گِنتی 27

صِل افحاد دیاں دِھیاں

1صِلافحاد دیاں پنج دِھیاں مَحلاہ، نُوعاہ، حُجلاہ، مِلکاہ تے تِرضاہ ہَن۔ صِلافحاد یُوسف دے پوتر منسّی دے خاندان ءچوں ہا۔ اُوندا پُورا ناں صِلافحاد بِن حِفر بِن جِلعاد بِن مکِیر بِن منسّی بِن یُوسف ہا۔ 2صِلافحاد دیاں دِھیاں اِجتماع آلے تمبُو دے دَر تے آیاں تے مُوسیٰ، الِیعزر کاہِن، تے سرداراں تے یکی جماعت دے سامنڑے کھڑیاں تھی تے آکھنڑ لگیاں، 3”ساڈا پِیُو بیابان ءچ فوت تھیّا۔ او قورح دے اُنہاں ساتھیاں ءچوں نہ ہا جیہڑے رب العالمین دے خلاف کٹھے تھئے ہَن بلکہ او آپنڑے ذاتی گُناہ پارُوں مویا ہا۔ تے جِیں ویلے او مویا تاں اُوندا کوئی پوتر نہ ہا۔ 4کیا ایہ ٹھیک ہے جو ساڈے خاندان ءچ پوتر نہ ہووݨ پارُوں ساکُوں زمین نہ مِلے تے ساڈے پِیُو دا ناں نشان مِٹ ونجے؟ ساکُوں وی ساڈے پِیُو دے بئے رشتے داراں دے نال زمین ڈیؤ۔“

5مُوسیٰ اُنہاں دا معاملہ رب العالمین دے سامنڑے پیش کیتا 6تاں رب العالمین اُونکُوں آکھیا، 7”جیہڑی گالھ صِلافحاد دیاں دِھیاں کریندیاں پئیاں ہِن، او ٹھیک ہے۔ اُنہاں کُوں ضرور اُنہاں دے پِیُو دے رشتے داراں دے نال زمین مِلنڑی چاہیدی ہے یعنی اُنہاں کُوں پِیُو دی میراث مِلے۔ 8بنی اِسرائیل کُوں ڈسا جو جے کوئی بندہ مر ونجے تے اُوندا پوتر نہ ہووے تاں اُوندی دِھی کُوں اُوندی میراث مِلے۔ 9جیکر اُوندی دِھی وی نہ ہووے تاں اُوندے بِھرانواں کُوں اُوندی میراث مِلے۔ 10جیکر اُوندے بِھرا وی نہ ہووݨ تاں اُوندے پِیُو دے بِھرانواں کُوں اُوندی میراث مِلے۔ 11جیکر او وی نہ ہووݨ تاں اُوندے سبھ تُوں نیڑے دے رشتے دار کُوں اُوندی میراث مِلے۔ او اُوندا وارث ہوسی۔ ایہ اصُول بنی اِسرائیل کیتے شرعی حُکم ہوسی تے او اِینکُوں اُونویں ای مننڑ جِینویں رب العالمین مُوسیٰ کُوں حُکم ڈِتے۔“

یشُوع کُوں مُوسیٰ دا جانشین مقرر کیتا ویندے

12وَل رب العالمین مُوسیٰ کُوں آکھیا، ”عبارِیم دے پہاڑی سلسلے دے اِیں پہاڑ اُتے چڑھ تے اُوں مُلک کُوں ڈیکھ گِھن جیہڑا مَیں بنی اِسرائیل کُوں ڈِتے۔ 13اُونکُوں ڈیکھنڑ تُوں بعد تُوں وی آپنڑے بِھرا ہارُون آلی کار آپنڑے پِیُو ڈاڈے نال وَنج مِلسیں۔ 14کیوں جو تُساں ڈوہائیں صِین دے بیابان ءچ میڈے حُکم دی خلاف ورزی کیتی ہئی۔ جِیں ویلے یکی جماعت مریبہ ءچ میڈے خلاف بغاوت کیتی ہئی تاں تُساں چٹان ءچوں پانڑی کڈھیندے ہوئے لوکاں دے اکھیں دے سامنڑے میڈی قدُوسیت دا احترام نہ کیتا۔“ مریبہ صِین دے بیابان دے قادِس ءچ ہِک چشمہ ہے۔

15مُوسیٰ رب العالمین کُوں آکھیا، 16”یا رب العالمین، ساری مخلوق کُوں ساہ ڈیوݨ آلے خُدا! جماعت اُتے کہیں بندے کُوں راہنما مقرر کر 17جیہڑا جنگ کیتے ویندے ویلے تے واپسی تے اُنہاں دے اگُوں اگُوں ٹُرے تے جیہڑا اُنہاں کُوں باہر گِھن ونجے تے واپس گِھن آوے، نہ تاں رب العالمین دی جماعت اُنہاں بھیڈاں آلی کار ہوسی جِنہاں دا کوئی آجڑی نہ ہووے۔“

18رب العالمین مُوسیٰ کُوں آکھیا، ”یشُوع بِن نُون کُوں چُنڑ گِھن جیندے ءچ میڈا رُوح ہے تے آپنڑا ہتھ اُوندے اُتے رکھ۔ 19اُونکُوں الِیعزر کاہِن تے یکی جماعت دے سامنڑے کھڑا کر تے اُنہاں دے اکھیں دے سامنڑے راہنما دے طور تے مُقرر کر۔ 20آپنڑے کُجھ اِختیار اُونکُوں ڈے تاں جو بنی اِسرائیل دی یکی جماعت اُوندی فرمانبرداری کرے۔ 21رب العالمین دی مرضی جانڑن کیتے او الِیعزر کاہِن دے سامنڑے کھڑا تھیسی تے الِیعزر کاہِن رب العالمین دے سامنڑے اُورِیم اِستعمال کر تے اُوندی مرضی پُچھسی۔ اُوندے حُکم اُتے یشُوع تے بنی اِسرائیل دی یکی جماعت ڈیرے ءچوں نِکلسی تے واپس وَل آسی۔“

22مُوسیٰ رب العالمین دے حُکم دے مطابق ای کیتا تے یشُوع کُوں الِیعزر کاہِن تے یکی جماعت دے سامنڑے کھڑا کیتا۔ 23وَل اُوں اُوندے اُتے آپنڑے ہتھ رکھ تے اُونکُوں راہنما دے طور تے مُقرر کیتا جِینویں رب العالمین اُونکُوں حُکم ڈِتا ہا۔