گِنتی 19

پاکیزگی دیاں رسماں

1رب العالمین مُوسیٰ تے ہارُون کُوں آکھیا، 2”بنی اِسرائیل کُوں ڈساؤ جو او تُہاڈے کولھ رتّے رنگ دی ایجھی ویہڑ گِھن تے آوݨ جِیندے ءچ کوئی داغ یا نُقص نہ ہووے تے اِیندے اُتے کڈھائیں پنجالی نہ رکھی گئی ہووے۔ 3تُساں ایہ ویہڑ الِیعزر کاہِن کُوں ڈیوائے۔ الِیعزر کاہِن اُونکُوں ڈیرے دے باہر گِھن ونجے تے اُتھاں ویہڑ کُوں اُوندی موجودگی ءچ ذبح کر ڈِتا ونجے۔ 4وَل الِیعزر کاہِن آپنڑی انگل نال اُوندی رَت ءچوں کُجھ گِھن تے اِجتماع آلے تمبُو دے سامنڑے آلے پاسے سَت پھیری چِھنڈکے۔ 5اُوندی موجودگی ءچ یکی ویہڑ کُوں ساڑیا ونجے۔ اُوندی کَھل، گوشت، رَت تے آندراں وی ساڑیاں ونجنڑ۔ 6وَل او دیار1 دی کُجھ لکڑ، زُوفا تے رتّے رنگ دا دھاگا گِھن تے اُونکُوں سڑدی ہوئی ویہڑ اُتے سٹے۔ 7اِیندے بعد او آپنڑے کپڑیاں کُوں دھو تے غُسل کرے۔ وَل او ڈیرے ءچ آ سگدے پر شام تئیں ناپاک راہسی۔

8جیہڑے بندے ویہڑ کُوں ساڑیا ہا، او وی آپنڑے کپڑیاں کُوں دھو تے غُسل کر گِھنے تے او وی شام تئیں ناپاک راہسی۔

9کوئی ڈُوجھا بندہ جیہڑا پاک صاف ہے، او ویہڑ دی سواہ کٹھی کر تے ڈیرے دے باہر کہیں پاک صاف جاہ تے رکھ ڈیوے۔ بنی اِسرائیل دی جماعت اُوں سواہ کُوں ناپاکی تُوں پاک صاف کرݨ آلے پانڑی ءچ اِستعمال کرݨ کیتے محفوظ رکھے۔ ایہ گُناہ تُوں پاک صاف کرݨ کیتے اِستعمال تھیسی۔ 10جیہڑے بندے سواہ کٹھی کیتی ہے، او وی آپنڑے کپڑیاں کُوں دھووے پر او شام تئیں ناپاک راہسی۔ ایہ بنی اِسرائیل تے اُنہاں دے وچال راہوݨ آلے پردیسیاں کیتے دائمی شرع ہوسی۔

لاش تُوں پاک صاف تھیوݨ دا طریقہ

11جیہڑا وی کہیں بندے دی لاش کُوں ہتھ لیسی او سَت ڈینہہ تئیں ناپاک راہسی۔ 12تریجھے تے ستویں ڈینہہ او آپنڑے آپ اُتے ناپاکی دُور کرݨ دا پانڑی چِھنڈک تے پاک صاف تھی ونجے، اِیندے بعد ای او پاک تھیسی۔ پر جیکر او اِنہاں ڈوہائیں ڈینہاں ءچ آپنڑے آپ کُوں اِینویں پاک نہ کرے تاں او ناپاک راہسی۔ 13جیہڑا وی کہیں بندے دی لاش کُوں ہتھ لاوݨ تُوں بعد آپنڑے آپ کُوں اِینویں پاک صاف نئیں کریندا، او رب العالمین دے مُقدّس تمبُو کُوں ناپاک کریندے۔ لازم ہے جو اُونکُوں بنی اِسرائیل ءچوں کڈھ ڈِتا ونجے۔ کیوں جو ناپاکی دُور کرݨ دا پانڑی اُوندے اُتے چِھنڈکیا نئیں گِیا، اِیں پارُوں او ناپاک راہسی۔

14جیکر کوئی کہیں تمبُو ءچ مر ونجے تے جیہڑا وی اُوں ویلے اُوندے ءچ موجود ہوسی یا وڑسی او سَت ڈینہہ تئیں ناپاک راہسی۔ 15ہر ہِک کُھلا تھاں جیہڑا ڈھکنڑ نال بند نہ کیتا گِیا ہووے، او وی ناپاک ہوسی۔ 16اِینویں ای جیہڑا کوئی کُھلے میدان ءچ تلوار نال یا خُداؤں موئے ہوئے دی لاش کُوں ہتھ لیسی یا اِنسان دی کہیں ہڈی یا قبر کُوں ہتھ لیسی، او سَت ڈینہہ تئیں ناپاک راہسی۔

17ناپاکی دُور کرݨ کیتے اِینویں کرائے: گُناہ تُوں پاک کرݨ کیتے جیہڑی ویہڑ ساڑی گئی ہئی، اُوندی سواہ ءچوں کُجھ گِھن تے تھاں ءچ پا تے تازے پانڑی ءچ رلائی ونجے۔ 18وَل کوئی پاک صاف بندہ کُجھ زُوفا گِھنے تے اُونکُوں اِیں پانڑی ءچ بوڈ تے موئے ہوئے بندے دے تمبُو، اُوندے سامان تے اُنہاں لوکاں اُتے چِھنڈکے جیہڑے اُوندے مرݨ ویلے اُتھاں ہَن۔ اِینویں ای او اُوں بندے اُتے وی پانڑی چِھنڈکے جئیں خُداؤں مرے ہوئے یا قتل تھئے ہوئے بندے کُوں یا کہیں اِنسان دی ہڈی کُوں یا کہیں قبر کُوں ہتھ لایا ہووے۔ 19پاک صاف بندہ ایہ پانڑی تریجھے تے ستویں ڈینہہ ناپاک بندے اُتے چِھنڈکے۔ تے ستویں ڈینہہ او اُونکُوں پاک صاف کرے۔ جِینکُوں پاک کیتا ویندا پِیا ہے او آپنڑے کپڑے دھو تے غُسل کرے، تاں او شام کُوں پاک صاف تھی ویسی۔

20پر جیہڑا ناپاک بندہ آپنڑے آپ کُوں پاک صاف نئیں کریندا، اُونکُوں جماعت ءچوں کڈھ ڈِتا ونجے کیوں جو اُوں رب العالمین دے مُقدّس تمبُو کُوں ناپاک کر ڈِتے۔ ناپاکی دُور کرݨ دا پانڑی اُوندے اُتے چِھنڈکیا نئیں گِیا، اِیں پارُوں او ناپاک ای ہے۔ 21ایہ بنی اِسرائیل کیتے دائمی شرع ہے۔ جیہڑے بندے ناپاکی دُور کرݨ دا پانڑی چِھنڈکیا ہے، او وی آپنڑے کپڑے دھووے تے جئیں وی اِیں پانڑی کُوں ہتھ لائے، او شام تئیں ناپاک راہسی۔ 22تے ناپاک بندہ جیہڑی وی شے کُوں ہتھ لیسی او ناپاک تھی ویسی۔ نہ صرف ایہ بلکہ جیہڑا بعد ءچ اِیں ناپاک شے کُوں ہتھ لیسی او وی شام تئیں ناپاک راہسی۔“