گِنتی 12

مریم تے ہارُون مُوسیٰ دی مخالفت کریندین

1ہِک ڈینہوار مریم تے ہارُون مُوسیٰ دے خلاف گالھیں کرݨ لگے کیوں جو اُوں کُوش دی ہِک عورت کُوں پرنا گِھدا ہا۔ 2اُنہاں آکھیا، ”کیا رب العالمین صرف مُوسیٰ دے ذریعے الویندے؟ کیا او ساڈے نال نئیں الوایا؟“ تے رب العالمین اُنہاں دے ایہ گالھیں سُنڑیاں۔

3پر مُوسیٰ بہُوں تحمل مزاج ہا۔ دُنیا ءچ اُوں جِیہا حلیم بِیا کوئی نہ ہا۔ 4اچانک رب العالمین مُوسیٰ، ہارُون تے مریم کُوں آکھیا، ”تُساں ترِیہے اِجتماع آلے تمبُو دے کولھ آؤ۔“

ترِیہے اُتھاں پُجے 5تاں رب العالمین بدّل دے تھمبے ءچ لہہ تے اِجتماع آلے تمبُو دے در تے آیا۔ اُوں ہارُون تے مریم کُوں سڈیا تاں ڈوہائیں کولھ آئے۔ 6اُوں آکھیا، ”میڈی گالھ سُنڑو،

جِیں ویلے تُہاڈے وچال نبی ہوندے

مَیں خود کُوں رویا ءچ اُوندے اُتے ظاہر کریندا ہاں۔

مَیں رب العالمین خواب ءچ اُوندے نال الویندا ہاں۔

7پر میڈے خادم مُوسیٰ دی گالھ کُجھ بئی ہے۔

او میڈے سارے لوکاں ءچوں دیانت دار ہے۔

8مَیں اُوندے نال آمنڑے سامنڑے الویندا ہاں

پہیلیاں ءچ نئیں بلکہ صاف صاف الویندا ہاں۔

اُونکُوں مَیں رب العالمین دا دیدار وی نصیب تھیندے،

تاں وَل تُہاکُوں میڈے خادم مُوسیٰ دے خلاف

الویندے ہوئے ڈر کیوں نہ لگیا؟“

9اُنہاں اُتے رب العالمین دا غضب بھڑکیا تے او چلیا گِیا۔ 10جِیں ویلے بدّل دا تھمبا تمبُو تُوں دُور تھیّا تاں مریم دے چم اُتے کوڑھ نِکل آیا تے او برف آلی کار چِٹا تھی گِیا ہا۔ ہارُون اُوں دِر مُنہ کیتا تے اُوندی حالت ڈِٹھی 11تاں مُوسیٰ کُوں آکھیا، ”میڈے مالک، مہربانی کر تے ساکُوں اِیں گُناہ دی سزا نہ ڈیؤ جیہڑا ساڈی حماقت پارُوں تھی گئے۔ 12مریم کُوں اِیں حالت ءچ نہ چھوڑو۔ او تاں اُوں مرے ہوئے بال آلی کار ہے جِیندا جِسم جماندرُو ادھا گلیا ہویا ہوندے۔“

13وَل مُوسیٰ رب العالمین کُوں فریاد کر تے آکھیا، ”اے خُدا! مہربانی کر تے اُونکُوں شِفا ڈے۔“

14رب العالمین ولدے ءچ مُوسیٰ کُوں آکھیا، ”جیکر مریم دا پِیُو سزا ءچ اُوندے مُنہ اُتے تُھک ڈیندا تاں کیا او ہِک ہفتے تئیں شرمندہ نہ راہندی؟ اِیں کیتے اُونکُوں ہِک ہفتے تئیں ڈیرے دے باہر بند کر تے رکھ۔ اِیندے بعد اُونکُوں واپس گِھن تے آیا وَنج سگدے۔“

15اِیں کیتے مریم کُوں ہِک ہفتے تئیں ڈیرے دے باہر بند رکھیا گِیا۔ لوک اُوں ویلے تئیں سفر تے روانہ نہ تھئے جِیں ویلے تئیں اُونکُوں واپس نہ گِھن تے آیا گِیا۔ 16جِیں ویلے او واپس آئی تاں بنی اِسرائیل حصیرات تُوں ٹُر تے فاران دے بیابان ءچ پُج تے ڈیرے لائے۔