گِنتی 9

بیابان ءچ فسح دی عید

1بنی اِسرائیل کُوں مِصر ءچوں نِکلے ہِک سال تھی گِیا ہا۔ ڈُوجھے سال دے پہلے مہینے ءچ رب العالمین سِینا دے بیابان ءچ مُوسیٰ کُوں آکھیا،

2”بنی اِسرائیل مقررہ ویلے تے فسح دی عید مناوݨ 3یعنی اِیں مہینے دے چوڈھویں ڈینہہ سِجھ لہوݨ دے فوراً بعد اُونکُوں یکے رسم و رواج دے مطابق مناوݨ۔“ 4وَل مُوسیٰ بنی اِسرائیل کُوں آکھیا جو او فسح دی عید مناوݨ۔ 5تے اُنہاں اِینویں ای کیتا۔ اُنہاں فسح دی عید کُوں پہلے مہینے دے چوڈھویں ڈینہہ سِجھ لہوݨ دے فوراً بعد سِینا دے بیابان ءچ منایا۔ اُنہاں سبھ کُجھ اُونویں ای کیتا جِینویں رب العالمین مُوسیٰ کُوں حُکم ڈِتا ہا۔

6پر کُجھ بندے ناپاک ہَن کیوں جو اُنہاں لاش کُوں ہتھ لایا ہا، اِیں کیتے او اُوں ڈینہوار فسح دی عید نہ منا سگے۔ او مُوسیٰ تے ہارُون دے کولھ آ تے 7آکھنڑ لگے، ”اساں لاش کُوں ہتھ لائے اِیں کیتے ناپاک تھی گئے ہیں پر اِیں پارُوں ساکُوں باقی بنی اِسرائیل دے نال مُقررہ ویلے تے رب العالمین دی قُربانی پیش کرݨ تُوں کیوں روکیا ویندے؟“

8مُوسیٰ جواب ڈِتا، ”کھڑو، مَیں پتہ کریندا ہاں جو رب العالمین تُہاڈے بارے ءچ کیا حُکم ڈیندے۔“

9رب العالمین مُوسیٰ کُوں آکھیا، 10”بنی اِسرائیل کُوں ڈسا جو جیکر تُہاڈے ءچوں یا تُہاڈی اولاد ءچوں کوئی لاش کُوں ہتھ لاوݨ پارُوں ناپاک تھی ونجے یا دُور دا سفر کریندا پِیا ہووے، وَل وی او میڈے کیتے فسح دی عید منا سگدے، 11پر او اگلے مہینے دی چوڈھویں تاریخ کُوں عید مناوے۔ او لیلے دے نال بے خمیری روٹی تے کوڑا ساگ پات کھاوے۔ 12کھانڑے ءچوں کُجھ وی ولدی سویل تئیں باقی نہ راہوے تے فسح دے جانور دی کوئی ہڈی نہ تُڑائے بلکہ فسح دی عید مناوݨ آلیاں یکیاں ہدایتاں اُتے عمل کرائے۔ 13پر جیہڑا پاک صاف ہووے تے سفر وی نہ کریندا ہووے، تے وَل وی فسح دی عید نہ مناوے، اُونکُوں اُوندے لوکاں ءچوں کڈھ ڈِتا ونجے کیوں جو اُوں مقررہ ویلے تے رب العالمین دے حضُور قُربانی پیش نئیں کیتی۔ اُوں بندے کُوں آپنڑے گُناہ دی سزا بُھگتنڑی پوسی۔ 14جیکر کوئی پردیسی تُہاڈے ءچ راہندا ہووے تے رب العالمین دے ناں تے فسح دی عید مناونڑاں چاہوے تاں او یکیاں ہدایتاں دے مطابق عید مناوے۔ دیسی تے پردیسی کیتے فسح دی عید مناوݨ دا ہِکو قانُون ہے۔“

اِجتماع آلے تمبُو اُتے بدّل دا ستون

15جیہڑی ڈینہوار مُقدّس تمبُو یعنی عہد دے صندوق آلے تمبُو کُوں کھڑا کیتا گِیا، اُوں ڈینہوار بدّل آ تے اُوندے اُتے چھا گِیا۔ رات ویلے بدّل بھاہ دی صورت ءچ نظر آیا تے سویل تئیں اِینویں ای ریہا۔ 16اِیندے بعد اِینویں ای تھیندا ریہا جو ڈینہہ ویلے بدّل اُونکُوں ڈھکی رکھیندا تے رات ویلے بھاہ دی صورت ءچ نظر آندا ہا۔ 17جِیں ویلے بدّل مُقدّس تمبُو تُوں اُتاں تھی ویندا تاں بنی اِسرائیل ٹُر پوندے تے جِتھاں وی بدّل کھڑ ویندا اُتھاں بنی اِسرائیل ڈیرے لا گِھندے۔ 18بنی اِسرائیل رب العالمین دے حُکم نال ٹُردے تے اُوندے حُکم نال ای ڈیرے لیندے، تے جئیں تئیں بدّل مُقدّس تمبُو اُتے کھڑا راہندا، اُوں ویلے تئیں او اُتھائیں رُکے راہندے۔ 19تے جِیں ویلے بدّل بہُوں ڈینہاں تئیں مُقدّس تمبُو اُتے کھڑا راہندا تاں بنی اِسرائیل رب العالمین دا حُکم مَن تے اگُوں نہ ٹُردے ہَن۔

20کڈھائیں کڈھائیں بدّل کُجھ ڈینہاں کیتے مُقدّس تمبُو اُتے راہندا تے او رب العالمین دے حُکم دے مطابق رُکے راہندے تے رب العالمین دے حُکم دے مطابق ای اگُوں ٹُردے۔ 21کڈھائیں کڈھائیں بدّل صرف شام تُوں گِھن تے سویل تئیں تمبُو اُتے راہندا تے جِیں ویلے او سویل کُوں اُتاں تھی ویندا تاں بنی اِسرائیل ٹُر پوندے۔ بھانویں ڈینہہ ہووے یا رات، جِیں ویلے وی بدّل اُٹھدا او ٹُر پوندے۔ 22تے بھانویں بدّل ڈُو ڈینہہ، ہِک مہینہ، ہِک سال یا اِیں تُوں وی زیادہ عرصے تئیں مُقدّس تمبُو اُتے رُکیا راہندا، بنی اِسرائیل آپنڑے ڈیرے ءچ راہندے تے روانہ نہ تھیندے ہَن۔ پر جِیں ویلے او اُتاں تھی ویندا تاں بنی اِسرائیل ٹُر پوندے ہَن۔ 23او رب العالمین دے حُکم اُتے ای ڈیرے لیندے تے اُوندے حُکم اُتے ای ٹُر پوندے ہَن۔ او اُونویں ای کریندے ہَن جِینویں رب العالمین مُوسیٰ دی معرفت اُنہاں کُوں حُکم ڈیندا ہا۔