گِنتی 23

بلعام دی بنی اِسرائیل اُتے پہلی برکت

1بلعام آکھیا، ”اُتھاں میڈے کیتے سَت قُربان گاہیں بنڑا۔ نال نال میڈے کیتے سَت ڈاند تے سَت چھترے تیار رکھیں۔“ 2بلق اِینویں ای کیتا تے ڈوہائیں رَل تے ہر قُربان گاہ اُتے ہِک ڈاند تے ہِک چھترا پیش کیتا۔ 3وَل بلعام بلق کُوں آکھیا، ”اِتھاں آپنڑی قُربانی دے کولھ کھڑے راہو۔ مَیں کُجھ فاصلے تے ویندا ہاں، شاید رب العالمین میکُوں مِلنڑ آوے۔ جیہڑا کُجھ او میڈے اُتے ظاہر کریسی مَیں تُہاکُوں ڈسا ڈیساں۔“

ایہ آکھ تے بلعام ہِک اُچی جاہ تے لگا گِیا جِتھاں ساوِل اصلُوں نہ ہئی۔ 4اُتھاں خُدا اُونکُوں مِلیا۔ بلعام آکھیا ”مَیں سَت قُربان گاہیں بنڑا تے ہر قُربان گاہ اُتے ہِک ڈاند تے ہِک چھترا قُربان کیتے۔“

5وَل رب العالمین بلعام کُوں بلق کیتے سنیہا ڈِتا تے آکھیا، ”بلق دے کولھ واپس وَنج تے اُونکُوں ایہ سنیہا ڈے۔“ 6بلعام، بلق دے کولھ واپس آیا، جیہڑا ہُنڑ تئیں موآبی سرداراں دے نال قُربانی دے کولھ کھڑا ہا۔ 7بلعام اِنہاں لفظاں ءچ پیغام سُنڑایا:

”بلق میکُوں ارام مُلک تُوں اِتھاں گِھن آئے

ہا، موآب دا بادشاہ مشرقی پہاڑاں تُوں، تے آکھیا

’آؤ میڈے کیتے یعقُوب اُتے لعنت کرو۔

آؤ تے بنی اِسرائیل کُوں بددُعا ڈیؤ۔‘

8مَیں کِینویں اُنہاں اُتے لعنت بھیجاں

جِنہاں اُتے خُدا لعنت نئیں بھیجی؟

مَیں کِیں طرحاں اُنہاں کُوں ملامت کراں

جِنہاں کُوں رب العالمین ملامت نئیں کیتی؟

9او چٹاناں دی چوٹی تُوں نظردے ہِن

پہاڑیاں تُوں مَیں اِنہاں کُوں ڈیدھا ہاں۔

واقعی ایہ دُوجھیاں تُوں اَنج راہوݨ آلی قوم ہے

آپنڑے آپ کُوں ڈُوجھیاں قوماں نال شمار نئیں کریندی۔

10یعقُوب دی اولاد کُوں جیہڑی مِٹی دے ذریاں آلی کار ہے،

بنی اِسرائیل دا چوتھا حصہ کوݨ گِنڑ سگدے؟

رب العالمین کرے مَیں صادقاں دی موت مراں

میڈا انجام اُنہاں دے انجام آلی کار ہووے۔“

11بلق بلعام کُوں آکھیا، ”تُساں میڈے نال کیا کیتے؟ مَیں تُہاکُوں آپنڑے دُشمنڑاں اُتے لعنت بھیجنڑ کیتے گِھن آیا ہم، پر تُساں اُنہاں کُوں ڈھیر ساری برکت ڈِتی ہے۔“

12بلعام جواب ڈِتا، ”کیا لازم نئیں جو مَیں اُوہو کُجھ آکھاں جیہڑا رب العالمین ڈساوݨ کُوں آکھے؟“

بلعام دی بنی اِسرائیل اُتے ڈُوجھی برکت

13وَل بلق اُونکُوں آکھیا، ”آؤ اساں ہِک بئی جاہ تے ونجُوں جِتھاں تُساں اُنہاں کُوں ڈیکھ سگسو، بھانویں اُنہاں دے ڈیرے دا صرف کونا ای نظرسی۔ تُساں سبھ کُوں نہ ڈیکھ سگسو۔ اُتھاؤں اُنہاں اُتے میڈے کیتے لعنت بھیجو۔“ 14ایہ آکھ تے بلق اُونکُوں نال گِھن تے ضوفِیم1 دے میدان پُجیا جیہڑا پِسگہ دی چوٹی اُتے ہے۔ اُتھاں وی اُوں سَت قُربان گاہیں بنڑا تے ہر ہِک اُتے ہِک ڈاند تے ہِک چھترا قُربان کیتا۔

15وَل بلعام بلق کُوں آکھیا، ”اِتھاں آپنڑی قُربانی دے کولھ کھڑے راہو، مَیں کُجھ دُور وَنج تے رب العالمین نال مِلساں۔“

16رب العالمین بلعام کُوں مِلیا۔ اُوں اُونکُوں بلق کیتے سنیہا ڈِتا تے آکھیا، ”بلق دے کولھ واپس وَنج تے اُونکُوں ایہ سنیہا ڈے۔“

17او واپس لگا گِیا۔ بلق ہُنڑ تئیں آپنڑے سرداراں دے رَلے آپنڑی قُربانی دے کولھ کھڑا ہا۔ اُوں اُوندے تُوں پُچھیا، ”رب العالمین کیا آکھے؟“

18بلعام آکھیا،

” صفور دے پوتر بلق! اُٹھی

تے میڈی گالھ اُتے کَن لا۔

19خُدا اِنسان نئیں جیہڑا کُوڑ مارے۔

او آدم دی اولاد نئیں جیہڑا اِرادہ بدلے۔

کیا او اکھیندے تے وَل عمل نئیں کریندا؟

کیا او فرمیندے تے وَل پُورا نئیں کریندا؟

20ڈیکھو، میکُوں برکت ڈیوݨ دا حُکم مِلیا ہے۔

اُوں برکت ڈِتی ہے، مَیں اِینکُوں بدل نئیں سگدا۔

21او بنی یعقُوب ءچ کوئی بدی نئیں ڈیدھا

بنی اِسرائیل ءچ کوئی مُصیبت نئیں ڈیدھا۔

رب العالمین اُوندا خُدا اُوندے نال ہے

لوک بادشاہ دی خوشی ءچ نعرے مریندے ہِن

22خُدا اُنہاں کُوں مِصر تُوں کڈھ آیا

اُنہاں کُوں جنگلی ڈاند جیہی طاقت مِلی ہوئی ہے۔

23بنی یعقُوب دے خلاف جادُوگری ناکام ہے

بنی اِسرائیل دے خلاف فال گِیری نئیں چلدی۔

ہُنڑ بنی یعقُوب دے حق ءچ آکھیا ویسی،

’بنی اِسرائیل کیتے خُدا کیجھے کم کیتے!‘

24ایہ قوم شیرنی آلی کار اُٹھدی ہے،

او ببرشیر آلی کار کھڑی تھیندی ہے۔

جئیں تئیں او آپنڑا شکار نہ کھا گِھنے

تے مقتولاں دی رَت نہ پی گِھنے، ارام نئیں کریندی۔“

25ایہ سُنڑ تے بلق آکھیا، ”جیکر تُساں اُنہاں اُتے لعنت نئیں کریندے، گھٹ و گھٹ اُنہاں کُوں برکت تے نہ ڈیؤ۔“

26بلعام جواب ڈِتا، ”کیا مَیں تُہاکُوں نہ ڈسایا ہا جو جیہڑا کُجھ رب العالمین اکھیسی، میکُوں اُوہو کرنڑا پوسی؟“

بلعام دی بنی اِسرائیل اُتے تریجھی برکت

27اُوں ویلے بلق بلعام کُوں آکھیا، ”آؤ مَیں تُہاکُوں ہِک بئی جاہ اُتے گِھن وَنجاں۔ متاں خُدا راضی تھی پووے جو تُساں میڈے کیتے اُتھوں اُنہاں اُتے لعنت کرو۔“ 28او بلعام دے رَلے فغُور پہاڑ اُتے چڑھ گِیا۔ اُوندی چوٹی تُوں یردن وادی دا ویران2 حصہ نظر آندے۔

29بلعام بلق کُوں آکھیا، ”میڈے کیتے اِتھاں سَت قُربان گاہیں بنڑاؤ، تے سَت ڈاند تے سَت چھترے تیار کر رکھو۔“ 30بلق اِینویں ای کیتا تے ہر ہِک قُربان گاہ اُتے ہِک ڈاند تے ہِک چھترا قُربان کیتا۔