گِنتی 17

ہارُون دی سوٹی ءچوں بادام نِکلدے ہِن

1رب العالمین مُوسیٰ کُوں آکھیا، 2”بنی اِسرائیل نال گالھ کر تے اُنہاں تُوں بارہاں سوٹیاں منگوا گِھن، یعنی ہر قبیلے دے سردار تُوں ہِک سوٹی۔ ہر سوٹی اُتے اُوندے مالک دا ناں لِکھیں۔ 3بنی لاوی دی سوٹی اُتے ہارُون دا ناں لِکھیں کیوں جو ہر قبیلے دے سردار کیتے ہِکو سوٹی ہوسی۔ 4وَل اُنہاں کُوں اِجتماع آلے تمبُو ءچ عہد دے صندوق دے سامنڑے رکھیں جِتھاں مَیں تُہاڈے نال مُلاقات کریندا ہاں۔ 5جیہڑے بندے کُوں مَیں چُنڑ گِھدے، اُوندی سوٹی ءچوں کلِیاں نِکل آسن۔ اِیں طریقے نال مَیں تُہاڈے خلاف بنی اِسرائیل دی بُڑبُڑ مُکا ڈیساں۔“

6بس مُوسیٰ بنی اِسرائیل نال گالھ کیتی تے قبیلیاں دے ہر سردار اُونکُوں آپنڑی سوٹی ڈِتی۔ اُنہاں بارہاں سوٹیاں ءچ ہارُون دی سوٹی وی شامل ہئی۔ 7مُوسیٰ اُنہاں کُوں اِجتماع آلے تمبُو ءچ عہد دے صندوق دے سامنڑے رکھیا۔ 8اگلی ڈینہوار جِیں ویلے او عہد دے صندوق آلے تمبُو ءچ وڑیا تاں اُوں ڈِٹھا جو لاوی قبیلے دے سردار ہارُون دی سوٹی تُوں نہ صرف کلِیاں پُھٹ نِکلیاں ہِن بلکہ اُوندے اُتے پُھل تے پکّے ہوئے بادام وی لگے ہِن۔

9مُوسیٰ ساریاں سوٹیاں رب العالمین دے حضُور تُوں باہر گِھن تے بنی اِسرائیل دے کولھ گِھن آیا تے اُنہاں کُوں ڈِکھائیاں۔ وَل ہر ہِک آپنڑی آپنڑی سوٹی واپس گِھن گِھدی۔ 10رب العالمین مُوسیٰ کُوں آکھیا، ”ہارُون دی سوٹی عہد دے صندوق دے سامنڑے رکھ ڈے تاں جو باغی اِسرائیلیاں کیتے ہِک نشان ہووے۔ اِینویں اُنہاں دی بُڑبُڑ کُوں بند کر ڈے، نہ تاں او ہلاک تھی ویسن۔“

11مُوسیٰ اُونویں ای کیتا جِینویں رب العالمین اُونکُوں حُکم ڈِتا ہا۔ 12پر بنی اِسرائیل مُوسیٰ کُوں آکھیا، ”ہائے! اساں مر ویسوں۔ ہائے! اساں ہلاک تھی ویسوں۔ اساں سارے ہلاک تھی ویسوں۔ 13جیہڑا وی رب العالمین دے مُقدّس تمبُو دے نیڑے آسی، او مر ویسی۔ کیا اساں سارے ای ہلاک تھی ویسوں؟“