گِنتی 5

ڈیرے دی پاکیزگی

1رب العالمین مُوسیٰ کُوں آکھیا، 2”بنی اِسرائیل کُوں حُکم ڈے جو ہر اُوں بندے کُوں ڈیرے تُوں باہر کڈھ ڈیوݨ جِینکُوں چم دی خطرناک بیماری ہووے، جِینکُوں جریان دا مرض ہووے یا جیہڑا کہیں لاش کُوں ہتھ لاوݨ پارُوں ناپاک تھی گِیا ہووے۔ 3بھانویں مرد ہووے یا عورت یکیاں کُوں ڈیرے تُوں باہر کڈھ ڈیوݨ تاں جو او ڈیرے کُوں جِتھاں مَیں تُہاڈے وچال راہندا ہاں، ناپاک نہ کرݨ۔“ 4بس بنی اِسرائیل اِیہو جِیہے یکے لوکاں کُوں ڈیرے تُوں باہر کڈھ تے اُونویں ای کیتا جِینویں رب العالمین مُوسیٰ کُوں حُکم ڈِتا ہا۔

نُقصان دا معاوضہ

5رب العالمین مُوسیٰ کُوں آکھیا، 6”بنی اِسرائیل کُوں ڈسا جو جیہڑا وی میڈے نال بے وفائی کر تے کہیں بئے نال بُرا سلوک کریندے، او قصُوروار ہے بھانویں مرد ہے یا عورت۔ 7لازم ہے جو او آپنڑا گُناہ منے تے اُوندا یکا معاوضہ ڈیوے پر جیہڑے بندے دا نُقصان تھیّا ہووے اُوندا نُقصان پُورا کرݨ تُوں علاوہ وِیہہ فیصد زیادہ ڈیوے۔ 8پر جیکر او بندہ جِیندا نقصان کیتا گِیا ہا مر گِیا ہووے تے اُوندا کوئی نزدیکی رشتہ دار وی نہ ہووے جیہڑا ایہ معاوضہ گِھن سگے، تاں وَل ایہ معاوضہ رب العالمین دے حضُور پیش کیتا ونجے۔ کاہِن کُوں ایہ معاوضہ اُوں چھترے تُوں علاوہ مِلسی جیہڑا قصُوروار آپنڑے کفارے کیتے ڈیسی۔ 9جِتنیاں مُقدّس شیواں بنی اِسرائیل نذرانے دے طور تے کاہِن دے کولھ گِھن تے آوݨ، او اُوندیاں ای ہووݨ۔ 10جیہڑی مُقدّس شے کاہِن کُوں ڈِتی ویندی ہے، او اُوندی ای ہووے۔“

زِنا دے شک تے خُدا دا فیصلہ

11رب العالمین مُوسیٰ کُوں آکھیا، 12”بنی اِسرائیل کُوں ڈسا جو جے کوئی پرنی پتری عورت گُمراہ تھی تے آپنڑے پئے نال بے وفائی کرے تے 13کہیں بئے نال ہم بستر تھی تے ناپاک تھی ونجے تے اُوندے پئے کُوں پتہ نہ ہووے، تے ایہ کم لُک لُکا تے تھیّا ہووے تے نہ کہیں اُونکُوں پکڑیا ہووے تے نہ اِیندا کوئی گواہ ہووے 14تے جیکر پئے کُوں آپنڑی ذال دی وفاداری اُتے شک ہووے تے او غیرت کھاوݨ لگے، پر یقین نال نہ آکھ سگدا ہووے جو اُوندی ذال بے وفائی کر تے ناپاک تھئی ہے یا نئیں، 15تاں او آپنڑی ذال کُوں کاہِن دے کولھ گِھن آوے تے آپنڑی ذال کیتے نذرانے دے طور تے جَوں دا ڈیڈھ کلو بہترین میدہ گِھن آوے۔ اِیندے اُتے نہ تیل وِیٹیا ونجے تے نہ خوشبودار مصالحہ رکھیا ونجے کیوں جو غلے دا ایہ نذرانہ غیرت دا نذرانہ ہے جِیندا مقصد ہے جو لُکیا ہویا قصُور سامنڑے آ ونجے۔

16کاہِن عورت کُوں کولھ گِھن آ تے رب العالمین دے حضُور کھڑا کرے۔ 17او مِٹی دا تھاں مُقدّس پانڑی نال بھر تے اِیندے ءچ مُقدّس تمبُو دے فرش دی تھوڑی جیہی دھُوڑ پاوے۔ 18وَل او عورت کُوں رب العالمین دے حضُور پیش کر تے اُوندے وال کُھلواوے تے اُوندے ہتھاں اُتے غیرت کیتے میدے دا نذرانہ رکھے۔ کاہِن دے آپنڑے ہتھ ءچ کوڑے پانڑی دا تھاں ہووے جیہڑا لعنت دا سبب ہے۔

19وَل کاہِن عورت تُوں قَسم چوا تے آکھے جو ’جیکر کوئی بِیا بندہ تیڈے نال ہم بستر نئیں تھیّا تے تُوں آپنڑے پئے دی ہوندے ہوئیاں ناپاک نئیں تھئی تاں اِیں کوڑے پانڑی دی لعنت دا تیڈے اُتے کوئی اثر نہ تھیوے۔ 20پر جیکر تُوں آپنڑے پئے دی ہوندے ہوئیاں گُمراہ تھی تے کہیں بئے نال ہم بستر تھی تے ناپاک تھی گئی ہیں 21تاں رب العالمین تیڈی قوم دے سامنڑے تیکُوں لعنتی بنڑاوے۔ تُوں بانجھ تھی ونجیں تے تیڈا ڈھیڈ پُھوکیج ونجے۔ 22جِیں ویلے لعنت دا ایہ پانڑی تیڈے ڈھیڈ ءچ لہوے تاں تُوں بانجھ تھی ونجیں تے تیڈا ڈھیڈ پُھوکیج ونجے۔‘ اِیندے تے عورت آکھے، ’آمین، اِینویں ای تھیوے۔‘

23وَل کاہِن ایہ لعنت لِکھ تے کاغذ کُوں اُوں کوڑے پانڑی ءچ اِینویں دھووے جو اُوندے اُتے لِکھی ہوئی تحریر پانڑی ءچ گُھل ونجے۔ 24تے او عورت کُوں ایہ پانڑی پِلاوے تاں جو او لعنت اُوں عورت دے جِسم ءچ وَنج تے اُونکُوں تکلیف ڈیوے۔ 25پر پہلے کاہِن اُوندے ہتھاں ءچوں غیرت دا نذرانہ گِھن تے اُونکُوں غلے دے نذرانے دے طور تے رب العالمین دے حضُور ہلاوے تے وَل قُربان گاہ دے کولھ گِھن آوے۔ 26او غلے دے نذرانے ءچوں ہِک مُٹھ گِھن تے یادگاری دے طور تے اُوندے اُتے ساڑے۔ اِیندے بعد او عورت کُوں پانڑی پِلاوے۔ 27جیکر او آپنڑے پئے نال بے وفائی کر تے ناپاک تھئی ہوسی تاں او لعنت دا پانڑی اُونکُوں تکلیف ڈیسی تے او بانجھ تھی ویسی، اُوندا ڈھیڈ پُھوکیج ویسی تے او آپنڑی قوم دے سامنڑ ے لعنتی تھی ویسی۔ 28پر جیکر او ناپاک نئیں تھئی بلکہ پاک صاف ہے تاں اوبے اِلزام کھڑسی تے بال جم سگسی۔

29غیرت دے بارے ءچ شرع اِیہو ہے بھانویں ذال آپنڑے پئے دی ہوندے ہوئیاں گُمراہ تھی تے ناپاک تھی ونجے، 30یا پایا آپنڑی ذال اُتے شک کر تے غیرت کھاوݨ لگے۔ او اُوں عورت کُوں رب العالمین دے حضُور کھڑا کرے تے کاہِن اُوندے بارے ءچ اِیں شرع اُتے عمل کرے۔ 31جے پائے دا شک غلط ہا تاں او بےقصور راہسی پر جے اُوندی ذال قصوروار ہے تاں اُونکُوں سزا مِلسی۔“