گِنتی 15

قُربانیاں پیش کرݨ دا طریقہ

1رب العالمین مُوسیٰ کُوں آکھیا، 2”بنی اِسرائیل کُوں ڈسا جو جِیں ویلے تُساں اُوں مُلک ءچ وڑسو جیہڑا مَیں تُہاکُوں ڈیساں 3تے تُساں ساڑے ونجنڑ آلے نذرانے جِنہاں دی خوشبو مَیں رب العالمین کُوں پسند ہے پیش کریسو، یعنی آپنڑیاں گانواں، ڈانداں، بھیڈاں یا بکریاں ءچوں ساڑے ونجنڑ آلیاں قُربانیاں، مَنت دیاں قُربانیاں، خوشی نال یا مقررہ عیداں تے پیش کرݨ آلیاں قُربانیاں، 4تاں اِیندے نال رب العالمین کُوں غلے دے نذرانے دے طور تے ڈیڈھ کلو بہترین میدہ وی جیندے ءچ ہِک لِیٹر زیتون دا تیل رَلایا گِیا ہووے، پیش کرائے۔

5ہر لیلے کُوں پیش کریندے ویلے ہِک لِیٹر انگُور دا رَس وی وِیٹے ونجنڑ آلی نذر دے طور تے پیش کرائے۔ 6جڈاں چھترا پیش کرائے تاں ترے کلو میدہ وی جیندے ءچ سوا لِیٹر تیل رَلایا گِیا ہووے، غلے دے نذرانے دے طور تے پیش کرائے۔ 7سوا لِیٹر انگُور دا رَس وی وِیٹے ونجنڑ آلی نذر دے طور تے پیش کیتا ونجے۔ اِیہو جیہی قُربانی دی خوشبو رب العالمین کُوں پسند ہے۔

8جیکر رب العالمین کُوں ساڑے ونجنڑ آلی قُربانی، مَنت دی قُربانی یا سلامتی دی قُربانی دے طور تے جوان ڈاند پیش کرو 9تاں اُوندے نال ساڈھے چار کلو بہترین میدہ وی جیندے ءچ ڈُو لِیٹر تیل رَلایا گِیا ہووے، غلے دے نذرانے دے طور تے پیش کرائے۔ 10ڈُو لِیٹر انگُور دا رَس وی وِیٹے ونجنڑ آلی نذر دے طور تے پیش کیتا ونجے۔ ایہ ساڑے ونجنڑ آلے نذرانے دی خوشبو رب العالمین کُوں پسند ہے۔

11لازم ہے جو ہر ڈاند، چھترے، بھیڈ دے لیلے یا بکری دے لیلے کُوں اِینویں ای پیش کیتا ونجے۔ 12جِتنے جانور پیش کرو، ہر ہِک نال اِینویں ای کرائے۔ 13لازم ہے جو بنی اِسرائیل دا ہر بندہ ساڑے ونجنڑ آلے نذرانے جِنہاں دی خوشبو رب العالمین کُوں پسند ہے، پیش کریندے ویلے اِینویں ای کرے۔ 14تے تُہاڈے وچال عارضی یا مُستقل طور تے راہوݨ آلے پردیسی وی اِنہاں اصُولاں دے مطابق آپنڑے نذرانے پیش کرݨ جِنہاں دی خوشبو رب العالمین کُوں پسند ہے۔ 15یکی جماعت تے تُہاڈے ءچ راہنڑ آلے لوکاں کیتے ہِکو جِیہیاں پابندیاں ہِن، کیوں جو رب العالمین دی نظر ءچ پردیسی تُہاڈے برابر ہے۔ ایہ نسل در نسل تُہاڈے کیتے ہِک دائمی شرع ہے۔ 16تُہاڈے تے تُہاڈے نال راہوݨ آلے پردیسی کیتے ہِکو شریعت تے ہِکو قانُون ہے۔“

فصل کیتے شُکرگزاری دی قُربانی

17رب العالمین مُوسیٰ کُوں آکھیا، 18”بنی اِسرائیل کُوں ڈسا جو جِیں ویلے تُساں اُوں مُلک ءچ وڑسو جیندے ءچ مَیں تُہاکُوں گِھن تے ویندا پِیا ہاں 19تے اُتھاں دی پیداوار کھاسو تاں پہلے اُوندا ہِک حصہ نذرانے دے طور تے رب العالمین کُوں پیش کرائے۔ 20فصل دے پہلے باریک اٹّے ءچوں میڈے کیتے ہِک روٹی بنڑا تے اُونکُوں نذرانے دے طور تے اِینویں پیش کرائے جِینویں گہاوݨ آلی جاہ تُوں رب العالمین کیتے قُربانی پیش کریندے ہیوے۔ 21تُساں آپنڑی فصل دے پہلے باریک اٹّے ءچوں ایہ نذرانہ نسل در نسل پیش کرائے۔

انجانڑے ءچ کیتے ہوئے گُناہاں کیتے قُربانیاں

22تھی سگدے جو تُہاڈے تُوں غیر اِرادی طور تے کوئی غلطی تھی گئی ہووے تے تُساں اُنہاں حُکماں اُتے عمل نئیں کیتا جیہڑے مَیں رب العالمین مُوسیٰ کُوں ڈِتے ہِن۔ 23یعنی جیہڑے ڈینہہ تُوں رب العالمین حُکم ڈیوݨ شروع کیتا، اُوں ڈینہہ تُوں گِھن تے اگُوں تئیں جیہڑے حُکم اُوں مُوسیٰ دی معرفت تُہاکُوں نسل در نسل ڈِتے ہِن۔ 24جیکر ایہ غلطی غیر اِرادی طور تے تھئی ہئی تے جماعت اِیں گالھ تُوں انجاݨ ہئی تاں یکی جماعت ہِک جوان ڈاند ساڑے ونجنڑ آلی قُربانی دے طور تے پیش کرے جیندی خوشبو مَیں رب العالمین کُوں پسند ہے تے اُوندے نال جماعت مقررہ غلے دے نذرانے تے وِیٹے ونجنڑ آلیاں نذراں وی پیش کرے۔ اِیں تُوں ہٹ تے او گُناہ تُوں پاک کرݨ آلی قُربانی کیتے ہِک بکرا وی پیش کرے۔ 25کاہِن بنی اِسرائیل دی یکی جماعت دا کفارہ ڈیوے تاں اُنہاں کُوں معافی مِلسی کیوں جو اُنہاں دا گُناہ غیر اِرادی ہا تے اُنہاں رب العالمین کُوں ساڑے ونجنڑ آلے نذرانے تے گُناہ تُوں پاک کرݨ آلی قُربانی پیش کیتی ہے۔ 26بنی اِسرائیل دی یکی جماعت کُوں تے نال راہوݨ آلے پردیسیاں کُوں معافی مِلسی کیوں جو ایہ غیر اِرادی گُناہ اُنہاں سبھ دا ہا۔

27جیکر غیر اِرادی گُناہ ہِک بندے تُوں تھئے تاں او گُناہ تُوں پاک کرݨ آلی قُربانی کیتے ہِک سال دی بکری پیش کرے۔ 28کاہِن رب العالمین دے حضُور اُوں بندے دا کفارہ ڈیوے۔ جِیں ویلے کفارہ ڈے ڈِتا ویسی تاں اُونکُوں معافی مِل ویسی۔ 29جیہڑے بندے تُوں غیر اِرادی طور تے گُناہ تھیّا ہووے، اُوندے کیتے اِیہو شرع ہے بھانویں او دیسی ہووے یا پردیسی۔

جاݨ بُجھ تے کیتے گئے گُناہاں دی سزا

30پر جیکر کوئی دیسی یا پردیسی جاݨ بُجھ تے گُناہ کریندے تاں او رب العالمین دی بے عزتی کریندے۔ اِیں کیتے لازم ہے جو اُونکُوں بنی اِسرائیل ءچوں کڈھ ڈِتا ونجے۔ 31اُوں رب العالمین دے کلام کُوں حقیر جاݨ تے اُوندے حُکم تروڑے ہِن۔ اِیں کیتے اُونکُوں ضرور جماعت ءچوں کڈھ ڈِتا ونجے۔ او آپنڑے قصُور دا ذمہ دار ہے۔“

32جِیں ویلے بنی اِسرائیل بیابان ءچ راہندے ہَن تاں ہِک سبت دی ڈینہوار اُنہاں کُوں ہِک بندہ لکڑیاں کٹھیاں کریندا ہویا مِلیا۔ 33جِنہاں اُونکُوں پکڑیا او اُونکُوں مُوسیٰ، ہارُون تے بنی اِسرائیل دی یکی جماعت دے کولھ گِھن آئے۔ 34اُنہاں اِیں بندے کُوں گرفتار کر تے رکھ گِھدا کیوں جو اُنہاں کُوں پتہ نہ ہا جو اِیندے نال کیا کیتا ونجے۔

35وَل رب العالمین مُوسیٰ کُوں آکھیا، ”اِیں بندے کُوں ضرور موت دی سزا ڈِتی ونجے۔ یکی جماعت اُونکُوں ڈیرے تُوں باہر گِھن وَنج تے سنگسار کرے۔“ 36جماعت اُونکُوں ڈیرے تُوں باہر گِھن وَنج تے سنگسار کر ڈِتا جِینویں رب العالمین مُوسیٰ کُوں حُکم ڈِتا ہا۔

حُکم یاد ڈیواوݨ آلے پُھمنڑیں

37رب العالمین مُوسیٰ کُوں آکھیا، 38”بنی اِسرائیل کُوں ڈسا جو تُساں تے تُہاڈے بعد آوݨ آلیاں نسلاں آپنڑے لباس دے کناریاں اُتے پُھمنڑ لاوݨ۔ ہر پُھمنڑ ہِک نیلی ڈوری نال لباس دے کنارے اُتے لگیا ہووے۔ 39اِنہاں پُھمنڑاں کُوں ڈیکھ تے تُہاکُوں رب العالمین دے حُکم یاد راہسن تے تُساں اُنہاں اُتے عمل کریسو۔ وَل تُساں آپنڑے دِلاں تے اکھیں دے غلط خواہشاں دے پِچُھوں پے تے میڈے نال بے وفائی کرݨ تُوں باز راہسو۔ 40بلکہ تُساں میڈے حُکماں کُوں یاد کر تے اُنہاں اُتے عمل کریسو تے آپنڑے خُدا کیتے مخصوص تے مُقدّس راہسو۔ 41مَیں رب العالمین تُہاڈا خُدا ہاں جیہڑا تُہاکُوں مِصر ءچوں کڈھ تے گِھن آیا ہاں تاں جو تُہاڈا خُدا ہوواں1۔ مَیں رب العالمین تُہاڈا خُدا ہاں۔“