گِنتی 25

بنی موآب بنی اِسرائیل کُوں گُناہ ءچ پھسیندن

1جِیں ویلے بنی اِسرائیل شِطِیم ءچ راہندے ہَن تاں کُجھ مرد موآبی عورتاں نال زِنا کاری کرݨ لگ پئے۔ 2ایہ موآبی عورتاں آپنڑے دیوتیاں کُوں قُربانیاں پیش کرݨ ویلے اِنہاں مرداں کُوں شریک تھیوݨ دی دعوت ڈیوݨ لگیاں تے ایہ لوک اُنہاں دیاں قُربانیاں ءچوں کھاوݨ تے دیوتیاں کُوں سجدہ کرݨ لگ پئے۔ 3اِینویں بنی اِسرائیل موآبی دیوتا بعل فغُور1 دی پُوجا کرݨ لگ پئے، تے رب العالمین دا غضب اُنہاں اُتے آ پِیا۔ 4اُوں مُوسیٰ کُوں آکھیا، ”اِنہاں لوکاں دے یکے بزُرگاں کُوں سزائے موت ڈے تے دُھپ ءچ مَیں رب العالمین دے حضُور ٹنگ ڈے، نہ تاں میڈا غضب بنی اِسرائیل تُوں نہ ٹلسی۔“

5اِیں واسطے مُوسیٰ بنی اِسرائیل دے قاضیاں کُوں آکھیا، ”لازم ہے جو تُہاڈے ءچوں ہر ہِک آپنڑے اُنہاں بندیاں کُوں جانُوں مار ڈیوے جیہڑے بعل فغُور دیوتا دی پُوجا ءچ شریک تھئے ہِن۔“

6جِیں ویلے بنی اِسرائیل دی یکی جماعت اِجتماع آلے تمبُو دے دَر تے روندی پئی ہئی، تاں ہِک بندہ مُوسیٰ تے جماعت دے اکھیں دے سامنڑے ہِک مِدیانی عورت کُوں آپنڑے تمبُو ءچ گِھن آیا۔ 7ایہ ڈیکھ تے ہارُون کاہِن دا پوترا فِینحاس بِن الِیعزر جماعت ءچوں نِکلیا تے نیزہ پکڑ تے 8اُوں اِسرائیلی دے پِچُھوں ٹُر پِیا تے تمبُو ءچ وَنج تے نیزہ اِتنے زور نال ماریا جو او بندے ءچوں لنگھ تے عورت دے ڈھیڈ ءچوں لنگھ گِیا۔ فِینحاس دے اِیں کم نال بنی اِسرائیل ءچ کِھنڈی ہوئی وبا رُک گئی۔ 9وَل وی وبا نال چوِّیہہ ہزار بندے مر گئے ہَن۔

10رب العالمین مُوسیٰ کُوں آکھیا، 11”ہارُون کاہِن دے پوترے فِینحاس بِن الِیعزر بنی اِسرائیل اُتے میڈی کاوڑ کُوں ٹھڈا کر ڈِتے کیوں جو اُوں اُنہاں دے وچال میڈے کیتے غیرت کیتی۔ اِیں پارُوں میڈی غیرت بنی اِسرائیل کُوں برباد نئیں کیتا۔ 12اِیں واسطے اُونکُوں ڈس ڈیویں جو مَیں اُوندے نال صُلح دا عہد قائم کریندا ہاں۔ 13اِیں عہد دے مطابق کاہِن دا عُہدہ ابد تئیں اُوندے تے اُوندی اولاد کولھ راہسی کیوں جو آپنڑے خُدا دی خاطر غیرت کھا تے اُوں بنی اِسرائیل دا کفارہ ڈِتا۔“

14جیہڑے اِسرائیلی بندے کُوں مِدیانی عورت نال مار ڈِتا گِیا ہا، او زِمری بِن سلُو ہا۔ او شمعون دے قبیلے دے ہِک آبائی خاندان دا سردار ہا۔ 15مِدیانی عورت دا ناں کزبی ہا۔ او صور دی دِھی ہئی جیہڑا مِدیانیاں دے ہِک آبائی خاندان دا سردار ہا۔

16وَل رب العالمین مُوسیٰ کُوں آکھیا، 17”مِدیانیاں کُوں دُشمنڑ سمجھ تے اُنہاں کُوں مار سٹیں۔ 18کیوں جو اِنہاں آپنڑی چالاکی نال تُہاڈے نال دُشمنڑی کیتی۔ اُنہاں دوکھے نال تُہاڈے تُوں بعل فغُور دی پُوجا کروائی تے تُہاکُوں آپنڑی بھینڑ مِدیانی سردار دی دِھی کزبی دے ذریعے پھسایا جِینکُوں وبا کِھنڈݨ ویلے مار ڈِتا گِیا ہا۔“