Modern Central Saraiki Bible
گِنتی 2
ڈیرے ءچ قبیلیاں دی ترتیب
رب العالمین مُوسیٰ تے ہارُون کُوں آکھیا، ”بنی اِسرائیل آپنڑے آپنڑے تمبُو، اِجتماع آلے تمبُو دے آسُوں پاسُوں تھوڑے فاصلے تے لاوݨ۔ ہر ہِک آپنڑا تمبُو آپنڑے جھنڈے تے آپنڑے آبائی خاندان دے نشان کولھ لاوے۔
مُقدّس تمبُو دے مشرق ءچ یہُوداہ دا جھنڈا ہووے جیندے آسُوں پاسُوں ترے فوجی دستے ڈیرہ لاوݨ۔ پہلے یہُوداہ دا قبیلہ جِیندا سردار نحسون بِن عِمّینداب ہووے، تے جیندے لشکر دے چوہتّر ہزار، چِھی سو (74,600) فوجی ہِن۔ وَل اُنہاں دے نیڑے اِشکار دا قبیلہ جِیندا سردار نتنی ایل بِن ضُغر ہووے، تے جیندے لشکر دے چروِنجھاہ ہزار، چار سو (54,400) فوجی ہِن۔ تے وَل زبُولُون دا قبیلہ جِیندا سردار الِیاب بِن حیلون ہووے تے جیندے لشکر دے سَتونجھاہ ہزار، چار سو (57,400) فوجی ہِن۔ یہُوداہ دے ڈیرے دے فوجیاں دی کُل گِنتری ہِک لکھ، چِھیاسی ہزار، چار سو (1,86,400) ہے۔ ٹُردے ویلے ایہ ترِیہے قبیلے سبھ تُوں اگُوں ٹُرݨ۔
مُقدّس تمبُو دے جنُوب ءچ رُوبِن دا جھنڈا ہووے جیندے آسُوں پاسُوں ترے دستے ڈیرہ لاوݨ۔ پہلا، رُوبِن دا قبیلہ جِیندا سردار الِیصُور بِن شِدیُور ہووے، تے جیندے چِھیالیہہ ہزار، پنج سو (46,500) فوجی ہِن۔ وَل شمعون دا قبیلہ جِیندا سردار سلومی ایل بِن صُوری شدّی ہووے، تے جیندے اُنیٹھ ہزار، ترے سو (59,300) فوجی ہِن۔ تے وَل جد دا قبیلہ جِیندا سردار اِلیاسف بِن رعُوایل ہووے، تے جیندے پِنتالیہہ ہزار، چِھی سو پنجھاہ (45,650) فوجی ہِن۔ رُوبِن دے ڈیرے دے فوجیاں دی کُل گِنتری ہِک لکھ، اِکونجھاہ ہزار، چار سو پنجھاہ (1,51,450) ہے۔ ٹُردے ویلے ایہ ترِیہے قبیلے مشرقی قبیلیاں دے پِچُھوں پِچُھوں ٹُرݨ۔
اِنہاں جنُوبی قبیلیاں تُوں بعد لاوی اِجتماع آلا تمبُو چا تے قبیلیاں دے وچال ٹُرݨ۔ قبیلے اُوں ترتیب نال ٹُرݨ جیہڑی ترتیب نال او آپنڑے تمبُو لیندے ہِن۔ ہر قبیلہ آپنڑے آپنڑے جھنڈے دے پِچُھوں ٹُرے۔
مُقدّس تمبُو دے مغرب ءچ اِفرائِیم دا جھنڈا ہووے جیندے آسُوں پاسُوں ترے فوجی دستے ڈیرہ لاوݨ۔ پہلے اِفرائِیم دا قبیلہ جِیندا سردار الِیسمع بِن عِمّیہُود ہووے، تے جیندے چالیہہ ہزار، پنج سو (40,500) فوجی ہِن۔ وَل منسّی دا قبیلہ جِیندا سردار جَملی ایل بِن فداہصُور ہووے، تے جیندے بترِیح ہزار، ڈُو سو (32,200) فوجی ہِن۔ تے وَل بِنیمِین دا قبیلہ جِیندا سردار اَبِدان بِن جِدعونی ہووے، تے جیندے پینتریح ہزار، چار سو (35,400) فوجی ہِن۔ اِفرائِیم دے ڈیرے دے فوجیاں دی کُل گِنتری ہِک لکھ، اَٹھ ہزار ہِک سو (1,08,100) ہے۔ ٹُردے ویلے ایہ ترِیہے قبیلے تریجھا گروہ ہوسن۔
مُقدّس تمبُو دے شمال ءچ دان دا جھنڈا ہووے جیندے آسُوں پاسُوں ترے فوجی دستے ڈیرہ لاوݨ۔ پہلے دان دا قبیلہ جِیندا سردار اخیعزر بِن عمِیشدّی ہووے، تے جیندے بیئٹھ ہزار، سَت سو (62,700) فوجی ہِن۔ وَل آشر دا قبیلہ جِیندا سردار فجعی ایل بِن عکران ہووے، تے جیندے اِکتالیہہ ہزار، پنج سو (41,500) فوجی ہِن۔ تے وَل نفتالی دا قبیلہ جِیندا سردار اَخِیرع بِن عینان ہووے، تے جیندے تِرونجھاہ ہزار، چار سو (53,400) فوجی ہِن۔ دان دے ڈیرے دے فوجیاں دی کُل گِنتری ہِک لکھ، سَتونجھاہ ہزار چِھی سو (1,57,600) ہے۔ ایہ ترِیہے قبیلے سبھ تُوں آخر ءچ آپنڑا جھنڈا چا تے نِکلنڑ۔“
بنی اِسرائیل دی لِسٹ آپنڑے آبائی خانداناں دے مطابق اِیہو ہے۔ تے یکے فوجیاں دی کُل گِنتری آپنڑے آپنڑے دستے دے مطابق چِھی لکھ، ترے ہزار، پنج سو پنجھاہ (6,03,550) ہئی۔ پر لاوی جِینویں رب العالمین مُوسیٰ کُوں حُکم ڈِتا ہا بنی اِسرائیل دی اِیں گِنتری ءچ شامل نہ ہَن۔
تے بنی اِسرائیل سبھ کُجھ اُونویں ای کیتا جِینویں رب العالمین مُوسیٰ کُوں حُکم ڈِتا ہا۔ او اُنہاں حُکماں دے مطابق ای آپنڑے جھنڈیاں دے آسُوں پاسُوں آپنڑے ڈیرے لیندے تے اُنہاں دے مطابق ای آپنڑے خانداناں تے گھرانڑیاں نال ٹُردے ہَن۔
Modern Central Saraiki Bible. Copyright © Strategic Resource Group. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.