گِنتی 32

یردن دریا د ے مشرق آلے پاسے آباد قبیلے

1رُوبِن تے جد دے قبیلیاں دے کولھ بہُوں سارے ڈھورڈنگر ہَن۔ جِیں ویلے اُنہاں ڈِٹھا جو یعزیر تے جِلعاد دا علاقہ ڈھورڈنگر پالنڑ کیتے چنگا ہے 2تاں اُنہاں مُوسیٰ، الِیعزر کاہِن تے جماعت دے سرداراں دے کولھ آ تے آکھیا، 3”عطارات، دِیبون، یعزیر، نِمرہ، حسبون، الیعالی، شبام، نبُو تے بعُون شہراں دے علاقے 4جِنہاں کُوں رب العالمین بنی اِسرائیل دی جماعت کیتے شکست ڈِتی ہئی، او ڈھورڈنگر پالنڑ کیتے چنگے ہِن، تے تُہاڈے خادماں دے کولھ بہُوں سارے ڈھورڈنگر ہِن۔ 5جیکر تُہاڈے کرم دی نظر ساڈے اُتے ہے تاں ساکُوں ایہ علاقہ ملکیت دے طور تے ڈِتا ونجے تے ساکُوں یردن دریا کُوں پار کرݨ تے مجبور نہ کیتا ونجے۔“

6مُوسیٰ جد تے رُوبِن دے بندیاں کُوں آکھیا، ”کیا ایہ ٹھیک ہے جو تُہاڈے بِھرا جنگ لڑن کیتے اگُوں ونجنڑ تے تُساں اِتھائیں بیٹھے راہو؟ 7تُساں بنی اِسرائیل کُوں دریا پار کر تے اُوں مُلک ءچ جیہڑا رب العالمین اُنہاں کُوں ڈے ڈِتے، ونجنڑ تُوں کیوں بے دِل کریندے ہیوے؟ 8تُہاڈے پِیُو ڈاڈے وی اِیہو کُجھ کیتا ہا جِیں ویلے مَیں اُنہاں کُوں قادِس بَرنِیعَ تُوں مُلک دا جائزہ گِھننڑ کیتے بھیجیا ہا۔ 9اِسکال دی وادی ءچ پُج تے مُلک کُوں ڈیکھنڑ تُوں بعد اُنہاں بنی اِسرائیل کُوں اُوں مُلک ءچ وڑن تُوں بے دل کیتا جیہڑا رب العالمین اُنہاں کُوں ڈِتا ہا۔ 10اُوں ڈینہہ رب العالمین دا غضب اُنہاں اُتے بھڑکیا تے اُوں قَسم کھا تے آکھیا جو 11’اِنہاں بندیاں ءچوں جیہڑے مِصر تُوں نِکلدے ویلے وِیہہ سال یا اِیں تُوں زیادہ ہَن، کوئی وی اُوں مُلک کُوں نہ ڈیکھسی جِیندے ڈیوݨ دا وعدہ مَیں قَسم کھا تے ابرہام، اِضحاق تے یعقُوب نال کیتا ہا، کیوں جو اِنہاں پُورے دل نال میڈی پیروی نئیں کیتی۔ 12صرف کالِب بِن یفُنّہ جیہڑا قنِزی قبیلے دا ہے تے یشُوع بِن نُون اُوں مُلک کُوں ڈیکھسن، کیوں جو اُنہاں وفاداری نال میڈی پیروی کیتی ہے۔‘ 13اُوں ویلے رب العالمین دا غضب بنی اِسرائیل اُتے تروٹ پِیا تے اُنہاں کُوں چالیہہ سال تئیں بیابان ءچ اوارہ پِھرنڑا پِیا، جئیں تئیں او ساری نسل ختم نہ تھی گئی جئیں رب العالمین دی نظر ءچ بدی کیتی ہئی۔

14ہُنڑ تُساں جیہڑے گُنہگاراں دی اولاد ہیوے آپنڑے پِیُو ڈاڈے دی جاہ کھڑ تے رب العالمین دے غضب کُوں بنی اِسرائیل اُتے زیادہ ودھیندے پئے ہیوے۔ 15جیکر تُساں اُوندی پیروی تُوں پِھر ویسو تاں او ولا سارے اِسرائیل کُوں بیابان ءچ چھوڑ ڈیسی تے تُساں اُنہاں دی ہلاکت دا سبب بنڑسو۔“

16وَل بنی رُوبِن تے بنی جد مُوسیٰ دے کولھ آئے تے آکھنڑ لگے، ”اساں اِتھاں آپنڑے ڈھورڈنگراں کیتے بھانڑے تے آپنڑے بال بچیاں کیتے شہر بنڑاوݨ چاہندے ہیں۔ 17اِیندے بعد اساں ہتھیار چا تے باقی اِسرائیلیاں دے اگُوں اگُوں ٹُرسوں جئیں تئیں ہر ہِک کُوں اُوندی آپنڑی جاہ تئیں نہ پُچا ڈیؤں۔ اِیں دوران ساڈے بال بچّے ساڈے شہراں دی چاردیواری دے اندر مُلک دے باشندیاں تُوں محفوظ راہسن۔ 18اساں اُوں ویلے تئیں آپنڑے گھراں کُوں واپس نہ ہٹسُوں جئیں تئیں ہر اِسرائیلی کُوں اُوندی وراثتی زمین نہ مِل ونجے۔ 19اساں خود اِنہاں دے نال یردن دریا دے مغرب ءچ کوئی میراث نہ گِھنسوں کیوں جو ساکُوں آپنڑی وراثتی زمین یردن دریا دے مشرق آلے پاسے مِل گئی ہے۔“

20ایہ سُنڑ تے مُوسیٰ آکھیا، ”جے تُساں اِینویں ای کریسو تاں رب العالمین دے ناں اُتے جنگ کیتے تیار تھی ونجو، 21تے ہتھیار بَدھ تے تُساں یکے رب العالمین دے حضُور یردن دریا کُوں پار کرو، تے جئیں تئیں رب العالمین آپنڑے یکے دُشمنڑاں کُوں آپنڑے اگُوں کڈھ نہ ڈیوے اُتھائیں راہو۔ 22وَل جِیں ویلے رب دا قبضہ اُوں مُلک اُتے تھی ویسی تاں تُساں واپس آ سگسو۔ اِینویں تُساں رب العالمین تے باقی بنی اِسرائیل کیتے آپنڑے فرض ادا کر ڈِتے ہوسن تے ایہ مُلک رب العالمین دے حضُور تُہاڈی ملکیت تھی ویسی۔ 23پر جیکر تُساں اِینویں نہ کریسو تاں وَل تُساں رب العالمین دا گُناہ کریسو تے یقین منّو جو تُہاکُوں تُہاڈے گُناہ دی سزا مِلسی۔ 24ہُنڑ آپنڑے بال بچیاں کیتے شہر تے آپنڑے بھیڈ بکریاں کیتے واڑے بنڑاؤ پر آپنڑے وعدے کُوں ضرور پُورا کرائے۔“

25بنی جد تے بنی رُوبِن مُوسیٰ کُوں آکھیا، ”اساں تُہاڈے خادم ہیں۔ اساں آپنڑے آقا دے حُکم دے مطابق ای کریسوں۔ 26ساڈے بال بچّے تے ڈھورڈنگر اِتھائیں جِلعاد دے شہراں ءچ راہسن۔ 27پر اساں جیہڑے تُہاڈے خادم ہیں، ساڈے ءچوں ہتھیار چاتا ہویا ہر جوان رب العالمین دے ناں اُتے جنگ کرݨ کیتے دریا دے پار ویسی۔ اساں سبھ کُجھ اُونویں ای کریسوں جِینویں ساڈے آقا ساکُوں حُکم ڈِتے۔“

28وَل الِیعزر کاہِن، یشُوع بِن نُون تے بنی اِسرائیل دے آبائی خانداناں دے سرداراں کُوں مُوسیٰ ایہ ہدایت کیتی، 29”جیکر بنی جد تے بنی رُوبِن ہتھیار چا تے تُہاڈے نال ای رب العالمین دے ناں اُتے یردن دریا کُوں پار کرݨ تاں وَل جِیں ویلے مُلک اُتے قبضہ تھی ونجے تاں اُنہاں کُوں وراثت ءچ جِلعاد دا علاقہ ڈے ڈیوائے۔ 30پر جیکر او اِینویں نہ کرݨ تاں وَل اُنہاں کُوں مُلک کنعان ءچ ای تُہاڈے نال وراثتی زمین مِلسی۔“

31بنی جد تے بنی رُوبِن جواب ڈِتا، ”تُہاڈے خادم او سبھ کُجھ کریسن جیہڑا رب العالمین آکھے۔ 32اساں ہتھیار چا تے رب العالمین دے ناں اُتے یردن دریا کُوں پار کریسوں تے کنعان دے مُلک ءچ وڑسُوں، پر ساڈی وراثتی زمین اِتھائیں یردن دے مشرق آلے پاسے ہوسی۔“

33وَل مُوسیٰ بنی جد، بنی رُوبِن تے بنی منسّی دے ادھے قبیلے کُوں او یکا مُلک جیندے اُتے پہلے امورِیاں دا بادشاہ سِیحون تے بسن دا بادشاہ عوج حکُومت کریندے ہَن ڈے ڈِتا یعنی پُورا علاقہ اُوندے شہراں تے وستیاں سمیت اُنہاں دے حوالے کر ڈِتا۔

34وَل بنی جد اِنہاں شہراں کُوں یعنی دِیبون، عطارات، عروعیر، 35عطرات شوفان، یعزیر، یُگبِہا، 36بیت نِمرہ تے بیت ہاران کُوں ولا تعمیر کر تے اُنہاں دی چار دیواری بنڑائی، تے آپنڑیاں بھیڈ بکریاں کیتے واڑے بنڑائے۔ 37بنی رُوبِن اِنہاں شہراں کُوں یعنی حسبون، الیعالی، قریتائِم، 38نبُو، بعل معُون تے سِبماہ کُوں ولا تعمیر کیتا۔ اُنہاں نبُو تے بعل معُون دے ناں بدل ڈِتے تے اِنہاں شہراں کُوں نویں ناں ڈِتے جیہڑے اُنہاں ولا بنڑائے ہَن۔

39منسّی دے پوتر مکِیر دی اولاد جِلعاد وَنج تے اُوندے اُتے قبضہ کر گِھدا تے اُوندے ءچ راہوݨ آلے یکے امورِیاں کُوں کڈھ ڈِتا۔ 40وَل مُوسیٰ بنی مکِیر کُوں جِلعاد دی سرزمین ڈے ڈِتی تے او اُتھاں وَنج تے آباد تھئے۔ 41بنی منسّی دے یائِیر ناں دے ہِک بندے اُوں علاقے ءچوں کُجھ وستیاں اُتے قبضہ کر تے اُنہاں کُوں ”حَوّوت یائِیر“ یعنی یائِیر دی وستیاں دا ناں ڈِتا۔ 42اِیں طرحاں نُوبح ناں دے ہِک بندے قنات تے اُوندیاں وستیاں اُتے قبضہ کر تے شہر دا ناں نُوبح رکھ ڈِتا۔