گِنتی 4

بنی قہات دیاں ذمہ داریاں

1رب العالمین مُوسیٰ تے ہارُون کُوں آکھیا، 2”لاوی دے قبیلے ءچوں بنی قہات دی گِنتری اُنہاں دے خانداناں تے گھرانڑیاں دے مطابق کریں۔ 3اُنہاں یکے مرداں کُوں درج کریں جیہڑے ترِیح تُوں پنجھاہ سال دے ہِن تے اِجتماع آلے تمبُو ءچ خدمت کرݨ دے قابل ہِن۔ 4بنی قہات دی خدمت ایہ ہے جو او اِجتماع آلے تمبُو دیاں سبھ تُوں مُقدّس شیواں دی ڈیکھ بھال کرݨ۔

5جِیں ویلے لشکر اگُوں ٹُرے تاں ہارُون تے اُوندے پوتر تمبُو دے اندر وڑ تے سبھ تُوں مُقدّس کمرے دا پڑدہ لہاوݨ تے اُونکُوں عہد دے صندوق اُتے پا ڈیوݨ۔ 6اِیندے اُتے او اعلیٰ قِسم دیاں کَھلاں دا غلاف تے نیلے رنگ دا ہِک کپڑا وچھاوݨ۔ اِیندے بعد او صندوق کُوں چاوݨ آلیاں سوٹیاں لاوݨ۔

7وَل او اُوں میز اُتے جیندے اُتے رب العالمین دے حضُور نذر دیاں روٹیاں پیش کیتیاں ویندیاں ہِن، نیلے رنگ دا کپڑا وچھاوݨ۔ اُوندے اُتے تھال، خوشبودار مصالحے کیتے پیالے، وِیٹے ونجنڑ آلیاں نذراں پیش کرݨ دے مُنگر تے جگ رکھے ونجنڑ۔ جیہڑی روٹی ہمیشاں میز اُتے ہوندی ہے او وی اِیندے اُتے راہوے۔ 8ہارُون تے اُوندے پوتر اِنہاں یکے شیواں اُتے رتّے رنگ دا کپڑا وچھا تے اُنہاں دے اُتے اعلیٰ قِسم دیاں کَھلاں دا غلاف پاوݨ۔ اِیندے بعد او میز کُوں چاوݨ آلیاں سوٹیاں لاوݨ۔

9او چراغ دان تے اُوندے سامان اُتے یعنی اُوندے ڈیویاں، بتی کُترݨ آلیاں قینچیاں، چھوٹے تھاں تے تیل دے تھانواں اُتے نیلے رنگ دا کپڑا پاوݨ۔ 10او ایہ سبھ کُجھ اعلیٰ قِسم دیاں کَھلاں دے غلاف ءچ ولھیٹنڑ تے اُونکُوں چا تے گِھن ونجنڑ کیتے ہِک چوکھٹے اُتے رکھنڑ۔

11او خوشبودار مصالحے ساڑن آلی سونے دی قُربان گاہ اُتے وی نیلے رنگ دا کپڑا وچھا تے اُوندے اُتے اعلیٰ قِسم دیاں کَھلاں دا غلاف پاوݨ تے وَل اُونکُوں چاوݨ آلیاں سوٹیاں اُوندے اُتے لاوݨ۔ 12مُقدّس تمبُو ءچ اِستعمال تھیوݨ آلا باقی سامان گِھن تے نیلے رنگ دے کپڑے ءچ ولھیٹنڑ، اُوندے اُتے اعلیٰ قِسم دیاں کَھلاں دا غلاف پاوݨ تے اُونکُوں چا تے گِھن ونجنڑ کیتے ہِک چوکھٹے اُتے رکھنڑ۔

13وَل او جانور ساڑن آلی قُربان گاہ ءچوں سواہ کڈھ تے اُوندے اُتے جامنی رنگ دا کپڑا وچھاوݨ۔ 14او اُوندے اُتے قُربان گاہ دی خدمت دا یکا سامان رکھنڑ یعنی رَت چِھنڈکنڑ آلے کٹورے، بکھدے ہوئے کولیاں کیتے تھاں، بیلچے تے سیخاں۔ اِیں سامان اُتے او اعلیٰ قِسم دیاں کَھلاں دا غلاف پا تے قُربان گاہ کُوں چاوݨ آلیاں سوٹیاں اُوندے اُتے لاوݨ۔

15جِیں ویلے ہارُون تے اُوندے پوتر مُقدّس تمبُو تے اُوندے سارے سامان کُوں ڈھک گِھننڑ تے لشکراگُوں ٹُرݨ کیتے تیار ہووے، وَل بنی قہات اُونکُوں چاوݨ کیتے آوݨ۔ پر او اِنہاں ءچوں کہیں شے کُوں ہتھ نہ لاوݨ نہ تاں مارے ویسن۔ اِجتماع آلے تمبُو دیاں ایہ شیواں چاوݨ دی ذمہ داری بنی قہات دی ہے۔

16ہارُون کاہِن دا پوتر الِیعزر ڈیویاں دے تیل، خوشبودار مصالحے، غلے دے روزانہ دے نذرانے تے مسح کرݨ آلے تیل بلکہ مُقدّس تمبُو تے اُوندے یکے سامان دا نگہبان ہووے۔“

17رب العالمین مُوسیٰ تے ہارُون کُوں آکھیا، 18”خبردار راہو جو بنی قہات دے خانداناں دے لوک لاوی دے قبیلے ءچوں مِٹ نہ ونجنڑ۔ 19جِیں ویلے او سبھ تُوں مُقدّس شیواں دے کولھ آوݨ تاں ہارُون تے اُوندے پوتر اندر وَنج تے اُنہاں ءچوں ہِک ہِک کیتے اُوندا کم تے او سامان جیہڑا اُنہاں چاونڑا ہے، مقرر کرݨ تاں جو او مر نہ ونجنڑ بلکہ زندہ راہوݨ۔ 20بنی قہات مُقدّس شیواں کُوں ڈیکھنڑ کیتے ہِک لاحظے کیتے وی اندر نہ ونجنڑ نہ تاں او مارے ویسن۔“

بنی جیرسون دیاں ذمہ داریاں

21وَل رب العالمین مُوسیٰ کُوں آکھیا، 22”بنی جیرسون دی گِنتری وی اُنہاں دے خانداناں تے گھرانڑیاں دے مطابق کریں۔ 23اُنہاں یکے مرداں کُوں درج کریں جیہڑے ترِیح تُوں پنجھاہ سال دے ہِن تے اِجتماع آلے تمبُو ءچ خدمت کرݨ دے قابل ہِن۔ 24بنی جیرسون دی خدمت ایہ ہے جو او ایہ شیواں چاوݨ: 25اِجتماع آلے تمبُو کُوں بنڑاوݨ آلے پڑدے، اُوندے اُتے پاوݨ آلے پڑدے، اعلیٰ قِسم دیاں کَھلاں دا غلاف، تمبُو دے دروازہ دا پڑدہ، 26مُقدّس تمبُو تے قُربان گاہ دی چار دیواری دے پڑدے، چار دیواری دے دروازہ دا پڑدہ، اُوندے رسے تے اُونکُوں لاوݨ دا باقی سامان۔ بنی جیرسون اِنہاں یکے کماں دے ذمہ دار ہِن جیہڑے اِنہاں شیواں نال جُڑے ہوئے ہِن۔ 27بنی جیرسون دی یکی خدمت ہارُون تے اُوندے پوتراں دی ہدایت دے مطابق ہووے۔ تُساں ہر بندے کیتے اُوہو سامان مُقرر کرائے جیہڑا اُوں چاونڑا ہے۔ 28اِجتماع آلے تمبُو ءچ بنی جیرسون دی ذمہ داری اِیہو ہے۔ او ہارُون کاہِن دے پوتر اِتمر دی نِگرانی ءچ کم کرݨ۔“

بنی مراری دیاں ذمہ داریاں

29رب العالمین آکھیا، ”بنی مراری دی گِنتری وی اُنہاں دے خانداناں تے گھرانڑیاں دے مطابق کریں۔ 30اُنہاں یکے مرداں کُوں درج کریں جیہڑے ترِیح تُوں پنجھاہ سال دے ہِن تے اِجتماع آلے تمبُو ءچ خدمت کرݨ دے قابل ہِن۔ 31بنی مراری دی خدمت ایہ ہے جو او اِجتماع آلے تمبُو دیاں ایہ شیواں چاوݨ: کندھاں کیتے تختے، شتِیر، تھمبے تے چوکیاں، 32صحن دی چار دیواری دے تھمبے تے اُنہاں دیاں چوکیاں، کِل، رسے تے اِنہاں شیواں کُوں لاوݨ دا سامان۔ تُساں ہر بندے کیتے اُوہو سامان مُقرر کرائے جیہڑا اُوں چاونڑا ہے۔ 33اِجتماع آلے تمبُو ءچ بنی مراری دی ذمہ داری اِیہو ہے۔ او ہارُون کاہِن دے پوتر اِتمر دی نِگرانی ءچ کم کرݨ۔“

لاویاں دی مردم شماری

34مُوسیٰ، ہارُون تے جماعت دے سرداراں بنی قہات دی اولاد ءچوں اُنہاں دے خانداناں تے گھرانڑیاں دے مطابق گِنتری کیتی۔ 35اُنہاں ترِیح تُوں پنجھاہ سال دے اُنہاں یکے مرداں کُوں درج کیتا جیہڑے اِجتماع آلے تمبُو ءچ خدمت کرݨ دے قابل ہَن۔ 36اُنہاں دی کُل گِنتری ڈُو ہزار، سَت سو پنجھاہ ہئی۔ 37بنی قہات دے خانداناں ءچوں اِجتماع آلے تمبُو ءچ خدمت کرݨ آلیاں دی گِنتری جیہڑی مُوسیٰ تے ہارُون رب العالمین دے حُکم دے مطابق کیتی، اِیہو ہے۔

‏ 38وَل اُنہاں بنی جیرسون دی گِنتری اُنہاں دے خانداناں تے گھرانڑیاں دے مطابق کیتی۔ 39اُنہاں ترِیح تُوں پنجھاہ سال دے اُنہاں یکے مرداں کُوں درج کیتا جیہڑے اِجتماع آلے تمبُو ءچ خدمت کیتے آ سگدے ہَن۔ 40اُنہاں دی کُل گِنتری ڈُو ہزار، چِھی سو ترِیح ہئی۔ 41بنی جیرسون دے خانداناں ءچوں اِجتماع آلے تمبُو ءچ خدمت کرݨ آلیاں دی گِنتری جیہڑی مُوسیٰ تے ہارُون رب العالمین دے حُکم دے مطابق کیتی، اِیہو ہے۔

42وَل اُنہاں بنی مراری دی گِنتری اُنہاں دے خانداناں تے گھرانڑیاں دے مطابق کیتی۔ 43اُنہاں ترِیح تُوں پنجھاہ سال دے اُنہاں یکے مرداں کُوں درج کیتا جیہڑے اِجتماع آلے تمبُو ءچ خدمت کیتے آ سگدے ہَن۔ 44اُنہاں دی کُل گِنتری ترے ہزار، ڈُو سو ہئی۔ 45مُوسیٰ تے ہارُون بنی مراری دی گِنتری اُونویں ای کیتی جِینویں رب العالمین مُوسیٰ کُوں حُکم ڈِتا ہا۔ 46اِینویں مُوسیٰ، ہارُون تے بنی اِسرائیل دے سرداراں یکے لاویاں دی گِنتری اُنہاں دے خانداناں تے گھرانڑیاں دے مطابق کیتی۔ 47اُنہاں ترِیح تُوں پنجھاہ سال دے اُنہاں یکے مرداں دے ناں لکھے جیہڑے اِجتماع آلے تمبُو ءچ خدمت کیتے آ سگدے ہَن۔ 48اُنہاں دی کُل گِنتری اَٹھ ہزار، پنج سو اسّی ہئی۔

49مُوسیٰ رب العالمین دے حُکم دے مطابق ہر ہِک بندے کیتے اُوہو کم مقرر کیتا جیہڑا اُونکُوں کرنڑا ہا تے اُوہو سامان وی جیہڑا اُونکُوں چاونڑا ہا۔

اِینویں لاویاں دی گِنتری رب العالمین دے اُوں حُکم دے مطابق کیتی گئی جیہڑا اُوں مُوسیٰ کُوں ڈِتا ہا۔