گِنتی 3

ہارُون دے پوتر

1جِیں ویلے رب العالمین مُوسیٰ نال سِینا پہاڑ اُتے گالھ کیتی، اُوں ویلے ہارُون تے مُوسیٰ دے خاندان ایہ ہَن۔ 2ہارُون دے چار پوتر ہَن۔ وڈا پوتر ندب ہا، وَل ابِیہُو، الِیعزر تے اِتمر۔ 3ایہ کاہِن ہَن جِنہاں کُوں مسح کر تے اِیں خدمت کیتے مقرر کیتا گِیا ہا۔ 4پر ندب تے ابِیہُو اُوں ویلے ای مر گئے جِیں ویلے اُنہاں سِینا دے بیابان ءچ رب العالمین دے حضُور ناجائز بھاہ1 پیش کیتی ہئی۔ او بے اولاد ہَن، اِیں کیتے ہارُون دی باقی زندگی ءچ الِیعزر تے اِتمر کاہِن دے طور تے خدمت کریندے ہَن۔

مُقدّس تمبُو ءچ لاویاں دی ذمہ داری

5رب العالمین مُوسیٰ کُوں آکھیا، 6”لاوی دے قبیلے کُوں گِھن آ تے ہارُون کاہِن دے اگُوں پیش کر، تاں جو او اُوندی خدمت کرݨ۔ 7او مُقدّس تمبُو ءچ خدمت کریندے ہوئے ہارُون کیتے تے یکی جماعت کیتے آپنڑیاں ذمہ داریاں پُوریاں کرݨ۔ 8او اِجتماع آلے تمبُو دا سامان سنبھالنڑ تے یکے بنی اِسرائیل کیتے مُقدّس تمبُو دی خدمت دے فرائض ادا کرݨ۔ 9یکے بنی اِسرائیل ءچوں لاویاں کُوں ہارُون تے اُوندے پوتراں دی خدمت کیتے مقرر کر۔ 10پر کاہِن دے طور تے خدمت کرݨ کیتے ہارُون تے اُوندے پوتر مقرر ہِن۔ باقیاں ءچوں جیہڑا وی مُقدّس تمبُو دے نیڑے آوݨ دی کوشش کرے، اُونکُوں سزائے موت ڈِتی ونجے۔“

11رب العالمین مُوسیٰ کُوں ایہ وی آکھیا، 12”مَیں لاویاں کُوں بنی اِسرائیل دے یکے پلوٹھیاں دے بدلے ءچ چُنڑ گِھدے۔ لاوی میڈے ہوسن 13کیوں جو پلیٹھی دے یکے بال میڈے ای ہِن۔ جیہڑی ڈینہوار مَیں مِصر دے یکے پلوٹھیاں کُوں مار ڈِتا ہا، اُوں ڈینہوار مَیں اِسرائیل دے پلوٹھیاں کُوں آپنڑے کیتے مخصوص تے مُقدّس کیتا، بھانویں او اِنسان دے ہَن یا جانور دے۔ او میڈے ای ہِن۔ مَیں رب العالمین ہاں۔“

لاویاں دی گِنتری

14رب العالمین سِینا دے بیابان ءچ مُوسیٰ کُوں آکھیا، 15”لاویاں دی گِنتری کر تے اُنہاں کُوں اُنہاں دے خانداناں تے گھرانڑیاں دے حساب نال درج کریں۔ ہِک مہینے تے اِیں تُوں زیادہ دے ہر پوتر دی گِنتری کرنڑی ہے۔“ 16مُوسیٰ رب العالمین دے حُکم دے مطابق اِینویں ای کیتا۔

17لاوی دے ترے پوتر جیرسون، قہات تے مراری ہَن۔ 18جیرسون ءچوں نِکلے ہوئے ڈُو خاندان اُوندے پوتراں لِبنی تے سِمعی دے نانواں اُتے ہَن۔ 19قہات ءچوں نِکلے ہوئے چار خاندان اُوندے پوتراں عمرام، اِضہار، حبرون تے عُزی ایل دے نانواں اُتے ہَن۔ 20مراری ءچوں نِکلے ہوئے ڈُو خاندان اُوندے پوتراں مَحلی تے مُوشی دے نانواں اُتے ہَن۔ لاویاں دے گھرانڑے اُنہاں دے آبائی خانداناں دے مطابق اِیہو ہَن۔

21جیرسون ءچوں نِکلے ہوئے ڈُو خاندان لِبنی تے سِمعی ہَن۔ 22اُنہاں دے سَت ہزار، پنج سو مرد ایجھے ہَن جِنہاں دی عُمر ہِک مہینہ یا اِیں تُوں زیادہ ہئی۔ 23اُنہاں کُوں آپنڑے ڈیرے مغرب ءچ مُقدّس تمبُو دے پِچُھوں لاونڑے ہَن۔ 24اُنہاں دا سردار اِلیاسف بِن لاایل ہا۔ 25تے او اِجتماع آلے تمبُو کُوں سنبھلیندا ہا یعنی مُقدّس تمبُو، اُوندے غلاف، تمبُو دے در دا پڑدہ، 26تمبُو تے قُربان گاہ دی چار دیواری دے صحن دے پڑدے، صحن دے دَر دا پڑدہ تے یکے رسے۔ اِنہاں شیواں کُوں سنبھالنڑ دی خدمت اُنہاں دی ذمہ داری ہئی2۔

27قہات ءچوں نِکلے ہوئے چار خاندان عمرام، اِضہار، حبرون تے عُزی ایل دے ناں اُتے ہَن۔ 28اُنہاں دے اَٹھ ہزار، چِھی سو مرد ایجھے ہَن جِنہاں دی عُمر ہِک مہینہ یا اِیں تُوں زیادہ ہئی۔ مُقدّس تمبُو دی خدمت بنی قہات دے ذمے ہئی۔ 29اُنہاں کُوں مُقدّس تمبُو دے جنُوب ءچ آپنڑے ڈیرے لاونڑے ہَن۔ 30اُنہاں دا سردار الِیصفن بِن عُزی ایل ہا۔ 31او ایہ شیواں سنبھلیندے ہَن: عہد دا صندوق، میز، چراغ دان، قُربان گاہاں، مُقدّس تمبُو ءچ اِستعمال تھیوݨ آلا سامان تے تھاں تے سبھ تُوں مُقدّس کمرے دا پڑدہ۔ اِنہاں شیواں دے بارے ءچ ساری خدمت اُنہاں دی ذمہ داری ہئی۔ 32ہارُون کاہِن دا پوتر الِیعزر لاویاں دے یکے سرداراں دا سردار ہا تے او مُقدّس تمبُو دی ڈیکھ بھال کرݨ آلے یکے بندیاں دا سربراہ ہا۔

33مراری ءچوں نِکلے ہوئے ڈُو خاندان مَحلی تے مُوشی دے ناں اُتے ہَن۔ 34اُنہاں دے چِھی ہزار، ڈُو سو مرد ایجھے ہَن جِنہاں دی عُمر ہِک مہینہ یا اِیں تُوں ودھ ہئی۔ 35اُنہاں دا سردار صُوری ایل بِن ابی خَئِیل ہا۔ اُنہاں کُوں آپنڑے ڈیرے مُقدّس تمبُو دے شمال ءچ لاونڑیں ہَن۔ 36تے او ایہ شیواں سنبھلیندے ہَن : مُقدّس تمبُو دے تختے، اُوندے شتِیر، تھمبے، چوکیاں تے اِنہاں ساریاں شیواں دا سامان۔ اِنہاں شیواں تُوں مُتعلق یکی خدمت اُنہاں دے ذمے ہئی۔ 37او چار دیواری دے تھمبے، چوکیاں، کِل تے رسے وی سنبھلیندے ہَن۔

38مُوسیٰ، ہارُون تے اُوندے پوتراں کُوں آپنڑے ڈیرے مشرق ءچ اِجتماع آلے تمبُو دے سامنڑے لاونڑیں ہَن۔ مُقدّس تمبُو ءچ بنی اِسرائیل دی خدمت کرنڑا اُنہاں دی ذمہ داری ہئی۔ اُنہاں دے علاوہ جیہڑا وی مُقدّس تمبُو ءچ وڑن دی کوشش کرے، اُونکُوں جان تُوں مار ڈِتا ونجے۔

39ہِک مہینہ یا اِیں تُوں زیادہ عُمر دے لاوی مرداں دی کُل گِنتری باویہہ ہزار ہئی۔ رب العالمین دے حُکم دے مطابق مُوسیٰ تے ہارُون اُنہاں کُوں خانداناں دے مطابق گِنتری کر تے درج کیتا۔

لاوی قبیلے دے مرد پلوٹھیاں دے عوضی ہِن

40رب العالمین مُوسیٰ کُوں آکھیا، ”بنی اِسرائیل دے ہِک مہینہ یا اِیں تُوں زیادہ دے یکے پلوٹھیاں دی گِنتری کر تے اُنہاں کُوں درج کریں۔ 41اُنہاں یکے پلوٹھیاں دی جاہ تے لاویاں کُوں میڈے کیتے مخصوص کریں۔ اِیں طریقے نال بنی اِسرائیل دے ڈھورڈنگراں دے پلوٹھیاں دی جاہ تے لاویاں دے ڈھورڈنگر میڈے کیتے مخصوص کریں۔ مَیں رب العالمین ہاں۔“ 42مُوسیٰ اُونویں ای کیتا جِینویں رب العالمین اُونکُوں حُکم ڈِتا ہا۔ اُوں بنی اِسرائیل دے یکے پلوٹھے 43جیہڑے ہِک مہینہ یا اِیں تُوں زیادہ دے ہَن، گِنتری کیتے۔ اُنہاں دی کُل گِنتری باویہہ ہزار، ڈُو سو تہتّر ہئی۔

44رب العالمین مُوسیٰ کُوں آکھیا، 45”میڈے کیتے بنی اِسرائیل دے یکے پلوٹھیاں دی جاہ تے لاویاں کُوں وقف کریں۔ اِینویں ای میڈے کیتے بنی اِسرائیل دے ڈنگراں دی جاہ تے لاویاں دے ڈنگر وقف کریں۔ لاوی میڈے ای ہِن۔ مَیں رب العالمین ہاں۔ 46لاویاں دی نسبت باقی بنی اِسرائیل دے ڈُو سو تہتّر پلوٹھے زیادہ ہِن۔ 47ہر ہِک دے فِدیے ءچ چاندی دے پنج سِکے گِھن، جیہڑے مُقدّس تمبُو دے وزن دے مطابق ہووݨ یعنی ہِک تولا۔ 48ایہ پیسے ہارُون تے اُوندے پوتراں کُوں ڈیویں۔“

49مُوسیٰ اِینویں ای کیتا۔ اُوں بنی اِسرائیل دے ڈُو سو تہتّر پلوٹھیاں تُوں جیہڑے گِنتری ءچ زیادہ ہَن، فِدیہ دے پیسے گِھدے۔ 50اِینویں اُوں مُقدّس تمبُو دے سِکے دے وزن دے برابر چاندی دے ہِک ہزار، ترے سو پنجئیٹھ (1,365) سکے جمع کیتے۔ 51تے ہارُون تے اُوندے پوتراں کُوں ڈِتے جِینویں رب العالمین اُونکُوں حُکم ڈِتا ہا۔