احبار 26

فرمانبرداری دا اجر

1آپنڑے کیتے بُت نہ بنڑائے، نہ آپنڑے کیتے دیوتا دے مجسمے یا پتھر آلے تھمبے کھڑے کرائے، نہ سجدہ کرݨ کیتے آپنڑے مُلک ءچ اِیہو جِیہے پتھر رکھائے جِنہاں اُتے دیوتے دی شکل بنڑائی گئی ہووے۔ مَیں رب العالمین تُہاڈا خُدا ہاں۔ 2سبت دا ڈینہہ منائے تے میڈے مُقدّس تمبُو دا احترام کرائے۔ مَیں رب العالمین ہاں۔

3جیکر تُساں میڈیاں ہدایتاں اُتے ٹُرو تے میڈے حُکم مَن تے اُنہاں اُتے عمل کرو، 4تاں مَیں ویلے سر مینہ وسیساں۔ زمین آپنڑی پیداوار ڈیسی تے درخت آپنڑے آپنڑے پھل گِھن آسن۔ 5زیادہ پیداوار پارُوں کنڑک دی گہائی انگُور تُڑیندے ویلے تئیں چلدی راہسی تے انگُور اُوں ویلے تئیں تڑوڑے ویسن جِیں ویلے تئیں بیج رہاوݨ دا موسم آسی۔ تُساں رَج تے روٹی کھاسو تے آپنڑے مُلک ءچ محفوظ راہسو۔

6مَیں مُلک ءچ امن بخشیساں۔ تُساں سکون دے نال سمسو کیوں جو کہیں تُوں ڈرݨ دی لوڑ نہ ہوسی۔ مَیں وحشی جانور مُلک تُوں دُور کر ڈیساں تے کوئی تلوار تُہاڈے مُلک ءچ نہ چلسی۔ 7تُساں آپنڑے دُشمنڑاں دا پِچھا کریسو تے او تُہاڈی تلوار نال مارے ویسن۔ 8تُہاڈے پنج بندے سو دُشمنڑاں دا پِچھا کریسن تے تُہاڈے سو بندے اُنہاں دے ڈاہ ہزار بندیاں کُوں بھجا ڈیسن۔ تُہاڈے دُشمنڑ تُہاڈی تلوار نال مارے ویسن۔

9میڈی نظرِکرم تُہاڈے اُتے ہوسی۔ مَیں تُہاڈی اولاد کُوں ودھیساں تے تُہاڈے نال آپنڑا عہد قائم رکھیساں۔ 10ہِک سال اِتنی فصل تھیسی جو جِیں ویلے اگلی فصل دی کٹائی تھیسی تاں نویں اناج کیتے جاہ بنڑاوݨ کیتے پُرانڑے اناج کُوں سٹنڑاں پوسی۔ 11مَیں تُہاڈے وچال آپنڑی سکونت گاہ بنڑیساں تے تُہاڈے تُوں نفرت نہ کریساں۔ 12مَیں تُہاڈے وچال پِھرساں تے تُہاڈا خُدا ہوساں تے تُساں میڈی قوم ہوسو۔

13مَیں رب العالمین تُہاڈا خُدا ہاں جیہڑا تُہاکُوں مِصر ءچوں کڈھ تے گِھن آیا ہاں تاں جو تُہاڈی غُلامی مُک ونجے۔ مَیں تُہاڈی پنجالی کُوں بَھن سٹے تے ہُنڑ تُساں سِر چا تے ٹُر سگدے ہیوے۔

نافرمانی دی سزا

14پر جیکر تُساں میڈی نہ سُنڑسو تے اُنہاں یکے حُکماں دے مطابق نہ ٹُرسو، 15تے میڈیاں ہدایتاں کُوں رَد کر تے میڈے حُکماں تُوں نفرت کریسو تے اُنہاں اُتے عمل نہ کر تے میڈا عہد تُڑیسو 16تاں مَیں ولدے ءچ اچانک تُہاڈے اُتے دہشت گِھن آساں۔ جِسم کُوں کھاوݨ آلیاں بیماریاں تے بُخار نال تُہاڈے اکھیں ضائع تھی ویسن تے تُہاڈی جان لگی ویسی۔ جِیں ویلے تُساں بیج رہیسو تاں بے فائدہ ہوسی کیوں جو دُشمنڑ اُوندی فصل کھا ویسی۔ 17مَیں تُہاڈے خلاف تھی ویساں، اِیں کیتے تُساں آپنڑے دُشمنڑ دے ہتُھوں ہر ویسو۔ تُہاڈے تُوں نفرت کرݨ آلے تُہاڈے اُتے حکومت کریسن تے تُساں اُوں ویلے وی بھجسو جِیں ویلے کوئی تُہاڈا پِچھا وی نہ کریندا ہوسی۔

18جیکر تُساں اِیندے بعد وی میڈی نہ سُنڑو تاں مَیں تُہاڈے گُناہاں پارُوں تُہاکُوں سَت گُنا زیادہ سزا ڈیساں۔ 19مَیں تُہاڈی طاقت دے غرور کُوں مِٹی ءچ مِلا ڈیساں۔ تُہاڈے اُتے اسمان لُوہے جِیہا تے تُہاڈے تلے زمین پِتّل جیہی ہوسی۔ 20تُہاڈی ساری محنت بے فائدہ ہوسی کیوں جو نہ تُہاڈے کھیتاں ءچ فصلاں پکسن تے نہ تُہاڈے درخت پھل پیدا کریسن۔

21جیکر وَل وی تُساں میڈی مخالفت کریندے راہسو تے میڈی نہ سُنڑسو تاں مَیں تُہاڈے گُناہاں دے مطابق تُہاکُوں اِیں تُوں وی ودھ سَت گُنا عذاب ڈیساں۔ 22مَیں تُہاڈے خلاف وحشی جانور بھجیساں جیہڑے تُہاڈے بالاں کُوں پھاڑ سٹیسن تے تُہاڈے ڈھورڈنگر برباد کر ڈیسن۔ تُہاڈی تعداد اِتنی گھٹ تھی ویسی جو تُہاڈیاں سڑکاں ویران تھی ویسن۔

23جیکر وَل وی تُساں میڈی تربیت اُتے عمل نہ کرو تے میڈی مخالفت کریندے راہو 24تاں مَیں آپ تُہاڈے خلاف تھی ویساں۔ اِنہاں گُناہاں دے بدلے ءچ مَیں تُہاکُوں سَت گُنا سزا ڈیساں۔ 25مَیں تُہاڈے اُتے تلوار چلوا تے اِیندا بدلہ گِھنساں جو تُساں میڈا عہد تروڑے۔ جِیں ویلے تُساں حفاظت کیتے بھج تے شہراں ءچ کٹھے تھیسو تاں مَیں تُہاڈے وچال خطرناک بیماریاں کِھنڈا ڈیساں تے تُہاکُوں دُشمنڑاں دے حوالے کر ڈیساں۔ 26اناج دی اِتنی تھوڑ ہوسی جو ڈاہ عورتاں تُہاڈی یکی روٹی ہِکے تنُور ءچ پکیسن تے او وڈی احتیاط نال اِینکُوں تول تول تے ونڈیسن پر تُساں کھا تے وی بُکھے راہسو۔

27جیکر تُساں وَل وی میڈی نہ سُنڑسو بلکہ میڈے مخالف راہسو 28تاں میں کاوڑ ءچ تُہاڈے خلاف تھی تے تُہاڈے گُناہاں دے بدلے ءچ تُہاکُوں سَت گُنا سزا ڈیساں۔ 29تُساں کال پارُوں آپنڑیاں دِھیاں، پوتراں دا گوشت کھاسو۔ 30مَیں تُہاڈے اُچے جاہیں دیاں عبادت گاہیں تے تُہاڈے خوشبودار مصالحے دیاں قُربان گاہیں برباد کر ڈیساں۔ مَیں تُہاڈے بے جان بُتاں اُتے تُہاڈیاں لاشاں دے ڈھیر لا ڈیساں تے تُہاڈے تُوں نفرت کریساں۔ 31مَیں تُہاڈے شہراں کُوں کھنڈر بنڑا تے تُہاڈے عبادت گاہیں کُوں برباد کر ڈیساں۔ تُہاڈیاں قُربانیاں دی خوشبو میں پسند نہ کریساں۔ 32مَیں تُہاڈے مُلک دا ستیاناس کر ڈیساں تے تُہاڈے دُشمنڑ جیہڑے اُتھاں آ تے راہندے ہِن اِیں پارُوں اُنہاں دے لُوئیں کھڑیاں تھی ویسن۔ 33مَیں تُہاکُوں مختلف مُلکاں ءچ کِھنڈا ڈیساں پر اُتھاں وی آپنڑی تلوار ہتھ ءچ پکڑ تے تُہاڈا پِچھا کریساں۔ تُہاڈی زمین ویران تھی ویسی تے تُہاڈے شہر کھنڈر بنڑ ویسن۔ 34جِیں ویلے تُساں آپنڑے دُشمنڑاں دے مُلک ءچ راہسو تاں تُہاڈی زمین ویران حالت ءچ سبت دے ستویں سال دا او ارام منا سگسی جیہڑا اُونکُوں نہ مِلیا ہا۔ 35اُنہاں یکے ڈینہاں ءچ جِیں ویلے او ویران راہسی، اُونکُوں سبت دا او ارام مِلسی جیہڑا اُونکُوں اُوں ویلے نہ مِلیا ہا، جِیں ویلے تُساں مُلک ءچ راہندے ہَوے۔

36تُہاڈے ءچوں جیہڑے بچ تے آپنڑے دُشمنڑاں دے مُلک راہسن، مَیں اُنہاں دے دلاں ءچ ڈر پیدا کر ڈیساں۔ او ہوا پارُوں ڈھاوݨ آلے پتر دی اواز نال وی ڈر تے بھج ویسن۔ او اِینویں بھجسن جِینویں کوئی ہتھ ءچ تلوار پکڑ تے اُنہاں دے پِچُھوں بھجدا ہووے۔ او ڈھے تے مر ویسن بھانویں جو کوئی اُنہاں دا پِچھا نہ کریندا پِیا ہوسی۔ 37او ہِک بئے نال اِینویں ٹکراں کھاسن جِینویں کوئی تلوار پکڑ تے اُنہاں دے پِچُھوں لگا پِیا ہووے بھانویں جو کوئی وی نہ ہوسی۔ تے تُساں آپنڑے دُشمنڑاں دا سامنڑا نہ کر سگسو۔ 38تُساں ڈُوجھیاں قوماں ءچ کِھنڈ تے مارے ویسو تے تُہاڈے دُشمنڑاں دی زمین تُہاکُوں کھا ویسی۔ 39تُہاڈے ءچوں باقی لوک آپنڑے تے آپنڑے پِیُو ڈاڈے دے قصُور پارُوں آپنڑے دُشمنڑاں دے مُلکاں ءچ گَل سڑ ویسن۔

40پر ہِک وقت آسی جو او آپنڑا تے آپنڑے پِیُو ڈاڈے دا قصُور مَن گِھنسن۔ او میڈے نال آپنڑی بے وفائی تے مخالفت کُوں مَن گِھنسن 41جئیں پارُوں مَیں اُنہاں دا مخالف تھیّا تے اُنہاں کُوں دُشمنڑاں دے مُلک ءچ دَھک ڈِتا۔ تے جِیں ویلے اُنہاں دے ضِدی دل عاجز تھی ویسن تے او آپنڑے گُناہ دی قیمت ادا کریسن، 42تاں مَیں ابرہام، اِضحاق تے یعقُوب نال آپنڑا عہد یاد کریساں۔ تے مَیں اِیں مُلک کُوں وی یاد کریساں۔ 43پر پہلے او زمین اُنہاں تُوں چُھٹ ویسی تاں جو او اُنہاں دی غیر موجودگی ءچ ویران تھی تے سبت دے ارام آلے سال کُوں مناوے۔ اِینویں بنی اِسرائیل آپنڑے گُناہاں دی سزا پیسن کیوں جو اُنہاں میڈے حُکماں کُوں رَد کیتا تے میڈیاں ہدایتاں تُوں نفرت کیتی۔ 44اِیندے باوجود وی مَیں اُنہاں کُوں دُشمنڑ دے مُلک ءچ چھوڑ تے رَد نہ کریساں تے نہ اُنہاں تُوں اِتنی نفرت کریساں جو او اصلُوں تباہ تھی ونجنڑ کیوں جو مَیں اُنہاں نال آپنڑا عہد تروڑن آلا نئیں۔ مَیں رب العالمین اُنہاں دا خُدا ہاں۔ 45مَیں اُنہاں دی خاطر اُنہاں دے پِیُو ڈاڈے نال کیتا ہویا عہد یاد کریساں جِنہاں کُوں مَیں ڈُوجھیاں قوماں دے اکھیں دے سامنڑے مِصر ءچوں کڈھ آیا ہم تاں جو اُنہاں دا خُدا ہوواں۔ مَیں رب العالمین ہاں‘۔“

46رب العالمین مُوسیٰ کُوں بنی اِسرائیل کیتے ایہ یکے حُکم تے ہدایتاں سِینا پہاڑ اُتے ڈِتیاں۔