گِنتی 36

عورتاں تے زمین دی وراثت

1ہِک ڈینہوار جِلعاد بِن مکِیر بِن منسّی بِن یُوسف دے آبائی خانداناں دے سردار، مُوسیٰ تے بنی اِسرائیل دے خانداناں دے سرداراں دے کولھ آ تے 2آکھنڑ لگے، ”آقا! رب العالمین تُہاکُوں حُکم ڈِتا ہا جو تُساں پرچی پا تے مُلک کُوں اِسرائیل ءچ وَنڈ ڈیو۔ اُوں ویلے اُوں ایہ وی آکھیا ہا جو ساڈے بِھرا صِلافحاد دیاں دِھیاں کُوں اُنہاں دی وراثتی زمین ڈِتی ونجے۔ 3جیکر او اِسرائیل دے کہیں بئے قبیلے دے مرداں نال پرنیجنڑ، تاں ایہ زمین جیہڑی ساڈے قبیلے دی وراثت ہے اُوں قبیلے دی وراثت بنڑ ویسی تے اساں اِیں تُوں محروم تھی ویسوں۔ 4تے بحالی دے سال ءچ وی ایہ زمین ساڈے کولھ واپس نہ آسی1 بلکہ اُوں قبیلے کولھ چلی ویسی جیندے ءچ ایہ عورتاں پرنیسن۔ اِینویں ساڈے پِیُو ڈاڈے دی قبائلی میراث ءچوں ایہ حصہ نِکل ویسی۔“

5وَل مُوسیٰ رب العالمین دے حُکم دے مطابق بنی اِسرائیل کُوں ڈسایا جو، ”بنی یُوسف دے ایہ بندے حق تے ہِن، 6اِیں کیتے رب العالمین دی ہدایت ایہ ہے جو صِلافحاد دیاں دِھیاں کُوں آپنڑی پسند دے بندیاں نال پرنیجنڑ دی اِجازت ہے پر شرط ایہ ہے جو او اُنہاں دے آپنڑے قبیلے دے ہووݨ۔ 7اِیں طریقے نال ہِک قبیلے دی زمین کہیں بئے قبیلے کُوں منتقل نہ تھیسی کیوں جو ہر اِسرائیلی کیتے لازم ہے جو آپنڑے پِیُو ڈاڈے دی قبائلی میراث آپنڑے قبضہ ءچ رکھے۔

8جیہڑی وی دِھی کُوں وراثت ءچ زمین مِلدی ہے اُوندے کیتے لازم ہے جو او آپنڑے ای قبیلے دے کہیں مرد نال پرنیجے تاں جو ہر اِسرائیلی آپنڑے پِیُو ڈاڈے دی میراث اُتے قابض راہوے۔ 9ہِک قبیلے دی وراثتی زمین کہیں بئے قبیلے کُوں منتقل کرݨ دی اِجازت نئیں کیوں جو بنی اِسرائیل کیتے لازم ہے جو ہر قبیلہ آپنڑی آپنڑی میراث آپنڑے قبضہ ءچ رکھے۔“

‏ 10صِلافحاد دیاں دِھیاں مَحلاہ، تِرضاہ، حُجلاہ، مِلکاہ تے نُوعاہ اِینویں ای کیتا جِینویں رب العالمین مُوسیٰ کُوں حُکم ڈِتا ہا۔ 11اُنہاں آپنڑے سوتراں نال پرنیوا کیتا 12یعنی یُوسف دے پوتر منسّی دے قبیلے دے مرداں نال۔ اِیں کیتے ایہ وراثتی زمین اُنہاں دے پِیُو صِلافحاد دے قبیلے دے کولھ ریہی۔

13رب العالمین مُوسیٰ دی معرفت بنی اِسرائیل کُوں اِیہو حُکم تے قانُون ڈِتے جِیں ویلے او موآب دے میدانی علاقے ءچ یردن دریا دے مشرقی کنارے اُتے یرِیحُو دے سامنڑے ڈیرے لائی پئے ہَن۔