گِنتی 6

آپنڑے آپ کُوں نذر کرݨ آلیاں کیتے قانُون

1رب العالمین مُوسیٰ کُوں آکھیا، 2”بنی اِسرائیل کُوں آکھ جو جیکر کوئی مرد یا عورت نذر دے طور تے مَنت مَن تے آپنڑے آپ کُوں ہِک خاص ویلے کیتے رب العالمین کیتے وقف کرے 3تاں نہ او انگور دی شراب پِیوے تے نہ کہیں بئی شے دی شراب۔ تے نہ او انگُور دا یا کہیں بئی شے دا سِرکہ پِیوے۔ نہ او انگُور دا رَس پِیوے تے نہ انگُور یا کِشمِش کھاوے۔ 4جئیں تئیں او وقف ہے انگُور دی کوئی وی پیداوار نہ کھاوے، اِتھوں تئیں جو انگُور دے بیج یا چھِلڑ وی نہ کھاوے۔

5جئیں تئیں او آپنڑی مَنت دے مطابق نذر دے طور تے وقف ہے، آپنڑے وال نہ کٹواوے۔ آپنڑے آپ کُوں رب العالمین کیتے وقف کرݨ دے ڈینہہ ختم تھیوݨ تئیں او مُقدّس ہے، اِیں کیتے او آپنڑے وال ودھنڑ ڈیوے۔ 6جئیں تئیں او وقف ہے کہیں لاش دے کولھ نہ ونجے، 7بھانویں او اُوندے ماء پِیُو یا بھینڑ بِھرا دی لاش ای کیوں نہ ہووے۔ او آپنڑے آپ کُوں اِیندے نال ناپاک نہ کرے کیوں جو اُوندے لمبے وال خُدا کیتے وقف ہووݨ دا نشان ہِن۔ 8او آپنڑے وقف ہووݨ دے ڈینہاں ءچ مَیں رب العالمین کیتے مخصوص تے مُقدّس ہے۔

9جیکر کوئی بندہ اچانک اُوندے کولھ ای مر ونجے تے اُوندے وال جیہڑے اُوندے وقف ہووݨ دا نشان ہِن ناپاک تھی ونجنڑ تاں او آپنڑے پاک تھیوݨ دے ڈینہہ یعنی ستویں ڈینہہ آپنڑا سر مُنواوے۔ 10اٹھوِیں ڈینہوار او ڈُو گُھگیاں یا ڈُو جوان کبوتراں کُوں اِجتماع آلے تمبُو دے دَر تے کاہِن کولھ گِھن آوے۔ 11کاہِن اُنہاں ءچوں ہِک کُوں گُناہ تُوں پاک کرݨ آلی قُربانی دے طور تے پیش کرے تے ڈُوجھے کُوں ساڑے ونجنڑ آلی قُربانی دے طور تے۔ اِینویں کاہِن اُوندے کیتے کفارہ ڈیسی کیوں جو او لاش دے سببّوں ناپاک تھی گئے۔ اُوں ڈینہوار او آپنڑے والاں کُوں ولا وقف کر تے ودھنڑ ڈیوے 12تے آپنڑے آپ کُوں اُوں مقررہ ویلے کیتے ہِک پھیری ولا رب العالمین کیتے وقف کرے تے قصُور دی قُربانی دے طور تے ہِک سال دا بھیڈا لیلا پیش کرے۔ اُوں وقف ہووݨ دی حالت ءچ جِتنے ڈینہہ پہلے گُزارے ہَن، اُنہاں دی گِنتری نہ کیتی وَنجے کیوں جو او ناپاک تھی گِیا ہا۔ او ولا نویں سِروں گِنتری شروع کرے۔

13جِیں ویلے نذر دے طور تے وقف تھیوݨ آلے بندے دا مقرر کیتا ہویا ویلا لنگھ گِیا ہووے تاں شرع ایہ ہے جو پہلے اُونکُوں اِجتماع آلے تمبُو دے دَر تے گِھن آیا ونجے۔ 14اُتھاں او رب العالمین دے حضُور ساڑے ونجنڑ آلی قُربانی کیتے ہِک سال دا بے عیب نَر بھیڈا لیلا، گُناہ تُوں پاک کرݨ آلی قُربانی کیتے ہِک سال دی بے عیب بھیڈ، تے سلامتی دی قُربانی کیتے ہِک بے عیب چھترا پیش کرے۔ 15اِیں تُوں علاوہ او ہِک ٹوکری ءچ بے خمیری روٹیاں جِنہاں ءچ بہترین میدہ تے تیل رَلایا گِیا ہووے تے بے خمیری پتلی روٹیاں جِنہاں اُتے تیل لایا گِیا ہووے، تے آپنڑے غلے دے نذرانے تے وِیٹے ونجنڑ آلیاں نذراں وی گِھن آوے۔ 16کاہِن اِنہاں سبھ کُوں رب العالمین دے حضُور پیش کرے۔ پہلے گُناہ تُوں پاک کرݨ آلی قُربانی تے ساڑے ونجنڑ آلی قُربانی، 17تے وَل ٹوکری دیاں بے خمیری روٹیاں نال سلامتی دی قُربانی دے طور تے چھترے۔ تے نال ای کاہِن غلے دے نذرانے تے وِیٹے ونجنڑ آلیاں نذراں وی پیش کرے۔ 18وَل نذر دے طور تے وقف ہووݨ آلا بندہ اِجتماع آلے تمبُو دے دَر تے آپنڑے وقف کیتے گئے سر کُوں مُنوا تے یکے وال سلامتی دی قُربانی دی بھاہ ءچ سٹ ڈیوے۔

19جِیں ویلے وقف ہووݨ آلا بندہ آپنڑے وال منوا گِھنے تاں کاہِن چھترے دا ہِک اُبلیا ہویا مونڈھا تے ٹوکری ءچوں ڈوہائیں قِسم دی ہِک ہِک روٹی گِھن تے نذر کیتے ہوئے بندے دے ہتھاں اُتے رکھے۔ 20وَل کاہِن ایہ شیواں واپس گِھن تے اُنہاں کُوں ہلائے ونجنڑ آلی قُربانی دے طور تے رب العالمین دے حضُور ہلاوے۔ ایہ ہِک مُقدّس قُربانی ہے جیہڑی کاہِن دا حصہ ہے۔ سلامتی دی قُربانی دا ہلایا ہویا سینہ تے پیش کیتی ہوئی ران وی کاہِن دا حصہ ہِن۔ قُربانی تُوں بعد نذر کیتے ہوئے بندے کُوں انگُور دا رَس پِیوݨ دی اِجازت ہوسی۔

21جیہڑا آپنڑے آپ کُوں رب العالمین کیتے نذر دے طور تے وقف کریندے اُوندے کیتے شرع اِیہو ہے تے لازم ہے جو او اُنہاں ہدایتاں دے مطابق یکیاں قُربانیاں پیش کرے۔ جیکر گُنجائش ہووے تاں او اِنہاں تُوں علاوہ وی پیش کر سگدے۔ لازم ہے جو او نذر دے طور تے وقف ہووݨ دی شرع دے مطابق آپنڑی مَنت پوری کرے۔“

کاہِن دی برکت دی دُعا

22رب العالمین مُوسیٰ کُوں آکھیا، 23”ہارُون تے اُوندے پوتراں کُوں ڈسا جو او بنی اِسرائیل کُوں اِینویں برکت ڈیوݨ،

24’رب العالمین تیکُوں برکت ڈیوے تے تیڈی حفاظت کرے۔

25رب العالمین آپنڑے چہرے دا نُور تیڈے اُتے چمکاوے تے تیڈے اُتے مہربان راہوے۔‘

26تیڈے اُتے رب العالمین دی نظرِکرم تھیوے، تے او تیکُوں سلامتی بخشے۔

27اِینویں او میڈا ناں گِھن تے بنی اِسرائیل کُوں دُعا ڈیوݨ تے مَیں اُنہاں کُوں برکت ڈیساں۔“