Modern Central Saraiki Bible
گِنتی 35
لاویاں دے راہوݨ کیتے شہر
بنی اِسرائیل ہُنڑ تئیں موآب دے میدانی علاقے ءچ یردن دریا دے مشرق آلے پاسے یرِیحُو دے سامنڑے ہَن۔ اُتھاں رب العالمین مُوسیٰ کُوں آکھیا،
”بنی اِسرائیل کُوں ڈسا جو او آپنڑی اُوں میراث ءچوں جیہڑی اُنہاں کُوں مِلسی، لاویاں کُوں راہوݨ کیتے شہر ڈیوݨ۔ اُنہاں کُوں شہراں دے آسُوں پاسُوں ڈنگر چراوݨ کیتے وی زمین ڈیوائے۔ وَل لاویاں دے کولھ راہنڑ کیتے شہر، تے گانواں، بھیڈ بکریاں تے باقی ڈنگر چراوݨ کیتے زمین ہوسی۔ جیہڑی زمین تُساں لاویاں کُوں شہراں دے آسُوں پاسُوں چراوݨ کیتے ڈیسو، او شہر دی چار دیواری تُوں گِھن تے پندھراں سو فُٹ تئیں ہوسی، تے او مربع شکل ءچ ہوسی۔ اِیندے ہر پاسے دا فاصلہ ترے ہزار فُٹ ہوسی تے شہر اِیں مربع شکل دے وچال ہوسی۔ ایہ رقبہ شہر دے لوکاں کیتے ہوسی تاں جو او آپنڑے ڈنگر چرا سگنڑ۔
اُنہاں شہراں ءچوں جیہڑے تُساں لاویاں کُوں ڈیسو، چِھی شہر پناہ کیتے مقرر کرائے۔ اُنہاں ءچ او لوک پناہ گِھن سگسن جِنہاں تُوں کوئی غیر اِرادی طور تے ہلاک تھی گِیا ہووے۔ اِنہاں شہراں دے علاوہ اُنہاں کُوں بِتالیہہ شہر ڈیوائے یعنی کُل اڑتالیہہ شہر ڈیوائے تے اِنہاں دے نال چراوݨ کیتے زمین وی ڈیوائے۔ بنی اِسرائیل دا ہر قبیلہ لاویاں کُوں آپنڑے وراثتی علاقے دے رقبے دے مطابق شہر ڈیوے۔ جیہڑے قبیلے دا علاقہ وڈا ہووے او لاویاں کُوں زیادہ، تے جِنہاں دا علاقہ چھوٹا ہووے او لاویاں کُوں گھٹ شہر ڈیوے۔“
غیر اِرادی قتل کیتے پناہ دے شہر
وَل رب العالمین مُوسیٰ کُوں آکھیا، ”بنی اِسرائیل کُوں ڈسا ڈے جو او یردن دریا کُوں پار کر تے کنعان مُلک ءچ آوݨ تُوں بعد کُجھ شہر مقرر کرݨ جیہڑے پناہ دے شہر ہووݨ۔ اُتھاں او بندہ بھج تے وَنج سگدے جیندے ہتُھوں کوئی غیر اِرادی طور تے قتل تھی گِیا ہووے۔ اُتھاں او خون دا بدلہ گِھننڑ آلے تُوں پناہ گِھن سگسی تے جماعت دی عدالت دے سامنڑے کھڑا تھیوݨ تُوں پہلے ماریا نہ وَنج سگسی۔ اِیندے کیتے چِھی شہر چُنڑ گِھنائے۔ ترے شہر یردن دریا دے مشرق ءچ تے ترے کنعان مُلک ءچ ہووݨ۔ ایہ چِھی شہر ہر کہیں کُوں پناہ ڈیسن بھانویں او اِسرائیلی، پردیسی یا اُنہاں دے وچال راہوݨ آلا غیر شہری ہووے۔ جیندے ہتھُوں وی کوئی غیر اِرادی طور تے ہلاک تھیّا ہووے، او اُتھاں پناہ گِھن سگدے۔
پر جیکر کوئی کہیں کُوں لُوہے دے اوزار نال ایجھا مارے جو او مر ونجے تاں او قاتل ہے تے اُونکُوں ضرور موت دی سزا ڈِتی ونجے۔ یا جیکر کوئی کہیں کُوں پتھر نال ایجھا مارے جو او مر ونجے تاں او قاتل ہے تے اُونکُوں ضرور موت دی سزا ڈِتی ونجے۔ یا جیکر کوئی لکڑ دا اوزار گِھن تے کہیں کُوں ایجھا مارے جو او مر ونجے تاں او قاتل ہے تے اُونکُوں ضرور موت دی سزا ڈِتی ونجے۔ خون دا بدلہ گِھننڑ آلا قاتل کُوں خود قتل کرے۔ جِیں ویلے او اُونکُوں مِلے او اُونکُوں اُتھائیں مار ڈیوے۔
جیکر کوئی نفرت پارُوں کہیں کُوں دھکا ڈیوے یا اُوندی تاڑ لا تے اُوندے اُتے کوئی شے سَٹ ڈیوے تے او مر ونجے، یا دُشمنڑی پارُوں اُونکُوں آپنڑے ہتھ نال ایجھا مارے جو او مر ونجے تاں او قاتل ہے تے اُونکُوں ضرور موت دی سزا ڈِتی ونجے۔ خون دا بدلہ گِھننڑ آلا قاتل کُوں جِیں ویلے او اُونکُوں مِلے، مار ڈیوے۔
پر جیکر کوئی کہیں کُوں بغیر دُشمنڑی دے اِتفاقاً دھکا ڈے ڈیوے یا غیر اِرادی طور تے اُوندے اُتے کوئی شے سَٹ ڈیوے، یا بغیر ڈِٹھے اُوندے اُتے کوئی ایجھا پتھر سَٹ ڈیوے جیندے نال بندہ مر سگدا ہووے تے او مر ونجے، پر او نہ تاں اُوندا دُشمنڑ ہا تے نہ اُونکُوں مارنڑا چاہندا ہا، تاں جماعت اِنہاں ہدایتاں دے مطابق اُوندے، تے خون دا بدلہ گِھننڑ آلے دے وچال فیصلہ کرے۔ جیکر مُلزم بے قصُور ہے تاں جماعت اُونکُوں خون دا بدلہ گِھننڑ آلے دے ہتُھوں چُھڑاوے تے پناہ دے اُوں شہر ءچ واپس پُچوا ڈیوے جِتھاں او بھج گِیا ہا تے جئیں تئیں کاہِنِ اعظم جیہڑا مُقدّس تیل نال مسح تھیّا ہا مر نہ ونجے اُوں ویلے تئیں او اُتھائیں راہوے۔ پر جیکر ایہ بندہ اِیں تُوں پہلے پناہ دے اِیں شہر تُوں باہر نِکل ونجے جِتھاں او بھج گِیا ہا تے خون دا بدلہ گِھننڑ آلا اُونکُوں شہر دے باہر ڈیکھ تے قتل کر ڈیوے تاں بدلہ گِھننڑ آلا خون کرݨ دا مُجرم نہ ہوسی۔ پناہ گِھننڑ آلا کاہِنِ اعظم دی موت تئیں پناہ دے شہر ءچ راہوے، اِیں تُوں بعد ای او آپنڑے گھر پِچھاں وَل سگدے۔ تُساں جِتھاں وی راہندے ہیوے تُہاڈے کیتے ایہ گالھیں نسل در نسل قانُون ہوسن۔
جیکر کوئی کہیں کُوں مار ڈیوے تاں اُونکُوں صرف اِیں صورت ءچ سزائے موت ڈِتی وَنج سگدی ہے جو گھٹ تُوں گھٹ ڈُو گواہ ہووݨ۔ ہِک گواہ کافی نہ ہوسی۔
قاتل دی رہائی کیتے تُساں دِیَت قبول نہ کرائے، او واجب القتل ہے۔ اُونکُوں ضرور سزائے موت ڈِتی ونجے۔ اُوں بندے تُوں وی جیہڑا قاتل نئیں تے پناہ دے شہر ءچ بھج گِیا ہووے، اِیں غرض نال دِیَت نہ گِھنائے جو او آپنڑے گھر ءچ راہوݨ کیتے واپس وَنج سگے۔ لازم ہے جو او اِیندے کیتے کاہِنِ اعظم دی وفات دا اِنتظار کرے۔
جیہڑے مُلک ءچ تُساں راہندے ہیوے اُوندی مُقدّس حالت کُوں پلیت نہ کرائے کیوں جو قتل دا خون مُلک کُوں پلیت کر ڈیندے تے اُوں مُلک کیتے جیندے ءچ خون وہایا ویندے، قاتل دے خون دے علاوہ کہیں بئی شے دا کفارہ نئیں ڈِتا وَنج سگدا۔ اُوں مُلک کُوں پلیت نہ کرائے جیندے ءچ تُساں راہندے ہیوے تے جیندے ءچ مَیں راہندا ہاں کیوں جو مَیں رب العالمین بنی اِسرائیل دے وچال راہندا ہاں۔“
Modern Central Saraiki Bible. Copyright © Strategic Resource Group. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.