Angaramɔ 1

Sɔ dea nzan hinɛ hio wi mɔ ka dung nɛ zutunɔ.

1Ha angara nzan, Sɔ dea ngɔn nɛ nu.

2Nu tɛ̂ bo nɛ ma mɔ ha zua ndang na. Dungɔ nɛ̂ ngɛngɛngɛ tutum ha zu hio gduko li, maa Sɔtɛ pɛ Sɔ dungɔ ha yuo ha zu hio li. 3Sɔ tɔa: «Lɛma nde saamɔ adung ha yo! Nɛ saamɔ hɔa.» 4Sɔ zɔka nde saamɔ dungɔ nɛ dedea, nɛ Sɔ kɛtana soko saamɔ nɛ tutum. 5Sɔ saa ling saamɔ nde «swe», nɛ wɛnɛ saa ling tutum nde «zɛ». Mbolo dungɔ ang, nɛ sutole dungɔ ang: Mɛgi, yo dungɔ nɛ̂ bosi yala.

6Sɔ tɔa: «Lɛma nde ma mɔ adung ha soko hio li mɔ kɛtini soko hio li mɔ ngɔn nɛ hio li mɔ nu.» 7Mɛgi, Sɔ dea mɔ ɛngi ka kɛtana hio li ka dung ha si ngɔn, nɛ hio li ka dung ha zu ngɔn. Yo hɔa mɛgi tuka a tɔa. 8Sɔ sa ling mɔ ɛngi nde «lîswe». Mbolo dungɔ ang, nɛ sutole dungɔ ang: Yo dungɔ nɛ̂ zebwa yala.

9Sɔ tɔa: «Lɛma nde hio li ka dung ha si ngɔn awesiri may ha bhandi ndang, nɛ bhandi ka dung nɛ kota agbasitɛ. Yo hɔa mɛgi tuka a tɔa. 10Sɔ sa ling hio bhandi ka dung nɛ kota nde «nu», nɛ wɛnɛ sa ling hio gasa li nde hio nanali. Sɔ zɔka nde mɔ ɛngi dungɔ nɛ dedea. 11Hapata, Sɔ tɔa nde: «Lɛma nde hio bɛlɛ nɛ hio te nɛtɛ nɛtɛ adon ha zu nu. Hio bɛlɛ ka dung nɛ waya, hio te ka way nɛ tili hio waya ndang ndang fɛt ha zu nu, nɛ hio wayamɔ mɔ gun ha zua.» Yo hɔa mɛgi tuka a tɔa. 12Nu dea nde hio bɛlɛ, nɛ hio te akpɔtɛ, tilia nɛtɛ nɛtɛ. Hio bɛlɛ ka dung nɛ waya mɔ gun, nɛ hio te ka way, nɛ ka dung nɛ̂ mɔ gun gun, nɛ tilia nɛtɛ nɛtɛ. Sɔ zɔka nde mɔ ɛngi dungɔ nɛ dedea. 13Mbolo hɔa pen, nɛ sutole hɔa: Yo nɛ̂ zetar yala.

14Sɔ tɔa: «Lɛma nde hio wi mɔ ka baa we ha lîswe ha ngɔn agbo ha dɛl, mɔ kɛtini soko swe nɛ zɛ. Yo adung nɛ̂ hio wi mɔ weka ka osi hio ngimɔ tuka ngimɔ gɔmfɔ, ngimɔ de hio yenga, nɛ̂ nɛ̂, hio yala, nɛ hio bɛlɛ. 15Lɛma nde hio wi mɔ ka baa we ha lîswe ha ngɔn aba we ha zu nu.» Yo hɔa mɛgi tuka a tɔa. 16Sɔ dea hio gasa mɔ mɔ baa we bwa. Wɛnɛ dea nde gasa mɔ mɔ dung wan nɛ swe, nɛ bebea mɔ dung wan nɛ zɛ. A dea fin hio Sɔla. 17Sɔ gdea mbwa bwa ha ngɔn mɔ baa ha zu nu, 18mɔ dung wan nɛ swe nɛ mɔ dung wan nɛ zɛ, mɔ kɛtini soko saamɔ hinɛ tutum. Sɔ zɔka nde mɔ ɛngi dungɔ nɛ dedea. 19Mbolo hɔa pen, nɛ sutole hɔa. Yo nɛ̂ zenar yala.

20Sɔ tɔa: «Lɛma nde hio wi mɔ ka dung nɛ zutunɔ adon nɛ dɔka ha si li, nɛ ha zu nu, hio nɔy abuy ha ngɔn ha si lîswe.» 21Sɔ dea hio gasa sari nɛtɛ-nɛtɛ mɔ hio nanali, nɛ hio wi mɔ zutunɔ fɛt ka nɛ̂ nɔ nɛ dɔka ha si li, wɛnɛ dea hio nɔy fɛt ka buy nɛ bhaka nɛtɛ-nɛtɛ. Sɔ zɔka nde mɔ ɛngi nɛ dedea. 22Sɔ wola dede wen ha zu mbwa, nɛ a tɔa: «Ɛnɛ abhɛ bem, gili ɛnɛ adung nɛ dɔka, nɛ ɛnɛ adon hio nanali, nɛ hio nɔy adung nɛ dɔka ha zu nu fɛt.» 23Mbolo hɔa pen, nɛ sutole hɔa. Yo nɛ̂ zemɔrkɔ yala.

24Sɔ tɔa: «Lɛma nde nu adon nɛ hio tili sari nɛtɛ-nɛtɛ: hio sari le ka ɛ pam, nɛ hio sari ka hay nɛ nu, nɛ hio sari kumbɔ.» Yo hɔa mɛgi tuka a tɔa. 25Sɔ dea hio tili sari ha nu nɛtɛ-nɛtɛ, hio tili sari le ka ɛ pam nɛtɛ-nɛtɛ, nɛ hio tili sari ka hay nɛ nu nɛtɛ-nɛtɛ fɛt. Sɔ zɔka nde mɔ ɛngi nɛ dedea.

26Sɔ tɔa: «Ɔ de wi nɛ zizitɛ ɔ ka baa may nɛ ɔ, kade wɛnɛ adung ha zu hio kɔyɔ mɔ nanali, ha zu hio nɔy mɔ gɔn, ha zu hio sari le, nɛ ha zu hio sari ka hay nɛ nu ha zu nu fɛt.»

27Sɔ dea wi nɛ zizitɛ wa.

nɛ mbwa baa may nɛ tɛ̂ zizitɛ Sɔ,

Wɛnɛ dea mbwa, wei hinɛ bhoko.

28Sɔ wɔla dede wen ha zu mbwa, nɛ wɛnɛ tɔa: «Ɛnɛ dung nɛ bhɛ, nɛ ɛnɛ bhɛ nɛ dɔka, ɛnɛ don nu, ɛnɛ de nde mbwa adung ha si ɛnɛ. Ɛnɛ dung ha zu hio kɔyɔ mɔ nanali, ha zu hio nɔy mɔ ngɔn, nɛ ha zu hio sari fɛt ka hay nɛ nu.» 29Sɔ tɔa: «Mi haa ɛnɛ hio bɛlɛ fɛt ka dung nɛ hio waya mɔ gun, nɛ ka dung ha zu nu fɛt, hinɛ hio te fɛt ka dung nɛ waya mɔ gun. Yo bedung nɛ̂ yɔngamɔ pɛ ɛnɛ.» 30Mi haa hio bɛlɛ fɛt ha ɛnɛ tuka yɔngamɔ pɛ ɛnɛ, ha hio sari mɔ zu nu fɛt, ha hio nɔy ka buy ha ngɔn fɛt, ha hio wi mɔ ka hay nɛ nu fɛt, nɛ hio wi mɔ ka ɔm.» Yo hɔa mɛgi tuka a tɔa. 31Mɛgi, Sɔ zɔka hio wi mɔ fɛt ka wɛnɛ dea, nɛ hio wi mɔ ndɔng fɛt nɛ tɛ̂ dedea. Mbolo hɔa pen, nɛ sutole hɔa: Yo dungɔ nɛ̂ zemɔrkɔ zanga ndang yala.