گِنتی 34

کنعان مُلک دیاں سرحداں

1رب العالمین مُوسیٰ کُوں آکھیا، 2”بنی اِسرائیل کُوں ڈسا جو ’جِیں ویلے تُساں کنعان مُلک ءچ وڑسو جیہڑا مَیں تُہاکُوں وراثت ءچ ڈیساں، تاں تُہاڈی زمین دیاں سرحداں ایہ ہوسن:

3اُوندی جنُوبی سرحد صِین دے بیابان ءچ ادُوم دی سرحد دے نال نال ٹُرسی۔ مشرق ءچ او بحیرہ مُردار دے جنُوبی کنڈے تُوں شروع تھیسی۔ 4وَل اِنہاں جاہیں تُوں لنگھ تے مغرب دو ویسی یعنی وِٹھوویاں دے پہاڑی رستہ1 دے جنُوب ءچوں، صِین دے بیابان تُوں قادِس بَرنِیعَ دے جنُوب ءچوں تے حصرادّار تُوں تھیندے ہوئے عَضمُون ءچوں۔ 5وَل اُتھوں مُڑ تے مِصر دی وادی دے نال نال بحیرہ روم تئیں۔

6تے مغرب دو بحیرہ روم دا کنارہ ہوسی۔ اِیہو تُہاڈی مغربی سرحد ہوسی۔

7تے تُہاڈی شمالی سرحد بحیرہ روم تُوں گِھن تے ہور پہاڑ تئیں ہوسی۔ 8وَل ہور پہاڑ تُوں لبوحمات تے صِداد ءچوں تھیندے ہوئے 9زِفرُون تئیں تے زِفرُون تُوں تھیندے ہوئے حصرعینان اُتے مُکسی۔ ایہ تُہاڈی شمالی سرحد ہوسی۔

10اُوندی مشرقی سرحد شمال ءچ حصرعینان تُوں شروع تھیسی۔ وَل او جنُوب دو سفام، 11رِبلہ جیہڑا عَین دے مشرق ءچ ہے، تے گلیل دی جھیل2 دے مشرق ءچ واقع پہاڑی علاقہ ءچوں لنگھسی۔ 12اِیندے بعد او یردن دریا دے کنارے کنارے لنگھدی ہوئی بحیرہ مُردار تئیں پُجسی۔

ایہ تُہاڈے مُلک دیاں سرحداں ہوسن‘۔“

13مُوسیٰ بنی اِسرائیل کُوں آکھیا، ”ایہ اُوہو مُلک ہے جِینکُوں تُساں پرچی پا تے میراث ءچ گِھنسو۔ رب العالمین حُکم ڈِتے جو اُونکُوں باقی ساڈھے نؤں قبیلیاں کُوں ڈیونڑیں 14کیوں جو ڈھائی قبیلیاں دے خانداناں کُوں اُنہاں دی وراثت مِل گئی ہے یعنی رُوبِن تے جد دے یکے قبیلے تے منسّی دے ادھے قبیلے کُوں۔ 15اُنہاں کُوں اِتھائیں یردن دریا دے مشرق دو یرِیحُو دے سامنڑے زمین مِل گئی ہے۔“

مُلک ونڈاوݨ دے ذمےدار بندے

16رب العالمین مُوسیٰ کُوں آکھیا، 17”الِیعزر کاہِن تے یشُوع بِن نُون لوکاں کیتے مُلک ونڈاوݨ۔ 18ہر قبیلے دے ہِک ہِک سردار کُوں وی چُنڑ گِھنیں تاں جو او ونڈاوݨ ءچ مدد کرݨ۔

19چُنڑے ونجنڑ آلیاں دے ناں ایہ ہِن:

یہُوداہ دے قبیلے دا کالِب بِن یفُنّہ،

20شمعون دے قبیلے دا سموئیل بِن عِمّیہُود،

21بِنیمِین دے قبیلے دا اِلیداد بِن کسلُون،

22دان دے قبیلے دا بُقّی بِن یُگلی،

23بنی یُوسف ءچوں منسّی دے قبیلے دا حنی ایل بِن افُود،

24اِفرائِیم دے قبیلے دا قمُوایل بِن سِفتان،

25زبُولُون دے قبیلے دا الیصفن بِن فرناک،

26اِشکار دے قبیلے دا فلتی ایل بِن عَزّان،

27آشر دے قبیلے دا اَخِیہُود بِن شلُومی،

28تے نفتالی دے قبیلے دا فداہیل بِن عِمّیہُود۔“

29رب العالمین بنی اِسرائیل ءچ کنعان مُلک ونڈاوݨ دی ذمہ داری اِنہاں بندیاں کُوں ڈِتی۔