Neftali3 ha bem ɛngɛ.

9Ka Lea zɔka nde ɛ bhɛ fin na, a kuo wantom pɛa Zilpa, nɛ haa wɛnɛ ha Zakob nɛ bhoko. 10Zilpa, wantom pɛ Lea bhɛa ma bewei ha Zakob. 11Lea tɔa: «Ngete dede Sɔngsi nde!» Mɛgi a haa ling Gad4 ha wɛnɛ.

12Zilpa, wantom pɛ Lea bhɛa fin zebwa bewei ha Zakob. 13Lea tɔa: « Ngete dede kpamɔ ha mi nde! Sising hio bhoko betɔ ha mi nde mi nɛ dedea.» Mɛgi wɛnɛ haa ling Azer5 ha bema.

14Ma swe, ha ngimɔ bhio kpal ble, Ruben nɛa ha fɔ. Wɛnɛ kpaa ma wayate mbonga ngoy6, nɛ a kuo yo pe nɛ̂ ha nana wa Lea. Mɛgi Rasɛl tɔa ha Lea: «Mi baa nanga mɛ fɛt, mɛ haa ma wayate mbonga ngoy ka bem pɛ mɛ kaya tɛ̂ nɛ̂ kɛ ha mi wa.» 15Lea kiforo wen ha Rasɛl: «Mɛ dola wei mi kari. Yo tɛ̂ lɛm mɛ na nde? Mɛ ngoya kay hio wayate mbonga ngoy pɛ bem pɔm fin!» Rasɛl tɔa fin: «Mɛgi, ka mɛ haa mi hio wayate ngoy ɛngɛ, mi begde wal ha Zakob mɔ ɔ yala hinɛ mɛ mɛsɛ nɛ zɛ ɛngɛ.»

16Mbolo ka Zakob pea ha wal fɔ, Lea gboa, nɛ ha Sɔngsi wa nɛ tɔa: «Mɛ be ɔ hinɛ mi mɛsɛ nɛ zɛ ɛngɛ. Hazu mi hɛa mɛ nɛ hio wayate mbonga ngoy pɛ bewei pɔm.» Mɛgi ka yo hɔa ha zɛa, Zakob ɔa hinɛ Lea. 17Sɔ zea gɔamɔ pɛ Lea. Lea baa zang nɛ a bhɛa nɛ ma zemɔrkɔ bewei ha Zakob. 18Lea tɔa : « Sɔ kɛa mi hazu mi haa wantom pɔm ha wei mi.» Mɛgi wɛnɛ haa ling Izakar7 ha bem ɛngɛ.

19Lea baa ma zang fin. A bhɛa nɛ zemɔrkɔ zang ndang bewei ha Zakob. 20A tɔa: «Sɔ haa dede sadaka ha mi! Mɔ ɛngɛ sising, wei mi be lukisi mi hazu mi bhɛa hio bewei mɔrkɔ zanga ndang ha wɛnɛ!» Mɛgi, Lea haa ling Zabulon8 ha bem ɛngi. 21Hapata ngimɔ nɛ dɔka, Lea bhɛa ma bebhoko nɛ wɛnɛ haa ling Dina ha wɛnɛ.

22Mɛgi, Sɔ gbatazu wa nɛ Rasɛl. A zea gɔamɔ pɛa nɛ agbosara wal bhɛ pɛ Rasɛl. 23Rasɛl baa zang nɛ bhɛa nɛ bewei. A tɔa: «Oeba, Sɔ guo foy pɔm yunɛ!» 24Wɛnɛ haa ling Zozɛf9 ha bema, nɛ a tɔa: «Lɛma nde Wankpoo aha ma mbing bewei ha mi fin.»

Zakob tɛ bo nɛ̂ wankpamɔ

25Hapata bhɛ pɛ Zozɛf, Zakob tɔa ha Laban nde: «Mɛ haa wal ha mi mɔ si ha pɔm, ha zang le pɔm. 26Ha wal ha mi mɔ si nɛ hio ko mi banɛ hio bem pɔm fɛt. Hazu, yo nɛ̂ ha wen zu mbwa ka mi bade nɛ tom ha si mɛ. Mɛ ingɔ tom fɛt ka mi dea ha pɛ mɛ.» 27Laban kiforo wen nde: «Mɛ zɔk mi nɛ dede li, nɛ mɛ ze mi. Hio tanamɔ pɔm osa ha mi nde Wankpoo wola dede wen hazu mi ha wen zu mɛ. 28Mɛ osi ha mi mɔ ka mi lɛma kɛ nɛ mɛ, mi beha yo ha mɛ.» 29Zakob tɔa ha wɛnɛ nde: «Mɛ ingɔ wal ka mi dea nɛ tom hasi mɛ, nɛ wal ka hio zugili namdalɛ pɛ mɛ kpɔa nɛ tɛ hawenzu mi. 30Sɔngsi nɛ tɛa pɔm, mɛ badungse nɛ hio wi mɔ tikiring. Sising, mɛ nɛ hio dɔka mɔ, nɛ Wankpoo wola dede wen hazu mɛ ha wen mi ka tɛa hasi mɛ. Maa ngimɔa tɛ lɛm nde mi ade tom hawen zu hio nam pɔm na nde?» 31Laban anamɔ nde: «Mɛ ngoya nde mi ahaa ge ha mɛ nde?» Zakob kiforowen nde: «Mɛ haa mamɔ ndang ha mi na. Ka mɛ mɛkara nɛ mɔ ka mi be ani ha kɔ mɛ, mi nɛ sanga mɔ zɔk mɔ hazu hio zugili namdalɛ pɛ mɛ, nɛ mɔ pam mbwa tuka mɔ Sɔngsi. 32Mɛsɛ, mi be pam hio namdalɛ pɛ mɛ sanga sanga nɛ mi. Mi be gde nɛtɛ hio sami fɛt ka dafu hio bebe mana gasa mɔ dung ha tɛ mbwa, hio sami ka dung nɛ hio tu dafu hatɛ mbwa, hio mbori ka dung nɛ hio bebe mana gasa dafu. Mbwa be dung nɛ kɛamɔ pɔm hali tom ka mi dea ha mɛ. 33Bin, mɛ be zɔk mana mi nɛ nzeng nde, ha zɔka hio namdalɛ ka mɛ haa ha mi. Mɛ be zɔk nde hio mbori fɛt ka bo nɛ hio dafumɔ hatɛ na, mana hio sami ka bo nɛ tua na, bo nɛ pɔm na, mi zuo mbwa zu.» 34Laban kiforowen nde: «Yo nɛ dedea! Mi mɛkara wen ka tɔa.»

35Mɛgi, ha ndangte yala ɛngi, Laban gdea nɛtɛ hio bafambu mbori ka hio dafu mɔ dung nɛ wal hatɛ mbwa, hio ɛ ndɔng ka hio dafu hatɛ mbwa, hio nanambu mbori ka hio bebe mana gasa dafu hatɛ mbwa, banɛ hio sami ka dafu tɛ mbwa nɛ tua mana ka dung nɛ hio bu dafu hatɛ tikiring. A kaya mbwa fɛt haa hio bewei pɛa. 36Mɛgi a tomsa mbwa ha mabhandi ka dung nɛ nyɛa nɛ Zakob ka pam hio olo zugili namdalɛ pɛ Laban. Bhandia baa yala tar mɔ nɛanɔ.

37Mɛgi Zakob kaya hio tɔla gbakɔte tar nɛtɛ nɛtɛ mɔ hio te ka ɛ saa nde: pop, amand banɛ platane. A ola kokoa nɛ bhala tuka nde dafu adung hatɛa. 38Wɛnɛ gdea hio gbakɔte ndɔng ha zang kpongi10 ha lî hio sami hinɛ hio mbori. Hazu hio sari dang may pentɛ ha ngimɔ ka mbwa tɛ̂ nɛ gili ha nɔa li ha zang kpongi. 39Mɛgi hio sari ndɔng danga may hali hio gbakɔte dafu ndɔng. Nɛ hio zɔnga mbori abhɛa hio bembori ka dung nɛ hio dafu wal banɛ hio bebe mana hio gasa dafu hatɛ mbwa. 40Zakob gdea hio sami nɛtɛ. A pama nɛtɛ hio sami pɛ Laban ka dung nɛ dafu wal hatɛ mbwa, banɛ hio ɛ ndɔng ka dung nɛ tua.

Mɛgi, wɛnɛ pama hio zugili namdalɛ pɛa nɛtɛ. A tɛ wesiri mbwa fɛt hamay nɛ hio zugili sari pɛ Laban na. 41Swe fɛt ka hio sari dafutɛ ndɔng ha danga may, Zakob kaya hio gbakɔte ndɔng nɛ gde yo hali mbwa ha zang kpongi li pɛ mbwa kade mbwa adang may hapɛtɛ hio te ndɔng. 42Maa ka hio sari ka dung nɛ ɔkaa ngoy mɔ dang may, Zakob gde hio gbakɔte ndɔng hali mbwa na. Mɛgi, hio ɔkaa sari tɛ bo nɛ̂ pɛ Laban nɛ hio lɔka sari nɛ̂ pɛ Zakob. Zakob yuomɔ hakɔ Laban.

Zakob yuomɔ hakɔ Laban

43Zakob tɛ bo nɛ̂ ma gasa wankpamɔ. Wɛnɛ nɛ hio dɔka zugili sami banɛ hio mbori, hio wantom mɔ wei nɛ mɔ bhoko, hio zambala hinɛ hio toyfok.