Modern Central Saraiki Bible
گِنتی 1
بنی اِسرائیل دی پہلی مردم شماری
بنی اِسرائیل کُوں مِصر ءچوں نِکلے ہِک سال تُوں ودھ عرصہ تھی گِیا ہا۔ ہُنڑ تئیں او سِینا دے بیابان ءچ ہَن۔ ڈُوجھے سال دے ڈُوجھے مہینے دے پہلے ڈینہہ رب العالمین اِجتماع آلے تمبُو ءچ مُوسیٰ کُوں آکھیا،
”تُوں تے ہارُون یکے بنی اِسرائیل دی گِنتری اُنہاں دے خانداناں تے گھرانڑیاں دے حساب نال کرائے۔ اُنہاں یکے بندیاں دی لِسٹ بنڑائے جیہڑے گھٹ و گھٹ وِیہہ سال دے تے جنگ ءچ لڑن دے قابل ہووݨ۔ اِیں کم ءچ ہر قبیلے دا ہِک بندہ جیہڑا آپنڑے خاندان دا سردار ہے، تُہاڈی مدد کرے۔ اُنہاں دے ناں ایہ ہِن:
رُوبِن دے قبیلے تُوں الِیصُور بِن شدِیُور،
شمعون دے قبیلے تُوں سلومی ایل بِن صُوری شدّی،
یہُوداہ دے قبیلے تُوں نحسون بِن عِمّینداب،
اِشکار دے قبیلے تُوں نتنی ایل بِن ضُغر،
زبُولُون دے قبیلے تُوں الِیاب بِن حیلون،
یُوسف دے پوتر اِفرائِیم دے قبیلے تُوں الِیسمع بِن عِمّیہُود،
یُوسف دے پوتر منسّی دے قبیلے تُوں جَملی ایل بِن فداہصُور،
بِنیمِین دے قبیلے تُوں اَبِدان بِن جِدعونی،
دان دے قبیلے تُوں اخیعزر بِن عمِیشدّی،
آشر دے قبیلے تُوں فجعی ایل بِن عکران،
جد دے قبیلے تُوں اِلیاسف بِن دعُوایل،
نفتالی دے قبیلے تُوں اَخِیرع بِن عینان۔“
اِیہے مرد جماعت ءچوں اِیں کم کیتے سڈوائے گئے۔ او آپنڑے قبیلیاں دے راہنما تے خانداناں دے سردار ہَن۔ اُنہاں دی مدد نال مُوسیٰ تے ہارُون اُوں ڈینہوار یکی جماعت کُوں کٹھا کیتا۔ گھٹ و گھٹ وِیہہ سال دے ہر مرد دا ناں اُوندے خاندان تے گھرانڑے دے حساب نال درج کیتا گِیا۔
سبھ کُجھ اُونویں ای کیتا گِیا جِینویں رب العالمین مُوسیٰ کُوں حُکم ڈِتا ہا تے مُوسیٰ سِینا دے بیابان ءچ لوکاں دی گِنتری کیتی۔
جیہڑے مرد وِیہہ سال یا اُوں تُوں زیادہ دے ہَن تے جنگ کرݨ دے قابل ہَن، اُنہاں دے ناں اُنہاں دے خانداناں تے گھرانڑیاں دے مطابق گِنڑے گئے تے او ایہ ہِن:
رُوبِن دے قبیلے دے چِھیالیہہ ہزار، پنج سو (46,500) مرد،
شمعون دے قبیلے دے اُنیٹھ ہزار، ترے سو (59,300) مرد،
جد دے قبیلے دے پِنتالیہہ ہزار، چِھی سو پنجھاہ (45,650) مرد،
یہُوداہ دے قبیلے دے چوہتّر ہزار، چِھی سو (74,600) مرد،
اِشکار دے قبیلے دے چروِنجھاہ ہزار، چار سو (54,400) مرد،
زبُولُون دے قبیلے دے سَتونجھاہ ہزار، چار سو (57,400) مرد،
یُوسف دے پوتر اِفرائِیم دے قبیلے دے چالیہہ ہزار، پنج سو (40,500) مرد،
یُوسف دے پوتر منسّی دے قبیلے دے بترِیح ہزار، ڈُو سو (32,200) مرد،
بِنیمِین دے قبیلے دے پینتریح ہزار، چار سو (35,400) مرد،
دان دے قبیلے دے بیئٹھ ہزار، سَت سو (62,700) مرد،
آشر دے قبیلے دے اِکتالیہہ ہزار، پنج سو (41,500) مرد،
نفتالی دے قبیلے دے تِرونجھاہ ہزار، چار سو (53,400) مرد۔
مُوسیٰ، ہارُون تے قبیلیاں دے بارہاں سرداراں اِنہاں یکے بندیاں دی گِنتری کیتی۔ بنی اِسرائیل دے جیہڑے مرد وِیہہ سال یا اُوں تُوں زیادہ دے ہَن تے جنگ کرݨ دے قابل ہَن، او آپنڑے گھرانڑیاں دے مطابق گِنڑے گئے۔ اُنہاں دی یکی گِنتری چِھی لکھ، ترے ہزار، پنج سو پنجھاہ (6,03,550) ہئی۔
لاویاں دی ذمہ داری
پر لاوی قبیلے دی گِنتری نہ تھئی کیوں جو رب العالمین مُوسیٰ کُوں آکھیا ہا جو، ”بنی اِسرائیل دی گِنتری ءچ لاویاں کُوں شامل نہ کرائے۔ اِیندی بجائے عہد دے صندوق دے مُقدّس تمبُو تے اُوندے سامان کُوں سنبھالنڑ دی ذمہ داری اُنہاں کُوں ڈیوائے۔ او سفر کریندے ویلے ایہ تمبُو تے اُوندا یکا سامان چاوݨ تے اُوندی خدمت کیتے حاضر راہوݨ۔ تے او آپنڑے ڈیرے مُقدّس تمبُو دے آسُوں پاسُوں لاوݨ۔ ٹُردے ویلے لاوی ای مُقدّس تمبُو کُوں ولھیٹنڑ تے ڈیرے لاوݨ ویلے لاوی ای مُقدّس تمبُو کُوں لاوݨ۔ جیکر کوئی بِیا اُوندے کولھ آوے تاں جانُوں مار ڈِتا ونجے۔ باقی بنی اِسرائیل ڈیرے ءچ آپنڑے آپنڑے دستے دے مطابق تے آپنڑے آپنڑے جھنڈے دے آسُوں پاسُوں آپنڑے ڈیرے لاوݨ۔ پر لاوی آپنڑے تمبُواں کُوں عہد دے صندوق دے مُقدّس تمبُو دے آسُوں پاسُوں لاوݨ تاں جو کہیں بئے بندے دے کولھ آوݨ پارُوں میڈا غضب بنی اِسرائیل دی جماعت اُتے نازل نہ تھی پووے۔ اِیں عہد دے صندوق دے مُقدّس تمبُو کُوں لاوی ای سنبھالنڑ۔“
بنی اِسرائیل اُونویں ای کیتا جِینویں رب العالمین مُوسیٰ کُوں حُکم ڈِتا ہا۔
Modern Central Saraiki Bible. Copyright © Strategic Resource Group. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.