گِنتی 13

بنی اِسرائیل دے جاسُوس

1وَل رب العالمین مُوسیٰ کُوں آکھیا، 2”کُجھ بندیاں کُوں کنعان مُلک دا جائزہ گِھننڑ کیتے بھیج ڈے جیہڑا مَیں بنی اِسرائیل کُوں ڈیوݨ آلا ہاں۔ ہر قبیلے ءچوں ہِک سردار کُوں چُنڑ تے بھیج ڈے۔“

3مُوسیٰ اُنہاں بارہاں بندیاں کُوں رب العالمین دے حُکم اُتے فاران دے بیابان تُوں بھیجیا۔ او سبھ بنی اِسرائیل دے سردار ہَن۔ 4اُنہاں دے ناں ایہ ہِن:

رُوبِن دے قبیلے تُوں سمُّوع بِن زکُور،

5شمعون دے قبیلے تُوں سافط بِن حوری،

6یہُوداہ دے قبیلے تُوں کالِب بِن یفُنّہ،

7اِشکار دے قبیلے تُوں اِجال بِن یُوسف،

8اِفرائِیم دے قبیلے تُوں ہوسِیع بِن نُون،

9بِنیمِین دے قبیلے تُوں فلتی بِن رفُو،

10زبُولُون دے قبیلے تُوں جدّی ایل بِن سودی،

11یُوسف دے پوتر منسّی دے قبیلے تُوں جدّی بِن سُوسی،

12دان دے قبیلے تُوں عمی ایل بِن جملّی،

13آشر دے قبیلے تُوں ستُور بِن مِیکاایل،

14نفتالی دے قبیلے تُوں نحبی بِن وُفسی،

15تے جد دے قبیلے تُوں جیُوایل بِن ماکی۔

16مُوسیٰ اِنہاں بارہاں بندیاں کُوں کنعان مُلک دا جائزہ گِھننڑ کیتے بھیجیا۔ اُوں ہوسِیع بِن نُون دا ناں یشُوع1 رکھیا۔

17اُنہاں کُوں بھیجنڑ تُوں پہلے مُوسیٰ آکھیا، ”جنُوبی بیابان ءچوں لنگھ تے پہاڑی علاقے تئیں ونجو۔ 18پتہ لاؤ جو ایہ کِیں طرحاں دا مُلک ہے تے اُوندے راہوݨ آلے کیہو جِیہے ہِن۔ کیا او تگڑے ہِن یا کمزور، گِنتری ءچ گھٹ ہِن یا زیادہ۔ 19جیہڑے مُلک ءچ او وسدے ہِن، او چنگا ہے یا نئیں؟ او کِیں قِسم دے شہراں ءچ راہندے ہِن؟ کیا اُنہاں دے شہراں دیاں چار دیواریاں ہِن یا او ڈیریاں ءچ راہندے ہِن؟ 20مُلک دی زمین زرخیز ہے یا بنجر؟ اُوندے ءچ درخت ہِن یا نئیں؟ تے تُساں جُرأت کر تے مُلک دا کُجھ پھل گِھن آؤ۔“ اُوں ویلے انگُور دا پہلا پھل پک گِیا ہا۔

کنعان مُلک دا جائزہ

21او بارہاں بندے روانہ تھئے تے اُنہاں [جنُوب ءچ] صِین دے بیابان تُوں [شمال ءچ] رحوب تئیں مُلک دا جائزہ گِھدا۔ رحوب لبوحمات دے نیڑے ہے۔

22شروع ءچ او جنُوبی بیابان تُوں لنگھ تے حبرون پُجے جِتھاں عناق دی اولاد یعنی بنی اخیمان، بنی سِیسی تے بنی تلمی راہندے ہَن۔

حبرون کُوں مِصر دے شہر ضُعن تُوں سَت سال پہلے اُساریا گِیا ہا۔

23جڈاں او اِسکال دی وادی تئیں پُجے تاں اُنہاں انگُور دی ہِک لڑی کپی جیندے اُتے ہِک ای گُچھا لگیا ہویا ہا جِینکُوں ڈُو بندے سوٹی اُتے لٹکا تے چاتی ودے ہَن۔ اُنہاں کُجھ انار تے کُجھ ہنجیراں وی چاتیاں ہوئیاں ہَن۔ 24اُوں جاہ دا ناں اُوندے گُچھے دے سببّوں جیہڑا بنی اِسرائیل اُتھوں کپیا ہا، اِسکال وادی یعنی گُچھے دی وادی پے گِیا۔

جاسُوساں دا بیان

25چالیہہ ڈینہہ بعد او مُلک دا جائزہ گِھن تے واپس وَل آئے۔ 26او مُوسیٰ، ہارُون تے بنی اِسرائیل دی یکی جماعت دے کولھ فاران دے بیابان ءچ قادِس دے مقام اُتے آئے۔ اُتھاں اُنہاں پُوری جماعت کُوں او سبھ کُجھ ڈسایا جیہڑا او پتہ لا تے آئے ہَن تے اُنہاں کُوں اُوں مُلک دا پھل وی ڈِکھایا۔ 27اُنہاں مُوسیٰ کُوں ڈسایا جو، ”اساں اُوں مُلک ءچ گئے جِتھاں تُساں ساکُوں بھیجیا ہا۔ اُوں مُلک ءچ واقعی کھیر تے ماکھی وافر ہے تے ساڈے کولھ اُوندے کُجھ پھل وی ہِن۔ 28پر اُوندے راہوݨ آلے تگڑے ہِن، اُنہاں دے شہر بہُوں وڈے تے چار دیواریاں آلے ہِن۔ اساں اُتھاں عناق دی اولاد وی ڈِٹھی ہے۔ 29عمالیقی جنُوبی بیابان ءچ وسدے ہِن۔ حِتّی، یبُوسی تے اموری پہاڑی علاقے ءچ آباد ہِن تے کنعانی ساحلی علاقے تے یردن دریا دے کنارے اُتے وسدے ہِن۔“

30وَل کالِب مُوسیٰ دے سامنڑے کٹھے تھئے ہوئے لوکاں کُوں چُپ کروایا تے آکھیا، ”آؤ اساں جلدی نال اُوں مُلک ءچ ونجُوں تے اُوندے اُتے قبضہ کر گِھنوں کیوں جو اساں یقیناً ایہ کرݨ دے قابل ہیں۔“

31پر باقی بندے جیہڑے اُنہاں نال مُلک ڈیکھنڑ گئے ہَن آکھنڑ لگے، ”اساں اُنہاں لوکاں اُتے حملہ نئیں کر سگدے، کیوں جو او ساڈے تُوں تگڑے ہِن۔“ 32تے اُنہاں اُوں مُلک دے بارے ءچ بنی اِسرائیل کُوں بُری خبر ڈِتی تے آکھیا، ”جیہڑے مُلک ءچوں اساں جائزہ گِھننڑ کیتے لنگھے ہسے، او ہر ہِک کُوں جیہڑا اُتھاں راہنڑ کیتے ویندے، کھا ویندے۔ اُتھاں دا ہر بندہ جِینکُوں اساں ڈِٹھے بہُوں قد آور ہے۔ 33اساں اُتھاں بنی عناق کُوں وی ڈِٹھا جیہڑے بہُوں لمبے تے زورآور قوم دی اولاد ہِن۔ اساں اُنہاں دے سامنڑے آپنڑے آپ کُوں ٹِڈی آلی کار محسوس کریندے ہسے، تے اُنہاں دی نظر ءچ وی اِینویں ای ہسے۔“