گِنتی 26

ڈُوجھی مردم شماری

1وبا دے بعد رب العالمین مُوسیٰ تے ہارُون کاہِن دے پوتر الِیعزر کُوں آکھیا،

2”بنی اِسرائیل دی یکی جماعت دی گِنتری اُنہاں دے آبائی گھرانڑیاں دے مطابق کرائے۔ اُنہاں یکے مرداں کُوں گِنڑو جیہڑے وِیہہ سال دے یا اِیں تُوں ودھ ہِن تے جیہڑے جنگ کڑن دے قابل ہِن۔“

3اِیں واسطے مُوسیٰ تے الِیعزر کاہِن موآب دے میدانی علاقے ءچ یرِیحُو دے سامنڑے پر یردن دریا دے مشرقی کنارے تے بنی اِسرائیل کُوں ڈسایا جو 4”اُنہاں یکے مرداں کُوں گِنڑو جیہڑے وِیہہ سال یا اِیں تُوں ودھ دے ہِن جِینویں رب العالمین مُوسیٰ کُوں حُکم ڈِتا ہا۔“

بنی اِسرائیل دے جیہڑے بندے مِصر ءچوں نِکلے ہَن، او ایہ ہِن۔

بنی رُوبِن

5-6بنی اِسرائیل دا پلوٹھا رُوبِن ہا۔ رُوبِن دے پوتراں حنُوک، فلُّو، حصرون تے کرمی تُوں چار خاندان یعنی بنی حنُوک، بنی فلُّو، بنی حصرون تے بنی کرمی نِکلے ہَن۔ 7ایہ رُوبن دے خاندان ہِن تے اُوندے قبیلے دے ترتالیہہ ہزار، سَت سو ترِیح مرد ہَن۔

8فلُّو دا پوتر الِیاب ہا 9تے الِیاب دے پوتر نمُوایل، داتن تے اَبِیرام ہَن۔

داتن تے اَبِیرام جماعت دے اُوہو سردار ہَن جِنہاں قورح دے گروہ سمیت مُوسیٰ تے ہارُون دی مخالفت ءچ رب العالمین نال بغاوت کیتی ہئی۔ 10اُوں ویلے زمین آپنڑا مُنہ کھول تے اُنہاں کُوں قورح سمیت نِگل گِھدا ہا۔ اُوندے نال اُوندے اڈھائی سو ساتھی وی مر گئے ہَن جِیں ویلے بھاہ اُنہاں کُوں ساڑ تے سواہ کر ڈِتا۔ اِینویں او یکے اِسرائیل کیتے عِبرت دا نشان بنڑ گئے ہَن۔ 11پر قورح دی پُوری نسل مِٹائی نہ گئی ہئی۔

بنی شمعون

12-13شمعون دے پوتراں نمُوایل، یمِین، یکِین، زارح تے ساؤل تُوں ایہ پنج خاندان یعنی بنی نمُوایل، بنی یمِین، بنی یکِین، بنی زارح، تے بنی ساؤل نِکلے ہَن۔ 14شمعون دے خاندان ایہ ہَن تے اُوندے قبیلے دے باویہہ ہزار، ڈُو سو مرد ہَن۔

بنی جد

15-17جد دے پوتراں صفون، حَجّی، سُونی، اُزنی، عیری، اُرود تے اریلی تُوں ایہ سَت خاندان یعنی بنی صفون، بنی حَجّی، بنی سُونی، بنی اُزنی، بنی عیری، بنی اُرود تے بنی اریلی نِکلے ہَن۔ 18جد دے خاندان ایہ ہَن تے اُوندے قبیلے دے چالیہہ ہزار پنج سو مرد ہَن۔

بنی یہُوداہ

19-21یہُوداہ دے ڈُو پوتر عیر تے اونان مِصر آوݨ تُوں پہلے کنعان ءچ مر گئے ہَن۔ یہُوداہ دے باقی پوتر سیلہ، فارص تے زارح تُوں ایہ ترے خاندان یعنی بنی سیلہ، بنی فارص تے بنی زارح نِکلے ہَن۔

فارص دے ڈُو پوتراں حصرون تے حمُول تُوں ایہ ڈُو خاندان یعنی بنی حصرون تے بنی حمُول نِکلے ہَن۔ 22یہُوداہ دے خاندان ایہ ہَن تے اُوندے قبیلے دے چھہتر ہزار پنج سو مرد ہَن۔

بنی اِشکار

23-24اِشکار دے پوتراں تولع، فُوّہ، یسُوب تے سِمرون تُوں ایہ چار خاندان یعنی بنی تولع، بنی فُوّہ، بنی یسُوب تے بنی سِمرون نِکلے ہَن۔ 25اِشکار دے خاندان ایہ ہَن تے اُوندے قبیلے دے چوریٹھ ہزار ترے سو مرد ہَن۔

بنی زبُولُون

26زبُولُون دے پوتراں سرد، ایلون تے یَہلی ایل تُوں ایہ ترے خاندان یعنی بنی سرد، بنی ایلون تے بنی یَہلی ایل نِکلے ہَن۔ 27زبُولُون دے خاندان ایہ ہَن تے اُوندے قبیلے دے سَٹھ ہزار پنج سو مرد ہَن۔

بنی یُوسف

28یُوسف دے ڈُو پوتراں منسّی تے اِفرائِیم دے اَنج اَنج قبیلیاں دے خاندان ایہ ہَن:

بنی منسّی

29-33منسّی دے پوتر مکِیر تُوں بنی مکِیر نِکلے، مکِیر دے پوتر جِلعاد تُوں بنی جِلعاد نِکلے ہَن۔ جِلعاد دے پوتراں اِیعزر، خلق، اَسری ایل، سِکم، سمِیدع تے حِفر تُوں ایہ چِھی خاندان یعنی بنی اِیعزر، بنی خلق، بنی اَسری ایل، بنی سِکم، بنی سمِیدع تے بنی حِفر نِکلے ہَن۔

صِلافحاد بِن حِفر دا کوئی پوتر نہ ہا پر پنج دِھیاں مَحلاہ، نُوعاہ، حُجلاہ، مِلکاہ تے تِرضاہ ہَن۔ 34منسّی دے خاندان ایہ ہَن تے اُوندے قبیلے دے بوِنجھا ہزار سَت سو مرد ہَن۔

بنی اِفرائِیم

35-36اِفرائِیم دے پوتراں سُوتلح، بکر تے تحن تُوں ایہ ترے خاندان یعنی بنی سُوتلح، بنی بکر تے بنی تحن نِکلے ہَن۔ سُوتلح دے پوتر عِیران تُوں بنی عِیران نِکلے ہَن۔ ایہ یکے یُوسف دے پوتراں دے خاندان ہَن۔ 37اِفرائِیم دے خاندان ایہ ہَن تے اُوندے قبیلے دے بترِیح ہزار پنج سو مرد ہَن۔

بنی بِنیمِین

38-40بِنیمِین دے پوتراں بالع، اَشبیل، اَخِیرام، سُوفام تے حُوفام تُوں ایہ پنج خاندان یعنی بنی بالع، بنی اَشبیل، بنی اَخِیرام، بنی سُوفام تے بنی حُوفام نِکلے ہَن۔ بالع دے ڈُو پوتراں اَرد تے نعمان تُوں بنی اَرد تے بنی نعمان نِکلے ہَن۔ 41بِنیمِین دے خاندان ایہ ہَن تے اُوندے قبیلے دے پِنتالیہہ ہزار چِھی سو مرد ہَن۔

بنی دان

42بنی دان دے یکے لوک دان دے پوتر سُوحام تُوں نِکلے ہَن، اِیں پارُوں یکے بنی سُوحام ہَن۔ 43دان دے خاندان ایہ ہَن تے اُوندے قبیلے دے چوریٹھ ہزار چار سو مرد ہَن۔

بنی آشر

44-46آشر دے پوتراں یِمنہ، اِسوی تے برِیعاہ تُوں ایہ ترے خاندان یعنی بنی یِمنہ، بنی اِسوی تے بنی برِیعاہ نِکلے ہَن۔ برِیعاہ دے پوتراں حِبر تے مَلکی ایل تُوں بنی حِبر تے بنی مَلکی ایل نِکلے ہَن۔ آشر دی ہِک دِھی ہئی جِیندا ناں سِرہ ہا۔ 47آشر دے خاندان ایہ ہَن تے اُوندے قبیلے دے تِرونجھاہ ہزار چار سو مرد ہَن۔

بنی نفتالی

48-49نفتالی دے پوتراں یحصی ایل، جُونی، یصر تے سِلیم تُوں ایہ چار خاندان یعنی بنی یحصی ایل، بنی جُونی، بنی یصر تے بنی سِلیم نِکلے ہَن۔ 50نفتالی دے خاندان ایہ ہَن تے اُوندے قبیلے دے پِنتالیہہ ہزار چار سو مرد ہَن۔

51بنی اِسرائیل دے مرداں دی کُل گِنتری چِھی لکھ، ہِک ہزار، سَت سو ترِیح ہئی۔

52رب العالمین مُوسیٰ کُوں آکھیا، 53”اِنہاں کُوں اِنہاں دے نانواں دی گِنتری دے مطابق کنعان مُلک دی زمین میراث دے طور تے ونڈی ونجے۔ 54وڈے قبیلیاں کُوں زیادہ زمین ڈِتی ونجے تے چھوٹے قبیلیاں کُوں گھٹ۔ ہر قبیلے دا علاقہ اُوندی گِنتری دے مطابق ہووے۔ 55پرچی پا تے فیصلہ کیتا ونجے جو ہر قبیلے کُوں کِتھاں زمین مِلسی پر قبیلیاں دے افراد دی گِنتری دے حساب نال۔ 56ہر قبیلے ءچ میراث قُرعے دے مطابق تقسیم کیتی ونجے بھانویں او وڈا ہووے یا چھوٹا۔“

57لاوی دے پوتراں جیرسون، قہات تے مراری تُوں ایہ ترے خاندان یعنی بنی جیرسون، بنی قہات تے بنی مراری نِکلے ہَن۔ 58تے بنی لِبنی، بنی حبرون، بنی مَحلی، بنی مُوشی تے بنی قورح وی لاوی دے خاندان ءچوں ہَن۔

عمرام قہات دی نسل ءچوں ہا۔ 59عمرام لاوی دے قبیلے دی ہِک عورت یوکبد نال پرنیجیا جیہڑی مِصر ءچ جمی ہئی۔ اُوندے ڈُو پوتر ہارُون تے مُوسیٰ تے ہِک دِھی مریم جمی۔ 60ہارُون دے پوتر ندب، ابِیہُو، الِیعزر تے اِتمر ہَن۔ 61پر ندب تے ابِیہُو رب العالمین کُوں خوشبودار مصالحے دا ناجائز نذرانہ1 پیش کرݨ پارُوں مر گئے ہَن۔ 62لاویاں دے مرداں دی کُل گِنتری تریویہہ ہزار ہئی۔ اِنہاں ءچ او یکے شامل ہَن جیہڑے ہِک مہینہ یا اِیں تُوں ودھ ہَن۔ اُنہاں کُوں ڈُوجھے بنی اِسرائیل تُوں اَنج کر تے گِنڑیا گِیا کیوں جو اُنہاں کُوں اِسرائیل ءچ وراثتی زمین نہ مِلنڑی ہئی۔

63مُوسیٰ تے الِیعزر کاہِن موآب دے میدانی علاقے ءچ یرِیحُو دے سامنڑے تے یردن دریا دے مشرقی کنارے اُتے جِنہاں اِسرائیلیاں دی گِنتری کیتی، او اِیہو ہِن۔ 64پر بنی اِسرائیل دے جِنہاں بندیاں کُوں مُوسیٰ تے ہارُون کاہِن پہلی پھیری سِینا دے بیابان ءچ گِنڑیا ہا، اُنہاں ءچوں ہِک وی نہ بچیا ہا۔ 65کیوں جو رب العالمین آکھیا ہا جو او یکے بیابان ءچ مر ویسن تے اِینویں ای تھیّا2۔ صرف کالِب بِن یفُنّہ تے یشُوع بِن نُون زندہ ریہے۔