Modern Central Saraiki Bible
گِنتی 31
مِدیانیاں نال جنگ
رب العالمین مُوسیٰ کُوں آکھیا، ”مِدیانیاں تُوں بنی اِسرائیل دا بدلہ گِھن۔ اِیندے بعد تُوں فوت تھی تے آپنڑے پِیُو ڈاڈے نال وَنج مِلسیں۔“
ایہ سُنڑ تے مُوسیٰ بنی اِسرائیل کُوں آکھیا، ”آپنڑے کُجھ بندیاں کُوں ہتھیاراں نال لیس کرو تاں جو او مِدیانیاں نال جنگ کر تے رب العالمین دا بدلہ گِھننڑ۔ ہر قبیلے ءچوں ہِک ہزار مرد جنگ کیتے بھیجو۔“
اِیں واسطے بنی اِسرائیل دے ہر قبیلے ءچوں ہِک ہزار مرد یعنی کُل بارہاں ہزار ہتھیار چاتے ہوئے بندے چُنڑے گئے۔ وَل مُوسیٰ اُنہاں کُوں جنگ کیتے بھیج ڈِتا۔ اُوں الِیعزر کاہِن دے پوتر فِینحاس کُوں وی اُنہاں دے نال بھیجیا جیندے کولھ مُقدّس تمبُو دیاں کُجھ شیواں تے اعلان کرݨ کیتے نرسِنگے ہَن۔ جِینویں رب العالمین مُوسیٰ کُوں حُکم ڈِتا ہا اُنہاں مِدیانیاں نال جنگ کیتی تے یکے بندیاں کُوں مار ڈِتا۔ اُنہاں ءچ مِدیانیاں دے پنج بادشاہ عَوّی، رقم، صور، حور تے ربع ہَن۔ اُنہاں بلعام بِن بعور کُوں وی تلوار نال قتل کر ڈِتا۔
بنی اِسرائیل مِدیانی عورتاں تے بالاں کُوں قیدی بنڑا تے اُنہاں دے یکے ڈاند گائیں، بھیڈ بکریاں تے مال لُٹ گِھدا۔ مِدیانیاں دیاں یکیاں آبادیاں کُوں اُنہاں ڈیریاں سمیت ساڑ تے سواہ کر ڈِتا۔ وَل او لُٹیا ہویا یکا مال، قیدیاں تے جانوراں سمیت مُوسیٰ، الِیعزر کاہِن تے اِسرائیل دی یکی جماعت دے کولھ گِھن آئے، جیہڑے ہُنڑ تئیں موآب دے میدانی علاقے ءچ یردن دے مشرقی کنارے اُتے یرِیحُو دے سامنڑے رُکے ہوئے ہَن۔ مُوسیٰ، الِیعزر کاہِن تے جماعت دے یکے سردار اُنہاں دے اِستقبال کیتے ڈیرے تُوں باہر نِکلے۔
مُوسیٰ کُوں ہزار ہزار تے سو سو بندیاں اُتے مقرر افسراں اُتے جیہڑے جنگ تُوں ولے ہَن، کاوڑ آئی۔ اُوں آکھیا، ”تُساں یکیاں عورتاں کُوں کیوں بچائی رکھے؟ بلعام دے مشورے اُتے فغُور دے معاملے ءچ اُنہاں ای بنی اِسرائیل کُوں رب العالمین تُوں بے وفا کیتا ہا۔ اُنہاں پارُوں ای رب العالمین دے لوکاں ءچ وبا کِھنڈی ہئی۔ اِیں واسطے ہُنڑ یکے چھوہراں کُوں جانُوں مار ڈیؤ تے ہر اُوں عورت کُوں وی قتل کر ڈیؤ جئیں کہیں مرد نال مِلاپ کر گِھدے۔ پر یکیاں کُنواریاں کُوں بچا تے رکھائے۔ تُہاڈے ءچوں جئیں وی کہیں کُوں قتل کیتا ہووے یا کہیں لاش کُوں ہتھ لایا ہووے، او سَت ڈینہہ تئیں ڈیرے تُوں باہر راہوے۔ تریجھے تے ستویں ڈینہہ آپنڑے آپ کُوں قیدیاں سمیت پاک کرائے۔ تُساں آپنڑے ہر لباس تے ہر شے کُوں جیہڑی چمڑے، بکری دے والاں یا لکڑ دی ہووے، پاک کرائے۔“
وَل الِیعزر کاہِن جنگ تُوں واپس آوݨ آلے بندیاں کُوں آکھیا، ”جیہڑی شریعت رب العالمین مُوسیٰ کُوں ڈِتی ہے، اُوندے مطابق سونا، چاندی پِتّل، لُوہا، ٹین، سیسا تے جیہڑی وی شے سڑ نئیں سگدی اُونکُوں بھاہ ءچوں لنگھا ڈیوائے تاں جو او پاک صاف تھی ونجے۔ وَل اُوندے اُتے ناپاکی دُور کرݨ دا پانڑی وی چِھنڈکائے۔ باقی یکیاں شیواں جیہڑیاں بھاہ ءچ سڑ ویندیاں ہِن، اُنہاں کُوں پانڑی ءچوں لنگھا ڈیوائے تاں جو او پاک صاف تھی ونجنڑ۔ ستویں ڈینہہ آپنڑے کپڑیاں کُوں دھوائے، تاں جو تُساں پاک صاف تھی ونجو۔ اِیندے بعد تُساں ڈیرے ءچ داخل تھی سگسو۔“
مالِ غنیمت دی وَنڈ
رب العالمین مُوسیٰ کُوں آکھیا، ”تُوں الِیعزر کاہِن تے قبائلی خانداناں دے سبھ سرداراں کُوں نال گِھن تے یکے قیدیاں تے لُٹے ہوئے جانوراں دی گِنتری کر۔ یکا مال ڈُو برابر حصیاں ءچ ونڈائے۔ ہِک حصہ فوجیاں کیتے جیہڑے جنگ ءچ گئے ہَن تے ڈُوجھا باقی جماعت کیتے ہووے۔ اُنہاں فوجیاں دے حصے ءچوں جیہڑے جنگ ءچ گئے ہَن، ہر پنج سو پِچھے ہِک کُوں رب العالمین کیتے اَنج کر گِھن بھانویں او لوک ہووݨ یا گائیں ڈاند، گڈھاں یا بھیڈ بکریاں۔ اِنہاں کُوں الِیعزر کاہِن کُوں ڈیوائے تاں جو او اِنہاں کُوں مَیں رب العالمین دے حضُور نذرانے دے طور تے پیش کرے۔ باقی جماعت دے حصے ءچوں بھانویں او قیدی ہووݨ یا ڈاند، گڈھاں، بھیڈاں، بکریاں یا ڈُوجھے جانور، ہر پنجھاہ پِچھے ہِک ہِک کُوں اَنج کر تے اُنہاں لاویاں کُوں ڈیوائے جیہڑے رب العالمین دے مُقدّس تمبُو دی حفاظت کریندے ہِن۔“
مُوسیٰ تے الِیعزر کاہِن اِینویں ای کیتا جِینویں رب العالمین مُوسیٰ کُوں حُکم ڈِتا ہا۔ تے جیہڑا مال غنیمت فوجیاں دے ہتھ آیا ہا اُوں تُوں علاوہ چِھی لکھ پنجھتر ہزار بھیڈ بکریاں، بہتّر ہزار گائیں ڈاند تے اکئیٹھ ہزار گڈھاں ہَن۔ اِنہاں دے علاوہ بترِیح ہزار کُنواریاں وی ہَن۔
فوجیاں کُوں یکے شیواں دا ادھا حصہ مِل گِیا یعنی:
ترے لکھ، ستتریح ہزار، پنج سو بھیڈ بکریاں، جِنہاں ءچوں چِھی سو پنجھتر رب العالمین دا حصہ ہَن،
چھتریح ہزار گائیں ڈاند، جِنہاں ءچوں بہتّر رب العالمین دا حصہ ہَن،
ترِیح ہزار، پنج سو گڈھاں، جِنہاں ءچوں اکئیٹھ رب العالمین دا حصہ ہَن،
تے سولہاں ہزار کُنواریاں جِنہاں ءچوں بترِیح چھوہریں رب العالمین دا حصہ ہَن۔
رب العالمین کیتے نذرانے دا ایہ حصہ مُوسیٰ الِیعزر کاہِن کُوں ڈے ڈِتا، جِینویں رب العالمین حُکم ڈِتا ہا۔
باقی جماعت کُوں وی مال ِ غنیمت دا ادھا حصہ مِل گِیا جیہڑا مُوسیٰ فوجیاں دے ادھے حصہ تُوں اَنج کر ڈِتا ہا، یعنی ترے لکھ ستتریح ہزار پنج سو بھیڈ بکریاں، چھتریح ہزار گائیں ڈاند، ترِیح ہزار پنج سو گڈھاں، تے سولہاں ہزار کُنواریاں۔ مُوسیٰ ہر پنجھاہ قیدیاں تے ہر پنجھاہ جانوراں پِچھوں ہِک ہِک کُوں اَنج کر تے لاویاں کُوں ڈے ڈِتا، جیہڑے رب العالمین دے مُقدّس تمبُو دی حفاظت کریندے ہَن۔ اُوں اُونویں ای کیتا جِینویں رب العالمین اُونکُوں حُکم ڈِتا ہا۔
وَل او افسر جیہڑے لشکر دے ہزار ہزار تے سو سو بندیاں اُتے سردار ہَن مُوسیٰ دے کولھ آئے۔ اُنہاں مُوسیٰ کُوں آکھیا، ”تُہاڈے خادماں اُنہاں فوجیاں کُوں گِنڑ گِھدے جیہڑے ساڈے ماتحت ہِن تے ہِک وی گھٹ کائنی۔ اِیں پارُوں سونے دیاں جیہڑیاں شیواں ساکُوں مِلیاں ہِن یعنی بازو بند، کڑے، مُندریاں، والیاں تے ہار، اساں رب العالمین کُوں پیش کرنڑا چاہندے ہیں تاں جو رب العالمین دے حضُور ساڈا کفارہ تھی ونجے۔“
مُوسیٰ تے الِیعزر کاہِن سونے دیاں یکیاں شیواں اُنہاں تُوں گِھن گِھدیاں۔ جیہڑیاں شیواں اُنہاں افسراں تُوں گِھن تے رب العالمین کُوں نذرانے دے طور تے پیش کیتیاں ہَن، اُنہاں دا وزن تقریباً سولہاں ہزار سَت سو پنجھاہ تولے1 ہا۔ یکے فوجیاں لُٹ دا کُجھ مال آپنڑے کیتے رکھ گِھدا ہا۔ مُوسیٰ تے الِیعزر کاہِن افسراں دا ایہ سونا اِجتماع آلے تمبُو ءچ گِھن آئے تاں جو او رب العالمین کُوں بنی اِسرائیل دی یاد ڈیویندا راہوے۔
Source notes (1)
- Footnote یعنی ہِک سو نوّے (190) کلو۔
Modern Central Saraiki Bible. Copyright © Strategic Resource Group. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.