Modern Central Saraiki Bible
گِنتی 28
روزانہ دیاں قُربانیاں
رب العالمین مُوسیٰ کُوں آکھیا، ”بنی اِس رائیل کُوں ایہ حُکم سُنڑا جو ’خیال راہوے جو تُساں کھاوݨ آلیاں چیزاں دے ساڑے ونجنڑ آلے نذرانے جِنہاں دی خوشبو میکُوں پسند ہے، مقررہ ویلے تے پیش کرو۔ رب العالمین کُوں ساڑے ونجنڑ آلے ایہ نذرانے پیش کرائے:
ہر روز بھیڈ دے ہِک سال دے ڈُو بے عیب لیلے ساڑے ونجنڑ آلی قُربانی دے طور تے پیش کرائے۔ ہِک کُوں سویلے پیش کرائے تے ڈُوجھے کُوں سِجھ لہوݨ دے فوراً بعد۔ لیلے دے نال غلے دا نذرانہ وی پیش کیتا ونجے یعنی ڈیڈھ کلو بہترین میدہ جیہڑا کُٹ تے کڈھے ہوئے زیتون دے ہِک لِیٹر تیل نال رَلایا گِیا ہووے۔ ایہ روزانہ دی قُربانی ہے جیہڑی مکمل طور تے ساڑی ویندی ہے تے پہلی پھیری سِینا پہاڑ اُتے پیش کیتی گئی ہئی۔ اِیں ساڑے ونجنڑ آلے نذرانے دی خوشبو مَیں رب العالمین کُوں پسند ہے۔ ہر لیلے دے نال ہِک لِیٹر انگُور دا رَس وی وِیٹے ونجنڑ آلی نذر دے طور تے قُربان گاہ اُتے وِیٹیا ونجے۔ شام کُوں پیش کیتے ونجنڑ آلے لیلے نال غلے دا نذرانہ تے وِیٹے ونجنڑ آلی نذر اُونویں ای پیش کرائے جِینویں سویل کُوں پیش کیتے ونجنڑ آلے لیلے نال پیش کریندے ہیوے۔ اِیں ساڑے ونجنڑ آلے نذرانے دی خوشبو مَیں رب العالمین کُوں پسند ہے۔
سبت دی قُربانی
سبت دے ڈینہہ بھیڈ دے ڈُو بئے لیلے پیش کرائے۔ او وی بے عیب تے ہِک ہِک سال دے ہووݨ۔ تیل دے نال رَلیا ہویا ترے کلو بہترین میدہ غلے دے نذرانے دے طور تے تے وِیٹے ونجنڑ آلی نذر وی اُنہاں نال پیش کرائے۔ ساڑے ونجنڑ آلی ایہ قُربانی ہر سبت کُوں پیش کرنڑی ہے۔ ایہ روزانہ دیاں قُربانیاں تے اُنہاں دیاں وِیٹے ونجنڑ آلیاں نذراں تُوں علاوہ ہے۔
ہر مہینے دی پہلی ڈینہوار دی قُربانی
ہر مہینے دے شروع ءچ تُساں رب العالمین کُوں ساڑے ونجنڑ آلی قُربانی دے طور تے ڈُو جوان ڈاند، ہِک چھترا تے سَت ہِک ہِک سال دے بے عیب بھیڈے لیلے پیش کرائے۔ ہر جانور دے نال غلے دے نذرانے دے طور تے بہترین میدہ پیش کرائے جیندے ءچ تیل رَلایا گِیا ہووے۔ ہر ڈاند دے نال ساڈھے چار کلو، ہر چھترے دے نال ترے کلو، تے بھیڈ دے ہر لیلے دے نال ڈیڈھ کلو میدہ پیش کرائے۔ ایہ قُربانی رب العالمین کیتے ساڑے ونجنڑ آلا نذرانہ ہے تے اِیندی خوشبو رب العالمین کُوں پسند ہے۔ اِنہاں قُربانیاں دے نال وِیٹے ونجنڑ آلی نذر وی پیش کرائے یعنی ہر ڈاند دے نال ڈُو لِیٹر، ہر چھترے دے نال سوا لِیٹر تے بھیڈ دے ہر لیلے دے نال ہِک لِیٹر انگُور دا رَس۔ ایہ قُربانی سال ءچ ہر مہینے دی پہلی ڈینہوار پیش کرنڑی ہے۔ اِیں قُربانی، روزانہ دیاں ساڑے ونجنڑ آلیاں قُربانیاں تے وِیٹے ونجنڑ آلیاں نذراں دے علاوہ رب العالمین کُوں ہِک بکرا گُناہ تُوں پاک کرݨ آلی قُربانی دے طور تے وی پیش کرائے۔
فسح دیاں قُربانیاں
پہلے مہینے دے چوڈھویں ڈینہہ فسح دی عید مَیں رب العالمین دی تعظیم ءچ منائی ونجے۔ اگلے ڈینہہ پُورے ہفتے دی او عید شروع تھیسی جیندے دوران تُساں صرف بے خمیری روٹی کھاونڑی ہے۔ پہلی ڈینہوار مُقدّس اِجتماع کیتے کٹھے تھی وَنجائے۔ اِیں ڈینہوار کوئی کم نہ کرائے۔ مَیں رب العالمین دے حضُور ساڑے ونجنڑ آلے نذرانے دے طور تے ڈُو جوان ڈاند، ہِک چھترا تے سَت ہِک ہِک سال دے بے عیب بھیڈے لیلے پیش کرائے۔ ہر جانور دے نال غلے دے نذرانے دے طور تے بہترین میدہ وی پیش کرائے جیندے ءچ تیل رَلایا گِیا ہووے۔ ہر ڈاند دے نال چار کلو، ہر چھترے دے نال ترے کلو تے بھیڈ دے ہر لیلے دے نال ڈیڈھ کلو میدہ پیش کرائے۔ گُناہ تُوں پاک کرݨ آلی قُربانی دے طور تے ہِک بکرا وی پیش کرائے تاں جو تُہاڈا کفارہ ڈِتا ونجے۔ ایہ سویل دیاں قُربانیاں روزانہ دیاں ساڑے ونجنڑ آلیاں قُربانیاں تُوں علاوہ ہِن۔ عید دی ستویں ڈینہوار کھاوݨ آلیاں چیزاں دے ساڑے ونجنڑ آلے نذرانے پیش کرائے جیندی خوشبو مَیں رب العالمین کُوں پسند ہے۔ ایہ روزانہ دیاں ساڑے ونجنڑ آلیاں قُربانیاں تے وِیٹے ونجنڑ آلیاں نذراں دے علاوہ پیش کرائے۔ ستویں ڈینہوار مُقدّس اِجتماع کیتے کٹھے تھی وَنجائے۔ اُوں ڈینہوار کوئی کم نہ کرائے۔
فصل کپنڑ دی عید دیاں قُربانیاں
فصل کپنڑ آلی عید1 اُتے جِیں ویلے تُساں رب العالمین دے حضُور آپنڑی فصل دا پہلا پھل نذرانے دے طور تے پیش کریندے ہیوے تاں مُقدّس اِجتماع کیتے کٹھے تھی وَنجائے۔ اُوں ڈینہوار کوئی کم نہ کرائے۔ اُوں ڈینہوار ڈُو جوان ڈاند، ہِک چھترا تے سَت ہِک ہِک سال دے بھیڈے لیلے قُربان گاہ اُتے ساڑ ڈیوائے جیندی خوشبو مَیں رب العالمین کُوں پسند ہے۔ ہر جانور دے نال غلے دے نذرانے دے طور تے بہترین میدہ پیش کرائے جیندے ءچ تیل رَلایا گِیا ہووے۔ ہر ڈاند دے نال ساڈھے چار کلو، ہر چھترے دے نال ترے کلو، تے بھیڈ دے ہر لیلے دے نال ڈیڈھ کلو میدہ پیش کرائے۔ اِیندے علاوہ ہِک بکرا تُہاڈے کفارے کیتے پیش کیتا ونجے۔
تُساں ایہ یکیاں قُربانیاں تے وِیٹے ونجنڑ آلیاں نذراں، روزانہ دیاں ساڑے ونجنڑ آلیاں قُربانیاں تے غلے دے نذرانیاں تُوں علاوہ پیش کرائے۔ تے یکے جانور بے عیب ہووݨ۔
Source notes (1)
- Footnote اِینکُوں ہفتیاں دی عید وی آدھے ہِن کیوں جو ایہ فسح دی عید دے سَت ہفتے بعد یعنی پنجھاہ ڈینہہ بعد منائی ویندی ہئی۔ اِیں کیتے نویں عہد نامے ءچ اِینکُوں ”پِنتیکُست“ یعنی پنجھاہ ڈینہہ وی آدھے ہِن۔ اِنہاں ڈینہاں ءچ گندم دی کٹائی تھیندی ہے۔
Modern Central Saraiki Bible. Copyright © Strategic Resource Group. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.