گِنتی

گِنتی

پیش لفظ

اِیں کتاب ءچ او سبھ کُجھ بیان کیتا گئے جیہڑا اُنہاں چالیہہ سالاں دے دوران تھیّا جڈاں بنی اِسرائیل مِصر ءچوں نِکلنڑ تُوں بعد بیابان ءچ سِینا پہاڑ تُوں گِھن تے کنعان مُلک تئیں سفرکریندے پئے ہَن۔

اِیں کتاب دا ناں ہِک خاص کم دو اِشارہ کریندے، یعنی اُوں مردم شماری دو جیہڑی موسیٰ بنی اِسرائیل دے روانہ تھیوݨ تُوں پہلے سِینا پہاڑ اُتے کیتی تے ڈُوجھی مردم شماری دو وی جیہڑی اُوں تقریباً چالیہہ سال بعد یردن دریا دے مشرق ءچ موآب ءچ کیتی ہئی۔

کتاب دے ترے حصے ہِن۔ پہلے حصے یعنی 1-10 باب ءچ رب العالمین مُوسیٰ کُوں لوکاں دی گِنتری کرݨ دا حُکم ڈیندے۔ وَل خُدا مُوسیٰ کُوں بنی اِسرائیل دے ڈیرے لاوݨ تے لاویاں ءچ اُنہاں دیاں ذمہ داریاں تقسیم کرݨ دی ہدایت کریندے۔ پہلے حصے دے آخر ءچ سبھ لوک فسح دی عید منیندن تے رب العالمین کُوں قُربانیاں پیش کریندن۔

ڈُوجھے حصے یعنی 10-21 باب ءچ او واقعات لِکھے ہِن جیہڑے اُوں ویلے تھئے جِیں ویلے بنی اِسرائیل یردن دریا دے مشرق ءچ آباد موآب دو سفر کریندے پئے ہَن۔ بیابان ءچوں لنگھنڑ بہُوں مُشکل ہا تے لوک ولا ولا مُوسیٰ تے خُدا دے خلاف شکایت کریندے تے بغاوت وی کریندے ریہے۔ جِیں ویلے بنی اِسرائیل اُتھوں دیاں بئیاں قوماں دے بارے ءچ سُنڑیا تاں اُنہاں کنعان مُلک ءچ وڑن تُوں اِنکار کر ڈِتا۔ اِیں واسطے رب العالمین اُنہاں کُوں سزا ڈے تے چالیہہ سال تئیں بیابان ءچ اوارہ پِھرݨ ڈِتا۔ کتاب دا ایہ حصہ اِیں گالھ اُتے ختم تھیندے جو بنی اِسرائیل موآب دے مُلک ءچ پِسگہ پہاڑ دے نیڑے ڈیرے لائے ہوئے ہَن۔

کتاب دے تریجھے حصے یعنی 21-36 باب ءچ بنی اِسرائیل یردن دریا دے مشرق ءچ پُجدن تے شمال ءچ گلیل دی جھیل تئیں امُوریاں دے سارے علاقے اُتے قبضہ کریندن تے کنعان مُلک اُتے قبضہ کرݨ دی تیاری کریندن۔ پر کُجھ اِسرائیلیاں یردن دریا دے مشرق ءچ راہوݨ دا فیصلہ کر گِھدا۔ جِیں ویلے بنی اِسرائیل دی ڈُوجھی گِنتری تھئی تاں رب العالمین یشُوع کُوں بنی اِسرائیل دا اگلا قاضی بنڑا ڈِتا۔

گِنتی دی کتاب بنی اِسرائیل یعنی ایجھے لوکاں دے بارے ءچ ہے جیہڑے مُصیبتاں دے سببّوں ڈردے تے بے دل تھی ویندے ہَن تے خُدا تے مُوسیٰ ڈُوہائیں دے خلاف بغاوت کریندے ہَن۔ پر اساں ڈیدھے ہیں جو اُنہاں دی نافرمانی تے کمزوری دے باوجود خُدا باقاعدگی نال اُنہاں دی ڈیکھ بھال کریندے۔