گِنتی 20

چٹان ءچوں پانڑی

1پہلے مہینے ءچ بنی اِسرائیل دی یکی جماعت صِین دے بیابان ءچ پُج تے قادِس ءچ راہوݨ لگی۔ اُتھاں مریم فوت تھئی تے اُونکُوں اُتھائیں دفن کیتا گِیا۔

2قادِس ءچ پانڑی نہ مِلدا ہا، اِیں پارُوں لوک مُوسیٰ تے ہارُون دے خلاف کٹھے تھئے۔ 3او مُوسیٰ نال ایہ آکھ تے جھیڑا کرݨ لگے، ”کاش اساں آپنڑے بِھرانواں دے نال ای رب العالمین دے حضُور مر گئے ہوندے۔ 4تُساں رب العالمین دی جماعت کُوں اِیں بیابان ءچ کیوں گِھن آئے ہیوے جو اساں اِتھاں آپنڑے ڈھورڈنگراں سمیت مر ونجُوں؟ 5تُساں ساکُوں مِصر ءچوں کڈھ تے اِیں بُری جاہ تے کیوں گِھن آئے ہیوے؟ اِتھاں نہ تاں اناج مِلدے، نہ ہنجیر، نہ انگُور تے نہ انار مِلدن، اِتُھوں تئیں جو پِیوݨ کیتے پانڑی وی کائنی۔“

6مُوسیٰ تے ہارُون لوکاں کُوں چھوڑ تے اِجتماع آلے تمبُو دے دَر تے گئے تے مُنہ دے بھار ڈھٹھے۔ وَل رب العالمین دا جلال اُنہاں اُتے ظاہر تھیّا۔ 7رب العالمین مُوسیٰ کُوں آکھیا، 8”اُوں سوٹی کُوں گِھن، تے ہارُون دے نال جماعت کُوں کٹھا کر۔ اُنہاں دے سامنڑے چٹان کُوں آکھیں تاں او آپنڑا پانڑی ڈیسی۔ اِینویں تُوں چٹان ءچوں جماعت کیتے پانڑی کڈھ تے اُنہاں کُوں اُنہاں دے ڈھورڈنگراں سمیت پانڑی پِلیسیں۔“

9وَل مُوسیٰ رب العالمین دے حُکم دے مطابق عہد دے صندوق اُتے پئی ہوئی سوٹی چاتی۔ 10تے ہارُون دے نال جماعت کُوں چٹان دے سامنڑے کٹھا کیتا۔ مُوسیٰ اُنہاں کُوں آکھیا، ”باغیو! سُنڑو، کیا اساں اِیں چٹان ءچوں تُہاڈے کیتے پانڑی کڈھوں؟“ 11وَل اُوں سوٹی کُوں چا تے چٹان اُتے ڈُو پھیری ماریا تے بہُوں سارا پانڑی نِکل آیا۔ ساری جماعت تے اُنہاں دے ڈھورڈنگراں رَج تے پانڑی پِیتا۔

12پر رب العالمین مُوسیٰ تے ہارُون کُوں آکھیا، ”تُہاڈا میڈے اُتے اِتنا اِیمان وی نہ ہا جو بنی اِسرائیل دے سامنڑے میڈی قدُوسیت دا احترام کریندے1۔ اِیں پارُوں تُساں اِیں جماعت کُوں اُوں مُلک ءچ گِھن تے نہ وَنج سگسو جیہڑا مَیں اُنہاں کُوں ڈیوݨ آلا ہاں۔“

13جِتھاں ایہ واقعہ تھیّا، اُوں جاہ دا ناں مریبہ2 ہے کیوں جو بنی اِسرائیل اُتھاں رب العالمین نال جھیڑا کیتا تے اُوں اُنہاں اُتے ظاہر کیتا جو او قدُّوس ہے۔

ادُوم بنی اِسرائیل کُوں لنگھنڑ نئیں ڈیندا

14قادِس تُوں مُوسیٰ ادُوم دے بادشاہ کُوں ایہ پیغام بھیجیا جو، ”تُہاڈے بِھرا اِسرائیل دی طرفوں ہِک گزارش ہے۔ تُہاکُوں اُنہاں ساریاں مُصیبتاں دے بارے ءچ پتہ ہے جیہڑیاں ساڈے اُتے تروٹ پئیاں ہِن۔ 15ساڈے پِیُو ڈاڈا مِصر گئے ہَن تے اُتھاں اساں بہُوں عرصے تئیں ریہے۔ مِصریاں ساڈے پِیُو ڈاڈے تے ساڈے نال بُرا سلوک کیتا۔ 16پر جِیں ویلے اساں رب العالمین تُوں فریاد کیتی تاں اُوں ساڈی سُنڑی تے فرشتہ بھیج تے ساکُوں مِصر تُوں کڈھ آیا۔ ہُنڑ اساں قادِس شہر ءچ ہیں جیہڑا تُہاڈی سرحد تے ہے۔ 17مہربانی کر تے ساکُوں آپنڑے مُلک ءچوں لنگھنڑ ڈیؤ۔ اساں کہیں کھیت یا انگُور دے باغ ءچ نہ وڑسُوں تے نہ کہیں کُھوہ دا پانڑی پِیسُوں۔ اساں وڈی سڑک تے ای راہسوں تے جئیں تئیں تُہاڈے مُلک ءچوں لنگھ نہ ونجُوں، اساں اُوندے تُوں نہ سجے تے نہ کھبے مُڑسُوں۔“

18پر ادُوم دے بادشاہ ولدا بھیجیا جو، ”میڈے مُلک ءچوں نہ لنگھائے، نہ تاں اساں تلوار چا تے تُہاڈے نال لڑسُوں۔“

19بنی اِسرائیل ولدی درخاست بھیجی، ”اساں وڈی سڑک اُتے راہندے ہوئے لنگھسُوں۔ جیکر اساں یا ساڈے ڈھورڈنگر تُہاڈا پانڑی پی وی گِھنوں تاں اُوندے پیسے ڈے ڈیسُوں۔ اساں پیدل ای لنگھنڑاں چاہندے ہیں تے بِیا کُجھ نئیں چاہندے۔“

20پر ادُوم دے بادشاہ ولا اِنکار کیتا تے نال ای لڑن کیتے ہِک وڈی تے طاقتور فوج بھیجی۔

21کیوں جو ادُوم اُنہاں کُوں لنگھنڑ دی اِجازت نہ ڈِتی، اِیں پارُوں بنی اِسرائیل مُڑ تے ڈُوجھے رستے تُوں لگے گئے۔

ہارُون دی وفات

22بنی اِسرائیل دی یکی جماعت قادِس تُوں ٹُر تے ہور پہاڑ دے کولھ پُجی۔ 23ادُوم دی سرحد دے کولھ ہور پہاڑ اُتے رب العالمین مُوسیٰ تے ہارُون کُوں آکھیا، 24”ہارُون ہُنڑ فوت تھی تے آپنڑے پِیُو ڈاڈے نال وَنج مِلسی۔ او اُوں مُلک ءچ نہ وڑسی جیہڑا مَیں بنی اِسرائیل کُوں ڈیساں کیوں جو تُساں ڈوہائیں مریبہ دے پانڑی اُتے میڈے حُکم دی خلاف ورزی کیتی ہئی۔ 25ہارُون تے اُوندے پوتر الِیعزر کُوں گِھن تے ہور پہاڑ اُتے چڑھ وَنج۔ 26ہارُون دے کاہِن آلے کپڑے لہا تے اُوندے پوتر الِیعزر کُوں پوا ڈے۔ وَل ہارُون اُتھائیں فوت تھی تے آپنڑے پِیُو ڈاڈے نال وَنج مِلسی۔“

27مُوسیٰ اُونویں ای کیتا جِینویں رب العالمین حُکم ڈِتا ہا۔ ترِیہے یکی جماعت دے ڈیدھے ڈیدھے ہور پہاڑ اُتے چڑھ گئے۔ 28مُوسیٰ ہارُون دے کپڑے لہوا تے اُوندے پوتر الِیعزر کُوں پوا ڈِتے۔ وَل ہارُون اُتھاں پہاڑ دی چوٹی اُتے فوت تھی گِیا تے مُوسیٰ تے الِیعزر تلے لہہ آئے۔ 29جڈاں یکی جماعت کُوں پتہ لگیا جو ہارُون فوت تھی گئے تاں اِسرائیل دے سارے لوکاں ترِیح ڈینہاں تئیں اُوندے کیتے ماتم کیتا۔