گِنتی 30

مَنت مننڑ دے اصُول

1وَل مُوسیٰ بنی اِسرائیل دے قبیلیاں دے سرداراں کُوں آکھیا، ”رب العالمین حُکم ڈیندے جو:

2جیکر کوئی بندہ رب العالمین کُوں کُجھ ڈیوݨ دی مَنت منے یا کہیں چیز تُوں دُور راہوݨ دی قَسم کھاوے تاں او آپنڑی قَسم کُوں نہ تڑوڑے بلکہ اُونکُوں پُورا کرے۔

3جیکر کوئی جوان عورت جیہڑی ہُنڑ تئیں آپنڑے پِیُو دے گھر ءچ راہندی ہے، رب العالمین کُوں کُجھ ڈیوݨ دی مَنت منے یا کہیں شے تُوں دُور راہوݨ دی قَسم کھاوے 4تے اُوندا پِیُو اِیں مَنت یا قَسم دے بارے ءچ سُنڑ تے کُجھ نہ آکھے تاں لازم ہے جو او آپنڑی مَنت یا قَسم دی ہر گالھ پُوری کرے۔ 5پر جیکر اُوندا پِیُو ایہ سُنڑ تے اُونکُوں اِینویں کرݨ تُوں ہٹکے تاں اُوندی مَنت یا قَسم منسوخ ہے تے او اُونکُوں پُورا کرݨ تُوں بری ہے۔ رب العالمین اُونکُوں معاف کر ڈیسی کیوں جو اُوندے پِیُو اُونکُوں اِجازت نئیں ڈِتی۔

6تے جیکر کہیں کُنواری عورت مَنت منّی ہووے یا کہیں شے تُوں دُور راہوݨ دی قَسم کھادی ہووے بھانویں اُوں جاݨ بُجھ تے یا سوچے سمجھے بغیر اِینویں کیتا ہووے تے اِیندے بعد او عورت پرنیج ونجے 7تے اُوندا پایا اِیندے بارے ءچ سُنڑ تے کُجھ نہ آکھے تاں لازم ہے جو او آپنڑی مَنت یا قَسم دی ہر گالھ پُوری کرے۔ 8پر جیکر اُوندا پایا ایہ سُنڑدے ای اُونکُوں اِینویں کرݨ تُوں ہٹکے تاں اُوندی مَنت یا قَسم منسوخ ہے تے او اُونکُوں پُورا کرݨ تُوں بری ہے۔ رب العالمین اُونکُوں معاف کر ڈیسی۔ 9جیکر کہیں بیوہ یا طلاق تھئی ہوئی عورت مَنت منّی ہووے یا کہیں شے تُوں دُور راہوݨ دی قَسم کھادی ہووے تاں لازم ہے جو او آپنڑی ہر گالھ پُوری کرے۔

10جیکر کہیں شادی شدہ عورت مَنت منّی ہووے یا کہیں شے تُوں دُور راہوݨ دی قَسم کھادی ہووے 11تے اُوندا پایا اِیندے بارے ءچ سُنڑ تے اعتراض نہ کرے تاں لازم ہے جو او آپنڑی ہر گالھ پُوری کرے۔ 12پر جیکر اُوندا پایا اُونکُوں اِینویں کرݨ تُوں ہٹکے تاں اُوندی مَنت یا قَسم منسوخ ہے تے او اُونکُوں پُورا کرݨ تُوں بری ہے۔ رب العالمین اُونکُوں معاف کر ڈیسی کیوں جو اُوندے پئے اُونکُوں اِجازت نئیں ڈِتی۔ 13بھانویں ذال کُجھ ڈیوݨ دی مَنت منّی ہووے یا کہیں شے تُوں دُور راہوݨ دی قَسم کھادی ہووے، اُوندے پئے کُوں اُوندی تصدیق یا اُونکُوں منسوخ کرݨ دا حق ہے۔ 14جیکر اُوں آپنڑی ذال دی مَنت یا قَسم دے بارے ءچ سُنڑ گِھدا ہووے تے آندی ڈینہوار تئیں اُونکُوں کُجھ نہ آکھیا ہووے تاں لازم ہے جو اُوندی ذال آپنڑی ہر گالھ پُوری کرے۔ اُوندے پئے آندی ڈینہوار تئیں اعتراض نہ کرݨ نال آپنڑی ذال دی گالھ دی تصدیق کیتی ہے۔ 15پر جیکر او اِیندے بعد ایہ مَنت یا قَسم منسوخ کرے تاں اُونکُوں آپنڑی ذال دے قصُور دے نتائج بُھگتنڑے پوسن۔“

16رب العالمین مَنت یا قَسم دی صورت ءچ پئے تے ذال، تے پِیُو تے اُوندے گھر ءچ راہوݨ آلی جوان دِھی دے بارے ءچ مُوسیٰ کُوں ایہ ہدایتاں ڈِتیاں۔