گِنتی 18

کاہِناں تے لاویاں دیاں ذمہ داریاں

1رب العالمین ہارُون کُوں آکھیا، ”مُقدّس تمبُو تیڈی، تیڈے پوتراں دی تے لاوی دے قبیلے دی ذمہ داری ہے۔ جیکر اِیندے ءچ کوئی غلطی تھی ونجے تاں تُساں قصُوروار ہوسو پر جیکر کاہِناں دی خدمت ءچ کوئی غلطی تھیسی تاں صرف تُوں تے تیڈے پوتر قصُوروار ہوسن۔ 2جِیں ویلے تُساں مُقدّس تمبُو دے سامنڑے1 آپنڑیاں ذمےداریاں پُوریاں کریسو تاں آپنڑے قبیلے بنی لاوی دے باقی بندیاں کُوں وی نال گِھن اوائے تاں جو او تیڈی تے تیڈے پوتراں دی مدد کرݨ۔ 3تیڈی خدمت کرݨ تے مُقدّس تمبُو دی حفاظت کرݨ اُنہاں دی ذمہ داری ہے پر او تمبُو دیاں مخصوص تے مُقدّس شیواں تے قُربان گاہ دے کولھ نہ ونجنڑ، نہ تاں او لاوی تے تُساں وی ہلاک تھی ویسو۔ 4اِینویں او تیڈے نال مِل تے اِجتماع آلے تمبُو دی نِگرانی تے کم دی ذمہ داری گِھننڑ، پر کہیں بئے کُوں اِینویں کرݨ دی اِجازت نئیں۔ 5صرف تُوں تے تیڈے پوتر مُقدّس تمبُو تے قُربان گاہ دی ڈیکھ بھال کرݨ تاں جو میڈا غضب ولا بنی اِسرائیل اُتے نہ بھڑکے۔ 6مَیں ای بنی اِسرائیل ءچوں تُہاڈے بِھرانواں یعنی لاویاں کُوں چُنڑ تے تیکُوں تحفے دے طور تے ڈِتے تاں جو او مَیں رب العالمین کیتے مخصوص تھی تے اِجتماع آلے تمبُو ءچ خدمت کرݨ۔ 7پر صرف تُوں تے تیڈے پوتر کاہِن آلی خدمت کرݨ دے ذمہ دار ہِن۔ مَیں تیکُوں کاہِن دا عُہدہ بخشش دے طور تے ڈیندا ہاں۔ کوئی بِیا قُربان گاہ دے نیڑے تے مُقدّس تمبُو دے اندر نہ آوے نہ تاں اُونکُوں جانُوں مار ڈِتا ویسی۔“

کاہِناں دا حصہ

8رب العالمین ہارُون کُوں آکھیا، ”مَیں خود مقرر کیتے جو میکُوں چا تے2 پیش کیتے ونجنڑ آلیاں ساریاں نذراں دی ذمہ داری تیڈی ہے۔ ایہ ہمیشاں بنی اِسرائیل دے مُقدّس نذرانیاں ءچوں تیڈا تے تیڈی اولاد دا حصہ ہے۔ 9تیکُوں سبھ تُوں مُقدّس قُربانیاں دا او حصہ مِلنڑا ہے جیہڑا ساڑیا نئیں ویندا۔ ہا، تیکُوں تے تیڈے پوتراں کُوں اُوہو مُقدّس حصہ مِلنڑا ہے بھانویں او میکُوں غلے دے نذرانے، گُناہ تُوں پاک کرݨ آلیاں قُربانیاں یا قصُور دیاں قُربانیاں پیش کرݨ۔ 10اُونکُوں مُقدّس جاہ تے کھوائے۔ ہر مرد اُونکُوں کھا سگدے پر دھیان راہوے جو او حصہ مخصوص تے مُقدّس ہووے۔

11تے بنی اِسرائیل دے ہدیے تے ساریاں ہلائے ونجنڑ آلیاں قُربانیاں دا اَنج کیتا ہویا حصہ وی تیڈا ہے۔ اِینکُوں مَیں تیکُوں تے تیڈے دِھیاں پوتراں کُوں ہمیشاں کیتے حق دے طور تے ڈیندا ہاں۔ تیڈے گھرانڑے دا ہر بندہ اِینکُوں کھا سگدے، شرط ایہ ہے جو او پاک صاف ہووے۔ 12لوکاں دیاں فصلاں دا پہلا پھل جیہڑا او میں رب العامین کُوں پیش کریندے ہِن یعنی زیتون دا تیل، انگُور دا نواں رَس تے اناج دا بہترین حصہ میں تیکُوں ای ڈِتا ہے۔ 13فصلاں دا جیہڑا وی پہلا پھل او مَیں رب العالمین کُوں پیش کریسن او تیڈا ای ہوسی۔ تیڈے گھرانڑے دا ہر پاک صاف بندہ اُونکُوں کھا سگدے۔ 14بنی اِسرائیل ءچ، مَیں رب العالمین کیتے وقف کیتی ہوئی ہر شے تیڈی ہوسی۔ 15ہر اِنسان تے ہر جانور دا جیہڑا پلوٹھا مَیں رب العالمین کُوں پیش کیتا ویندے، او تیڈا ای ہے پر لازم ہے جو تُوں ہر اِنسان تے ہر حرام جانور دے پلوٹھے دا فِدیہ گِھن تے اُونکُوں چُھڑاویں۔

16جِیں ویلے او ہِک مہینے دے ہووݨ تاں تُوں اُنہاں دے بدلے چاندی دے پنج سکے گِھنیں۔ ہر سِکے دا وزن مُقدّس تمبُو دے سِکیاں دے وزن دے مطابق ہِک تولا ہووے۔ 17پر گاں، ڈاند، بھیڈ تے بکریاں دے پلوٹھیاں دا فِدیہ نہ گِھنیں۔ او مخصوص تے مُقدّس ہِن۔ اُنہاں دی رَت قُربان گاہ اُتے چِھنڈک ڈیویں تے اُنہاں دی چربی ساڑ ڈیویں۔ ایہ ساڑے ونجنڑ آلے نذرانے دی خوشبو رب العالمین کُوں پسند ہے۔ 18جِینویں ہلائے ونجنڑ آلی قُربانی دا سینہ تے سجی ستھل تیڈے کیتے ہِن، اُونویں ای اُنہاں دا گوشت وی تیڈے کیتے ہوسی۔

19بنی اِسرائیل دے مُقدّس نذرانیاں ءچوں ساریاں چاتے ونجنڑ آلیاں قُربانیاں تیڈا تے تیڈے دِھیاں پوتراں دا حصہ ہِن۔ مَیں رب العالمین اُونکُوں ہمیشاں کیتے تیکُوں حق دے طور تے ڈے ڈِتے۔ ایہ نمک دا ابدی عہد ہے جیہڑا مَیں تیڈے تے تیڈی اولاد نال ہمیشاں کیتے قائم کیتے3۔“

لاویاں دا حصہ

20رب العالمین ہارُون کُوں آکھیا، ”تیکُوں بنی اِسرائیل دے مُلک ءچوں میراث نہ ڈِتی ویسی تے نہ تیکُوں جائیداد دا کوئی حصہ مِلسی کیوں جو بنی اِسرائیل دے وچال مَیں ای تیڈا حصہ تے تیڈی میراث ہاں۔ 21آپنڑی پیداوار دا جیہڑا ڈاہواں حصہ بنی اِسرائیل میکُوں ڈیندے ہِن، او مَیں لاویاں کُوں ڈیندا ہاں۔ ایہ اُنہاں دی میراث ہے جیہڑی اُنہاں کُوں اِجتماع آلے تمبُو ءچ خدمت کرݨ دے بدلے ءچ مِلدی ہے۔ 22ہُنڑ تُوں بنی اِسرائیل اِجتماع آلے تمبُو دے نیڑے نہ آوݨ، نہ تاں اُنہاں کُوں آپنڑے گُناہ دی سزا بُھگتنڑی پوسی تے او ہلاک تھی ویسن۔ 23صرف لاوی اِجتماع آلے تمبُو ءچ خدمت کرݨ۔ جیکر اِیندے ءچ کوئی غلطی تھی ونجے تاں اُوہو قصُوروار ہوسن۔ ایہ نسل در نسل تُہاڈے کیتے ہِک دائمی شرع ہے جو لاویاں کُوں بنی اِسرائیل ءچ زمین دی وراثت نہ مِلسی۔ 24کیوں جو مَیں لاویاں کُوں اُوہو ڈاہواں حصہ وراثت دے طور تے ڈِتے جیہڑا بنی اِسرائیل میکُوں نذرانے دے طور تے پیش کریندے ہِن۔ اِیں پارُوں مَیں اُنہاں دے بارے ءچ آکھے جو اُنہاں کُوں باقی بنی اِسرائیل دے وچال وراثت ءچ زمین نہ مِلسی۔“

لاویاں کُوں ڈاہواں حصہ ڈیوݨ دا حُکم

25رب العالمین مُوسیٰ کُوں آکھیا، 26”لاویاں کُوں ڈسا جو ’تُہاکُوں بنی اِسرائیل دی پیداوار دا ڈاہواں حصہ مِلسی جیہڑا مَیں رب العالمین دی طرفوں تُہاڈی میراث ہوسی۔ لازم ہے جو تُساں اِیندا ڈاہواں حصہ رب العالمین کُوں نذرانے دے طور تے پیش کرو۔ 27تُہاڈا ایہ نذرانہ نویں اناج یا نویں انگُور دے رَس دے نذرانے دے برابر ہوسی۔ 28اِینویں ای تُساں وی رب العالمین کُوں بنی اِسرائیل دی پیداوار دے ڈاہویں حصے ءچوں نذرانہ پیش کریسو۔ رب العالمین کیتے ایہ نذرانہ ہارُون کاہِن کُوں ڈیوائے۔ 29جیہڑا کُجھ وی تُہاکُوں مِلے، اُوندے ءچوں سبھ تُوں چنگا تے مُقدّس حصہ رب العالمین کُوں ڈیوائے۔ 30جڈاں تُساں اِیندا سبھ تُوں چنگا حصہ پیش کریسو تاں اُونکُوں نویں اناج یا نویں انگُور دے رَس دے نذرانے دے برابر منیا ویسی۔ 31تُساں آپنڑے خانداناں سمیت اِیندا باقی حصہ کِتھائیں وی کھا سگدے ہیوے کیوں جو ایہ اِجتماع آلے تمبُو ءچ تُہاڈی خدمت دا صلہ ہے۔ 32جیکر تُساں پہلے اِیندا بہترین حصہ پیش کیتا ہووے تاں وَل اِینکُوں کھاوݨ ءچ تُہاڈا کوئی قصُور نہ ہوسی۔ وَل بنی اِسرائیل دے مخصوص تے مُقدّس نذرانے تُہاڈے تُوں ناپاک نہ تھیسن تے تُساں نہ مرسو‘۔“