Modern Central Saraiki Bible
گِنتی 33
اِسرائیل دے سفر دے مرحلے
تلے اُنہاں جاہیں دے ناں ہِن جِتھاں جِتھاں بنی اِسرائیل آپنڑیاں وستیاں دے مطابق مُوسیٰ تے ہارُون دی راہنمائی ءچ مِصر تُوں نِکل تے ڈیرے لائے ہَن۔ رب العالمین دے حُکم اُتے مُوسیٰ ہر جاہ دا ناں لِکھ گِھدا جِتھاں اُنہاں آپنڑے آپنڑے ڈیرے لائے ہَن۔ اُنہاں دے سفر دا بیان ایہ ہے:
پہلے مہینے دے پندھرویں ڈینہہ یعنی عیدِ فسح تُوں اگلی ڈینہوار بنی اِسرائیل رعمسِیس تُوں ٹُرے۔ او وڈے اِختیار نال یکے مِصریاں دے اکھیں دے سامنڑے لگے گئے۔ اُوں ویلے مِصری آپنڑے پلوٹھیاں کُوں دفن کریندے پئے ہَن کیوں جو رب العالمین پلوٹھیاں کُوں مار تے اُنہاں دے دیوتیاں دے خلاف عدالت کیتی ہئی1۔
رعمسِیس تُوں روانہ تھی تے بنی اِسرائیل سُکات پُجے تے اُتھاں ڈیرے لائے۔ اُتھوں اُنہاں ایتام پُج تے ڈیرے لائے جیہڑا بیابان دے کنارے تے واقع ہے۔ ایتام تُوں پِچھاں مُڑ تے فی ہخِیروت دو ودھے جیہڑا بعل صفون دے مشرق ءچ ہے تے مِجدال دے نیڑے ڈیرے لائے۔ وَل او فی ہخِیروت تُوں روانہ تھی تے سمندر ءچوں لنگھ گئے۔ اِیندے بعد او ترے ڈینہوار ایتام دے بیابان ءچ سفر کریندے کریندے مارہ پُجے تے اُتھاں آپنڑے ڈیرے لائے۔ مارہ تُوں او ایلیم لگے گئے جِتھاں بارہاں چشمے تے کھجور دے ستّر درخت ہَن۔ اُتھاں رُکنڑ تُوں بعد اُنہاں بحر ِ قُلزم دے کنڈے اُتے ڈیرے لائے۔ وَل بحر ِ قُلزم تُوں روانہ تھی تے صِین دے بیابان ءچ پُج گئے۔
تے صِین دے بیابان تُوں روانہ تھی تے دُفقہ ءچ ڈیرے لائے۔ تے دُفقہ تُوں روانہ تھی تے الُوس ءچ ڈیرے لائے۔ تے الُوس تُوں روانہ تھی تے رفیدیم ءچ ڈیرے لائے جِتھاں اُنہاں کُوں پِیوݨ کیتے پانڑی نہ مِلیا۔
تے رفیدیم تُوں روانہ تھی تے سِینا دے بیابان ءچ ڈیرے لائے۔ تے سِینا دے بیابان تُوں روانہ تھی تے قِبروت ہَتّاوہ ءچ ڈیرے لائے۔ تے قِبروت ہَتّاوہ تُوں روانہ تھی تے حصیرات ءچ ڈیرے لائے۔ تے حصیرات تُوں روانہ تھی تے رِتمہ ءچ ڈیرے لائے۔ تے رِتمہ تُوں روانہ تھی تے رِمّون فارص ءچ ڈیرے لائے۔ تے رِمّون فارص تُوں روانہ تھی تے لِبناہ ءچ ڈیرے لائے۔ تے لِبناہ تُوں روانہ تھی تے ریسّہ ءچ ڈیرے لائے۔ تے ریسّہ تُوں روانہ تھی تے قہِیلاتہ ءچ ڈیرے لائے۔ تے قہِیلاتہ تُوں روانہ تھی تے سافر پہاڑ دے کولھ ڈیرے لائے۔ تے سافر پہاڑ تُوں روانہ تھی تے حرادہ ءچ ڈیرے لائے۔ تے حرادہ تُوں روانہ تھی تے مَقہِیلوت ءچ ڈیرے لائے۔ تے مَقہِیلوت تُوں روانہ تھی تے تحت ءچ ڈیرے لائے۔ تے تحت تُوں روانہ تھی تے تارح ءچ ڈیرے لائے۔ تے تارح تُوں روانہ تھی تے مِتقہ ءچ ڈیرے لائے۔ تے مِتقہ تُوں روانہ تھی تے حشمُونہ ءچ ڈیرے لائے۔ تے حشمُونہ تُوں روانہ تھی تے مَوسِیروت ءچ ڈیرے لائے۔ تے مَوسِیروت تُوں روانہ تھی تے بنی یعقان ءچ ڈیرے لائے۔ تے بنی یعقان تُوں روانہ تھی تے حُورہجِدجاد ءچ ڈیرے لائے۔ تے حُورہجِدجاد تُوں روانہ تھی تے یُوطباتہ ءچ ڈیرے لائے۔ تے یُوطباتہ تُوں روانہ تھی تے عبرُونہ ءچ ڈیرے لائے۔ تے عبرُونہ تُوں روانہ تھی تے عصیون جابر ءچ ڈیرے لائے۔ تے عصیون جابر تُوں روانہ تھی تے صِین دے بیابان دے قادِس ءچ ڈیرے لائے۔ تے قادِس تُوں روانہ تھی تے ہور پہاڑ دے کولھ جیہڑا ادُوم دی سرحد اُتے ہے، ڈیرے لائے۔
وَل ہارُون کاہِن رب العالمین دے حُکم دے مطابق ہور پہاڑ اُتے چڑھ گِیا تے بنی اِسرائیل دے مِصر ءچوں نِکلنڑ دے چالیہویں سال دے پنجویں مہینے دے پہلے ڈینہہ اُتھائیں فوت تھیّا۔ اُوں ویلے ہارُون ہِک سو تریویہہ سال دا ہا۔
اُنہاں ڈینہاں ءچ عَراد دے کنعانی بادشاہ جیہڑا مُلک ِ کنعان دے جنُوب ءچ حکُومت کریندا ہا، سُنڑیا جو بنی اِسرائیل میڈے مُلک دو ودھدے پئے ہِن۔
تے بنی اِسرائیل ہور پہاڑ تُوں روانہ تھی تے ضلمُونہ ءچ ڈیرے لائے۔ تے ضلمُونہ تُوں روانہ تھی تے فُونون ءچ ڈیرے لائے۔ تے فُونون تُوں روانہ تھی تے اوبوت ءچ ڈیرے لائے۔ تے اوبوت تُوں روانہ تھی تے عبارِیم دے کھنڈراں ءچ جیہڑے موآب دی سرحد اُتے ہِن، ڈیرے لائے۔ تے عبارِیم تُوں روانہ تھی تے دِیبون جد ءچ ڈیرے لائے۔ تے دِیبون جد تُوں روانہ تھی تے علمُون دبلہ تایم ءچ ڈیرے لائے۔ تے علمُون دبلہ تایم تُوں روانہ تھی تے نبُوپہاڑ دے سامنڑے عبارِیم دے پہاڑی علاقے ءچ ڈیرے لائے۔ تے عبارِیم دے پہاڑی علاقے تُوں روانہ تھی تے موآب دے میدانی علاقے ءچ جیہڑا یرِیحُو دے سامنڑے یردن دریا دے مشرق آلے پاسے ہے، ڈیرے لائے۔ اُنہاں دے تمبُو بیت یسیموت تُوں گِھن تے ابیل سِطِیم تئیں لگے ہوئے ہَن۔
یکے کنعانیاں کُوں کڈھنڑ دا حُکم
اُتھاں موآب دے میدانی علاقے ءچ یرِیحُو دے سامنڑے یردن دریا دے مشرق آلے پاسے رب العالمین مُوسیٰ کُوں آکھیا، ”بنی اِسرائیل کُوں ڈسا جو جِیں ویلے تُساں یردن دریا کُوں پار کر تے مُلک کنعان ءچ وڑسو تاں لازم ہے جو تُساں یکے راہوݨ آلیاں کُوں کڈھ تے اُنہاں دے تراشے تے گھڑے ہوئے بُتاں کُوں بَھن سٹو تے اُنہاں دے اُچے جاہیں دیاں عبادت گاہیں کُوں تباہ کرو۔ مُلک اُتے قبضہ کر تے اُوندے ءچ آباد تھی ونجو کیوں جو مَیں ایہ مُلک تُہاکُوں وراثتی ملکیت دے طور تے ڈے ڈِتے۔ مُلک کُوں آپنڑے قبیلیاں تے خانداناں ءچ اُنہاں دے آبائی خاندان دے بندیاں دی گِنتری دے مطابق پرچی پا تے ونڈائے۔ وڈے خانداناں کُوں زیادہ زمین ڈیوائے تے چھوٹے خانداناں کُوں گھٹ۔ ہر قبیلے کُوں اُوہو حصہ مِلسی جیہڑا پرچی ءچ نِکلسی۔
پر جیکر تُساں اُوں مُلک دے لوکاں کُوں نہ کڈھیسو جِتھاں تُساں آباد ہوسو، تاں بچے ہوئے لوک تُہاڈے اکھیں ءچ ککھ تے تُہاڈے پسلیاں ءچ کنڈے بنڑ تے تُہاکُوں تنگ کریندے راہسن۔ وَل مَیں تُہاڈے نال او سبھ کُجھ کریساں جیہڑا اُنہاں نال کرݨ دا اِرادہ کیتے۔“
Source notes (1)
- Footnote یعنی اُنہاں کُوں بے کار شیواں ظاہر کیتا۔
Modern Central Saraiki Bible. Copyright © Strategic Resource Group. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.