احبار 27

وقف کیتیاں ہوئیاں شیواں دی قیمت

1رب العالمین مُوسیٰ کُوں آکھیا، 2”بنی اِسرائیل کُوں ڈسا جو ’جیکر کہیں بندے مَنت مَن تے کہیں کُوں رب العالمین کیتے مخصوص کیتا ہووے، تاں او بندے دے برابر رقم ڈے تے آپنڑی مَنت پُوری کر سگدے، 3یعنی وِیہہ تُوں سَٹھ سال دے بندے کیتے چاندی دے پنجھاہ سِکے۔ ایہ سِکے مُقدّس تمبُو دے سِکیاں1 دے برابر ہووݨ۔ 4اِیں عُمر دی عورت کیتے چاندی دے ترِیح سِکے، 5پنج تُوں وِیہہ سال دے چھوہر کیتے چاندی دے وِیہہ سِکے تے چھوہیر کیتے ڈاہ سِکے۔ 6ہِک مہینے تُوں پنج سال دے چھوہر کیتے چاندی دے پنج سِکے تے چھوہیر کیتے ترے سِکے۔ 7سَٹھ سال تُوں وڈے بندے کیتے چاندی دے پندھراں سِکے تے عورت کیتے ڈاہ سِکے۔

8جیکر مَنت مننڑ آلا غریبی پارُوں مقررہ رقم ادا نہ کر سگے تاں او مخصوص کیتے گئے بندے کُوں کاہِن دے کولھ گِھن آوے۔ وَل کاہِن اِتنی رقم مقرر کرے جیہڑی مَنت مننڑ آلا ادا کر سگدا ہووے۔

9جیکر کہیں بندے مَنت مَن تے ایجھا جانور وقف کیتا ہووے جیہڑا رب العالمین دیاں قُربانیاں کیتے اِستعمال تھی سگدے تاں او جانور مخصوص تے مُقدّس تھی ویندے۔ 10نہ او اُونکُوں بدل سگدے تے نہ چنگے دی جاہ تے مندا تے مندے دی جاہ تے چنگا ڈے سگدے۔ جیکر او ہِک جانور بئے دی جاہ تے ڈیوے تاں ڈوہائیں مخصوص تے مُقدّس تھی ویندے ہِن2۔

11جیکر کہیں بندے مَنت مَن تے کوئی حرام جانور وقف کیتے جیہڑا رب العالمین دیاں قُربانیاں کیتے اِستعمال نئیں تھی سگدا تاں او اُونکُوں کاہِن دے کولھ گِھن آوے۔ 12کاہِن اُوندے چنگے مندے صفتاں دے مطابق اُوندی قیمت مقرر کرے۔ مقرر کیتی گئی قیمت گھٹ ودھ نئیں تھی سگدی۔ 13جیکر مَنت مننڑ آلا اُونکُوں واپس مُل گِھننڑ چاہوے تاں او مقررہ رقم تُوں وِیہہ فیصد زیادہ ڈیوے۔

14جیکر کوئی رب العالمین کیتے آپنڑے گھر کُوں وقف کر ڈیوے تاں کاہِن اُوندی چنگی مندی حالت دے مطابق گھر دی قیمت مقرر کرے۔ مقررہ قیمت گھٹ ودھ نئیں تھی سگدی۔ 15جیکر گھر کُوں وقف کرݨ آلا اُونکُوں واپس مُل گِھننڑ چاہوے تاں او مقررہ رقم تُوں وِیہہ فیصد زیادہ ڈیوے۔ وَل او گھر ولا اُوندا بنڑ ویسی۔

16جیکر کوئی آپنڑی کُجھ وراثتی زمین رب العالمین کیتے وقف کرے تاں اُوندی قیمت زمین ءچ رہائے ونجنڑ آلے بیج دے مطابق مقرر کیتی ونجے۔ جیہڑے کھیت ءچ ہِک سو پینتریح کلو3 جَوں دا بیج رہایا ونجے، اُوندی قیمت چاندی دے پنجھاہ سِکے ہوسی۔ 17جیکر او آپنڑی زمین بحالی دے سال ءچ ای وقف کرے تاں اُوندی اِیہو قیمت مقرر کیتی ونجے۔ 18پر جیکر زمین دا مالک اُونکُوں بحالی دے سال دے بعد وقف کرے تاں کاہِن بحالی دے اگلے سال تئیں باقی سالاں دے مطابق زمین دی قیمت مقرر کرے۔ جِتنے سال گھٹ ہوسن قیمت وی اُتنی ای گھٹ ہوسی۔ 19جیکر وقف کرݨ آلا آپنڑی زمین واپس مُل گِھننڑ چاہوے تاں او مقررہ قیمت دا وِیہہ فیصد زیادہ ڈیوے۔ وَل او گھر ولا اُوندا بنڑ ویسی۔ 20جیکر وقف کرݨ آلا آپنڑی زمین کُوں واپس مُل گِھدے بغیر کہیں بئے بندے کُوں ویچ ڈیوے تاں اُونکُوں واپس مُل گِھننڑ دا حق ختم تھی ویسی۔ 21اگلے بحالی دے سال ایہ زمین ہمیشاں کیتے وقف کیتی ہُوئی زمین آلی کار رب العالمین کیتے مخصوص تے مُقدّس ہوسی۔ او کاہِن دی ملکیت بنڑ ویسی۔

22جیکر کوئی آپنڑے وراثتی کھیت دی بجائے آپنڑا مُل گِھدا ہویا کھیت رب العالمین کیتے وقف کرے 23تاں کاہِن اُوندی قیمت بحالی دے اگلے سال تئیں باقی سالاں دے حساب نال مقرر کرے۔ کھیت دا مالک اُوندی قیمت اُوں ڈینہوار ای ڈیوے۔ ایہ پیسے رب العالمین کیتے مخصوص تے مُقدّس ہوسن۔ 24بحالی دے سال ءچ ایہ کھیت اُوں بندے کولھ واپس آسی جئیں اُونکُوں ویچیا ہا تے جیندی او ملکیت ہا۔

25قیمت ڈیوݨ کیتے اِستعمال تھیوݨ آلے سِکے مُقدّس تمبُو دے سِکیاں دے برابر ہووݨ، یعنی ہر سکے دا وزن ہِک تولا4 ہووے۔

26پر کوئی وی کہیں ڈھورڈنگر دا پلوٹھا رب العالمین کیتے وقف نئیں کر سگدا، کیوں جو بھانویں او پلوٹھا، گاں ڈاند یا بھیڈ بکری کیوں نہ ہووے او تاں پہلے تُوں ای رب العالمین دا ہے۔ 27جیکر اُوں کوئی حرام جانور وقف کیتا ہووے تاں او مقررہ قیمت تُوں وِیہہ فیصد زیادہ ڈے تے واپس مُل گِھن سگدے۔ جیکر او اُونکُوں واپس مُل نہ گِھننڑ چاہوے تاں او مقررہ قیمت تے ویچیا ونجے۔

28پر جیکر کہیں بندے آپنڑی کُجھ ملکیت رب العالمین کیتے ہمیشاں کیتے وقف کیتی ہووے، بھانویں او اِنسان، جانور، یا زمین کیوں نہ ہووے، تاں وَل او نہ اُونکُوں ویچ سگدے تے نہ اُونکُوں واپس مُل گِھن سگدے۔ جیہڑی شے اِینویں وقف کیتی گِئی ہووے، او رب العالمین کیتے بہُوں مُقدّس ہے۔ 29اِینویں ای جیہڑے بندے کُوں خُدا ہلاکت کیتے مقرر کیتے5، اُوندا فِدیہ نئیں ڈِتا وَنج سگدا۔ لازم ہے جو اُونکُوں سزائے موت ڈِتی ونجے۔

30ہر فصل دا ڈاہواں حصہ رب العالمین دا ہے بھانویں او اناج ہووے یا پھل۔ تے او رب العالمین کیتے مخصوص تے مُقدّس ہے۔ 31جیکر کوئی آپنڑی فصل دے ڈاہویں حصے ءچوں کُجھ واپس مُل گِھننڑ چاہوے تاں او اُوندے کیتے مقررہ قیمت تُوں وِیہہ فیصد زیادہ ڈیوے۔ 32اِیں طریقے نال گاں، ڈاند تے بھیڈ بکریاں دا وی ڈاہواں حصہ رب العالمین کیتے مخصوص تے مُقدّس ہے، یعنی ہر ڈاہواں جانور جیہڑا آجڑی دی گِنتری ءچ آندے۔ 33اِنہاں جانوراں دا ڈیوݨ تُوں پہلے معائنہ نہ کیتا ونجے جو کیہڑا جانور چنگا ہے تے کیہڑا ماڑا۔ تے نہ ای ڈاہویں جانور دے بدلے ءچ کوئی بِیا ڈِتا وَنج سگدے۔ جے وَل وی اُونکُوں بدلیا ونجے تاں ڈوہائیں جانور رب العالمین کیتے مخصوص تے مُقدّس ہوسن تے اُنہاں کُوں واپس مُل نئیں گِھدا وَنج سگدا‘۔“

34ایہ او حُکم ہِن جیہڑے رب العالمین سِینا پہاڑ اُتے مُوسیٰ کُوں بنی اِسرائیل کیتے ڈِتے۔